13
Bɑ Bɑɑnɑbɑsi kɑ Sɔɔlu gɔsɑ bɑ gɔrɑ
1 Gusunɔn sɔmɔbu kɑ keu koosiobu gɑbɑ wɑ̃ɑ Antiɔsin Yesun yigbɛru sɔɔ. Ben yĩsɑ wee. Bɑɑnɑbɑsi kɑ Simɛɔ wi bɑ sokumɔ tɔn wɔ̃ko, kɑ Lusiu Sirɛnigii, kɑ Mɑnɑhɛni wi bɑ nɛnuɑ yɛnu teu kɑ Herodu sinɑ boko, kɑ mɑɑ Sɔɔlu. 2 Sɔ̃ɔ teeru durɔ be, bɑ Yinni Gusunɔ sɑ̃ɑmɔ kɑ nɔɔ bɔkuru sɑnnu, yerɑ Hunde Dɛɛro u bu sɔ̃ɔwɑ u nɛɛ, bu Bɑɑnɑbɑsi kɑ Sɔɔlu wunɔ nɛnɛm bu kɑ sɔmburu gɑru ko tèn sɔ̃ u bu sokɑ.
3 Yen biru ye bɑ nɔɔ bɔkuru kɑ kɑnɑru kpɑ, durɔ be, bɑ Bɑɑnɑbɑsi kɑ Sɔɔlu nɔmɑ sɔndi wirɔ, mɑ bɑ derɑ bɑ doonɑ.
Bɑɑnɑbɑsi kɑ Sɔɔlu bɑ Sipu dɑ
4 Sɑnɑm mɛ Hunde Dɛɛro u bu gɔriɔ, Bɑɑnɑbɑsi kɑ Sɔɔlu bɑ turɑ wuu gɑgun mi ge bɑ rɑ soku Sɛlɛsi. Min diyɑ bɑ goo nimkuu duɑ, bɑ kɑ tem bureru gɑru dɑ te bɑ rɑ soku Sipu. 5 Sɑnɑm mɛ bɑ turɑ Sipun wuu gɑgu sɔɔ ge bɑ rɑ soku Sɑlɑmini, bɑ Gusunɔn gɑri wɑɑsu kuɑ Yuubɑn mɛnnɔ yenɔ. Yohɑnu Mɑɑku u bu yɔ̃siri u kɑ bu somi.
6 Mɑ bɑ tem bure bɑkɑ te kpuro sɑrɑri bɑ turɑ sere wuuɔ ge bɑ rɑ soku Pɑfɔsi. Miyɑ bɑ Yuu dobo dobogii goo wɑ wi u sɑ̃ɑ sɔmɔ weesugii. Win yĩsirɑ Bɑriyesu. 7 U wɑ̃ɑ kɑ Seegiu Pɔlusi, Sipun tem yɛ̃ro. Tem yɛ̃ro wi, u sɑ̃ɑwɑ bwisigii, yerɑ u Bɑɑnɑbɑsi kɑ Sɔɔlu sokɑ yèn sɔ̃ u kĩ u Gusunɔn gɑri nɔ. 8 Adɑmɑ dobo dobogii wi, wi bɑ rɑ mɑɑ soku Elimɑsi kɑ Gɛrɛkim u bu yinɑri. U kookɑri mɔ̀ u kɑ tem yɛ̃ro wi gɔsiɑ nɑɑnɛ dokebun swɑɑn di. 9 Sɑnɑm mɛyɑ Sɔɔlu wi bɑ mɑɑ sokumɔ Pɔlu, wi u Hunde Dɛɛro yibɑ, u dobo dobogii wi nɔni girɑri 10 u nɛɛ, wunɛ wi ɑ tɑki dibu kɑ dɑɑ kɔ̃sɑ yibɑ, wunɛ Setɑm bii kɑ gɑ̃ɑ geenu kpuron wɛrɔ, sere dommɑ kɑɑ n kɑsu ɑ Gusunɔn gem gɔsiɑ weesu. 11 Tɛ̃, wee, Gusunɔ u koo nun nɔmu tĩi, kɑɑ wɔ̃ko ko, ɑ ǹ mɑɑ yɑm wɑsi sɔ̃ɔ mɛɛru.
Mii mii wɔ̃korɑ durɔ wi wɔri, u yɑm biɑ, mɑ u sĩimɔ u bɑbi u goo kɑsu wi u koo nùn nɔmu nɛnɛ. 12 Ye tem yɛ̃ro wi, u wɑ ye n koorɑ, u Yesu nɑɑnɛ doke. U biti soorɑ Yinnin swɑɑn gɑrin sɔ̃.
Pɔlu kɑ Bɑɑnɑbɑsi bɑ wɑ̃ɑ Pisidin tem sɔɔ
13 Yen biru Pɔlu kɑ win kpɑɑsibu bɑ goo nimkuu duɑ Pɑfɔsin di, mɑ bɑ wuu gɑgu turɑ ge bɑ rɑ soku Perigɑ, Pɑnfilin temɔ. Miyɑ Yohɑnu u bu deri, u wurɑ Yerusɑlɛmuɔ. 14 Sɑɑ Perigɑn di bɑ dɑ Antiɔsiɔ, Pisidin temɔ. Tɔ̃ɔ wɛ̃rɑrugiru sɔɔ bɑ dɑ Yuubɑn mɛnnɔ yerɔ, bɑ sinɑ. 15 Ye bɑ Mɔwisin woodɑn tirerun gɑm kɑ mɑɑ Gusunɔn sɔmɔbuginun gɑm gɑrɑ bɑ kpɑ, mɛnnɔ gen wirugibu bɑ bu gɔriɑ bɑ nɛɛ mɛro bisibu, ì n gɑri gɛɛ mɔ yi yi koo tɔmbu dɑm kɛ̃ i geruo. 16 Pɔlu u seewɑ u yɔ̃rɑ u kɑ bu nɔmu mɑrisiɑ. U nɛɛ, bɛɛ Isirelibɑ, kɑ bɛɛ be i Gusunɔ nɑsie, i swɑɑ dɑkio. 17 Gusunɔ bɛsɛ Isirelibɑn Yinni u bɛsɛn sikɑdobɑ gɔsɑ mɑ u derɑ bɑ kuɑ bwese bɑkɑru sɑnɑm mɛ bɑ wɑ̃ɑ Egibitin temɔ. Yen biru u bu yɑrɑ min di kɑ win dɑm bɑkɑm, 18 mɑ u kɑ bu tɛmɑnɑ wɔ̃ɔ weeru gbɑburɔ. 19 U mɑɑ bwesenu nɔɔbɑ yiru kpeerɑsiɑ Kɑnɑnin tem sɔɔ, mɑ u nin tem win tɔmbu wɛ̃ mu n sɑ̃ɑ begim. 20 Ye kpuro yɑ kuɑ wɔ̃ɔ nɛɛru kɑ weerɑɑkuru (450).
Yen biru Gusunɔ u bu kpɑrobu wɛ̃ n kɑ girɑri Gusunɔn sɔmɔ Sɑmuɛlin wɑɑti. 21 Yerɑ bɑ sunɔ bikiɑ mɑ Gusunɔ u bu Sɔɔlu Kisin bii wɛ̃, sɑɑ Bɛnyɑmɛɛn bweserun di, mɑ u bɑndu di wɔ̃ɔ weeru. 22 Mɑ Gusunɔ u nùn bɑndu yɑrɑ u Dɑfidi kɔsire kuɑ, wìn sɔ̃ u seedɑ di u nɛɛ, u wɑ mɑ Dɑfidi, Isɑin bii u sɑ̃ɑ tɔnu wìn bweseru u kĩ, wi u koo win kĩru kpuro ko. 23 Dɑfidi win bweserun diyɑ, Yesu u yɑrɑ wi Gusunɔ u kuɑ Isirelibɑn Fɑɑbɑ kowo nge mɛ u nɔɔ mwɛɛru kuɑ. 24 Yesu u sere nɑ, Yohɑnu u Isirelibɑ kpuro wɑɑsu kuɑ u bu sɔ̃ɔwɑ bu gɔ̃ru gɔsiɑ bu bɑtɛmu ko. 25 Sɑnɑm mɛ Yohɑnu u win sɔmburu kpeemɑ, u rɑ nɛɛ, u ǹ sɑ̃ɑ wi bɑ mɑrɑ, ɑdɑmɑ yɛ̃ro u koo nɑ win biru wìn bɑrɑnu u ǹ turɑ u potɑ.
26 Tɛ̃, mɛro bisibu, bɛɛ Aburɑhɑmun bweserun bibu, kɑ bɛɛ be i Gusunɔ nɑsie, bɛsɛrɑ bɑ fɑɑbɑ yen gɑri gɔriɑmɑ. 27 Domi Yerusɑlɛmugibu kɑ ben wirugibu, bɑ ǹ Yesu wi tubɑ, bɑ ǹ mɑɑ Gusunɔn sɔmɔbun gɑri tubɑ yi bɑ gɑrimɔ tɔ̃ɔ wɛ̃rɑrugiru bɑɑtere. Adɑmɑ bɑ yi yibiɑ sɑnɑm mɛ bɑ Yesu tɑɑrɛ wɛ̃. 28 Bɑ ǹ gɑ̃ɑnu wɑ wi sɔɔ, ni nu kɑ gɔɔ weenɛ, ɑdɑmɑ kɑ mɛ, bɑ nɛɛ, Pilɑti u nùn goowo. 29 Ye bɑ kpuro kuɑ bɑ kpɑ ye bɑ yoruɑ win sɔ̃, bɑ nùn sɑrɑsiɑ dɑ̃ɑ bunɑnɑru wɔllun di, bɑ kpɛ̃ɛ sikiru sɔɔ. 30 Adɑmɑ Gusunɔ u nùn seeyɑ gɔrin di. 31 Sɔ̃ɔ dɑbinun bɑɑ sɔɔ u tii tɔmbu sɔ̃ɔsi be bɑ nùn swĩimɑ Gɑlilen di bɑ kɑ nɑ Yerusɑlɛmuɔ. Tɔn beyɑ bɑ tɛ̃ sɑ̃ɑ win seedɑ diobu Isirelibɑn mi. 32 Sɑ mɑɑ bɛɛ Lɑbɑɑri geɑ nɔɔsiɑmɔ ye yɑ kɑ Gusunɔn nɔɔ mwɛɛru yɑ̃ te u bɛsɛn sikɑdobɑ kuɑ. 33 Ye kpurowɑ u sun kuɑ bɛsɛ be sɑ sɑ̃ɑ ben bibu sɑnɑm mɛ u Yesu seeyɑ gɔrin di, nge mɛ bɑ yoruɑ Dɑfidin womu yiruse sɔɔ, mi Gusunɔ u nɛɛ,
<<Wunɑ ɑ sɑ̃ɑ nɛn Bii.
Gisɔrɑ nɑ kuɑ wunɛn tundo.>>
34 Gusunɔ u rɑɑ geruɑ u koo nùn seeyɑ gɔrin di kpɑ u ku mɑɑ kɔ̃si. Yeyɑ u geruɑ u nɛɛ,
<<Kon bɛɛ domɑru kuɑ te tɑ dɛɛre tɑ ǹ sikɑ mɔ,
tèn nɔɔ mwɛɛru nɑ Dɑfidi kuɑ.>>
35 Yen sɔ̃nɑ u kpɑm geruɑ Dɑfidin womu gɑgu sɔɔ u nɛɛ,
<<A ǹ derimɔ wunɛgii wi u nɑɑnɛ mɔn wɑsi yi kɔ̃si.>>
36 Domi Dɑfidi u kuɑ ye Gusunɔ u himbɑ kuɑ u ko win tiin wɑɑti sɔɔ. Yen biru u kpunɑ u gu mɑ bɑ nùn sikuɑ kɑ win sikɑdobɑ sɑnnu mɑ win wɑsi kɔ̃sɑ. 37 Adɑmɑ, wi Gusunɔ u seeyɑ gɔrin di, win wɑsi kun kɔ̃sɑ. 38 Ǹ n mɛn nɑ nɛgibu, i de i n yɛ̃ mɑ sɑɑ win min diyɑ sɑ bɛɛ torɑnun suurun gɑri nɔɔsiɑmɔ. 39 Wiyɑ mɑɑ bɑɑwure wi u nùn nɑɑnɛ doke yɑkiɑ kpuron di, ye Mɔwisin woodɑ kun kpɛ̃ yu ko. 40 Yen sɔ̃, i tii lɑɑkɑri koowo, kpɑ ye Gusunɔn sɔmɔbɑ geruɑ n ku bɛɛ deemɑ, ye bɑ nɛɛ,
41 <<I mɛɛrio, bɛɛ tɔn yɑɑko kowobu,
i biti sooro kpɑ i kɑm ko.
Domi kon gɑ̃ɑnu ko bɛɛn nɔni biru ni i ǹ nɑɑnɛ mɔ̀ bɑɑ goo ù n bɛɛ nu tusiɑ.>>
42 Sɑnɑm mɛ Pɔlu kɑ Bɑɑnɑbɑsi bɑ yɑrɑ mɛnnɔ yerun di, tɔn be, bɑ bu kɑnɑmɔ bu kpɑm bu gɑri yi sɔ̃ tɔ̃ɔ wɛ̃rɑrugii kpɑɑru sɔɔ. 43 Ye tɔmbɑ yɑrɑ mɛnnɔ yerun di, Yuubɑ dɑbiru kɑ mɑɑ tɔn tukobu be bɑ gɔsirɑ Yuubɑ, bɑ Pɔlu kɑ Bɑɑnɑbɑsi swĩi. Gɔro be, bɑ kɑ bu gɑri kuɑ bɑ bu dɑm kɑ̃ bɑ n kɑ wɑ̃ɑ Gusunɔn durom sɔɔ.
44 Tɔ̃ɔ wɛ̃rɑrugii kpɑɑ te sɔɔ, kɑɑ nɛɛ wuu gen tɔmbu kpurowɑ bɑ mɛnnɑ bu kɑ Yinnin gɑri nɔ. 45 Sɑnɑm mɛ Yuubɑ bɑ tɔn wɔru ge wɑ, bɑ nisinu kuɑ. Bɑ Pɔlun gɑri siki, bɑ gɑri kɔ̃si gerumɔ. 46 Adɑmɑ Pɔlu kɑ Bɑɑnɑbɑsi bɑ geruɑ kɑ wɔrugɔru bɑ nɛɛ, tilɑsiwɑ bu bɛɛ Yuubɑ Gusunɔn gɑri sɔ̃ gbiikɑɑ. Adɑmɑ yèn sɔ̃ i yi yinɑ, mɑ i ǹ tii gɑrisi be bɑ kɑ wɑ̃ɑru te tɑ ku rɑ kpe weenɛ, n wee, sɑ ko bɛɛ deri, kpɑ su dɑ tɔn tukobun mi. 47 N wee ye Yinni Gusunɔ sun yiire su ko. U nɛɛ,
<<Nɑ bɛɛ kuɑ tɔn tukobun yɑm bururɑm, kpɑ i kɑ fɑɑbɑ dɑ hɑnduniɑn goonu nnɛ kpuro sɔɔ.>>
48 Sɑnɑm mɛ tɔn tuko be, bɑ gɑri yi nuɑ, ben nukurɑ dorɑ, mɑ bɑ Yinnin gɑri siɑrɑ. Mɑ be Gusunɔ u rɑɑ gɔsɑ wɑ̃ɑru te tɑ ku rɑ kpen sɔ̃, bɑ nɑɑnɛ doke.
49 Mɑ gɑri yi, yi nɔɔrɑ berɑ mi kpuro. 50 Adɑmɑ Yuu be, bɑ wuun wirugibu kɑ kurɔ yĩsirugibu be bɑ Gusunɔ sɑ̃ɑmɔ mɔru seeyɑ, mɑ bɑ bu kpɑre bu Pɔlu kɑ Bɑɑnɑbɑsi nɔni sɔ̃, mɑ bɑ bu girɑ berɑ min di. 51 Gɔro be, bɑ bu ben nɑɑsun tuɑ kpɑre, mɑ bɑ doonɑ Ikonimuɔ. 52 Kɑ mɛ, nɑɑnɛ dokeobu bɑ nuku dobu mɔ, bɑ Hunde Dɛɛro yibɑ.