11
Piɛɛ u Yesun yigbɛru
win gɑri tubusiɑ Yerusɑlɛmuɔ
1 Gɔrobu kɑ nɑɑnɛ dokeobu gɑbu Yudeɑn tem kpuro sɔɔ bɑ nuɑ mɑ tɔn tukobu bɑ mɑɑ Gusunɔn gɑri nuɑ bɑ yi wurɑ. 2 Sɑnɑm mɛ Piɛɛ u wurɑ Yerusɑlɛmuɔ, Yuubɑn nɑɑnɛ dokeobu bɑ nùn tɑɑrɛ wɛ̃. 3 Bɑ nɛɛ u duɑ tɔn tukobun yɛnuɔ be bɑ ǹ bɑngo kue, mɑ u yɑɑ dibu di kɑ be sɑnnu.
4 Yen sɔ̃nɑ Piɛɛ u bu gɑri yi tubusiɑ sɑɑ yin toren di sere kɑ yin nɔrɔ. 5 U nɛɛ, sɑnɑm mɛ nɑ wɑ̃ɑ Yope mɑroɔ, ye nɑ kɑnɑru mɔ̀ sɔ̃ɔ teeru nɑ kɑ̃siru wɑ. Nɑ bekuru wɑ te tɑ sɑ̃ɑ nge gɔ̃gɔ bɔkɔ tɑ sɑrɑmɑ Gusunɔ wɔllun di, bɑ ten goonu nnɛ dɛrie mɑ tɑ yɔ̃rɑ nɛn bɔkuɔ. 6 Ye nɑ tu nɔni girɑri nɑ mɛɛrɑ nɑ yɛɛ nɑɑsu nnɛgii wɑ, kɑ gberun yɛɛ kɑ yɛɛ yi yi rɑ kɑbiri kɑ mɑɑ gunɔsu. 7 Mɑ nɑ nɔɔ gɑgu nuɑ gɑ mɑn sokɑ gɑ nɛɛ, n seewo n go kpɑ n tem. 8 Adɑmɑ nɑ nɛɛ, ɑɑwo pɑi Yinni, nɑ ǹ yɑɑ seserugiɑ diire. 9 Nɑ kpɑm nɔɔ ge nuɑ sɑɑ wɔllun di gɑ nɛɛ, n ku gɑ̃ɑnu soku seseru ni Gusunɔ u sokumɔ diirɑ. 10 Yɑbu yeni yɑ koorɑwɑ nɔn itɑ, yen biru yɑ kpɑm wurɑ wɔllɔ. 11 Sɑɑ ye sɔɔ mii mii, durɔbu itɑ be bɑ mɑn gɔriɑmɑ sɑɑ Sesɑren di bɑ tunumɑ yɛnu mi nɑ wɑ̃ɑ. 12 Hunde Dɛɛro u mɑn sɔ̃ɔwɑ u nɛɛ, n kɑ bu doo, n ku diriri. Bɛsɛgibu nɔɔbɑ tiɑ beni bɑ mɑn yɔ̃siri mɑ sɑ duɑ durɔ win yɛnuɔ. 13 U sun sɔ̃ɔwɑ nge mɛ u wɔllun gɔrɑdo wɑ u yɔ̃ win dirɔ u nɛɛ, u goo gɔrio Yopeɔ u kɑ Simɔɔ sokumɑ wi bɑ mɑɑ mɔ̀ Piɛɛ. 14 Wiyɑ u koo nùn gɑri sɔ̃ yi yi koo de wi kɑ win yɛnugibu bu fɑɑbɑ wɑ. 15 Ye nɑ nɛn wɑɑsu toruɑ Hunde Dɛɛro u sɑrɑmɑ be sɔɔ nge mɛ u kuɑ bɛsɛ sɔɔ dɔmɑ te. 16 Yerɑ nɑ Yinnin gɑri yɑɑyɑ yi u nɛɛ, Yohɑnu u kɑ nim bɑtɛmu kuɑ, ɑdɑmɑ bɑ koo bɛɛ bɑtɛmu ko kɑ Hunde Dɛɛro. 17 Ǹ n mɛn nɑ, Gusunɔ ù n bu kɛ̃ru kɑ̃ tèn bweseru u sun kɑ̃ sɑnɑm mɛ sɑ Yinni Yesu Kirisi nɑɑnɛ doke, wɑrɑ nɛ n kɑ Gusunɔ swɑɑ gɑnɛ.
18 Ye bɑ gɑri yi nuɑ, bɑ ben sikirinɔ mɑri, mɑ bɑ Gusunɔ siɑrɑ bɑ nɛɛ, Gusunɔ mɑɑ tɔn tukobu ɑyeru wɛ̃ bu kɑ gɔ̃ru gɔsiɑ, kpɑ bɑ n wɑ̃ɑru mɔ.
Yesun yigbɛru Antiɔsiɔ
19 Nɑɑnɛ dokeobu be bɑ rɑɑ yɑrinɑ bɑɑmɑ kpuro nɔni swɑ̃ɑrun sɔ̃ te tɑ seewɑ sɑnɑm mɛ bɑ Etiɛni go, ben gɑbɑ dɑ sere tem mɛ bɑ sokumɔ Fɛnisi kɑ mɑɑ tem bureru gɑru sɔɔ te bɑ sokumɔ Sipu, kɑ mɑɑ wuu gɑgun mi ge bɑ sokumɔ Antiɔsi, bɑ Lɑbɑɑri geɑ kpɑrɑmɔ, Yuubɑ tɔnɑwɑ bɑ sɔ̃ɔmɔ. 20 Adɑmɑ nɑɑnɛ dokeobu gɑbu be bɑ Antiɔsi dɑ sɑɑ Sipu kɑ Sirɛnin di, bɑ mɑɑ tɔn tukobu Yinni Yesun Lɑbɑɑri geɑ ye wɑɑsu kuɑ. 21 Yinni Gusunɔn dɑm mu wɑ̃ɑ kɑ be, mɑ tɔn dɑbinu nu gɑri yi nɑɑnɛ doke mɑ nu gɔ̃ru gɔsiɑ nu wurɑ Yinnin mi.
22 Yen lɑbɑɑri yɑ Yesun yigbɛru deemɑ te tɑ wɑ̃ɑ Yerusɑlɛmuɔ, mɑ bɑ Bɑɑnɑbɑsi gɔrɑ Antiɔsi mi. 23 Sɑnɑm mɛ u turɑ mi, ye u wɑ nge mɛ Gusunɔ u tɔn be durom kuɑ, win nukurɑ dorɑ. Mɑ u bu dɑm kɑ̃ bɑ n kɑ Yinni mɑninɛ kɑ ben gɔ̃rusu kpuro, 24 domi u sɑ̃ɑ tɔn geo u Hunde Dɛɛro yibɑ mɑ win nɑɑnɛ dokebu kpɑ̃. Mɑ tɔn dɑbinu tii Yinni wɛ̃.
25 Yen biru u Tɑɑsi dɑ u kɑ Sɔɔlu kɑsu. 26 Ye u nùn wɑ u kɑ nùn dɑ Antiɔsi mi. Be yiru bɑ sinɑ mi wɔ̃ɔ girɑ bɑ mɛnnɑ kɑ Yesun yigbɛrugibu mɑ bɑ tɔn dɑbinu Gusunɔn gɑrin keu sɔ̃ɔsi. Antiɔsi miyɑ bɑ gbiɑ bɑ nɑɑnɛ dokeobu sokɑ Kirisigibu.
27 Sɑɑ ye sɔɔrɑ Gusunɔn sɔmɔbu gɑbɑ Antiɔsi dɑ sɑɑ Yerusɑlɛmun di. 28 Ben turo, wi bɑ sokumɔ Agɑbusi, u seewɑ u yɔ̃rɑ mɛnnɔ sɔɔ, mɑ u Gusunɔn gɑri geruɑ kɑ Hunde Dɛɛron somiru u nɛɛ, gɔ̃ɔ bɑkɑrɑ koo ko hɑnduniɑ kpuro sɔɔ. Nge mɛyɑ tɑ mɑɑ kuɑ tem yɛ̃ro Kolodun wɑɑti. 29 Yerɑ nɑɑnɛ dokeobu bɑ gɔ̃ru doke bu kɛ̃ru mɔrisiɑ nge mɛ ben bɑɑwuren mɔrɑ nɛ, bu kɑ nɑɑnɛ dokeobu somi be bɑ wɑ̃ɑ Yudeɑɔ. 30 Mɑ bɑ kuɑ mɛ, bɑ derɑ Bɑɑnɑbɑsi kɑ Sɔɔlu bɑ kɑ tu dɑ guro gurobun mi.