19
Pɔlu u Efesu dɑ
1 Sɑnɑm mɛ Apolo wɑ̃ɑ Korintiɔ, Pɔlu u kpɑ kɑ guunun berɑ mɑ u turɑ Efesuɔ. Miyɑ u nɑɑnɛ dokeobu gɑbu deemɑ 2 u bu bikiɑ u nɛɛ, Hunde Dɛɛro u duɑ bɛɛ sɔɔ sɑnɑm mɛ i nɑɑnɛ doke?
Bɑ nùn wisɑ bɑ nɛɛ, ɑɑwo sɑ ǹ mɑm nɔɔre mɑ Hunde Dɛɛro wɑ̃ɑ.
3 Mɑ u nɛɛ, bɑtɛmu yerɑ̀ i kuɑ.
Bɑ nɛɛ, Yohɑnun bɑtɛmu.
4 Mɑ Pɔlu u nɛɛ, Yohɑnu u tɔmbu bɑtɛmu kuɑ be bɑ gɔ̃ru gɔsiɑ torɑnun di mɑ u bu sɔ̃ɔwɑ u nɛɛ, durɔ goo u sisi win biruɔ, wiyɑ Yesu wiyɑ bɑ koo nɑɑnɛ doke.
5 Ye bɑ Pɔlun gɑri yi nuɑ, mɑ bɑ bɑtɛmu kuɑ Yinni Yesun yĩsiru sɔɔ. 6 Pɔlu u bu nɔmɑ sɔndi winɔ mɑ Hunde Dɛɛro u duɑ be sɔɔ, mɑ bɑ kɑ bɑrum tukum gɑri mɔ̀, bɑ mɑɑ gɑri gerumɔ yi yi wee Gusunɔn min di. 7 Durɔ be kpuron geerɑ turɑ tɔnu wɔkurɑ yirun sɑkɑ.
8 Mɑ Pɔlu u Yuubɑn mɛnnɔ yeru duɑ u bɑn te Gusunɔ u swĩin wɑɑsu mɔ̀ kɑ toro sindu sere suru itɑ u kɑ bu wesiɑnɑmɔ u bu kɔkirimɔ. 9 Adɑmɑ ben gɑbu bɑ bɔbiɑ bɑ yinɑ bu Yesu nɑɑnɛ doke, bɑ mɑɑ gɑri kɔ̃si geruɑ win swɑɑ yen sɔ̃ tɔn wɔru gen wuswɑɑɔ. Yen sɔ̃nɑ Pɔlu u bu deri, wi kɑ nɑɑnɛ dokeobu bɑ doonɑ min di. Bɑ rɑ de bu wesiɑnɛ tɔ̃ru bɑɑtere mɛnnɔ yeru gɑru sɔɔ te tɑ sɑ̃ɑ Tirɑnusigiru. 10 Nge mɛyɑ bɑ kuɑ wɔ̃ɔ yiru, mɑ tɔmbu kpuro be bɑ wɑ̃ɑ Asiɔ, Yuubɑ kɑ mɑɑ Gɛrɛkibɑ, bɑ kɑ Yinnin gɑri nuɑ.
Sekefɑn bii tɔn durɔbu
11 Gusunɔ u Pɔlu dɑm wɛ̃ u kɑ sɔm mɑɑmɑɑki dɑmginu ko 12 sere bɑɑ bɑ̀ n win wɛnyɑ wokɑtii ǹ kun mɛ win sɔm koo yɑbenu suɑ bɑ sɔndi bɑrɔbu wɔllɔ, bɑ rɑ bɛkurewɑ kpɑ wɛrɛkunu nu yɑri ben wɑsin di. 13 Yuu be bɑ bɔsu bɑɑmɑ kpuro bɑ wɛrɛkunu yɑrɑmɔ, ben gɑbɑ mɑɑ kĩ bu Yinni Yesun yĩsiru soku be bɑ wɛrɛkunu mɔn sɔ̃ bu nɛɛ, nɑ nun woodɑ wɛ̃ɛmɔ kɑ Yesun yĩsiru, wi Pɔlu u kɑ wɑɑsu mɔ̀, ɑ yɑrio.
14 Yuubɑn yɑ̃ku kowo tɔnwero wi bɑ sokumɔ Sekefɑ, win bii tɔn durɔbu nɔɔbɑ yiru, bɑ rɑ mɑɑ ko mɛ. 15 Yerɑ wɛrɛku gɑgu gɑ nɛɛ, nɑ Yesu yɛ̃, nɑ mɑɑ Pɔlu yɛ̃, ɑdɑmɑ wɑrɑ bɛɛ i sɑ̃ɑ.
16 Mɑ durɔ wì sɔɔ wɛrɛku ge, gɑ wɑ̃ɑ u yɔ̃ɔwɑ u tɔn be sɛ̃re mɑ u bu so gem gem sere u bu kɑmiɑ. Be kpuro bɑ yɑkurɑ win yɛnun di tereru kɑ bosu. 17 Yuubɑ kɑ Gɛrɛkibɑ kpuro be bɑ wɑ̃ɑ Efesuɔ bɑ gɑri yi nuɑ, mɑ bɛrum bu mwɑ be kpuro. Mɑ Yinni Yesun yĩsirɑ bɛɛrɛ wɑ gem gem. 18 Dɑbiru be bɑ nɑɑnɛ doke bɑ nɑ bɑ geruɑ bɑtumɑ sɔɔ ye bɑ rɑ rɑɑ ko, mɑ bɑ tuubɑ kuɑ. 19 Dɑbiru be bɑ rɑ rɑɑ dobo dobo ko, bɑ kɑ ben tirenu nɑ mɑ bɑ nu dɔ̃ɔ mɛni bɑɑwuren wuswɑɑɔ. Goo u tire nin gobi dooru kuɑ, nin geerɑ kuɑ fɔrɔtɔ dɑbi dɑbiru. 20 Nge mɛyɑ Yinni Gusunɔn gɑri yi kpɑrɑrɑmɔ kɑ dɑm yi tɑ̃simɔ.
Sɑnnɔ Efesuɔ
21 Yenibɑn biru, Pɔlu u gɔ̃ru doke u bɔsu Mɑsedɔni kɑ Gɛrɛkibɑn tem sɔɔ. Min di kpɑ u Yerusɑlɛmu dɑ. U nɛɛ, ù n dɑ mi, u ǹ koo ko u kun turɑ Romuɔ.
22 Mɑ u win sɔmɔbu yiru, Timɔte kɑ Erɑsutu gɔrɑ Mɑsedɔniɔ, ɑdɑmɑ win tii u sɔ̃ɔ yiru kuɑ Asiɔ.
23 N deemɑ sɑɑ ye, wɑhɑlɑ bɑkɑ gɑɑ seewɑ Yesun swɑɑn sɔ̃. 24 Sii geesun seko goo wi bɑ rɑ soku Demɛtiru u rɑ bũu wi bɑ sokumɔ Aritemin\f |b19:24 Aritemin|d - Bũu wìn mi bɑ rɑ bii nɔnɑ de.\F dirun weenɑsiru ko. Sɔmbu te, tɑ sɔm kowobu ɑre bɛkɛ wɛ̃ɛmɔ. 25 Demɛtiru u win sɔm kowobu mɛnnɑ kɑ mɑɑ sekobu gɑbu mɑ u nɛɛ, durɔ bɛɛ i yɛ̃ mɑ sɔmbu ten sɔ̃nɑ sɑ kuurɑmɔ. 26 Bɛɛn tii i wɑɑmɔ, i mɑɑ nɔɔmɔ mɑ Pɔlu wi, u tɔn dɑbinu kɔkurɑ u mɑɑ bu swɑɑ nim wiɑ, n ǹ mɔ Efesu mi tɔnɑ, kɑ mɑɑ Asin tem wuu dɑbinu sɔɔrɑ, u mɔ̀, bũu ni tɔmbɑ kɑ nɔmɑ kuɑ nu ǹ sɑ̃ɑ Gusunɔ. 27 Ǹ n mɛn nɑ, bɛsɛn sɔmburɑ koo funɛ wɛnnɑ. N ǹ mɑm te tɔnɑ, bɑ ǹ koo mɑɑ bɛsɛn bũu Aritemin diru gɑrisi gɑ̃ɑnu gɑnu. Bũu win bɛɛrɛ bɑkɑ koo mɑɑ kpe, wi Asigibu kɑ mɑɑ tem bɑɑmɑn tɔmbu kpuro bɑ rɑ sɑ̃.
28 Sɑnɑm mɛ tɔn be, bɑ gɑri yi nuɑ, bɑ mɔru bɛsirɑ, bɑ gbɑ̃sukumɔ bɑ mɔ̀, bɛɛrɛ bɑkɑgiiwɑ, Efesugibun Aritemi.
29 Mɑ wuugibu kpuro bɑ burinɑmɔ. Tɔn wɔru gɑ duki dɑɑmɔ diru mi bɑ rɑ dwee. Mɑ bɑ Pɔlun kpɑɑsibu yiru gɑwɑ bɑ kɑ dɑ mi. Beyɑ Gɑyusi kɑ Aritɑɑki be bɑ sɑ̃ɑ Mɑsedɔnigibu. 30 Pɔlu u kĩ u dɑ tɔn wɔru gen mi, ɑdɑmɑ nɑɑnɛ dokeobɑ yinɑ. 31 Tem mɛn wirugibu gɑbu be bɑ sɑ̃ɑ win kpɑɑsibu, bɑ mɑɑ nùn nɔɔ mɔrisiɑ bɑ nɛɛ, u ku tii sɔ̃ɔsi dii te sɔɔ. 32 Dii te sɔɔrɑ tɔmbu kpuro bɑ gbɑ̃sukumɔ. Gɑbu bɑ gɑri tee gerumɔ, gɑbu mɑɑ gɑri gɛɛ. Ben dɑbirɑ kun mɑm yɛ̃ yèn sɔ̃ bɑ mɛnnɛ mi. 33 Yuu gɑbɑ Alesɑndu bɔrie tɔn wɔru gen wuswɑɑɔ, mɑ tɔmbu gɑbu bɑ tɑmɑɑ wiyɑ u derɑ wɑhɑlɑ kpuro yɑ seewɑ. Alesɑndu wi, u tɔn be kɑ nɔmu mɑrisiɑ, mɑ u kĩ u bu gɑri yin ɑsɑnsi sɔ̃. 34 Adɑmɑ sɑnɑm mɛ bɑ tubɑ mɑ u sɑ̃ɑwɑ Yuu, tɔn be kpuro bɑ gbɑ̃sukumɔ sere kɔbɑ yirun sɑkɑ, bɑ mɔ̀, bɛɛrɛ bɑkɑgiiwɑ Efesugibun Aritemi.
35 Amɛn biru, wuun guro guro u bu mɑrisiɑ u nɛɛ, bɛɛ Efesugibu, bɑɑwure u yɛ̃ mɑ bɛsɛn wuu Efesuɔwɑ Aritemi bɛɛrɛgiin dirɑ wɑ̃ɑ sɑ te kɔ̃su, kɑ mɑɑ win weenɑsii wi u surɑmɑ sɑɑ wɔllun di. 36 Goo kun kpɛ̃ u gɑri yi siki. Yen sɔ̃, i tii nɛnuɔ sɛ̃ɛ, i ku gɑ̃ɑnu ko kɑ sɛndɑru. 37 I kɑ durɔ beni nɑ mini bɑɑ mɛ bɑ ǹ gɑ̃ɑnu gbɛnɛ bɛsɛn bũun dirun di, bɑ ǹ mɑɑ bɛsɛn bũu gɑri kɔ̃si gɛɛ gerusi. 38 Demɛtiru kɑ win sɔm kowobu bɑ̀ n gɑri gɛɛ mɔ kɑ goo, sɑ siribun tɔ̃ru mɔ kɑ mɑɑ siri kowobu, i de bu ben gɑri ko mi. 39 Ì n mɑɑ gɑri gɛɛ mɔ yi yi yini kere, i ko kpĩ i kɑ yi dɑ wuun wirugibun mi. 40 Domi bɑ koo kpĩ bu sun tɑɑrɛ wɛ̃ gisɔn gɑri yinin sɔ̃ yèn sɔ̃ yi ǹ wiru kɑ nɑɑsu mɔ. Bɑ̀ n mɑɑ sun yin ɑsɑnsi bikiɑ, sɑ ǹ yɛ̃ ye sɑ ko gere.
41 Ye u yeni geruɑ u kpɑ, u bu yɑrinɑsiɑ.