22
1 bɛɛ, nɛn bisibu kɑ bɑɑbɑbɑ, i swɑɑ dɑkio ye kon bɛɛ sɔ̃ n kɑ tii tubusiɑ.
2 Ye bɑ nuɑ mɑ u kɑ Heberum gɑri mɔ̀, bɑ mɑri sɔ̃ɔ sɔ̃ɔ. Mɑ u nɛɛ, 3 nɛ Yuuwɑ wi bɑ mɑrɑ Tɑɑsiɔ, Silisin temɔ ɑdɑmɑ wuu geni sɔɔrɑ nɑ biru di. Gɑmɑliɛlin miyɑ nɑ keu kuɑ, nɑ bɛsɛn sikɑdobɑn woodɑ giɑ sɑ̃ɑ sɑ̃ɑ, mɑ nɑ Gusunɔn bɛɛrɛ yɛ̃ nge mɛ bɛɛ kpuro i sɑ̃ɑ gisɔ. 4 Nɑ mɑɑ swɑɑ yen tɔmbu nɔni sɔ̃ɔwɑ goo gookum, nɑ yen tɔn durɔbu kɑ tɔn kurɔbu mwɛɛrɑ nɑ bɔkuɑ nɑ pirisɔm doke. 5 Yɑ̃ku kowo tɔnwero kɑ Yuubɑn guro gurobu kpuro bɑ koo kpĩ bu mɑn yen seedɑ diiyɑ. Nɑ tirenu mwɑ ben nɔmɑn di ni bɑ Yuubɑ yoruɑ be bɑ wɑ̃ɑ Dɑmɑsiɔ. Mɑ nɑ dɑ mi n kɑ swɑɑ yen tɔmbu mwɑ n bɔke be bɑ wɑ̃ɑ mi, kpɑ n kɑ bu nɑ Yerusɑlɛmuɔ n sɛɛyɑsiɑ.
Pɔlu u bu
win gɔ̃ru gɔsiɑbun gɑri sɔ̃ɔwɑ
6 Sɑnɑm mɛ nɑ dɔɔ nɑ Dɑmɑsi turuku kuɑ sɔ̃ɔ wii wɔllun sɑkɑ, suɑru sɔɔ yɑm bururɑm nɑ bɑi wɔllun di mu mɑn wukiri. 7 Nɑ wɔrumɑ temɔ, mɑ nɑ nɔɔ gɑgu nuɑ gɑ nɛɛ, Sɔɔlu, Sɔɔlu mbɑn sɔ̃nɑ ɑ mɑn nɔni sɔ̃ɔmɔ. 8 Nɑ bikiɑ nɑ nɛɛ, wunɑ were Yinni. U mɑn sɔ̃ɔwɑ u nɛɛ, nɛnɑ Yesu Nɑsɑrɛtigii wi ɑ nɔni sɔ̃ɔmɔ. 9 Durɔ be bɑ mɑn yɔ̃siriɔ bɑ yɑm bururɑm mɛ wɑ, ɑdɑmɑ bɑ ǹ tubɑ ye yɛ̃ro geruɑ wi u kɑ mɑn gɑri kuɑ. 10 Nɑ bikiɑ nɑ nɛɛ, mbɑ kon ko Yinni. Mɑ u mɑn sɔ̃ɔwɑ u nɛɛ, n seewo n du Dɑmɑsiɔ. Miyɑ bɑ koo mɑn sɔ̃ kpuro ye Gusunɔ u himbɑ sɑ̃ɑ n ko. 11 Yɑm bururɑm mɛn kpɑ̃ɑrɑ derɑ nɑ wɔ̃ko kuɑ. Yen sɔ̃nɑ nɛn kpɑɑsibɑ mɑn nɔmu nɛnuɑ sɑ kɑ duɑ Dɑmɑsiɔ.
12 N deemɑ durɔ goo wɑ̃ɑ mi, wi bɑ rɑ nɛɛ Anɑniɑ, u Gusunɔn bɛɛrɛ yɛ̃, u Mɔwisin woodɑbɑ swĩi. Yuu be bɑ wɑ̃ɑ wuu ge sɔɔ kpuro bɑ win seedɑ geɑ dimɔ. 13 U nɑ nɛn mi, u yɔ̃rɑ nɛn bɔkuɔ mɑ u nɛɛ, Sɔɔlu nɛn beruse, ɑ yɑm wɑɑwo. Mii mii nɛn nɔni wukiɑrɑ mɑ nɑ nùn wɑ. 14 U mɑn sɔ̃ɔwɑ u nɛɛ, Gusunɔ bɛsɛn sikɑdobɑn Yinni u mɑn gɔsɑ n kɑ win kĩru giɑ, n kɑ Geegii wɑ, kpɑ n mɑɑ kɑ win nɔɔn gɑri nɔ. 15 Domi kon ko win seedɑ dio, kpɑ n kɑ tɔmbu kpuro sɔ̃ ye nɑ wɑ kɑ ye nɑ nuɑ. 16 Tɛ̃, mbɑ n mɑɑ tie. N seewo bu mɑn bɑtɛmu ko, kpɑ n wobe n dɛɛrɑ nɛn torɑnun di nɑ n Yinnin yĩsiru sokumɔ.
Nge mɛ Yinni u Pɔlu gɔsɑ
u kɑ tɔn tukobu wɑɑsu ko
17 Ye nɑ wurɑ Yerusɑlɛmuɔ, sɔ̃ɔ teeru sɑnɑm mɛ nɑ kɑnɑru mɔ̀ sɑ̃ɑ yerɔ, nɑ kɑ̃sɑ. 18 Kɑ̃si te sɔɔ, nɑ Yinni wɑ, u mɑn sɔ̃ɔwɑ u nɛɛ, n koowo kpɑɑkɑ kpɑ n yɑri Yerusɑlɛmun di mii mii. Domi wuu min tɔmbu bɑ ǹ koo win gɑri wurɑ yìn seedɑ nɑ dimɔ. 19 Nɑ nɛɛ, Yinni bɑ yɛ̃ sɑ̃ɑ sɑ̃ɑ mɑ nɑ Yuubɑn mɛnnɔ yenu dɑ dɑ, nɑ tɔmbu mwɛɛrɑ nɑ bu so be bɑ nun nɑɑnɛ doke. 20 Dɔmɑ te bɑ wunɛn seedɑ dio Etiɛni go, nɛn tii nɑ wɑ̃ɑ mi, nɑ win gɔɔ wurɑ. Nɛnɑ nɑ win gowobun yɑ̃nu kɔ̃su ni bɑ subɑ. 21 Mɑ Yinni u mɑn sɔ̃ɔwɑ u nɛɛ, n doo, domi u koo mɑn gɔri n tomɑ tɔn tukobun mi.
Pɔlu kɑ Romun tɑbu sunɔ
22 Tɔn be, bɑ Pɔlun gɑri swɑɑ dɑki sere u kɑ yeni geruɑ u kpɑ. Sɑnɑm mɛyɑ be kpuro bɑ gbɑ̃sukum wɔri bɑ nɛɛ, i nùn goowo, n ǹ weenɛ win bweseru tɑ n wɑ̃ɑ.
23 Bɑ kuuki mɔ̀, bɑ ben yɑbenu yɔwemɔ, bɑ tuɑ seeyɑmɔ wɔllɔ. 24 Romun tɑbu sunɔ wi, u woodɑ wɛ̃ bu kɑ Pɔlu dɑ sɑnsɑni gbɑ̃rɑrugiɑ sɔɔ bu nùn sɛni so sere u kɑ gem gere. Domi u kĩ u giɑ mbɑn sɑɑbuwɑ bɑ nùn wuremɔ mɛ. 25 Ye bɑ Pɔlu bɔkuɑ bu kɑ nùn so, u tɑbu sunɔ bikiɑ wi u nùn yɔ̃re, u nɛɛ, n weenɛ i Romugii so i sere nùn siri?
26 Ye tɔnwero wi, u gɑri yi nuɑ, u dɑ win tɑbu sunɔn mi, mɑ u nùn bikiɑ u nɛɛ, mbɑ ɑ kĩ ɑ ko mi. Durɔ wi, Romugiiwɑ.
27 Mɑ tɑbu sunɔ u dɑ u Pɔlu bikiɑ u nɛɛ, ɑ mɑn sɔ̃ɔwɔ, wunɛ Romugiiwɑ?
Pɔlu u nɛɛ, mɛyɑ.
28 Tɑbu sunɔ wi, u nɛɛ, gobi bɛkɛyɑ nɑ kɔsiɑ nɑ kɑ sere kuɑ Romugii.
Pɔlu u nɛɛ, mɛyɑ bɑ nɛ mɑrɑwɑ.
29 Yen sɔ̃nɑ tɑbu kowo be bɑ sɔɔru sɑ̃ɑ bu kɑ nùn sɛni so u kɑ gem gere, bɑ nùn deri mii mii. Mɑ bɛrum tɑbu sunɔ wi mwɑ ye u nuɑ mɑ Pɔlu sɑ̃ɑwɑ Romugii domi u derɑ bɑ nùn bɔkuɑ.
Bɑ kɑ Pɔlu dɑ Yuubɑn
guro gurobun wuswɑɑɔ
30 Tɑbu sunɔ wi, u kĩ u giɑ kɑm kɑm yèn sɑɑbu wɑhɑlɑ ye, yɑ seewɑ. Yen sɔ̃nɑ sisiru u derɑ bɑ Pɔlu kusiɑ, mɑ u nɛɛ yɑ̃ku kowo tɔnwerobu kɑ Yuubɑn guro gurobu bu mɛnnɑmɑ. Mɑ u kɑ Pɔlu dɑ ben wuswɑɑɔ.