24
Yuubɑ bɑ Pɔlu gɑri mɑni
1 Sɔ̃ɔ nɔɔbun biru, Anɑniɑ yɑ̃ku kowo tɔnwero u dɑ Sesɑreɔ wi kɑ guro gurobu gɑbu sɑnnu kɑ sere woodɑ yɛ̃ro goo wi bɑ mɔ̀ Terituru. Bɑ dɑ tem yɛ̃ron mi, mɑ bɑ Pɔlun tɑɑrɛ gerumɔ. 2 Bɑ Pɔlu sokɑ, mɑ Terituru u nùn gɑri mɑnibu wɔri u nɛɛ, Felisi bɛɛrɛgii, sɑ ɑlɑfiɑ mɔ gem gem kɑ wunɛn bɑrukɑ. Wunɛn yɑm wɑɑ geebu bu derɑ ɑ woodɑ dɑbiru kɔsɑ bɛsɛn tem ɑrufɑɑnin sɔ̃. 3 Sɑ ye kpuro wurɑ bɑɑmɑ kpuro sɑɑ bɑɑyere sɔɔ, kɑ siɑrɑbu. 4 Adɑmɑ nɑ ǹ kĩ n wunɛn sɑɑ kpuro di. Yen sɔ̃, nɑ nun kɑnɑmɔ ɑ kɑ sun tɛmɑnɔ gɑri piiko ye sɑ mɔ sɔɔ. 5 Sɑ wɑ mɑ durɔ wini nɑɑnɑɑnugiiwɑ, u rɑ sɑnnɔsu seeyewɑ Yuubɑn suunu sɔɔ hɑnduniɑ kpuro sɔɔ. U mɑɑ sɑ̃ɑ wuuru gɑrun wirugibun turo te bɑ rɑ soku Nɑsɑrenɛgibu\f |b24:5 Nɑsɑrenɛgibu|d - Tɔn be bɑ nɑ Nɑsɑrɛtin di. Bɑ mɑɑ nɑɑnɛ dokeo gbiikobu sokɑ mɛ yèn sɔ̃ Yesu u nɑ Nɑsɑrɛtin di.\F. 6 U mɑm swɑɑ kɑsu u kɑ sɑ̃ɑ yeru disi doke. Sɑnɑm mɛyɑ sɑ wi mwɑ. ((Sɑ rɑɑ kĩ su nùn siri kɑ bɛsɛn woodɑ, 7 ɑdɑmɑ tɑbu sunɔ Lisiɑsi u nɑ, u sun nùn wɔrɑri kɑ dɑm. 8 Mɑ u woodɑ wɛ̃ win tɑɑrɛ wɛ̃ɔbu bu nɑ wunɛn wuswɑɑɔ.)) Wunɛn tii ɑ̀ n nùn gɑri bikiɑ, kɑɑ kpĩ ɑ gɑ̃ɑ ni kpuron gem wɑ nì sɔɔ sɑ nùn tɑɑrɛ wɛ̃ɛmɔ.
9 Mɑ Yuubɑ bɑ gɑri yi kpuro wurɑ bɑ nɛɛ, geemɑ.
Pɔlu u win gɑri tubusiɑ Felisin wuswɑɑɔ
10 Yerɑ tem yɛ̃ro u Pɔlu gɑri wɛ̃ kɑ yĩreru, mɑ Pɔlu seewɑ u nɛɛ, nɑ yɛ̃ mɑ ɑ sɑ̃ɑ siri kowo tem mɛ sɔɔ sɑɑ wɔ̃ɔ dɑbirun di. Yen sɔ̃, kon gɑri gere n kɑ tii yinɑ kɑ toro sindu. 11 À n bikiɑ bɑ koo nun sɔ̃, n ǹ mɔ n sɔ̃ɔ wɔkurɑ yiru kere ye nɑ kɑ Yerusɑlɛmu dɑ n sɑ̃ɑru ko mi. 12 Bɑ ǹ mɑn wɑ nɑ kɑ goo sikirinɑmɔ ǹ kun mɛ nɑ tɔmbu sɑnnɔ nɔɔ kuurimɔ sɑ̃ɑ yerɔ ǹ kun mɛ ben mɛnnɔ yeru sɔɔ, ǹ kun mɛ wuu suunu sɔɔ. 13 Gɑri yi bɑ mɑn mɑnimɔ tɛ̃, bɑ ǹ mɑɑ yin seedɑ gɑɑ mɔ. 14 Adɑmɑ gɑ̃ɑ teenɑ nɑ wurɑ wunɛn wuswɑɑɔ, nɑ Gusunɔ bɛsɛn sikɑdobɑn Yinni sɑ̃ɑmɔ kɑ swɑɑ ye beni bɑ sokumɔ weesugiɑ. Nɑ mɑɑ Mɔwisin woodɑ kpuro nɑɑnɛ doke kɑ mɑɑ Gusunɔn sɔmɔbun tirenu. 15 Nɑ yĩiyɔ bini mɔ Gusunɔ sɔɔ bi durɔ beni bɑ mɑɑ mɔ mɑ tɔmbu kpuro, tɔn geegibu kɑ tɔn kɔ̃sobu, bɑ koo se gɔrin di. 16 Yen sɔ̃nɑ nɑ hɑniɑ mɔ̀ bɑɑdommɑ, kpɑ nɛn gɔ̃ru gu ku mɑn tɑɑrɛ wɛ̃ Gusunɔn wuswɑɑɔ kɑ mɑɑ tɔmbun wuswɑɑɔ.
17 Wɔ̃ɔ dɑbirun biru nɑ tɛ̃ wurɑ Yerusɑlɛmuɔ n kɑ nɛn tɔmbu somiru nɑɑwɑ kpɑ n mɑɑ Gusunɔ kɛ̃nu kɛ̃. 18 Mi sɔɔrɑ bɑ mɑn deemɑ sɑ̃ɑ yerɔ, nɑ tii dɛɛrɑsiɑ. Tɔn wɔru sɑri mi, sɑnnɔ nɔɔ kuribu mɑɑ sɑri mi. 19 Adɑmɑ Asin Yuu gɑbɑ wɑ̃ɑ mi. N weenɛ ben tii bu nɑ wunɛn wuswɑɑɔ bu seedɑ di bɑ̀ n gɑ̃ɑnu wɑ nɛ sɔɔ, 20 ǹ kun mɛ, ɑ de durɔ beni bu gere tɑɑrɛ ye bɑ wɑ nɛ sɔɔ dɔmɑ te nɑ yɔ̃rɑ guro gurobun mɛnnɔn wuswɑɑɔ. 21 Mɑ n kun mɔ gɑ̃ɑ tee nì sɔɔ nɑ gbɑ̃rɑ ye nɑ yɔ̃ ben suunu sɔɔ nɑ nɛɛ, bɛɛ i mɑn sirimɔwɑ gisɔ yèn sɔ̃ nɑ nɑɑnɛ doke mɑ gɔribɑ koo se.
22 N deemɑ Felisi u nɑɑnɛ dokebun swɑɑ yɛ̃, yerɑ u Yuu be sɔ̃ɔwɑ bu de tɑbu sunɔ Lisiɑsi ù n tunumɑ. Dɔmɑ teyɑ u koo ben gɑri yi wɛ̃ɛri.
23 U mɑɑ tɑbu kowobun tɔnwero woodɑ wɛ̃ u n ginɑ Pɔlu doke pirisɔm sɔɔ, ɑdɑmɑ u de u n tii mɔ mi, u mɑɑ de win kpɑɑsibu bu nùn berɑm nɑ bu kɑ nùn nɔɔri.
Pɔlu u dɑ Felisi kɑ Durusilɑn wuswɑɑɔ
24 Sɔ̃ɔ mɛɛrun biru Felisi u nɑ kɑ win kurɔ Durusilɑ, wi u sɑ̃ɑ Yuu. Mɑ u Pɔlu sokusiɑ. Ye u tunumɑ mɑ bɑ nùn swɑɑ dɑki sɑnɑm mɛ u nɑɑnɛ dokebu Kirisi Yesu sɔɔn gɑri mɔ̀. 25 Adɑmɑ sɑnɑm mɛ Pɔlu u bu gem kobu kɑ gɑyɑ kɑ mɑɑ siri bi bu ween gɑri tubusiɑmɔ, Felisi u nɑndɑ, mɑ u nɛɛ, ɑ doonɔ ginɑ. Kon kpɑm nun soku nɑ̀ n fɛɛ wɑ.
26 U rɑɑ mɑɑ yĩiyɔ u koo gobi wɑwɑ Pɔlun min di. Yenin sɑɑbuwɑ u rɑ nùn sokusie kiri kiri u kɑ nùn gɑri ko.
27 Wɔ̃ɔ yirun biru Pɔɔsiyu Fesitu u kuɑ Felisin kɔsire. N deemɑ Felisi u Pɔlu deri pirisɔm sɔɔ yèn sɔ̃ u kĩ u n bɛɛrɛ mɔ Yuubɑn mi.