26
Pɔlu u tii tubusiɑ
Agiripɑn wuswɑɑɔ
1 Agiripɑ u Pɔlu sɔ̃ɔwɑ u ɑyeru mɔ u kɑ win gɑri tubusiɑ.
Yerɑ Pɔlu u tɔmbu mɑrisiɑ kɑ nɔmu, mɑ u tii tubusiɑ u nɛɛ, 2 sinɑ boko Agiripɑ, nɛn nukurɑ dorɑ gisɔ yèn sɔ̃ kon kpĩ n tii tubusiɑ wunɛn wuswɑɑɔ gɑri yi kpuro sɔɔ yi Yuubɑ bɑ mɑn mɑnimɔ. 3 Domi nɑ yɛ̃ mɑ ɑ Yuubɑn komɑru yɛ̃ sɑ̃ɑ sɑ̃ɑ kɑ ben sikirinɔsun gɑri. Ǹ n mɛn nɑ, nɑ nun kɑnɑmɔ ɑ tɛmɑnɔ ɑ nɛn gɑri swɑɑ dɑki.
4 Yuubɑ kpuro bɑ nɛn wɑ̃ɑru yɛ̃ sɑɑ nɛn ɑluwɑɑsirun di. Bɑ yɛ̃ mɑ Yerusɑlɛmuɔrɑ nɑ biru di nɛn bweseru sɔɔ. 5 Bɑ mɑn yɛ̃ n tɛ. Yen sɔ̃, bɑ̀ n kĩ bɑ koo kpĩ bu mɑn seedɑ diiyɑ mɑ Fɑlisibɑn swɑɑ sɔɔrɑ nɑ kpɛ̃ɑ, ye yɑ Yuubɑn sɑ̃ɑrun komɑru nɛni n kpuro kere. 6 Mɑ tɛ̃, bɑ mɑn siri mini yèn sɔ̃ nɑ nɔɔ mwɛɛ te yĩiyɔ te Gusunɔ u bɛsɛn sikɑdobɑ kuɑ. 7 Nɔɔ mwɛɛ teyɑ bɛsɛn bwesenu wɔkurɑ yiru nu kɑ Gusunɔ sɑ̃ɑmɔ gem kɑ tiɑ bururu kɑ yokɑ. Sinɑ boko, yĩiyɔ bin sɔ̃nɑ Yuubɑ bɑ mɑn mɛm mɑnimɔ. 8 Mbɑn sɔ̃nɑ bɛɛ Yuubɑ i ǹ kpɛ̃ i nɑɑnɛ doke mɑ Gusunɔ u gɔribu seeyɑmɔ.
9 Nɛn tii nɑ rɑɑ tɑmɑɑ n weenɛ n Yesu Nɑsɑrɛtigiin yĩsiru sɑnku kɑ swɑɑ dɑbinu. 10 Mɛyɑ nɑ kuɑ Yerusɑlɛmuɔ. Nɑ woodɑ mwɑ sɑɑ yɑ̃ku kowo tɔnwerobun min di, mɑ nɑ nɑɑnɛ dokeobu dɑbiru doke pirisɔm sɔɔ. Bɑ̀ n mɑɑ kĩ bu ben gɑbu go nɛn nɔmu gɑ rɑ n wɑ̃ɑ sɔɔ. 11 Nɔn dɑbirɑ nɑ rɑ bu so Yuubɑn mɛnnɔ yenu kpuro sɔɔ, kpɑ n bu tilɑsi ko bu kɑ Gusunɔ gɑri kɑm gerusi. Nɑ kɑ bu mɔru bɛsirɑ too sere nɑ mɑm bu nɑɑ swĩi wuu tukusɔ.
Pɔlu u win gɔ̃ru gɔsiɑbun gɑri mɔ̀
12 Mɑ Pɔlu mɑɑ nɛɛ, yɑ̃ku kowo tɔnwerobɑ mɑn yɔllɑɑ kuɑ nɑ dɔɔ Dɑmɑsiɔ kɑ ben yiiko. 13 Sinɑ boko, sɔ̃ɔ wii wɔllun sɑkɑ swɑɑ ye sɔɔ, nɑ yɑm bururɑm wɑ mu nɑ wɔllun di mu sun wukiri nɛ kɑ be bɑ mɑn yɔ̃siriɔ. Yɑm bururɑm mɛ, mu sɔ̃ɔgim bɑllim kere. 14 Bɛsɛ kpuro sɑ wɔrumɑ temɔ, mɑ nɑ nɔɔ gɑgu nuɑ, gɑ kɑ mɑn gɑri mɔ̀ kɑ Heberum gɑ nɛɛ, Sɔɔlu Sɔɔlu, mbɑn sɔ̃nɑ ɑ mɑn nɔni sɔ̃ɔmɔ. Mɛɛrɑwɑ ɑ tii mɔ̀ nge nɑɑ kinɛ te tɑ ten yinnin dɛki nɔɔ sɛmgiɑ tɛsumɔ. 15 Mɑ nɑ bikiɑ nɑ nɛɛ, wunɑ were Yinni. Mɑ Yinni nɛɛ, nɛnɑ Yesu wi ɑ nɔni sɔ̃ɔmɔ. 16 Tɛ̃, ɑ seewo ɑ yɔ̃rɑ. Nɑ nun kuremɑwɑ n kɑ nun gɔsi ɑ ko nɛn sɔmɔ, kpɑ ɑ kɑ gɑ̃ɑ nin seedɑ di ni ɑ wɑ kɔ kɑ mɑɑ ni kɑɑ wɑ sɑnɑm mɛ kon kpɑm nun kure. 17 Kon nun yɑkiɑ sɑɑ Isirelibɑn nɔmun di, kɑ mɑɑ tɔn tukobun min di bèn mi kon nun gɔri, 18 ɑ kɑ ben nɔni wukiɑ bu kɑ gɔsirɑ yɑm wɔ̃kurun di bu du yɑm bururɑm sɔɔ, kpɑ bu gɔsirɑ Setɑm dɑm di bu nɑ Gusunɔn mi, kpɑ bu ben torɑnun suuru wɑ bu ɑyeru tubi di kɑ be sɑnnu be Gusunɔ u gɔsɑ u kuɑ wigibu yèn sɔ̃ bɑ mɑn nɑɑnɛ doke.
Pɔlu u win sɔmburun gɑri mɔ̀
19 Pɔlu mɑɑ nɛɛ, sinɑ boko Agiripɑ, yen sɔ̃nɑ nɑ wɔllun kɑ̃si te mɛm nɔɔwɑ. 20 Nɑ wɑɑsu kuɑ, gbiikɑɑ Dɑmɑsiɔ kɑ mɑɑ Yerusɑlɛmuɔ, yen biru Yudeɑn tem kpuro sɔɔ, kɑ mɑɑ tɔn tukobun mi. Nɑ bu sɔ̃ɔwɑ bu ben gɔ̃ru gɔsio bu torɑnu deri bu wurɑ Gusunɔn mi, kpɑ bu gɔ̃ru gɔsiɑbun kookoosu sɔ̃ɔsi. 21 Yenin sɑɑbuwɑ Yuu gɑbɑ mɑn mwɑ sɑ̃ɑ yerɔ bɑ kɑ swɑɑ kɑsu bu mɑn go. 22 Adɑmɑ sere kɑ gisɔn gisɔ Gusunɔ u mɑn kɔ̃su, nɑ kɑ wɑ̃ɑ nɑ seedɑ dimɔ tɔmbu kpuron wuswɑɑɔ, bɑkɑ kɑ buu. Nɑ ǹ gɑ̃ɑnu gerumɔ, mɑ n kun mɔ ye Gusunɔn sɔmɔbu kɑ Mɔwisi bɑ geruɑ ben tireru sɔɔ bɑ nɛɛ yɑ koo koorɑ. 23 Yeyɑ, Kirisi u ǹ koo ko u kun nɔni sɔ̃ɔre, kpɑ u n sɑ̃ɑ gbiikoo wi u koo se gɔrin di u kɑ yɑm bururɑm gɑri kpɑrɑ Yuubɑn mi kɑ mɑɑ tɔn tukobun mi.
Pɔlu u kĩ Agiripɑ u ko Kirisigii
24 Sɑnɑm mɛ Pɔlu u tii tubusiɑ mɛsum, Fesitu u gbɑ̃rɑ u nɛɛ, Pɔlu, ɑ wiirɑmɔwɑ! Wunɛn keu bɑkɑ yɑ nun wiiro kuɑ.
25 Pɔlu nɛɛ, Yinni Fesitu nɑ ǹ wiirɑmɔ. Gɑri yi nɑ gerumɔ yi sɑ̃ɑwɑ gem, yi mɑɑ swɑɑ swĩi. 26 Domi sinɑ boko Agiripɑ u gɑri yin ɑsɑnsi yɛ̃. Nɑ mɑɑ kɑ nùn gɑri mɔ̀ kɑ toro sindu yèn sɔ̃ nɑ yɛ̃ mɑ yen gɛɛ kun nùn berue, domi gɑri yi, yi ǹ koore gbɛnum. 27 Sinɑ boko Agiripɑ, ɑ Gusunɔn sɔmɔbun gɑri nɑɑnɛ doke ro? Nɑ yɛ̃ sɑ̃ɑ sɑ̃ɑ mɑ ɑ yi nɑɑnɛ doke.
28 Agiripɑ u Pɔlu sɔ̃ɔwɑ u nɛɛ, ǹ n sosi fiiko kɑɑ n kĩ ɑ de n ko Kirisigii.
29 Pɔlu u nɛɛ, bɑɑ ǹ n dommɑn nɑ, Gusunɔ u de ɑ ko Kirisigii n kun mɑm wunɛ tɔnɑ, n koorɑ mɛ kɑ be bɑ nɛn gɑri nɔɔmɔ mini kpuro gisɔ, kpɑ i n sɑ̃ɑ nge nɛ, yɔni yi bɑ mɑn doke bɑɑsi.
30 Sɑnɑm mɛyɑ sinɑ boko kɑ tem yɛ̃ro kɑ Berenisi, kɑ be bɑ sɔ̃ mi, bɑ seewɑ. 31 Ye bɑ yɑriɔ, bɑ sɔ̃ɔnɑmɔ bɑ mɔ̀, durɔ wi, u ǹ gɑ̃ɑnu kue ni nu kɑ gɔɔ weenɛ, bɑɑ mɑm pirisɔm.
32 Mɑ Agiripɑ u Fesitu sɔ̃ɔwɑ u nɛɛ, durɔ wi, ù kun win siribu tem yɛ̃ro nɔmu sɔndie, sɑ ko rɑɑ kpĩ su nùn kɑrɑ.