17
Pɔlu kɑ Silɑsi bɑ Tɛsɑlonikɑ dɑ
1 Nge mɛ bɑ dɔɔ bɑ wusu yiru sɑrɑ si bɑ sokumɔ Anfipolisi kɑ Apoloni, mɑ bɑ turɑ Tɛsɑlonikɑɔ mi Yuubɑ bɑ mɛnnɔ yeru mɔ. 2 Nge mɛ Pɔlun dɔɔnɛ u dɑ mɛnnɔ yeru mi. Mɑ ɑlusumɑ itɑn tɔ̃ɔ wɛ̃rɑrugiru bɑɑtere u kɑ bu wesiɑnɑ Gusunɔn gɑri sɔɔ. 3 U bu tubusiɑ mɑ u bu sɔ̃ɔsi gɑri yi sɔɔ mɑ Kirisi wi kun koo ko u kun nɔni swɑ̃ɑru wɑ kpɑ u se gɔrin di. U mɑɑ bu sɔ̃ɔwɑ mɑ Yesu wìn gɑri u kpɑrɑmɔ wiyɑ Kirisi wi.
4 Be bɑ nùn swɑɑ dɑki sɔɔ, gɑbɑ gɑri yi wurɑ, mɑ bɑ kɑ nùn nɔɔ tiɑ kuɑ wi kɑ Silɑsi. Mɛyɑ mɑɑ tɔn tuko dɑbinu bɑ kuɑ be bɑ Gusunɔn bɛɛrɛ yɛ̃, kɑ mɑɑ tɔn kurɔ dɑbinu be bɑ sɑ̃ɑ tɔn girobu wuu ge sɔɔ.
5 Adɑmɑ Yuubɑ bɑ nisinu seewɑ mɑ bɑ tɔn bɛrɛtɛkɛbɑ mɛnnɑ wuu sɔɔ bɑ wuu kpuro burinɑ, mɑ be kpuro bɑ dɑ Yɑsonin yɛnuɔ bu wɑ bu Pɔlu kɑ Silɑsi yɑrɑmɑ tɔn wɔrun wuswɑɑɔ. 6 Ye bɑ kun bu wɑ, bɑ Yɑsoni kɑ nɑɑnɛ dokeobu gɑbu gɑwɑ bɑ kɑ bu dɑ wuun wirugibun mi. Bɑ gbɑ̃sukumɔ bɑ mɔ̀, tɔn be, be bɑ hɑnduniɑ kpuro gɔsikiɑmɔ, bɑ mɑɑ nɑ mini, 7 mɑ Yɑsoni u derɑ bɑ sɔbiɑ win yɛnuɔ. Be kpuro bɑ tem yɛ̃ron woodɑ sɑnkumɔ, bɑ nɛɛ sinɑ boko goo mɑɑ wɑ̃ɑ wi bɑ mɔ̀ Yesu.
8 Yuubɑn gɑri yi, yi derɑ tɔn wɔru ge kɑ wuun wirugii be bɑ gɑri yi nuɑ bɑ burisinɑ. 9 Mɑ bɑ Yɑsoni kɑ nɑɑnɛ dokeo be kɑrɑbun gobi bikiɑ, mɑ bɑ derɑ bɑ doonɑ.
Bɑ dɑ Bereɔ
10 Mii mii nɑɑnɛ dokeobɑ derɑ Pɔlu kɑ Silɑsi bɑ doonɑ Bereɔ wɔ̃kuru. Ye bɑ turɑ mi, bɑ dɑ Yuubɑn mɛnnɔ yerɔ. 11 Tɔn be bɑ wɑ̃ɑ mi, bɑ lɑɑkɑri mɔ n kere tɔn be bɑ wɑ̃ɑ Tɛsɑlonikɑɔ. Bɑ gɑri yi mwɑ kɑ nuku dobu. Bɑ rɑ Gusunɔn gɑri wɛ̃ɛri tɔ̃ru bɑɑtere bu kɑ wɑ ye Pɔlu bu sɔ̃ɔmɔ ǹ n gem nɑ. 12 Yen sɑɑbuwɑ ben dɑbirɑ nɑɑnɛ doke, mɑ Gɛrɛki tɔn kurɔbu gɑbu be bɑ yĩsinu yɑrɑ bɑ nɑɑnɛ doke, kɑ sere mɑɑ tɔn durɔ dɑbinu. 13 Adɑmɑ sɑnɑm mɛ Yuu be bɑ wɑ̃ɑ Tɛsɑlonikɑɔ bɑ nuɑ mɑ Pɔlu u mɑɑ Gusunɔn gɑri wɑɑsu mɔ̀ Bereɔ, bɑ dɑ mi, mɑ bɑ tɔn wɔru mɔru seeyɑ bɑ burisinɑ. 14 Mii mii nɑɑnɛ dokeo be, bɑ derɑ Pɔlu dɑ nim wɔ̃kun berɑ giɑ, ɑdɑmɑ Silɑsi kɑ Timɔte bɑ sinɑ Bereɔ. 15 Be bɑ Pɔlu yɔ̃siri, bɑ kɑ nùn dɑwɑ sere Atɛniɔ. Yen biru ye bɑ kpɑm gɔsirɔ Bereɔ, Pɔlu u bu nɔɔ mɔrisiɑ u nɛɛ, bu Silɑsi kɑ Timɔte sɔ̃ bu nùn nɑɑmwɛmɑ fuuku.
Pɔlu wɑ̃ɑ Atɛniɔ
16 Sɑnɑm mɛ Pɔlu u bu mɑrɑ Atɛniɔ, win bwɛ̃rɑ kun kpunɛ domi u wɑ bũu turɑnu yibɑ wuu mi. 17 U rɑ Yuubɑn mɛnnɔ yeru de u kɑ bu wesiɑnɑ, be kɑ Gɛrɛki be bɑ Gusunɔn bɛɛrɛ yɛ̃. U rɑ mɑɑ tɔmbu wɑɑsu kue tɔ̃ru bɑɑtere bɑtumɑ mi wuugibɑ rɑ mɛnnɛ. 18 Sɑnɑm mɛ u kɑ bu gɑri mɔ̀ keu koosiobu gɑbu be bɑ sɑ̃ɑ Epikurigibu\f |b17:18 Epikurigibu|d - Ben yinni Epikuri u nɛɛ, doo nɔɔrɑ tɑ kpuro kere tɔnun wɑ̃ɑru sɔɔ.\F kɑ Sitosibɑ\f |b17:18 Sitosibɑ|d - Bɑ durɔ wi bɑ mɔ̀ Simɔɔn sɔ̃ɔsiru swĩi wi u nɛɛ, n weenɛ tɔnu u n dɛɛre, u win tɔnusi kĩɑ, kpɑ u Gusunɔ bɛɛrɛ wɛ̃.\F bɑ dɑ win mi, bɑ kɑ nùn sikirinɑmɔ. Ben gɑbɑ nɛɛ, mbɑ durɔsi gɑri bɛkɛgii wini u gerumɔ.
Mɑ gɑbɑ mɑɑ nɛɛ, bũu tukobɑ u kɑ yɑ̃. Bɑ yeni geruɑ yèn sɔ̃ Pɔlu u Yesun gɑri kɑ win seebu gɔrin din wɑɑsu mɔ̀.
19 Mɑ bɑ kɑ nùn dɑ Arepɑguɔ\f |b17:19 Arepɑguɔ|d - Yɑ sɑ̃ɑwɑ guuru Atɛniɔ mi wuun wirugibɑ rɑ mɛnnɛ.\F, wɔɔ berɑ mi wirugibu bɑ rɑ mɛnnɛ, mɑ bɑ nɛɛ, sɑ kĩ su sɔ̃ɔsi kpɑɑ te nɔwɑ te ɑ kpɑrɑmɔ mi. 20 Domi ɑ sun gɑ̃ɑ kpɑɑnun gɑri sɔ̃ɔmɔ, sɑ mɑɑ kĩ su nin tubusiɑnu giɑ.
21 N deemɑ Atɛnigibu kpuro kɑ sere sɔɔ be bɑ rɑ nɛ mi, bɑ rɑ ben wɛ̃rɑbun sɑɑ kpuro deriwɑ bu kɑ gɑ̃ɑ kpɑɑnun bɑɑru nɔ, ǹ kun mɛ bu kɑ gere.
22 Pɔlu u yɔ̃rɑ mɛnnɔ yee ten suunu sɔɔ u nɛɛ, bɛɛ Atɛnigibu, nɑ wɑ i sɑ̃ɑwɑ be bɑ sɑ̃ɑru kĩ gem gem. 23 Domi sɑnɑm mɛ nɑ bɔsu bɛɛn wuu mi, nɑ gɑ̃ɑ dɑbinu mɛɛrimɔ ni i sɑ̃ɑmɔ, nɑ turɑru gɑru wɑ tèn mi bɑ yoruɑ, Gusunɔ wi sɑ kun yɛ̃. Tɛ̃ Gusunɔ wi, wi bɛɛ i sɑ̃ɑmɔ yɛ̃ru sɑriru sɔɔ mi, wiyɑ nɑ bɛɛ tubusiɑmɔ. 24 Wiyɑ wi u hɑnduniɑ tɑkɑ kuɑ, kɑ yɑbu bɑɑyere ye yɑ wɑ̃ɑ ye sɔɔ, u sɑ̃ɑwɑ wɔllu kɑ tem Yinni, u ku rɑ sinɛ dinu sɔɔ ni bɑ kɑ nɔmɑ bɑnɑ. 25 Tɔmbun nɔmɑ kun kpɛ̃ yu nùn nɔɔri, domi u ǹ gɑ̃ɑnu gɑnun bukɑtɑ mɔ. Win tii tiiwɑ u yɑbu bɑɑyere wɑ̃ɑru kɑ wɛ̃siɑru kɑ bukɑtɑ kpuro wɛ̃ɛmɔ. 26 Tɔn turon min diyɑ u bwesenu kpuro tɑkɑ kuɑ bɑ kɑ tɛrie hɑnduniɑ kpuro sɔɔ. Sɑɑ yellun di u sɑɑbɑ yi yi, mɑ u tɔmbun wɑ̃ɑ yenu nɔɔ burɑ yenu kuɑ. 27 Gusunɔ u yeni kpuro kuɑ bu kɑ bɑbi bu nùn kɑsu kpɑ bu nùn wɑ bɑɑ mɛ u ǹ kɑ bɛsɛn bɑɑwure tomɑ. 28 Domi wi sɔɔrɑ sɑ wɑ̃ɑru mɔ, wiyɑ derɑ bɛsɛn wɑsi suɑrɑmɔ, wi sɔɔrɑ sɑ wɑ̃ɑ, nge mɛ gɑbu bɛɛn tire yorobu sɔɔ bɑ nɛɛ, sɑ mɑɑ sɑ̃ɑ Gusunɔn bibu. 29 Ǹ n mɛn nɑ, sɑ̀ n sɑ̃ɑ Gusunɔn bibu, n ǹ weenɛ su bwisiku mɑ Gusunɔ u sɑ̃ɑ nge bwɑ̃ɑroku ge tɔnu u bwisikɑ u kɑ nɔmɑ kuɑ kɑ wurɑ ǹ kun mɛ kɑ sii geesu, ǹ kun mɛ kɑ kperu. 30 Gusunɔ u ǹ tɔmbun yellun yɛ̃ru sɑriru gɑrisi, ɑdɑmɑ tɛ̃ u bɑɑmɑ kpuron tɔmbu woodɑ wɛ̃ɛmɔ bu kɑ gɔsirɑ ben kom kɔ̃sum di. 31 Domi u tɔ̃ru yi tè sɔɔ u koo hɑnduniɑgibu kpuro siri dee dee kɑ durɔ win sɑɑbu wi u gɔsɑ, mɑ u nùn bɑɑwure sɔ̃ɔsi ye u nùn seeyɑ gɔrin di.
32 Ye bɑ nuɑ Pɔlu u seebu gɔrin din gɑri geruɑ, gɑbɑ nùn yɑɑkoru kuɑ, ɑdɑmɑ gɑbɑ nɛɛ bɑ kĩ bu rɑ kpɑm gɑri yi nɔ.