26
Pọọlu îtumu ikọ ibot kan̄ me isi ogwu ubọọn̄ Agiripa
1 Agiripa onenitumu inyi Pọọlu ibe, “Mînyi owu irek mgbọ keyi ibe owu òtumu ikọ ibot kwun̄.”
Pọọlu onanan̄a ikeke, mè iwuwum ubọk ibe egban̄ utọn̄, mè inibene itumu ikọ ibe, 2 “Ogwu ubọọn̄ Agiripa, emi mmọnọ lek n̄a kubọk ogwu atisi, mije irek osibibe inyi emi, mè ǹkeke me isi kwun̄ me chereyi ǹtumu ikọ ibot n̄a me emen otutuuk ikọ geelek ebi Ju etumube ikeme emi. 3 Ògak ge, mmọnọ lek n̄a kubọk ogwu atisi enenen, mije, owu oriọọn̄ otutuuk orọmijọn̄ ebi Ju mè ubọk igbini-ikọ kiban̄ ijaan̄ lek. Eya orọ, ǹkibeek owu ibe, soso, kat ejit gban̄ ikọ n̄a.
4 “Otutuuk ebi Ju mîriọọn̄ ubọk nsabe ikiluk ugwem n̄a bene me karake nkupbe ijija, bene me mgbọ nlukbe me ido iman n̄a na re mgbọ nlukbe me Jeruselem. 5 Ife chi mîriọọn̄ emi karake ujọn̄ọ mgbọ. Ire môneme ema itutumu atikọ, ema mêkọt isa otu kiban̄ itumu ibe ke emi ǹluk ugwem igọọk orọmijọn̄ ebi Farisi. Ebi otu ogbo yi ere ebi ìkitet Ikan kè Mosis mè orọmijọn̄ ebi Ju inye igak otutuuk ene me ubọk eji ebi Ju ekiriaak Awaji. 6 Ire, me mgbọ keyi, ibot ibot inu òrọrọ mè ekesibi emi oyerebet me ibot chereyi ìre mije ǹkikpọ chieen̄ ibe ke Awaji môrọ otutuuk use îchieekbe ebi nte nte kiji iso. 7 Use yi ke otutuuk akọp mè otoko iba kiji ekikpọ chieen̄ ibe ke Awaji môrọ iso inyi ema. Eyi ore utoon̄-ejit kiban̄ eyi ema ekisi ikwaan̄ inyi Awaji eririeen̄ mè ikarek. Ogwu ubọọn̄ Agiripa ogwu otutuuk ene ekinyi umin, îre mije ikpọchieen̄ yi gaalek ke ebi Ju ekitoon̄ emi otutuuk ikọ chi. 8 Ǹdo enyi nu, enyi ebi Ju, ìre keke orọ mè iyọt enyi me lek ichechieek ibe ke Awaji îkijomo ene me mkpa?
9 “Me adasi mgbọ, emi me lek n̄a si nchieek inye ibe ke îgbe ibe ǹrọ inu geelek nkọtbe isasa ifiat erieen̄ kè Jisọs ogwu Najeret. 10 Ikeya si ke nrọ me Jeruselem. Mbọkọ unye me ubọk ebi ibot ngwugwa, mè ikpulu owuwa bọn Awaji itap me mkpọn. Mgbọ geelek etipbe ema oyerebet mkpa, emi nra igọọk ichieek ibe ke îgbe ibe ekpan̄ ema. 11 Owuwa mgbọ, ǹkijijen̄e ikana me uwu ntitiin̄ ebi Ju geelek ikisi isulu ema osusut, mè ikiweek irọrọ inyi ema etumu Awaji elọ. Ìkayaka me ikeya, emi nsa si me ujat ejit yi igọọk ife cha me ama ile geelek me ofifi ido, mè isisaak ema enenen.
Pọọlu îkpa ubọk ọmọ osabe ikana ogwu òchechieek
12 “Me ojelek ije yi, usen ge, nsisi ibọkọ unye me ubọk ebi ibot ngwugwa, ife cha si eraria emi isibi isi ama Damasikọs. 13 Me umin kwun̄, Ogwu ubọọn̄, kigban̄. Me oniin̄ ije ya nkije isi Damasikọs, me ejit ikarek, mmumun̄ ikpele utoon̄ òtotoon̄ igak ura onan̄abe me isinyọn̄, mè initoon̄ ikana emi mè ebi melek n̄a me ijọn̄ okokop. 14 Eji otutuuk ene erọrọn̄ me ijọn̄. Emi nnọnọ ida ge okitumu ikọ inyi emi me usem ebi Iburu ibe, ‘Sọọlu, Sọọlu! Ìre keke orọ okisisaak emi ikeyi? Îyọt enenen owu isasak lek kwun̄ unan ikeyi, kubọk eriembuuk osa ukot isook uti ukpak, eyi ekisa ilap ọmọ.’
15 “Emi nnenido ibe, ‘Okaan̄-ene, ìre owu ìre ekene?’
“Okaan̄-ene ofọfọọk ibe, ‘Emi ìre Jisọs, ogwu owu okisisaak. 16 Ire, me mgbọ keyi, nan̄a keke me ukot kwun̄. Emi ǹsa lek n̄a ijeen̄ owu isasa igobo owu, inyi owu ònore ogwu ikwaan̄ n̄a, mè òre si ogwu ata-ikọ n̄a, inyi owu òkọt òtumu ikọ ofolek inu echi owu osabe chieen̄ kwun̄ imun̄ òfo me lek n̄a, mè echi mâjeen̄be owu me mgbọ òkup me isi. 17 Mânyan̄a owu isibi me ubọk ebi kwun̄, mè inyan̄a owu isibi si me ubọk ebi ekarege ebi Ju, ebi mâriabe owu isi lek. 18 Owu môrọ inyi ema emọọn̄ inu, mè egwu ekom enan̄a me udun enin̄ me utoon̄, mè enan̄a si me unye eyi Setan enu me lek unye eyi Awaji, inyi Awaji itele ijo kiban̄ inyi ema, mè ema esa me ikeya ekaan̄ uche me lek ugbana eyi òkukup inyi ebi Awaji osan̄abe isun̄ esese inyi lek kan̄ sa me ichechieek echieekbe me lek n̄a.’
Pọọlu îkpa inu ofolek ikwaan̄ kan̄ inyi ogwu ubọọn̄ Agiripa
19 “Eya orọ, ogwu ubọọn̄ Agiripa, emi ǹkakpaka ibot ìnyi ilaak ọkpọchieen̄ ya eyi ònan̄a me emen inyọn̄ inu inyi emi. 20 Adasi kan̄, m̀bene ilolook etip ya me Damasikọs, mè inilook si me Jeruselem, mè isi ilook si ikana otutuuk agan̄ Judia, mè inikana igọọk ebi ekarege ebi Ju isi ilook etip yaage ibe mè ema egwu ekom, mè eyaka enu me lek Awaji, mè ekerọ si irọrọ echi òkijeen̄ ibe ke ema mîgwu ikom. 21 Îre mije ilolook ata etip yi ke ebi Ju etet emi me Uwu Mbuban, mè ibekpan̄ emi. 22 Ire, Awaji îtap ubọk inyi emi mege inire chereyi, mè irọ inyi ǹkeke me isi owuwa ebi ene, ebi asasa mè ebi ilile, ǹtumu ikọ Awaji. Inu nkitumu ìre inu yaage eyi ebi nriran mè Mosis etumube ibe ke môrọ. 23 Ema otutuuk ene etumu ibe ke Karais ya môbọkọ ufialek, mè inire adasi ogwu òbojomo me mkpa, mè isa me ikeya inilook otutuuk ebi Ju, mè ebi ekarege ebi Ju ibe ke utoon̄ eyi Awaji, eyi oboninyan̄a ema îra inu.”
24 Mgbọ Pọọlu okitumu ikọ yi isa inyan̄a lek kan̄, Fesitọs ofefieek Pọọlu ikọ ya me otu, mè itaan̄ ukpo itumu ibe, “Iyak Pọọlu, ibot kwun̄ îwuwọlọ isan̄a. Uga ikween̄-inu îrama owu iraak.”
25 Pọọlu ofọfọọk ọmọ ibe, “Me umin kwun̄ Fesitọs, emi ǹkare iraak. Ikọ nkitumu ìre atikọ, mè ire si ikọ ògbegbe itutumu. 26 Ogwu ubọọn̄ Agiripa îriọọn̄ inu chi ijaan̄. Eya orọ, emi mâkọt ifet lek itumu ikọ melek kan̄, mije, nriọọn̄ ibe ke ìkakaan̄ inu chi geege eyi ọmọ ikariọọn̄ge inu geege ofolek, bak me lek ìkakaan̄ geege me lek inu chi echi erọbe me nlelet. 27 Ogwu ubọọn̄ Agiripa, ìre owu ochieek me lek inu ebi nriran egebe me Ikpa Mbuban? Emi nriọọn̄ ibe ke owu ochieek.”
28 Agiripa onenido Pọọlu ibe, “Ìre òkikeek ibe ke owu môkọt inwene emi ejit mè ǹkana ogwu eyi Karais me sọntiik mgbidim mgbọ keyi gaalek?”
29 Pọọlu ofọfọọk ibe, “Mè ìre mgbidim mgbọ, mè ìre ujọn̄ọ mgbọ, uriaak n̄a me isi Awaji ìre, mè owu, mè ìre otutuuk ebi ìkup me ere yi ekana ere inu emi nrebe. Ire, ekakaan̄ mkpọn me ubọk, kubọk emi nkaan̄be.”
30 Ogwu ubọọn̄ Agiripa, mè Benais ogwu ngwan̄ enenwaan̄, mè Fesitọs ogwu ibot mkpulu, mè otutuuk ebi melek kan̄ cha enanan̄a ikeke, mè isibi. 31 Mgbọ ema ekije isibi, ema ekekitumu me etete kiban̄ ibe, “Ogwu enerieen̄ yi ìkarọ inu geege eyi mêkọtbe isa itet ọmọ ikpan̄, mè ìyaka ire itetet itap me mkpọn.”
32 Agiripa onenitumu inyi Fesitọs ibe, “Mebe ene yi ìkatumu ibe esa oyerebet kan̄ esi me isi ogwu Sisa, kè owu okọt òtele inyi ifo me utelelek.”