18
Pɔlu u Korinti dɑ
1 Yenin biru Pɔlu u doonɑ Atɛni min di, u wuu gɑgu dɑ ge bɑ rɑ soku Korinti. 2 Miyɑ u Yuu goo deemɑ wi bɑ mɔ̀ Akilɑsi, wi bɑ mɑrɑ Pontuɔ. N ǹ tɛ ye u kɑ nɑ sɑɑ Itɑlin tem di kɑ win kurɔ Pirisilɑ sɑnnu yèn sɔ̃ tem yɛ̃ro Kolodu u woodɑ yɑrɑ Yuubɑ kpuro bu yɑri Romun di. Mɑ Pɔlu u kɑ bu bɔrɔnu kuɑ, 3 u sinɑ kɑ be domi sɔm bwese teerɑ bɑ rɑ ko. Kuu bekuruginɑ be kpuro bɑ rɑ ko. 4 Tɔ̃ɔ wɛ̃rɑrugiru bɑɑtere u rɑ Yuubɑn mɛnnɔ yeru de u kɑ bu wesiɑnɑ. U rɑ bu kɔkiri be kɑ Gɛrɛkibɑ bu kɑ Yesu nɑɑnɛ doke.
5 Sɑnɑm mɛ Silɑsi kɑ Timɔte bɑ tunumɑ sɑɑ Mɑsedɔnin di, Pɔlu u win tii wɛ̃ u kɑ wɑɑsu ko sɑɑ kpuro, u Yuubɑ sɔ̃ɔmɔ mɑ Yesu sɑ̃ɑwɑ Kirisi wi kɑ gem. 6 Adɑmɑ ye bɑ nùn siki bɑ nùn gɑri kɔ̃si gerusi, Pɔlu u bu win yɑberun tuɑ kpɑre u nɛɛ, bɑ̀ n kɑm kuɑ ben tiin tɑɑrɛwɑ, n ǹ wi Pɔlu wɑ. U mɑɑ nɛɛ, sɑɑ gisɔn di wi, u koo dɑ u tɔn tukobu wɑɑsu kuɑ.
7 Ye u yɑrɑ min di, mɑ u dɑ u sinɑ tɔn tuko goon yɛnuɔ wi bɑ mɔ̀ Titu Yusitu, wi u Gusunɔ nɑsie. Durɔ win dirɑ wɑ̃ɑ mɛnnɔ yerun bɔkuɔ. 8 Adɑmɑ Kirisipu wi u sɑ̃ɑ mɛnnɔ yerun wirugii, u Yinni nɑɑnɛ doke kɑ win yɛnugibu kpuro. Korintigibu dɑbiru bɑ Lɑbɑɑri geɑ nuɑ, bɑ mɑɑ Yesu nɑɑnɛ doke, mɑ bɑ bu bɑtɛmu kuɑ.
9 Gusunɔ u Pɔlu sɔ̃ɔwɑ wɔ̃kuru kɑ̃siru sɔɔ u nɛɛ, ɑ ku bɛrum ko, ɑ n gɑri yi gerumɔ, ɑ ku mɑri, 10 nɑ wɑ̃ɑ kɑ wunɛ, goo kun kpɛ̃ u nun nɔmɑ doke u sere nun gɑ̃ɑ kɔ̃sunu kuɑ. Domi tɔn dɑbinɑ nu wɑ̃ɑ wuu ge sɔɔ ni nu sɑ̃ɑ nɛgibu.
11 Pɔlu u sinɑ wuu ge sɔɔ wɔ̃ɔ tiɑ kɑ suru nɔɔbɑ tiɑ u bu Gusunɔn gɑri sɔ̃ɔsimɔ.
12 Sɑnɑm mɛ Gɑlioni u sɑ̃ɑ tem yɛ̃ro Gɛrɛkibɑn tem sɔɔ, Yuubɑ bɑ nɔɔ tiɑ kuɑ bɑ Pɔlu seesi bɑ kɑ nùn dɑ siri yerɔ. 13 Bɑ nɛɛ, durɔ wini u tɔmbu bɔriemɔwɑ bu Gusunɔ sɑ̃ kɑ swɑɑ gɑɑ ye woodɑ yɑ yinɑ.
14 Ye Pɔlu kĩ u gɑri gere, yerɑ Gɑlioni u Yuu be sɔ̃ɔwɑ u nɛɛ, ǹ n sɑ̃ɑn nɑ torɑrun gɑri, ǹ kun mɛ kɔ̃sɑ gɑɑ ye u kuɑ, kon dɑɑ wurɑ n bɛɛ Yuubɑ swɑɑ dɑki. 15 Adɑmɑ ǹ n gɑrin sikirinɔsun nɑ, kɑ yĩsɑ kɑ bɛɛn tiin woodɑ, bɛɛn gɑriyɑ. Nɑ ǹ kpɛ̃ n ko gɑri yin siri kowo.
16 Mɑ u bu kpɑrɑ yɑ̃ɑ yɑ̃ɑ siri yerun di. 17 Sɑɑ yerɑ tɔn be kpuro bɑ Sɔsitɛni mwɑ, wi u sɑ̃ɑ Yuubɑn mɛnnɔ yerun wirugii, bɑ nùn soberu wɔri siri yerun wuswɑɑɔ. Adɑmɑ gɑri yi kun Gɑlioni gɑ̃ɑnu sɑ̃ɑ.
Pɔlu wurɑ Antiɔsiɔ
18 Pɔlu u kpɑm sinɑ Korinti mi sɔ̃ɔ mɛɛru. Yen biru u nɑɑnɛ dokeobu nɔɔ kɑnɑ u dɑ u kɔnɑ Sɑnkereɔ domi u rɑɑ Gusunɔ nɔɔ mwɛɛru\f |b18:18 nɔɔ mwɛɛru|d - Nɔɔ mwɛɛ te, tɑ sɑ̃ɑwɑ te Yuubɑ bɑ̀ n Gusunɔ kuɑ bɑ ku rɑ tɑm bɔmbɔm nɔ, bɑ ku rɑ mɑɑ kɔ̃ni sere bɑ̀ n nɔɔ mwɛɛ te yibiɑ.\F kuɑ. Mɑ u goo nimkuu duɑ kɑ Pirisilɑ kɑ Akilɑsi sɑnnu bɑ doonɑ Siri giɑ. 19 Mɑ bɑ turɑ Efesuɔ miyɑ Pɔlu u Pirisilɑ kɑ Akilɑsi deri. Mɑ u duɑ Yuubɑn mɛnnɔ yerɔ, u kɑ bu wesiɑnɑ. 20 Bɑ nùn kɑnɑ u sɔ̃ɔ yiru ko kɑ be, ɑdɑmɑ u ǹ wure. 21 Sɑnɑm mɛ u doonɔ, u bu sɔ̃ɔwɑ u nɛɛ, ǹ n Gusunɔn kĩrun nɑ u koo kpɑm wurɑmɑ ben mi.
Mɑ u goo nimkuu duɑ u doonɑ sɑɑ Efesun di. 22 Ye u turɑ Sesɑreɔ u Yerusɑlɛmu dɑ u Yesun yigbɛru tɔburɑ. Yen biru mɑ u dɑ Antiɔsiɔ. 23 Ye u sɔ̃ɔ mɛɛru kuɑ mi, u kpɑm swɑɑ wɔri u bɔsu Gɑlɑti kɑ Firigin tem sɔɔ u nɑɑnɛ dokeobu kpuro dɑm kɛ̃mɔ.
Apolo u Efesu kɑ Korinti dɑ
24 Yuu goo wi bɑ mɔ̀ Apolo, wi bɑ mɑrɑ Alesɑndiriɔ, u Efesu dɑ. U gɑri gerubun kɛ̃ru mɔ n bɑndɑ, u mɑɑ Gusunɔn gɑri yɛ̃ sɑ̃ɑ sɑ̃ɑ. 25 N deemɑ bɑ rɑɑ nùn Yinnin swɑɑ sɔ̃ɔsi mɑ u ye wɑɑsu mɔ̀ kɑ kĩru, u rɑ mɑɑ Yesun gɑri tubusie dee dee, ɑdɑmɑ Yohɑnun bɑtɛmu kobu tɔnɑwɑ u yɛ̃. 26 U wɑɑsu kuɑ kɑ toro sindu Yuubɑn mɛnnɔ yerɔ. Sɑnɑm mɛ Pirisilɑ kɑ Akilɑsi bɑ win wɑɑsu nuɑ, bɑ kɑ nùn dɑ bee tiɑ, bɑ nùn Gusunɔn swɑɑ tubusiɑ dee dee. 27 Ye Apolo u gɔ̃ru doke u Gɛrɛkibɑn tem dɑ, nɑɑnɛ dokeobɑ nùn yen dɑm kɑ̃ mɑ bɑ ben berusebu tireru kuɑ be bɑ wɑ̃ɑ Gɛrɛkibɑn temɔ bu kɑ nùn dɑm koosiɑ. Sɑnɑm mɛ u turɑ mi, u bu somi gem gem be bɑ sɑ̃ɑ nɑɑnɛ dokeobu Gusunɔn durom sɔ̃. 28 Domi kɑ gɑri dɑmgiiyɑ u kɑ Yuubɑn sikirinɔ kɑmiɑ bɑtumɑ sɔɔ, u bu sɔ̃ɔsi sɑɑ Gusunɔn gɑrin di mɑ Yesu sɑ̃ɑwɑ wi Gusunɔ u gɔsɑ.