14
Pɔlu kɑ Bɑɑnɑbɑsi Ikonimuɔ
1 Ikonimuɔ Pɔlu kɑ Bɑɑnɑbɑsi bɑ duɑ Yuubɑn mɛnnɔ yerɔ mɑ bɑ wɑɑsu kuɑ sere tɔn dɑbinu nɑɑnɛ doke, Yuubɑ kɑ mɑɑ Gɛrɛkibɑ. 2 Adɑmɑ Yuu be bɑ yinɑ bu nɑɑnɛ doke, bɑ tɔn tukobu mɔru seeyɑ bu kɑ wɑ bu nɑɑnɛ dokeobu kɔ̃sɑ bwisikusi. 3 Gɔro be, bɑ sinɑ mi sɔ̃ɔ mɛɛru, bɑ wɑɑsu mɔ̀ kɑ wɔrugɔru bɑ Yinni nɑɑnɛ sɑ̃ɑ. U bu dɑm wɛ̃ bɑ kɑ mɑɑmɑɑki kɑ sɔm dɑmginu mɔ̀. Nge mɛyɑ Yinni u kɑ sɔ̃ɔsi mɑ win durom mu sɑ̃ɑwɑ gem. 4 Adɑmɑ wuu gen tɔmbu bɑ bɔnu kuɑ yiru. Gɑbɑ yɔ̃rɑ kɑ Yuubɑ sɑnnu. Gɑbɑ mɑɑ yɔ̃rɑ kɑ gɔro be.
5 Sɑnɑm mɛyɑ tɔn tukobu kɑ Yuu gɑbu, kɑ ben wirugibu sɑnnu bɑ nɔɔ tiɑ kuɑ bu kɑ gɔro be wɑhɑlɑ ko, bu be kpenu kɑsuku. 6 Ye Pɔlu kɑ Bɑɑnɑbɑsi bɑ giɑ mɛ, yerɑ bɑ kpikiru suɑ Likonin temɔ Lisiti kɑ Dɛɛbeɔ, kɑ yen bɑru kpɑɑnɔ. 7 Miyɑ bɑ Lɑbɑɑri geɑ wɑɑsu mɔ̀.
Pɔlu kɑ Bɑɑnɑbɑsi
bɑ Lisiti dɑ
8 Lisitiɔ Pɔlu kɑ Bɑɑnɑbɑsi bɑ durɔ goo wɑ wìn nɑɑsu gu u sɔ̃. U ǹ mɑɑ sĩire mɛyɑ bɑ kɑ nùn mɑrɑ. 9 U Pɔlun gɑri swɑɑ dɑki. Yerɑ Pɔlu u durɔ wi nɔni girɑri mɑ u wɑ mɑ win nɑɑnɛ dokebu turɑ u kɑ bɛkurɑ, 10 mɑ u gbɑ̃rɑ u nɛɛ, ɑ seewo ɑ yɔ̃rɑ kɑ wunɛn nɑɑsu.
Durɔ wi, u seewɑ fiɑ mɑ u sɑnum wɔri. 11 Sɑnɑm mɛ tɔn wɔru ge, gɑ wɑ ye Pɔlu kuɑ gɑ nɔɔgiru suɑ kɑ Likonin bɑrum gɑ nɛɛ, bɛsɛn bũnɑ nu tɔmbu kɔsɑ mɑ nu nɑ bɛsɛn mi.
12 Bɑ Bɑɑnɑbɑsi sokɑ Susi, Pɔlu mɑɑ Herimɛsi\f |b14:12 Herimɛsi|d - Herimɛsi u sɑ̃ɑwɑ bũu wi u rɑ bũu ni nu tien gɑri tusie.\F, yèn sɔ̃ wiyɑ u wɑɑsu kuɑ. 13 Mɑ yɑ̃ku kowo goo wi u sɑ̃ɑ Susin bũu kɔ̃so, wìn bũu dirɑ wɑ̃ɑ wuun bɔkuɔ, u kɑ nɑɑ kinɛnu nɑ, kɑ mɑɑ biibii wuu gen kɔnnɔwɔ. Wi kɑ tɔn be kpuro bɑ kĩ bu gɔro be yɑ̃kuru koosi. 14 Sɑnɑm mɛ gɔro be, bɑ ye nuɑ, bɑ ben yɑbenu gɛ̃ɛkɑ mɑ bɑ duki dɑ tɔn wɔru gen suunu sɔɔ bɑ gbɑ̃sukumɔ bɑ nɛɛ, 15 durɔ bɛɛ, mbɑn sɔ̃nɑ i yeni mɔ̀. Bɛsɛn tii tɔmbɑ nge bɛɛ. Sɑ bɛɛ Lɑbɑɑri geɑ tubusiɑmɔwɑ, kpɑ i kɑ gɔ̃ru gɔsiɑ sɑ̃ɑ kɑmgirun di i wurɑ Gusunɔ Yinni wɑson mi, wi u wɔllu kɑ tem kɑ nim wɔ̃ku tɑkɑ kuɑ, kɑ yɑbu kpuro ye yɑ wɑ̃ɑ ye sɔɔ. 16 Yellu u derɑ tɔmbu kpuro bɑ ben gɔ̃ru kĩru kuɑ. 17 Adɑmɑ u ǹ tii deri seedɑ sɑri, u geɑ kuɑ, u bɛɛ gurɑ nɛɛsiɑmmɛ i kɑ dĩɑnu wɑ gbeɑɔ nin sɑɑ sɔɔ, kpɑ i n kɑ nuku dobu mɔ.
18 Bɑɑ mɛ bɑ gɑri yi geruɑ, kɑ nɔni swɑ̃ɑ bɑkɑrɑ bɑ tɔn be yinɑri bu bu yɑ̃kuru koosi.
19 Adɑmɑ Yuu gɑbɑ nɑ Antiɔsi kɑ Ikonimun di bɑ tɔn wɔru ge swɑɑ nim wiɑ, mɑ bɑ Pɔlu kpenu kɑsukɑ bɑ nùn gɑwɑ bɑ kɑ dɑ wuun biruɔ domi bɑ tɑmɑɑ u guwɑ. 20 Adɑmɑ sɑnɑm mɛ nɑɑnɛ dokeobɑ nɑ bɑ yɔ̃ bɑ nùn sikerenɛ, u seewɑ mɑ u wurɑ wuu sɔɔ. Yen sisiru wi kɑ Bɑɑnɑbɑsi bɑ doonɑ Dɛɛbe giɑ.
Pɔlu kɑ Bɑɑnɑbɑsi
bɑ wurɑ Sirin Antiɔsiɔ
21 Pɔlu kɑ Bɑɑnɑbɑsi bɑ Lɑbɑɑri geɑn wɑɑsu kuɑ Dɛɛbeɔ, mɑ tɔn dɑbinu kuɑ Yesun bwɑ̃ɑbu mi. Yen biru bɑ kpɑm wurɑ Lisitiɔ kɑ Ikonimuɔ kɑ mɑɑ Antiɔsi ye yɑ wɑ̃ɑ Pisidiɔ. 22 Bɑ nɑɑnɛ dokeobu tɑ̃sisiɑ bɑ bu dɑm kɑ̃ bu kɑ yɔ̃rɑ dim dim nɑɑnɛ dokebu sɔɔ. Bɑ bu sɔ̃ɔwɑ mɑ bɑ ǹ koo ko bɑ kun wɑhɑlɑ dɑbinu wɑ bu sere du mi Gusunɔ u bɑndu swĩi.
23 Mɑ bɑ Yesun yigbɛru bɑɑtere sɔɔ guro gurobu kuɑ. Ye bɑ kɑnɑru kuɑ kɑ nɔɔ bɔkuru bɑ kpɑ, bɑ bu Yinni nɔmu sɔndiɑ wi bɑ nɑɑnɛ doke.
24 Yen biru bɑ Pisidin tem sɑrɑ bɑ turɑ Pɑnfilin tem sɔɔ. 25 Ye bɑ wɑɑsu kuɑ Perigɑɔ mɑ bɑ sɑrɑ bɑ dɑ Atɑliɑɔ. 26 Min di, bɑ goo nimkuu duɑ bu kɑ kpɑm wurɑ Antiɔsiɔ, Sirin wuu mi, mi bɑ rɑɑ bu Gusunɔ nɔmu sɔndiɑ u kɑ bu durom kɛ̃ sɔmbu ten sɔ̃ te bɑ kuɑ bɑ kpɑ.