15
Bɑ mɛnnɔ kuɑ Yerusɑlɛmuɔ
1 Sɑɑ ye Pɔlu kɑ Bɑɑnɑbɑsi bɑ wɑ̃ɑ Antiɔsiɔ, durɔbu gɑbɑ nɑ sɑɑ Yudeɑn di, mɑ bɑ nɑɑnɛ dokeobu sɔ̃ɔmɔ bɑ mɔ̀, bɑ ǹ fɑɑbɑ wɑsi mɑ n kun mɔ bɑ derɑ bɑ bu bɑngo kuɑ nge mɛ Mɔwisin woodɑ yɑ geruɑ. 2 Pɔlu kɑ Bɑɑnɑbɑsi bɑ kɑ bu sikirinɑ gem gem gɑri yin sɔ̃. Mɑ nɑɑnɛ dokeobɑ gɔ̃ru doke bu Pɔlu kɑ Bɑɑnɑbɑsi kɑ mɑɑ gɑbu gɔri Yerusɑlɛmuɔ gɔrobu kɑ guro gurobun mi gɑri yin sɔ̃.
3 Yerɑ Yesun yigbɛru tɑ bu sɔɔru kuɑ bɑ swɑɑ wɔri, mɑ bɑ Fɛnisi kɑ Sɑmɑrin tem sɑrɑ bɑ nɑɑnɛ dokeobu sɔ̃ɔmɔ nge mɛ tɔn tukobu bɑ mɑɑ Yesu nɑɑnɛ doke. Yen bɑɑru yɑ bu nuku dobu wɛ̃ gem gem. 4 Ye bɑ turɑ Yerusɑlɛmuɔ, Yesun yigbɛru kɑ gɔrobu kɑ mɑɑ guro gurobu bɑ bu dɑm koosiɑ. Mɑ Pɔlu kɑ Bɑɑnɑbɑsi bɑ bu sɑɑriɑ ye Gusunɔ u kɑ bu kuɑ kpuro. 5 Adɑmɑ Fɑlisi gɑbu be bɑ nɑɑnɛ doke, bɑ seewɑ bɑ nɛɛ, tilɑsiwɑ bu nɑɑnɛ dokeo tɔn tuko be bɑngo kuɑ, kpɑ bu be sɔ̃ bu Mɔwisin woodɑ swĩi.
6 Mɑ gɔrobu kɑ guro gurobu bɑ mɛnnɑ bu kɑ gɑri yi wesiɑnɑ. 7 Ye bɑ gɑri yi gɑwɑmɔ, Piɛɛ u seewɑ u yɔ̃rɑ u nɛɛ, nɛgibu i yɛ̃ mɑ Gusunɔ u mɑn wunɑ bɛɛn suunu sɔɔn di n tɛ, n kɑ tɔn tukobu Lɑbɑɑri geɑ nɔɔsiɑ kpɑ bu nɑɑnɛ doke. 8 Mɑ Gusunɔ wi u tɔmbu kpuron gɔ̃rusu yɛ̃, u tɔn tuko be seedɑ diiyɑ ye u bu Hunde Dɛɛro kɑ̃ nge mɛ u sun kɑ̃. 9 U ǹ gɑ̃ɑnu wunɑnɛ bɛsɛ kɑ ben suunu sɔɔ. U mɑɑ ben gɔ̃rusu dɛɛrɑsiɑ nɑɑnɛ dokebun sɔ̃ nge mɛ u sun kuɑ. 10 Ǹ n mɛn nɑ, mbɑn sɔ̃nɑ i Gusunɔn lɑɑkɑri mɛɛrimɔ tɛ̃ ye i kɑ nɑɑnɛ dokeo be sɔmunu sɔbimɔ ni bɛsɛn sikɑdobɑ kɑ mɑɑ bɛsɛn tii sɑ kpɑnɑ su sɔbe. 11 Sɑ nɑɑnɛ sɑ̃ɑ mɑ sɑ fɑɑbɑ wɑ Yinni Yesun durom sɔ̃ nge mɛ ben tii bɑ wɑ.
12 Mɑ tɔn wɔru ge kpuro gɑ mɑri gɑ Bɑɑnɑbɑsi kɑ Pɔlu swɑɑ dɑki. Bɑ bu sɑɑriɑ nge mɛ Gusunɔ u kɑ bu dendɑ bu kɑ yĩrenu kɑ sɔm mɑɑmɑɑkiginu ko tɔn tukobun suunu sɔɔ. 13 Ye bɑ kpɑ, Yɑkɔbu u seewɑ u nɛɛ, nɛgibu i mɑn swɑɑ dɑkio. 14 Simɔɔ u bɛɛ tubusiɑ nge mɛ Gusunɔ u gbiɑ u kuɑ u kɑ tii tɔn tukobu gɑbu gɔsiɑ be bɑ koo soku wigibu. 15 Gɑri yi, yi sɑ̃ɑ tiɑ kɑ gɑri yi Gusunɔn sɔmɔbɑ yoruɑ Gusunɔn gɑri sɔɔ, bɑ nɛɛ,
16 <<Yinni Gusunɔ u nɛɛ,
sɑɑ yerɑ nɑ kon wurɑmɑ
kpɑ n Dɑfidin diru seeyɑ te tɑ wɔrumɑ.
Kon ten bɑnsu seeyɑ
kon kpɑm tu bɑni.
17 Kpɑ tɔn be bɑ tie bu nɛ Yinni Gusunɔ kɑsu,
kɑ mɑɑ tɔn tuko be bɑ sɑ̃ɑ nɛgibu.
18 Nɛ Yinni Gusunɔwɑ nɑ yeni geruɑ
nɛ wi nɑ gɑ̃ɑ ni sɔ̃ɔsi yellun di.>>
19 Yen sɔ̃nɑ nɛn bwisikunu sɔɔ, n ǹ weenɛ su gɑ̃ɑ sɛ̃sɔginu doke tɔn tuko ben swɑɑ sɔɔ be bɑ gɔ̃ru gɔsiɑmɔ bɑ wurɑmɔ Gusunɔn mi. 20 Adɑmɑ su bu tireru kuɑ su nɛɛ bu ku bũu sɑ̃ɑ dĩɑnu di, bu ku kɔ̃ɔ mɛnnɑ tɑntɑnɑru sɔɔ, bu ku yɑɑ tem ye bɑ wĩiru tɛmɑ bɑ kɑ go, bu ku mɑɑ yɑɑ yɛm di. 21 Domi tɛɛbun di wuu bɑɑgere sɔɔ bɑ rɑ Mɔwisin tirenu gɑri Yuubɑn mɛnnɔ yenɔ tɔ̃ɔ wɛ̃rɑrugiru bɑɑtere, kpɑ bu win gɑri wɑɑsu ko.
Bɑ tɔn tuko nɑɑnɛ dokeobu tireru mɔrisiɑ
22 Mɑ n gɔrobu kɑ guro gurobu kɑ mɑɑ Yesun yigbɛru kpuro wɛ̃re bu gɑbu gɔsi ben suunu sɔɔ, kpɑ bu be gɔri Antiɔsiɔ kɑ Pɔlu kɑ Bɑɑnɑbɑsi sɑnnu. Bɑ Silɑsi gɔsɑ kɑ Yudu wi bɑ mɑɑ sokumɔ Bɑɑsɑbɑ, be bɑ bɛɛrɛ mɔ nɑɑnɛ dokeobun suunu sɔɔ. 23 Mɑ durɔ be, bɑ dɑ kɑ tire te, te tɑ nɛɛ, bɛsɛ gɔrobu kɑ nɑɑnɛ dokeobun guro gurobu sɑ bɛɛ tɔburɑ, bɛɛ nɑɑnɛ dokeobu Antiɔsiɔ kɑ bɛɛ be i wɑ̃ɑ Siri kɑ Silisin temɔ, bɛɛ be bɑ mɑrɑ tɔn tukobu. 24 Sɑ nuɑ mɑ bɛsɛn gɑbu bɑ dɑ bɛɛn mi bɑ bɛɛ burisinɑ bɑ mɑɑ bɛɛn bwisikunu gɔsikiɑ kɑ ben gɑri. Adɑmɑ sɑ ǹ bu sɔ̃ɔwɑ bu ko mɛ. 25 Yerɑ sɑ wesiɑnɑ su gɑbu gɔsi su bu bɛɛ gɔriɑ kɑ bɛsɛn kĩnɑsibu Bɑɑnɑbɑsi kɑ Pɔlu sɑnnu, 26 durɔ be bɑ ben wɑ̃ɑru kɑri bɔrie Yinni Yesu Kirisin yĩsirun sɔ̃. 27 Yen sɔ̃nɑ sɑ bɛɛ Yudu kɑ Silɑsi gɔriɑ be bɑ koo bɛɛ gɑri yi sɔ̃ nɔɔ kɑ nɔɔ. 28 Domi bɛsɛ kɑ Hunde Dɛɛro n sun wɛ̃re su ku bɛɛ sɔmunu gɑnu sɔbi mɑ n kun mɔ nini. 29 I ku bũu sɑ̃ɑ dĩɑnu di, i ku yɑɑ yɛm di, i ku yɑɑ tem ye bɑ wĩiru tɛmɑ bɑ kɑ go, i ku mɑɑ kɔ̃ɔ mɛnnɑ tɑntɑnɑru sɔɔ. Ì n tii nɛnuɑ yɑbu yeni kpuron di n ko n wɛ̃rɑ. N kuɑ tɛɛru.
30 Yerɑ bɑ swɑɑ wɔri bɑ doonɑ Antiɔsiɔ. Ye bɑ turɑ mi, bɑ nɑɑnɛ dokeobu mɛnnɑ, bɑ bu tire te wɛ̃. 31 Ye bɑ tire te gɑrɑ tɑ bu dɑm kɑ̃ mɑ ben nukurɑ dorɑ. 32 Yudu kɑ Silɑsi be bɑ mɑɑ sɑ̃ɑ Gusunɔn sɔmɔbu, bɑ nɑɑnɛ dokeobu dɑm kɑ̃ bɑ mɑɑ bu tɑ̃sisiɑ kɑ gɑri dɑbiru. 33 Ye bɑ sɔ̃ɔ yiru kuɑ mi, nɑɑnɛ dokeobɑ bu nɔɔ kɑnɑ, bɑ nɛɛ, bu gɔsirɑ kɑ ɑlɑfiɑ be bɑ bu gɔrɑn mi.(( 34 Adɑmɑ n Silɑsi wɛ̃re u kɑ ginɑ bu sinɑ.))
35 Pɔlu kɑ Bɑɑnɑbɑsi bɑ sinɑ Antiɔsiɔ. Be kɑ mɑɑ tɔn dɑbinu sɑnnu bɑ Yinnin gɑri keu sɔ̃ɔsi, bɑ mɑɑ yi wɑɑsu kuɑ.
Pɔlu kɑ Bɑɑnɑbɑsi bɑ kɑrɑnɑ
36 Sɔ̃ɔ mɛɛrun biru Pɔlu u Bɑɑnɑbɑsi sɔ̃ɔwɑ bu kpɑm wurɑ bu nɑɑnɛ dokeobu berɑ wuu bɑɑgere sɔɔ mi bɑ rɑɑ Yinnin gɑri wɑɑsu kuɑ, kpɑ bu wɑ nge mɛ bɑ kɑ wɑ̃ɑ.
37 Bɑɑnɑbɑsi u kĩ Yohɑnu Mɑɑku u kɑ bu dɑ sɑnnu. 38 Adɑmɑ Pɔlu u geruɑ u nɛɛ, n ǹ weenɛ bu kɑ nùn dɑ domi u ǹ dɑɑ bu yɔ̃siri ben sɔmburu sɔɔ, u bu deriwɑ u gɔsirɑ Pɑnfilin di. 39 Yerɑ bɑ sikirinɑ too sere bɑ kɑrɑnɑ. Bɑɑnɑbɑsi u Mɑɑku suɑ mɑ bɑ goo nimkuu duɑ bɑ dɑ Sipuɔ. 40 Pɔlu u Silɑsi gɔsɑ, mɑ nɑɑnɛ dokeobu bɑ bu kɑnɑru kuɑ bɑ nɛɛ, Gusunɔn durom mu n kɑ bu wɑ̃ɑ. Mɑ bɑ ben sɑnum wɔri. 41 Bɑ dɑ Siri kɑ Silisin temɔ bɑ Yesun yigbɛnu tɑ̃sisiɑmɔ.