16
Timɔte u Pɔlu kɑ Silɑsi yɔ̃siri
1 Pɔlu u dɑ Dɛɛbeɔ kɑ Lisitiɔ. Nɑɑnɛ dokeo goo wɑ̃ɑ Lisiti mi, wi bɑ mɔ̀ Timɔte. Win mɛro sɑ̃ɑwɑ Yuu nɑɑnɛ dokeo, mɑ win tundo sɑ̃ɑ Gɛrɛki. 2 Nɑɑnɛ dokeo be bɑ wɑ̃ɑ Lisiti kɑ Ikonimuɔ, bɑ win seedɑ geɑ dimɔ. 3 Pɔlu u kĩ Timɔte u nùn yɔ̃siri, mɑ u nùn bɑngo kuɑ Yuubɑn sɔ̃ be bɑ wɑ̃ɑ berɑ mi, domi be kpuro bɑ yɛ̃ mɑ win tundo Gɛrɛkiwɑ. 4 Mɑ bɑ dɑ dɑ wuu kɑ wuu bɑ nɑɑnɛ dokeobu sɔ̃ɔwɑ ye gɔrobu kɑ yigbɛ guro guro be bɑ wɑ̃ɑ Yerusɑlɛmuɔ bɑ wesiɑnɑ bɑ yi, kpɑ bu ye mɛm nɔɔwɑ. 5 Nge mɛyɑ Yesun yigbɛnu nu tɑ̃sɑ nɑɑnɛ dokebu sɔɔ, mɑ nu dɑbiru sosimɔ tɔ̃ru bɑɑtere.
Pɔlu u kɑ̃siru wɑ Torɑsiɔ
6 Hunde Dɛɛro u ǹ dere bu Lɑbɑɑri geɑn wɑɑsu ko Asin temɔ. Yeyɑ n derɑ bɑ Firigi kɑ Gɑlɑtin tem bukiɑnɑ. 7 Ye bɑ turɑ Misin temɔ, bɑ kĩɑ bu Bitinin tem du, ɑdɑmɑ Yesun Hunde bu yinɑri. 8 Yeyɑ n derɑ bɑ Misin tem bukiɑnɑ bɑ dɑ yen wuu ge bɑ mɔ̀ Torɑsiɔ. 9 Pɔlu u kɑ̃siru wɑ wɔ̃kuru. Kɑ̃si te sɔɔ, u Mɑsedɔnigii goo wɑ u yɔ̃ u nùn kɑnɑmɔ u nɑ Mɑsedɔniɔ u kɑ bu somi. 10 Ye u kɑ̃si te wɑ, mii mii sɑ sɔɔru kuɑ su kɑ dɑ Mɑsedɔniɔ, domi sɑ tubɑ mɑ Gusunɔwɑ u sun soku su kɑ bu Lɑbɑɑri geɑn wɑɑsu kuɑ.
Lidiɑ u nɑɑnɛ doke Filipiɔ
11 Torɑsiɔwɑ sɑ goo nimkuu duɑ, mɑ sɑ dɑ Sɑmɔtɑsin deedeeru, yen sisiru sɑ dɑ Nɛɑpolisiɔ. 12 Sɑɑ min diyɑ sɑ dɑ sɑ sɔ̃ɔ yiru kuɑ wuu ge bɑ mɔ̀ Filipiɔ. Wuu gerɑ, sɑ gbiɑ sɑ girɑri Mɑsedɔnin tem sɔɔ. N deemɑ Romugibɑ bɑ wuu ge mɔ. 13 Tɔ̃ɔ wɛ̃rɑrugiru sɔɔ, sɑ yɑrɑ wuu min di sɑ dɑ dɑru bɔ̃ɔ gɑgun mi, mi sɑ yĩiyɔ kɑnɑ yerɑ ko n wɑ̃ɑ. Sɑ sinɑ sɑ kɑ kurɔbu gɑbu gɑri kuɑ be bɑ mɛnnɛ mi. 14 Kurɔ goo wɑ̃ɑ mi, wi bɑ mɔ̀ Lidiɑ Tiɑtirɑgii, wi u rɑ beku gobiginu dɔre ni bɑ wɔ̃kuɑ. U mɑɑ Gusunɔn bɛɛrɛ yɛ̃. U swɑɑ dɑki mɑ Yinni Gusunɔ u win gɔ̃ru wukiɑ u kɑ Pɔlun gɑri nɑɑnɛ doke. 15 Kurɔ wi kɑ win yɛnugibu bɑ bɑtɛmu kuɑ. Mɑ u sun kɑnɑ su dɑ su sinɑ win yɛnuɔ, sɑ̀ n nùn gɑrisi nɑɑnɛ dokeo Yinni sɔɔ kɑ gem.
U sun kɔkurɑ sere sɑ wurɑ sɑ dɑ.
Pirisɔm sɔɔ Filipiɔ
16 Sɔ̃ɔ teeru nge mɛ sɑ dɔɔ kɑnɑ yerɔ, sɑ kɑ wɔndiɑ yoo goo yinnɑ wi u wɛrɛku mɔ. Wɛrɛku ge, gɑ̀ n seewɑ u rɑ n gerumɔwɑ ye n ko n koorɑ. Win yinnibɑ mɑɑ gobi bɛkɛ wɑɑmɔ win sɔ̃. 17 U sun swĩi bɛsɛ kɑ Pɔlu mɑ u gbɑ̃rɑmɔ u mɔ̀, durɔ beni Yinni Wɔrukoon sɔm kowobɑ, bɑ nɑwɑ bu kɑ bɛɛ fɑɑbɑn swɑɑ sɔ̃ɔsi.
18 Mɛyɑ u rɑ n gerumɔ yɑm sɑ̃reru bɑɑtere sere Pɔlu u gɑri yi tusɑ. Mɑ u sĩirɑ u wɛrɛku ge sɔ̃ɔwɑ u nɛɛ, kɑ Yesu Kirisin yĩsirɑ nɑ nun sɔ̃ɔmɔ, ɑ yɑrio sɑɑ win min di.
Mii mii mɑ wɛrɛku ge, gɑ yɑrɑ. 19 Ye win yinnibɑ giɑ mɑ bɑ ǹ mɑɑ gobi wɑsi win min di, bɑ Pɔlu kɑ Silɑsi mwɑ bɑ bu bɔrikiɑ bɑ kɑ bu dɑ siri kowobun mi, mi tɔmbu bɑ rɑ mɛnnɛ. 20 Bɑ kɑ bu dɑ Romun wirugibun wuswɑɑɔ bɑ nɛɛ, durɔ beni bɑ bɛsɛn wuu burisimɔwɑ. Be Yuubɑrɑ 21 bɑ mɑɑ komɑnu gɑnu sɔ̃ɔsimɔ ni bɛsɛn woodɑbɑ bɑ yinɑ su swĩi bɛsɛ Romugibu.
22 Mɑ tɔn wɔru gɑ bu mɔru seesi, mɑ wirugibu bɑ Pɔlu kɑ Silɑsin yɑbenu kɑsukɑ, mɑ bɑ woodɑ wɛ̃ bu be dɑ̃ɑ so. 23 Ye bɑ bu dɑ̃ɑ kpɑsirɑ bɑ kpɑ, bɑ bu kɑre pirisɔm dirɔ, mɑ bɑ pirisɔm dirun kɔ̃so woodɑ wɛ̃ u bu nɔni dokeo gem gem. 24 Pirisɔm kɔ̃so wi, u woodɑ ye mɛm nɔɔwɑ mɑ u Pɔlu kɑ Silɑsi kpɛ̃ɛ sere dii sɔɔwɔ mɑ u ben nɑɑsu gɑn dɑ̃ru doke.
25 Ye n kuɑ wɔ̃ku suunun bɔnun sɑkɑ, Pɔlu kɑ Silɑsi bɑ kɑnɑru mɔ̀ bɑ womusu mɔ̀ bɑ Gusunɔ siɑrɑmɔ. Mɑ pirisɔm be bɑ wɑ̃ɑ mi, bɑ bu swɑɑ dɑki. 26 Suɑru sɔɔ tem yĩirɑ kɑ dɑm mɑ pirisɔm dirɑ diirɑ sere kɑ ten kpɛɛkpɛɛkuɔ. Mii mii ten gɑmbobɑ kpuro bɑ kɛnikiɑrɑ, mɑ pirisɔm bɑɑwuren yɔni kusirɑ yi wɔrumɑ. 27 Ye pirisɔm kɔ̃so u yɑndɑ, u wɑ pirisɔm dirun gɑmbobɑ bɑ wukiɑre, u tɑmɑɑ pirisɔmbɑ kpuro bɑ yɑkurɑwɑ. Yerɑ u win tɑkobi womɑ u kĩ u tii go. 28 Adɑmɑ Pɔlu u gbɑ̃rɑ too too u nɛɛ, ɑ ku tii kɔ̃sɑ kuɑ, bɛsɛ kpurowɑ sɑ wɑ̃ɑ mi.
29 Yerɑ pirisɔm kɔ̃so wi, u fitilɑ bikiɑ mɑ u kɑ dukɑ duɑ pirisɔm dirɔ mɑ u yiirɑ kɑ diiribu Pɔlu kɑ Silɑsin wuswɑɑɔ. 30 U bu yɑrɑmɑ tɔɔwɔ mɑ u nɛɛ, tɔnwerobu, ɑmɔnɑ kon ko n kɑ fɑɑbɑ wɑɑrɑ.
31 Bɑ nɛɛ, ɑ Yinni Yesu nɑɑnɛ dokeo, kɑɑ fɑɑbɑ wɑ wunɛ kɑ wunɛn yɛnugibu.
32 Mɑ bɑ nùn Yinnin gɑri wɑɑsu kuɑ, kɑ sere be kpuro be bɑ wɑ̃ɑ win yɛnuɔ. 33 Sɑɑ tiɑ ye, wɔ̃ku te sɔɔ, pirisɔm kɔ̃so wi, u ben bosu teɑ. Mɑ wi kɑ win yɛnugibu kpuro bɑ bɑtɛmu kuɑ yɑnde. 34 U kɑ Pɔlu kɑ Silɑsi dɑ win dirɔ, mɑ u bu dĩɑnu wɛ̃ bɑ di. Wi kɑ win yɛnugibu, ben nukurɑ dorɑ gem gem yèn sɔ̃ bɑ Gusunɔ nɑɑnɛ doke.
35 Ye yɑm mu sɑ̃rɑ Romun wirugibu bɑ polisibɑ gɔrɑ bu dɑ bu gere bu be durɔ be kɑro.
36 Mɑ pirisɔm kɔ̃so wi, u gɑri yi Pɔlu sɔ̃ɔwɑ u nɛɛ, wirugibɑ woodɑ wɛ̃ n kɑ bɛɛ kɑrɑ wunɛ kɑ Silɑsi. Yen sɔ̃ tɛ̃, i dɔɔnɔ sɛ̃ɛ.
37 Adɑmɑ Pɔlu u polisi be sɔ̃ɔwɑ u nɛɛ, ɑɑwo, bɑ sun so bɑtumɑ sɔɔ, bɑ ǹ sun siri, mɑ bɛsɛn tii sɑ mɑɑ sɑ̃ɑwɑ Romugibu. Yen biru bɑ sun kɑsɑ kuɑ pirisɔm dirɔ. Wee tɛ̃ bɑ kĩ bu sun yɑrɑ ɑsiri sɔɔ? Aɑwo, sere bu nɑ ben tii bu sun yɑrɑ.
38 Polisibɑ bɑ kɑ gɑri yi dɑ bɑ Romun wirugibu sɔ̃ɔwɑ. Ye wirugii be, bɑ nuɑ mɑ Pɔlu kɑ Silɑsi bɑ sɑ̃ɑwɑ Romugibu, yerɑ bɑ nɑndɑ. 39 Mɑ bɑ dɑ bɑ bu suuru kɑnɑ bɑ bu yɑrɑ pirisɔm di, mɑ bɑ bu sɔ̃ɔwɑ bu wuu ge yɑrio. 40 Pɔlu kɑ Silɑsi bɑ yɑrɑ pirisɔm diru min di bɑ dɑ Lidiɑn yɛnuɔ. Ye bɑ nɑɑnɛ dokeobu wɑ bɑ bu dɑm kɑ̃, yerɑ bɑ doonɑ.