19
Yesu u yinɑnɑɑn gɑri mɔ̀
(I mɑɑ mɛɛrio Mɑɑku 10:1-12)
1 Ye Yesu u gɑri yi geruɑ u kpɑ u doonɑ Gɑlilen di u dɑ Yudeɑn berɑ giɑ ye yɑ wɑ̃ɑ Yuudɛnin dɑɑrun guru giɔ. 2 Tɔn wɔru gunɑ nùn swĩi mi, mɑ u ben bɑrɔbu bɛkiɑ.
3 Fɑlisi gɑbɑ nɑ win mi, bu kɑ win lɑɑkɑri mɛɛri bɑ nùn bikiɑ bɑ nɛɛ, bɛsɛn woodɑ yɑ wurɑ tɔnu u win kurɔ yinɑ gɑri bɑɑyiren sɔ̃?
4 Yesu u nɛɛ, i ǹ gɑrire Gusunɔn gɑri sɔɔ mɑ <<Toren di Tɑkɑ kowo u bu kuɑwɑ durɔ kɑ kurɔ.>> 5 Mɑ yi kpɑm nɛɛ, <<Yen sɔ̃nɑ, durɔ u koo win tundo kɑ win mɛro deri kpɑ wi kɑ win kurɔ bɑ n mɑninɛ kpɑ be yiru kpuro bu ko wɑsi tee.>> 6 Nge mɛyɑ bɑ ǹ mɑɑ sɑ̃ɑ tɔmbu yiru mɑ n kun mɔ tɔn turo. Ǹ n mɑn nɑ, tɔnu u ku kɑrɑnɑ ye Gusunɔ u mɛnnɑ.
7 Fɑlisibɑ bɑ nùn bikiɑ bɑ nɛɛ, ǹ n mɛn nɑ, mbɑn sɔ̃nɑ Mɔwisi u woodɑ wɛ̃ u nɛɛ, durɔ u yinɑnɑɑn tireru yore kpɑ u de win kurɔ u doonɑ.
8 Yesu u bu wisɑ u nɛɛ, Mɔwisi derɑ i bɛɛn kurɔbu yinɑmɔ bɛɛn woo bɔbunun sɔ̃. Adɑmɑ sɑɑ toren di gɑri yi, yi ǹ sɑ̃ɑ mɛ. 9 Nɑ bɛɛ sɔ̃ɔmɔ, wi u win kurɔ yinɑ mɑ n kun mɔ sɑkɑrɑrun sɔ̃, mɑ u kurɔ kpɑo suɑ, u sɑkɑrɑru kuɑwɑ.
10 Win bwɑ̃ɑbɑ nùn sɔ̃ɔwɑ bɑ nɛɛ, ǹ n mɛn nɑ n sɑ̃ɑ durɔ kɑ win kurɔn suunu sɔɔ, n burɑm bo bu ku suɑnɑ.
11 Yesu u nɛɛ, tɔmbu kpuro bɑ ǹ kpɛ̃ bu gɑri yi suɑ mɑ n kun mɔ be Gusunɔ u yen dɑm wɛ̃. 12 Domi gɑbun mi mɑrumɑrɑ, gɑbu mɑɑ tɔmbɑ bɑ bu kuɑ mɛ, gɑbu mɑɑ kpɑm, Gusunɔn bɑndun sɔ̃nɑ bɑ ǹ kurɔ suɑmɔ. Wi u koo kpĩ u gɑri yi suɑ, u suo.
Yesu u bibu kɑnɑru kuɑ
13 Tɔmbɑ kɑ bii piiminu nɑ Yesun mi, u kɑ bu nɔmɑ sɔndi kpɑ u bu kɑnɑru kuɑ, ɑdɑmɑ win bwɑ̃ɑbɑ tɔn be gerusi. 14 Yerɑ Yesu nɛɛ, i de bii piiminu nu nɑ nɛn mi, i ku bu yinɑri. Domi Gusunɔ u bɑndu swĩi tɔmbun sɔ̃ be bɑ kɑ bu weenɛ.
15 U bu nɔmɑ sɔndi mɑ u doonɑ min di.
Gobigii goon gɑri
16 Durɔ goo nɑ Yesun mi, u nùn bikiɑ u nɛɛ, yinni, geɑ mbɑ kon ko n kɑ wɑ̃ɑru te tɑ ku rɑ kpe wɑ.
17 Yesu nùn sɔ̃ɔwɑ u nɛɛ, mbɑn sɔ̃nɑ ɑ mɑn geɑn kobun gɑri bikiɑmɔ. Tɔn turowɑ sɑ̃ɑ geo. À n kĩ ɑ wɑ̃ɑru te tɑ ku rɑ kpe wɑ ɑ woodɑbɑ swĩiyɔ.
18 U nɛɛ, yen yerɑ̀.
Yesu u nɛɛ, ɑ ku tɔnu go, ɑ ku sɑkɑrɑru ko, ɑ ku gbɛni, ɑ ku goo gɑri mɑni, 19 ɑ wunɛn tundo kɑ wunɛn mɛro bɛɛrɛ wɛ̃ɛyɔ, kpɑ ɑ wunɛn tɔnusi kĩɑ nge wunɛn tii tii.
20 Aluwɑɑsi wi, u nɛɛ, yeni kpurowɑ nɑ swĩi. Mbɑ n mɑɑ mɑn tie.
21 Yesu nùn sɔ̃ɔwɑ u nɛɛ, ɑ̀ n kĩ ɑ yibu, ɑ doo ɑ dɔrɑ kpuro ye ɑ mɔ, kpɑ ɑ yen gobi sɑ̃ɑrobu bɔnu kuɑ, kɑɑ n dukiɑ mɔ wɔllɔ, kpɑ ɑ nɑ ɑ mɑn swĩi.
22 Adɑmɑ ye ɑluwɑɑsi wi, u nuɑ mɛ, u doonɑ kɑ nuku sɑnkirɑnu domi win dukiɑ yɑ kpɑ̃.
23 Yerɑ Yesu u win bwɑ̃ɑbu sɔ̃ɔwɑ u nɛɛ, kɑ geemɑ nɑ bɛɛ sɔ̃ɔmɔ, n sɛ̃ gem gem dukiɑgii u kɑ bɑn te Gusunɔ u swĩi wurɑ. 24 Yen sɛ̃sɔ gɑ kpɑ̃ n kere yooyoo gu du yɑburɑn wɛ̃rɔ gu yɑri.
25 Ye bwɑ̃ɑ be, bɑ gɑri yi nuɑ, bɑ biti soorɑ gem gem, mɑ bɑ nɛɛ, ǹ n mɛn nɑ, wɑrɑ u koo den fɑɑbɑ wɑ.
26 Yesu bu mɛɛrɑ mɑ u nɛɛ, tɔmbun miyɑ n ǹ koorɔ ɑdɑmɑ gɑ̃ɑnu sɑri ni Gusunɔ u kpɑnɛ.
27 Yerɑ Piɛɛ u nùn sɔ̃ɔwɑ u nɛɛ, n wee bɛsɛ sɑ gɑ̃ɑnu kpuro deri sɑ nun swĩi. Mbɑ n ko n ko bɛsɛgiɑ.
28 Yesu bu sɔ̃ɔwɑ u nɛɛ, kɑ geemɑ nɑ bɛɛ sɔ̃ɔmɔ, sɑnɑm mɛ Tɔnun Bii u ko n sɔ̃ win sinɑ gɔni yiikogiɑn wɔllɔ hɑnduniɑ kpɑɑ sɔɔ, bɛɛ wɔkurɑ yiru be i mɑn swĩi bɛɛn tii i ko n sɔ̃ sinɑ gɔni wɔllɔ i kɑ Isirelibɑn bwesenu wɔkurɑ yiru siri. 29 Mɑ bɑɑwure wi u win yɛnu deri, ǹ kun mɛ wɔnɔbu, ǹ kun mɛ sesubu, ǹ kun mɛ tundo, ǹ kun mɛ mɛro, ǹ kun mɛ bibu, ǹ kun mɛ gbeɑ nɛn yĩsirun sɔ̃, u koo yen kɔsire wɑ dɑbi dɑbinu, kpɑ u wɑ̃ɑru te tɑ ku rɑ kpe tubi di. 30 Adɑmɑ dɑbiru be bɑ tɛ̃ sɑ̃ɑ gbiikobu bɑ koo ko birukobu, mɑ dɑbiru be bɑ tɛ̃ sɑ̃ɑ birukobu bɑ koo ko gbiikobu.