25
Pɔlu u kĩ u dɑ tem yɛ̃ron mi
1 Ye Fesitu u tunumɑ Sesɑreɔ u kɑ sɔmburu suɑ, yen sɔ̃ɔ nnɛse u Yerusɑlɛmu dɑ. 2 Miyɑ yɑ̃ku kowo tɔnwerobu kɑ Yuubɑn guro gurobu bɑ Pɔlu durum mɑni, bɑ mɑɑ Fesitu suuru kɑnɑ 3 u kɑ Pɔlu nɑ Yerusɑlɛmuɔ, domi bɑ gɔ̃ru doke bu nùn go swɑɑɔ. 4 Fesitu u bu sɔ̃ɔwɑ u nɛɛ, Pɔlu wɑ̃ɑ pirisɔm sɔɔ Sesɑreɔ, nɛn tii nɑ ǹ mɑɑ tɛɛmɔ n kɑ wurɑ mi. 5 Yen sɔ̃, i de su dɑ mi kɑ bɛɛn wirugibu gɑbu sɑnnu kpɑ bu gere torɑ te u kuɑ.
6 Fesitu kun sɔ̃ɔ nɔɔbɑ itɑ ǹ kun mɛ sɔ̃ɔ wɔkuru kere ben mi, u kɑ wurɑ Sesɑreɔ. Ye u turɑ mi, sisiru u dɑ u sinɑ siri yerɔ mɑ u woodɑ wɛ̃ bu kɑ Pɔlu nɑ win wuswɑɑɔ. 7 Ye Pɔlu u tunumɑ, Yuu be bɑ nɑ Yerusɑlɛmun di bɑ nùn suunu bure mɑ bɑ nùn kɔ̃sɑn tɑɑrɛ mɑnimɔ yèn seedɑ bɑ ǹ mɔ. 8 Adɑmɑ Pɔlu u kɑ tii yinɑ u nɛɛ, nɑ ǹ Yuubɑn woodɑ torɑri, ǹ kun mɛ sɑ̃ɑ yeru, ǹ kun mɛ Romun tem yɛ̃ro.
9 Fesitu wi, u kĩ u n bɛɛrɛ mɔ Yuubɑn mi, yerɑ u Pɔlu sɔ̃ɔwɑ u nɛɛ, ɑ kĩ ɑ dɑ Yerusɑlɛmuɔ bu nun siri gɑri yin sɔ̃ nɛn wuswɑɑɔ?
10 Pɔlu nɛɛ, ɑɑwo. Tem yɛ̃ron woodɑn siri yerɔwɑ nɑ yɔ̃, miyɑ n weenɛ bu mɑn siri. Nɑ ǹ Yuubɑ torɑri nge mɛ wunɛn tii ɑ yɛ̃ sɑ̃ɑ sɑ̃ɑ. 11 Nɑ̀ n woodɑ sɑrɑ, ǹ kun mɛ nɑ̀ n gɑ̃ɑnu gɑnu kuɑ ni nu kɑ gɔɔ weenɛ, nɑ ǹ yinɑmɔ bu mɑn go. Adɑmɑ mɛm mɛ bɑ mɑn mɑnimɔ sɔɔ, gem mù kun wɑ̃ɑ, goo sɑri wi u koo kpĩ u mɑn bu nɔmu sɔndiɑ. Yen sɔ̃, tɛ̃ nɑ kɑ nɛn siribu dɔɔwɑ tem yɛ̃ron mi.
12 Ye Fesitu u kɑ wigibu wesiɑnɑ u kpɑ, u Pɔlu sɔ̃ɔwɑ u nɛɛ, yèn sɔ̃ ɑ wunɛn siribu tem yɛ̃ro nɔmu sɔndiɑ, win miyɑ kɑɑ dɑ.
Bɑ kɑ Pɔlu dɑ Agiripɑ kɑ Berenisin wuswɑɑɔ
13 Sɔ̃ɔ mɛɛrun biru, sinɑ boko Agiripɑ kɑ win sesu Berenisi bɑ Sesɑre dɑ bu kɑ Fesitu tɔbiri. 14 Ye bɑ sɔ̃ɔ yiru mɔ̀ mi, Fesitu u sinɑ boko wi Pɔlun gɑri sɔ̃ɔwɑ u nɛɛ, durɔ goo wɑ̃ɑ pirisɔm sɔɔ wuu mi, wi Felisi u deri. 15 Sɑnɑm mɛ nɑ Yerusɑlɛmu dɑ, Yuubɑn yɑ̃ku kowo tɔnwerobu kɑ guro gurobu bɑ mɑn win torɑnu tubusiɑ. Mɑ bɑ mɑn bikiɑ n nùn tɑɑrɛ wɛ̃ bu go. 16 Adɑmɑ nɑ bu sɔ̃ɔwɑ Romugibu bɑ ku rɑ de bu goo go mɑ n kun mɔ bɑ yɛ̃ro siri. Bɑ rɑ dewɑ wi kɑ win tɑɑrɛ wɛ̃ɔbu bu gɑri ko nɔɔ kɑ nɔɔ. 17 Sɑnɑm mɛ be kpuro bɑ nɑ wuu mi, nɑ ǹ dirirɑ, ɑdɑmɑ yen sisirɑ nɑ bu sokusiɑ siri yerɔ, mɑ nɑ mɑɑ woodɑ wɛ̃ bu kɑ Pɔlu nɑ. 18 Win tɑɑrɛ wɛ̃ɔbu bɑ seewɑ, ɑdɑmɑ bɑ ǹ nùn gɑ̃ɑ kɔ̃sunun tɑɑrɛ wɛ̃ ni nɑ rɑɑ tɑmɑɑ. 19 Ben tiin sɑ̃ɑrun gɑriyɑ bɑ kɑ nùn sikirinɑmɔ, kɑ mɑɑ durɔ goon gɑri wi bɑ sokumɔ Yesu wi u gu. Adɑmɑ Pɔlu u gerumɔ kɑm kɑm durɔ wi, u wɑsi. 20 Nɑ biti kuɑ ɑmɔnɑ kon gɑri yin bweseru sirisinɑ. Yen sɔ̃nɑ nɑ Pɔlu bikiɑ ù n kĩ bu nùn gɑri yin siribu kuɑ Yerusɑlɛmuɔ. 21 Adɑmɑ u win siribu tem yɛ̃ro nɔmɑ sɔndiɑ. Yerɑ nɑ woodɑ wɛ̃ bu kpɑm nùn doke pirisɔm sɔɔ sere n kɑ nùn dɑɑsiɑ mi.
22 Agiripɑ u Fesitu sɔ̃ɔwɑ u nɛɛ, nɛn tii nɑ kĩ n durɔ win nɔɔn gɑri nɔ.
Fesitu nɛɛ, siɑ kɑɑ nɔ.
23 Yen sɔ̃nɑ sisiru Agiripɑ kɑ Berenisi bɑ tunumɑ siri yerɔ kɑ bɛɛrɛ bɑkɑ, mɑ tɑbu sinɑmbu kɑ wuun wirugibu bɑ bu swĩi. Mɑ Fesitu u woodɑ wɛ̃ bu kɑ Pɔlu nɑ. 24 Fesitu nɛɛ, sinɑ boko Agiripɑ kɑ bɛɛ kpuro be i wɑ̃ɑ mi kɑ bɛsɛ sɑnnu, durɔ wi wee, wìn gɑri Yuubɑ kpuro bɑ kɑ nɑ nɛn mi, be bɑ wɑ̃ɑ wuu mi kɑ be bɑ mɑɑ wɑ̃ɑ Yerusɑlɛmuɔ. Bɑ gbɑ̃sukumɔ bɑ mɔ̀, n ǹ weenɛ u n mɑɑ wɑ̃ɑ. 25 Nɛn tii nɑ ǹ gɑ̃ɑnu wɑ wi sɔɔ, ni nu kɑ gɔɔ weenɛ. Adɑmɑ yèn sɔ̃ win tii u win siribu tem yɛ̃ro nɔmu sɔndiɑ, nɑ gɔ̃ru doke n nùn dɑɑsiɑ win mi. 26 Kɑ mɛ, nɑ ǹ gɑ̃ɑnu wɑ ni kon nɛnusi win gɑri sɔɔ n kɑ nɛn yinni tireru kuɑ. Yen sɔ̃nɑ nɑ kɑ nùn nɑ bɛɛ kpuron wuswɑɑɔ, n mɑm nɛɛre wunɛ sinɑ boko Agiripɑ, i kɑ win gɑri wɛ̃ɛri kpɑ n kɑ wɑ ye kon yore. 27 Domi n ǹ mɑn dee dee sɑ̃ɑwɛ n kɑ pirisɔm goo mɔrisiɑ kpɑ nɑ kun geruɑ mbɑn sɔ̃nɑ.