23
1 Pɔlu u be bɑ mɛnnɛ nɔni girɑri, mɑ u nɛɛ, mɛro bisibu, nɛn gɔ̃ru gɑ ǹ mɑn tɑɑrɛ wɛ̃ɛmɔ domi nɑ nɛn wɑ̃ɑru diwɑ dee dee Gusunɔn wuswɑɑɔ, sere kɑ gisɔn gisɔ.
2 Yɑ̃ku kowo tɔnwero wi bɑ rɑ soku Anɑniɑ u be bɑ yɔ̃ Pɔlun bɔkuɔ sɔ̃ɔwɑ bu nùn soowo win nɔɔwɔ. 3 Pɔlu u nɛɛ, Gusunɔ koo nun so, gɑni kpikɑ wunɛ! A sɔ̃wɑ ɑ kɑ mɑn siri Mɔwisin woodɑ sɔɔ, mɑ ɑ mɑɑ kpɑm woodɑ sɑrɑ ɑ nɛɛ, bu mɑn soowo.
4 Be bɑ yɔ̃ win bɔkuɔ bɑ nɛɛ, Gusunɔn yɑ̃ku kowo tɔnwerowɑ ɑ kɑ̃kɑ ɑ wɔmmɔ mɛ?
5 Pɔlu u nɛɛ, mɛro bisibu nɑ ǹ yɛ̃ yɑ̃ku kowo tɔnwerowɑ. Domi Gusunɔn gɑri yi nɛɛ, <<I ku bɛɛn tɔmbun wirugiin kɔ̃sɑ gere.>>
6 Ye Pɔlu u tubɑ mɛnnɔ ge sɔɔ, mɑ gɑbɑ sɑ̃ɑwɑ Sɑdusibɑ, gɑbu mɑɑ Fɑlisibɑ, yerɑ u nɔɔgiru suɑ mɛnnɔ ge sɔɔ u nɛɛ, mɛro bisibu, nɛ Fɑlisiwɑ wi Fɑlisibɑ bɑ mɑrɑ. I mɑn sirimɔwɑ yèn sɔ̃ nɑ yĩiyɔ mɑ gɔribɑ koo se gɔrin di.
7 Ye u yeni geruɑ u kpɑ, Fɑlisibɑ kɑ Sɑdusibɑ bɑ sikirinɔ wɔri mɑ mɛnnɔ ge, gɑ bɔnu kuɑ yiru. 8 Domi Sɑdusibɑ bɑ rɑ nɛɛ gɔribɑ kun seemɔ gɔrin di, hunde kɑ wɔllun gɔrɑdo mɑɑ sɑri ɑdɑmɑ Fɑlisibɑ bɑ wurɑ mɑ yɑbu itɑ ye kpuro yɑ wɑ̃ɑ. 9 Mɑ wure bɑkɑnu tunumɑ ben suunu sɔɔ bɑ sikirinɑmɔ kɑ dɑm, mɑ woodɑ yɛ̃robu gɑbɑ seewɑ Fɑlisibɑ sɔɔ bɑ nɛɛ, sɑ ǹ tɑɑrɛ gɑɑ wɑ durɔ wi sɔɔ. Wɑrɑ yɛ̃ nge hundewɑ ǹ kun mɛ wɔllun gɔrɑdo goowɑ u kɑ nùn gɑri kuɑ.
10 Sikirinɔ ge, gɑ kpɛ̃ɑ gem gem sere tɑbu sunɔ wi, u bɛrum kuɑ bu ku rɑɑ Pɔlu kɑrɑnɑ. Mɑ u win tɑbu kowobu woodɑ wɛ̃ u nɛɛ, bu doo bu Pɔlu wɔrɑmɑ kpɑ bu kɑ nùn dɑ sɑnsɑni gbɑ̃rɑrugiɑn mi.
11 Tɔ̃ɔ ten wɔ̃kuru sɔɔ, Yinni Gusunɔ u Pɔlu yɔ̃re mɑ u nɛɛ, ɑ ku mwiɑ kpɑnɑ. Nge mɛ ɑ mɑn seedɑ diiyɑ Yerusɑlɛmu mi, mɛyɑ kɑɑ mɑɑ mɑn seedɑ diiyɑ Romuɔ.
Bɑ Pɔlun wɑ̃ɑru kɑsu
12 Yen sisiru Yuubɑ bɑ mɛnnɑ bɑ nɔɔ tiɑ kuɑ bɑ bɔ̃ruɑ bɑ nɛɛ bɑ ǹ gɑ̃ɑnu dimɔ, bɑɑ nim bɑ ǹ nɔrumɔ mɑ n kun mɔ bɑ Pɔlu go. 13 Tɔn be, bɑ tɔnu weeru kere be bɑ nɔɔ tiɑ ye kuɑ. 14 Mɑ bɑ dɑ bɑ yɑ̃ku kowo tɔnwerobu kɑ guro gurobu deemɑ bɑ nɛɛ, sɑ bɔ̃ruɑ sɑnnu mɑ sɑ ǹ gɑ̃ɑnu dimɔ sere su kɑ Pɔlu go. 15 Ǹ n mɛn nɑ, sɑ kĩ bɛɛ kɑ guro gurobu i tɑbu sunɔ sɔ̃ u kɑ Pɔlu nɑ bɛɛn mɛnnɔ sɔɔ kpɑm, kpɑ n sɑ̃ɑre nge i kĩ i kpɑm win gɑri mɛɛrim sɔmɛ. Bɛsɛ sɑ ko n sɔɔru sɑ̃ɑ su kɑ nùn go u sere tunumɑ.
16 Adɑmɑ Pɔlun sesun bii tɔn durɔ u yinɑ yen gɑri nuɑ. U dɑ u duɑ sɑnsɑni gbɑ̃rɑrugiɑ yen mi, mɑ u Pɔlu gɑri yi sɔ̃ɔwɑ. 17 Mɑ Pɔlu u tɑbu kowobun tɔnwero turo sokɑ, u nùn sɔ̃ɔwɑ u kɑ ɑluwɑɑsi wi doo tɑbu sunɔn mi domi u gɑri mɔ u kĩ u nùn sɔ̃.
18 Tɑbu kowobun tɔnwero wi, u kɑ nùn dɑ tɑbu sunɔn mi, mɑ u nɛɛ, Pɔlu pirisɔm wi, u mɑn sokɑ mɑ u mɑn kɑnɑ n kɑ ɑluwɑɑsi wi nɑ wunɛn mi domi u kĩ u nun gɑ̃ɑnu sɔ̃.
19 Tɑbu sunɔ u ɑluwɑɑsi win nɔmu nɛnuɑ u kɑ nùn dɑ bɔ̃ɔrɔ u nùn bikiɑ u nɛɛ, mbɑ ɑ kĩ ɑ mɑn sɔ̃.
20 U nɛɛ, Yuubɑ bɑ nɔɔ tiɑ kuɑ bu kɑ nun bikiɑ siɑ ɑ kɑ Pɔlu dɑ guro gurobun mɛnnɔwɔ, kpɑ n sɑ̃ɑre nge bɑ kĩ bu win gɑri mɛɛrim sɔmɛwɑ. 21 Adɑmɑ ɑ ku ben gɑri nɔ, domi bɑ tɔnu weeru kere be bɑ koo kuke swɑɑɔ bu kɑ nùn mwɑ. Be kpuro bɑ bɔ̃ruɑ mɑ bɑ ǹ dimɔ, bɑ ǹ mɑɑ nɔrumɔ mɑ n kun mɔ bɑ nùn go. Bɑɑ tɛ̃ bɑ sɔɔru sɑ̃ɑ bu kɑ ye ko. Wunɛn woodɑwɑ bɑ swɑɑ dɑki.
22 Mɑ tɑbu sunɔ wi, u nɛɛ, ɑ ku goo sɔ̃ mɑ ɑ mɑn gɑri yini dɔmɛɑ. Mɑ u derɑ ɑluwɑɑsi wi, u doonɑ.
Bɑ kɑ Pɔlu dɑ Felisin mi
23 Mɑ tɑbu sunɔ wi, u tɑbu kowobun wirugibu yiru sokɑ u nɛɛ, i tɑbu kowo goobu (200) sɔɔru koosio bu Sesɑre dɑ, kɑ mɑɑsɔbu wɑtɑ kɑ wɔkuru, kɑ sere yɑɑsigibu goobu, bɑ n sɔɔru sɑ̃ɑ bu swɑɑ wɔri kɔbɑ nɔɔbɑ nnɛ wɔ̃ku te. 24 I mɑɑ dumi gɑɑri bɔkuo kpɑ i kɑ Pɔlu dɑ sinɑ wuu yɛ̃ro wi bɑ rɑ soku Felisin mi, i turi kɑ ɑlɑfiɑ.
25 Yen biru tɑbu sunɔ u tireru yoruɑ tè sɔɔ u nɛɛ, 26 nɛ Kolodu Lisiɑsi, nɑ nun tɔburɑ tem yɛ̃ro Felisi bɛɛrɛgii. 27 Yuubɑ bɑ durɔ wi mwɑwɑ, bɑ kĩ bu nùn go. Ye nɑ giɑ mɑ u sɑ̃ɑ Romugii, yeyɑ nɑ dɑ kɑ nɛn tɑbu kowobu nɑ nùn wɔrɑ. Yen biru nɑ kɑ nùn dɑ ben guro gurobun wuswɑɑɔ. 28 Domi nɑ kĩ nɑ n yɛ̃ yèn sɔ̃ bɑ nùn tɑɑrɛ wɛ̃ɛmɔ. 29 Miyɑ nɑ giɑ mɑ u ǹ gɑ̃ɑnu gɑnu kue ni nu kɑ gɔɔ weenɛ, bɑɑ mɑm pirisɔm. Nɑ deemɑ bɑ nùn tɑɑrɛ wɛ̃ɛmɔwɑ ben woodɑn gɑrin sɔ̃. 30 Sɑnɑm mɛ bɑ mɑn sɔ̃ɔwɑ mɑ Yuubɑ bɑ nɔɔ tiɑ kuɑ bu kɑ nùn go, yɑnde nɑ derɑ bɑ kɑ nun nùn nɑɑwɑ. Nɑ win tɑɑrɛ wɛ̃ɔbu sɔ̃ɔwɑ bu nɑ bu ben gɑri gere wunɛn wuswɑɑɔ.
31 Yerɑ tɑbu kowo be, bɑ win woodɑ kpuro swĩi. Bɑ Pɔlu suɑ wɔ̃ku te, mɑ bɑ kɑ nùn dɑ sere Antipɑtiriɔ. 32 Yen sisiru tɑbu kowo be, bɑ wurɑ ben sɑnsɑniɔ mɑ dumigibu bɑ kɑ nùn dɑ wuswɑɑɔ. 33 Ye bɑ turɑ Sesɑreɔ bɑ tem yɛ̃ro tire te wɛ̃, bɑ mɑɑ nùn Pɔlu tusiɑ. 34 Ye tem yɛ̃ro u tire te gɑrɑ u kpɑ, u Pɔlu bikiɑ berɑ mìn di u nɑ. Pɔlu nɛɛ, Silisin di. 35 Tem yɛ̃ro u nɛɛ u koo win gɑri nɔ sɑnɑm mɛ win tɑɑrɛ wɛ̃ɔbu bɑ tunumɑ.
Mɑ u woodɑ wɛ̃ bu Pɔlu kɔ̃su Herodun sinɑ kpɑɑrɔ.