20
Sɔm kowo be bɑ wɑ̃ɑ gbɑɑrɔ
1 Mɑ Yesu u nɛɛ, n wee ye Gusunɔn bɑndu tɑ kɑ weenɛ. Yɛnu yɛ̃ro goo u yɑrɑ buru buru yellu u kɑ sɔm kowobu kɑsu bu dɑ win gbɑɑrɔ. 2 U wurɑ u bu kɔsiɑ nge mɛ bɑ rɑ sɔm kowo kɔsie sɔ̃ɔ teeru, mɑ u nɛɛ bu doo bu sɔmburu ko win gbɑɑrɔ. 3 Ye n kuɑ bururun kɔbɑ nɔɔbɑ nnɛ, u kpɑm yɑrɑ mɑ u gɑbu deemɑ bɑ sɔ̃ tɛngɛɔ bɑ ǹ gɑru mɔ̀. 4 U bu sɔ̃ɔwɑ u nɛɛ, bɛɛn tii i doo i sɔmburu ko nɛn gbɑɑrɔ. Kon bɛɛ yen gobi kɔsiɑ nge mɛ n weenɛ. 5 Mɑ bɑ dɑ mi. Yɛnu yɛ̃ro wi, u kpɑm yɑrɑ sɔ̃ɔ wii wɔllu, kɑ mɑɑ yokɑn kɔbɑ itɑ, mɑ u kuɑ mɛ. 6 Ye n dɑ kuɑ yokɑn kɔbɑ nɔɔbu, u kpɑm yɑrɑ u gɑbu wɑ be bɑ sɔ̃ mi. U bu bikiɑ u nɛɛ, mbɑn sɔ̃nɑ i sɔ̃ mini sɑɑ bururun di i ǹ gɑru mɔ̀. 7 Bɑ wisɑ bɑ nɛɛ, yèn sɔ̃ goo kun sun sɔmburu wɛ̃. Mɑ u nɛɛ, ǹ n mɛn nɑ, i doo nɛn gbɑɑrɔ i sɔmburu ko bɛɛn tii.
8 Ye n kuɑ yokɑ yɛnu yɛ̃ro wi, u win sɔm kowobun wirugii sokɑ u nɛɛ, ɑ sɔm kowobu sokuo ɑ bu ben gobi kɔsiɑ, sɑɑ birukobun min di sere kɑ gbiikobun mi. 9 Be bɑ sɔmburu toruɑ yokɑn kɔbɑ nɔɔbu bɑ nɑ mɑ bɑ sɔ̃ɔ teerun sɔmburun gobi wɑ. 10 Ye gbiikoo be, bɑ nɑ, bɑ tɑmɑɑ begii koo kerɑwɑ mɛ. Adɑmɑ sɔ̃ɔ teerun sɔmburun gobiyɑ bɑ mɑɑ ben tii kɔsiɑ. 11 Ye bɑ gobi yi wɑ bɑ kɑ yɛnu yɛ̃ro wi wɔki. 12 Bɑ geruɑ, bɑ nɛɛ, be bɑ dɑ̃kuru nɑ mi, kɔbi tiɑ tɔnɑwɑ bɑ kuɑ mɑ ɑ bu kɔsiɑ nge bɛsɛ be sɑ sɔmburu kuɑ bururun di kɑ sɔ̃ɔ boko. 13 Mɑ u ben turo wisɑ u nɛɛ, nɛn bɔrɔ, nɑ ǹ nun tɑki di. A wurɑ mɑ kɑɑ sɔ̃ɔ teerun sɔmburun gobi mwɑ, nge n ǹ mɛ. 14 Ǹ n mɛn nɑ, ɑ wunɛn gobi mɔɔ ɑ doonɑ. Nɑ̀ n kĩ n biruko wini kɔsiɑ nge wunɛ, mbɑ n nun wɑ. 15 N ǹ ye nɑ kĩ yerɑ kon kɑ nɛn ye nɑ mɔ ko? Nge ɑ nisinu mɔ̀wɑ yèn sɔ̃ nɑ tɔn geeru kuɑ. 16 Mɑ Yesu nɛɛ, nge mɛyɑ birukobu bɑ koo ko gbiikobu, gbiikobu mɑɑ, bɑ koo ko birukobu.
Yesu u win gɔɔ kɑ win seebun gɑri mɔ̀ nɔn itɑse
17 Nge mɛ Yesu u dɔɔ Yerusɑlɛmu giɑ, swɑɑɔ u win bwɑ̃ɑbu wɔkurɑ yiru ye tɔnɑ sɔ̃ɔwɑ u nɛɛ, 18 wee, sɑ dɔɔ Yerusɑlɛmuɔ mi bɑ koo Tɔnun Bii yɑ̃ku kowo tɔnwerobu kɑ woodɑ yɛ̃robu nɔmɑ bɛriɑ. Bɑ koo nùn tɑɑrɛ wɛ̃ bu go, 19 kpɑ bu nùn tɔn tukobu nɔmu sɔndiɑ be bɑ koo nùn yɑɑkoru ko, bu nùn sɛni so, yen biru bu nùn kpɑre dɑ̃ɑ bunɑnɑrɔ. Sɔ̃ɔ itɑse u koo mɑɑ se gɔrin di.
Ye Yɑkɔbu kɑ Yohɑnun mɛro u bikiɑ
(I mɑɑ mɛɛrio Mɑɑku 10:35-45)
20 Yerɑ Sebeden bibun mɛro u nɑ Yesun mi kɑ win bibu sɑnnu u yiirɑ u kɑ gɑ̃ɑnu kɑnɑ. 21 Yesu u nùn bikiɑ u nɛɛ, mbɑ ɑ kĩ.
U nɛɛ, ɑ de nɛn bibu yiru yeni yu sinɑ, turo wunɛn nɔm geuɔ, turo mɑɑ wunɛn nɔm dwɑrɔ sɑnɑm mɛ kɑɑ bɑndu di.
22 Yesu u wisɑ u nɛɛ i ǹ yɛ̃ ye i bikiɑmɔ, i ko kpĩ i wɑhɑlɑ sɔbe ye kon sɔbe?
Mɑ bɑ nɛɛ, sɑ ko kpĩ.
23 Yesu bu sɔ̃ɔwɑ u nɛɛ, kɑ geemɑ i ko wɑhɑlɑ sɔbe nge nɛ. Adɑmɑ n ǹ nɛn bɑɑ n kɑ gɔsi be bɑ koo sinɑ nɛn nɔm geuɔ kɑ nɛn nɔm dwɑrɔ. Tɔn bèn sɔ̃ nɛn Bɑɑbɑ u ɑye ni sɔɔru kuɑ beyɑ bɑ koo nu wɑ.
24 Ye bwɑ̃ɑbu wɔku te tɑ tie tɑ gɑri yi nuɑ, tɑ kɑ yiru ye mɔru kuɑ. 25 Yerɑ Yesu bu sokɑ u nɛɛ, bɛɛn tii i yɛ̃ nge mɛ tɔn tukobun tem yɛ̃robu bɑ rɑ n bu dɑm dɔremɔ. Kpɑ ben wirugibu bɑ n bu tɑɑremɔ. 26 Adɑmɑ n ǹ sɑ̃ɑ mɛ bɛɛn mi. Bɛɛn goo ù n kĩ u ko wirugii, u de u ko bɛɛn sɔmɔ. 27 Mɛyɑ mɑɑ bɛɛn wi u kĩ u ko gbiikoo u koowo bɛɛn yoo. 28 Nge mɛyɑ Tɔnun Bii kuɑ. U ǹ nɛ bu kɑ nùn sɑ̃ mɑ n kun mɔ u kɑ gɑbu sɑ̃, kpɑ u win wɑ̃ɑru wɛ̃ u kɑ tɔn dɑbinu yɑkiɑ.
Yesu wɔ̃kobu yiru bɛkiɑ
29 Sɑnɑm mɛ bɑ yɑrɑ Yerikon di, tɔn wɔru gunɑ Yesu swĩi. 30 Wɔ̃kobu yiru gɑbɑ sɔ̃ swɑɑ bɑɑrɔ bɑ nuɑ mɑ Yesu sɑrɔ. Yerɑ bɑ nɔɔgiru suɑ bɑ nɛɛ, Yinni, Dɑfidin sikɑdobu, ɑ bɛsɛn wɔnwɔndu wɑɑwo.
31 Tɔn wɔru gunɑ ye, yɑ bu wɔkisimɔ bu mɑrio. Kɑ mɛ, bɑ gbɑ̃rɑmɔ too too, bɑ mɔ̀, Yinni, Dɑfidin sikɑdobu, ɑ bɛsɛn wɔnwɔndu wɑɑwo.
32 Yerɑ Yesu u yɔ̃rɑ u bu sokɑ mɑ u bu bikiɑ u nɛɛ, mbɑ i kĩ n bɛɛ kuɑ.
33 Bɑ nùn wisɑ bɑ nɛɛ, Yinni, sɑ kĩ bɛsɛn nɔni yi yɑm wɑwɑ.
34 Yesu u ben wɔnwɔndu wɑ mɑ u ben nɔni bɑbɑ. Yɑ̃ɑtem mi, tɔnu yiru ye, yɑ yɑm wɑ mɑ yɑ nùn swĩi.