12
Bɑ Yɑkɔbu go mɑ bɑ Piɛɛ pirisɔm doke
1 Sɑnɑm mɛ sɔɔrɑ sinɑ boko wi bɑ sokumɔ Herodu, u Yesun yigbɛrun tɔmbu gɑbu nɔmɑ doke u kɑ bu nɔni sɔ̃. 2 Wiyɑ derɑ bɑ Yɑkɔbu, Yohɑnun mɔɔ mwɑ bɑ go kɑ tɑkobi. 3 Ye u wɑ mɑ n Yuubɑ dore, u mɑɑ Piɛɛ mwɑ. N wee sɑɑ ye, pɛ̃ɛ ye bɑ ǹ seeyɑtiɑ doken tɔ̃ɔ bɑkɑrɑ. 4 Ye bɑ nùn mwɑ bɑ kpɑ, bɑ nùn pirisɔm doke mɑ tɑbu kowobu wɔkurɑ nɔɔbu kɑ tiɑ bɑ nùn kɔ̃su. Bɑ bu yi nnɛ nnɛ. Herodu u gɔ̃ru doke u nùn siri tɔmbun wuswɑɑɔ Gɔɔ sɑrɑribun tɔ̃ɔ bɑkɑrun biru. 5 Bɑ Piɛɛ nɛni pirisɔm sɔɔ, ɑdɑmɑ Yesun yigbɛrugibu bɑ kɑnɑru mɔ̀ gem gem win sɔ̃ Gusunɔn mi.
Bɑ Piɛɛ yɑkiɑ
6 Tɔ̃ɔ te Herodu u kĩ u nùn yɑrɑ pirisɔm di u kɑ dɑ tɔmbun mi, ten wɔ̃kuru Piɛɛ u dweeyɑ tɑbu kowobu yirun suunu sɔɔ. Bɑ nùn bɔkuɑ kɑ yɔni yiru, mɑ kɔ̃sobu gɑbɑ mɑɑ wɑ̃ɑ pirisɔm kɔnnɔwɔ. 7 Suɑru sɔɔ Yinnin gɔrɑdo u kurɑmɑ mɑ pirisɔm dii te, tɑ yɑm bururɑ. Gɔrɑdo wi, u Piɛɛ so yɛ̃sɑɔ u nùn yɑmiɑ u nɛɛ, u seewo fuuku fuuku.
Mii mii yɔni yi, yi wɔrumɑ win nɔmɑn di. 8 Mɑ gɔrɑdo u nɛɛ, ɑ wunɛn yɑberu sebuo kpɑ ɑ wunɛn sɑlubɑtɑ doke.
Piɛɛ u kuɑ mɛ, mɑ gɔrɑdo u kpɑm nɛɛ, ɑ wunɛn gɔ̃gɔ wukirio kpɑ ɑ mɑn swĩi.
9 Piɛɛ u yɑrɑ u nùn swĩi, ɑdɑmɑ u tɑmɑɑ u dosimɔwɑ, u ǹ yɛ̃ ye gɔrɑdo u mɔ̀ n sɑ̃ɑwɑ gem. 10 Bɑ pirisɔm kɔ̃so gbiikobu sɑrɑri kɑ yiruse, mɑ bɑ gɑmbo sisugiɑ turɑ ye yɑ wɑ̃ɑ wuun berɑ giɑ. Yeyɑ yɑ kɛniɑrɑ kɑ tii mɑ bɑ yɑrɑ bɑ swɑɑ doo kɑmɛ, bɑ gu swĩi. Mɑ gɔrɑdo wi, u Piɛɛ deri suɑru sɔɔ.
11 Sɑnɑm mɛ sɔɔrɑ Piɛɛ u tubɑ ye n nùn deemɑ. Mɑ u tii sɔ̃ɔwɑ u nɛɛ, tɛ̃ nɑ giɑ mɑ geemɑ. Yinni Gusunɔwɑ u win gɔrɑdo gɔrimɑ u kɑ mɑn yɑkiɑ Herodun nɔmɑn di, kɑ mɑɑ ye kpuron di ye Yuubɑ bɑ kĩ bu mɑn kuɑ.
12 Ye gɑri yi, yi nùn yeeri yi kpɑ, u dɑ Mɑɑrin yɛnuɔ wi u sɑ̃ɑ Yohɑnu Mɑɑkun mɛro. Tɔn dɑbinu mɛnnɛ mi, bɑ kɑnɑru mɔ̀. 13 Piɛɛ u gɑmbo so yɛnu kɔnnɔwɔ mɑ kurɔ sɔm kowo goo wi bɑ rɑ soku Rodɑ, u dɑ u swɑɑ dɑki. 14 Ye u Piɛɛn nɔɔ tubɑ nuku dobu kun dere u gɑmbo kɛniɛ, mɑ u dukɑ gɔsirɑ dirɔ u bu sɔ̃ɔwɑ mɑ Piɛɛwɑ wɑ̃ɑ kɔnnɔwɔ. 15 Bɑ nùn sɔ̃ɔwɑ bɑ nɛɛ, ɑ wiirɑmɔwɑ.
Adɑmɑ u mɔ̀, kɑ geemɑ ni.
Mɑ bɑ mɔ̀, win yɑrowɑ.
16 N deemɑ Piɛɛ u yɔ̃ mi, u gɑmbo soomɔ. Ye bɑ ye kɛniɑ, bɑ nùn tubɑ, mɑ bɑ biti soorɑ. 17 U bu mɑrisiɑ kɑ nɔmu, mɑ u bu tubusiɑ nge mɛ Yinni Gusunɔ u kɑ nùn yɑrɑ pirisɔm di. U nɛɛ, bu gɑri yi Yɑkɔbu sɔ̃ kɑ mɑɑ nɑɑnɛ dokeo be bɑ tie.
Yen biru u doonɑ u dɑ gɑm giɑ.
18 Yen sisiru bururu nɑndɑ bɑkɑbu wɑ̃ɑ tɑbu kowobun suunu sɔɔ. Bɑ wɔki bɑ mɔ̀, mɑnɑ Piɛɛ u doonɑ. 19 Herodu u yiire bu nùn kɑsu, ɑdɑmɑ bɑ ǹ nùn wɑ. Yen sɔ̃nɑ u pirisɔm kɔ̃sobu win gɑri bikiɑ mɑ u woodɑ wɛ̃ bu kɑ bu dɑ bu go. Yen biru Herodu u seewɑ Yudeɑn di u dɑ u sinɑ sɔ̃ɔ mɛɛru Sesɑreɔ.
Herodun gɔɔ
20 N wee Herodu u kɑ Tirigibu kɑ Sidonigibu mɔru bɑrɑ gem gem. Yen sɔ̃nɑ tɔn be, bɑ kpɑrɑnɑ bɑ dɑ win mi sɑnnu. Gbiikɑɑ bɑ kɑ Bɑlɑtu bɔrɔnu kuɑ wi u sɑ̃ɑ sinɑ bokon yɛnun sɔm kowobun wirugii. Yen biru bɑ dɑ Herodun mi bu kɑ nùn suuru kɑnɑ, domi ben temgibu bɑ ben dĩɑnu wɑɑmɔwɑ sɑɑ Herodun tem di.
21 Herodu u tɔ̃ru yi te u koo bu wɑ. Ye tɔ̃ɔ te, tɑ turɑ, u win gurumusuru sebuɑ u sinɑ win sinɑ turɑru wɔllɔ mɑ u gɑri gerubu wɔri. 22 Tɔn be, bɑ nɛɛ, Gusunɔn nɔɔwɑ mini, n ǹ tɔnuguu.
23 Mii mii Yinnin gɔrɑdo u nɑ u Herodu so mɑ kɔkɔnu nɑ nu win wɑsi di mɑ u gu yèn sɔ̃ wi tɔnu, u Gusunɔn yiiko mwɑ.
24 Sɑɑ ye sɔɔ, mɑ Gusunɔn gɑri yi kpɑrɑrɑmɔ yi sosimɔ.
25 Ye Bɑɑnɑbɑsi kɑ Sɔɔlu bɑ ben sɔmburu kuɑ bɑ kpɑ, bɑ wurɑ Yerusɑlɛmuɔ. Mɑ bɑ Yohɑnu Mɑɑku suɑ, u kɑ bu dɑ.