27
Mîtap Pọọlu me uji isa isi Rom
1 Mgbọ etumube ifieek isan̄a ibe ke eji mênikọp isi Itali, enenibene Pọọlu mè ofifi ebi mkpọn itap me ubọk ogwu ibot ebi akọn̄ ge ekigwen Juliọs, òrere ene ge me lek ogbo ebi akọn̄ ebi ekigwen “Urum akọn̄ ogwu Sisa” ebi ìkisi ikwaan̄ inyi ogwu ibot mkpulu ebi Rom. 2 Eji esisi inin̄ uji ile ge me atasuk ama Adaramitiyum, mè ikọp isibi. Uji ile ya ìbonan̄a me ere ya isi otutuuk ama mgba-uji òkup me agba okwaan̄ ile me ido Esia. Ogwu enerieen̄ ge ekigwen Arisitakọs, ogwu ònan̄a me ama Teselonaika me agan̄ Mesidonia òwa melek kiji.
3 Me ofit iwele kan̄, eji ekọkọp itoon̄ me atasuk Sidọn. Juliọs onenikaan̄ ata ejit me lek kè Pọọlu, mè itele ibe isibi ijọn̄ isi ikpọ ebi unene, inyi etap ubọk enyi me lek inu geelek òkup ọmọ me uyọt. 4 Eji enenisan̄a uji me ama ya. Mije efet okiwut ibieen̄ eji, eji ekọkọp isi ikana me agan̄ udun̄ achọ Saipọrọs inyi eji enan̄a me isi efet. 5 Eji enenikọp isaba okwaan̄, mè iraka me isi okwaan̄ agan̄ Silisia mè Pamfilia, mè isi itoon̄ me ijọn̄ me ama ekigwen Mira me agan̄ Lisia. 6 Me ere ya ke Juliọs ogwu ibot ebi akọn̄ ya onimun̄ uji ge ònan̄a me Alikisendira ibosi ido Itali, mè inisan̄a eji itap me emen. 7 Eji enenisan̄a uji, mè ikikọp ususuk ususuk, mè ifiat owuwa usen me okwaan̄ mije efet okiwut ikweek eji. Eji mîmun̄ ufialek sabum eji enikọt ikọp itoon̄ me atasuk ge òkup me agba lek ama Kinidọs. Mije efet ya ikachieekge ibe eji ekọp ubọk ekiwuuk lek ikọp, ebi ìkikọp uji ya ebeben uji ya ikọp isi ikana me udun̄ achọ Keret inan̄a me isi efet, mè ikọp iraka me otu ọsọt ekigwen Salimọni, 8 mè itet iriaak me agba ijọn̄ ikikọp. Eji mîmun̄ ufialek enenen sabum eji enikọt inwan̄a efet ya mege isi ire emen ọfọ ekigwen, “Ata Atasuk” òkup me agba lek ama ekigwen Lasia.
9 Sabum mgbọ yi, mgbọ îwuuk lek ije enenen me lek kiji, mè inin̄ emen mgbọ unye efet okiwut, òrere mgbọ mfaka Usen Irọ-esuuk orakabe igwook. Eya orọ, ikọkọp me okwaan̄ ya mgbọ ya onenire mkpa mè ugwem. Mije keya, Pọọlu onenitaba otutuuk ebi ìkup me uji ya ubọk me utọn̄ ibe, 10 “Ebi une n̄a, emi nra imun̄ ibe ke ùrioon̄ mônu inyi eji me emen ije kiji yi, mè itap ikpele ichep me lek uji yi, mè otutuuk akpan inu òjot me emen, melek ugwem kiji si.” 11 Ire, kpan̄asi ogwu ibot ebi akọn̄ ya môgban̄be ida kè Pọọlu, ìyaka isi igban̄ ida ogwu òkikọp uji, mè ogwukaan̄ uji. 12 Mije atasuk ya ikanwọnge ere ikukup me mgbọ utọọk, owuwa ene me uji ya ebebe mè esan̄a uji ekọp efo ama Finikis, me achọ Keret ya si, esi ekup mè mgbọ utọọk iraka. Atasuk Finikis ya ìyaka isi ikikpọ agan̄ ichep-ura, bene me ntut inyọn̄ re ntut osiki.
Egwijo îjibi me okwaan̄
13 Sọntiik mgbọ, efet awaji obebene ikiwut ususuk. Ebi ìkikọp uji ya ekekikeek ibe ke ema mêkọt ikọp uji ya isi ire ere ema ebenbe me ejit, mè initaba iloma, mè isan̄a uji, mè itap awala, mè ikikọp agba ijọn̄ agba ijọn̄ me isi okwaan̄ achọ Keret ya. 14 Ìkajọn̄ọ mgbọ, unye egwijo ge ekigwen “Efet inyọn̄ agan̄ mbum-ura” obebene ikiwut inan̄a me inyọn̄ achọ Keret ya, mè itap ogbururu ijot okwaan̄. 15 Egwijo ya osisik eji ito me eden̄ okwaan̄ mgbọ yaage. Eji kpeyaka ikọt ikọp inwan̄a efet ifo agba ijọn̄. Eji ekakana uji ito itat, inyi iben eji ije. 16 Unye efet ya obeben eji ikọp ejit yaage isi ikana inin̄ udun̄ achọ ge ekigwen Kawuda, inan̄a me isi efet sọnja. Me ere ya ke ebi ìkikọp uji ya enisa mege, mè inikọt itaba gwun̄ uji etobobe me edim uji ile ya itap me emen uji ile ya. 17 Mgbọ etababe gwun̄ uji ya itap isan̄a, ema esasa olik itap ikana me lek uji ile ya, mè itobo ikam, inyi inu geege ikawaka ìrọn̄. Mije ema ekifieek owot ibe ke egwijo ya môben uji ya isi itọbọ irak me inyọn̄ okpurukpu yereyerek okpoon̄ òkup me isi okwaan̄ ido Libia, ema ekpọkpọk awala isan̄a me lek uji ya, mè itele uji ya ikeya inyi efet ikibieen̄ ije. 18 Ubọk egwijo ya omabe lek isulu uji ya enenen, me ofit iwele kan̄, ebi ìkikọp uji ya ebebene ikikpulu inu etapbe me uji ya itọọn̄ ifiin̄ me okwaan̄. 19 Me òso egwe ita, ebikaan̄ uji ya esasa ubọk kiban̄ gaalek ikpulu otutuuk inu ekisa ikọp uji ile ya itọọn̄ ifiin̄ me okwaan̄ isan̄a. 20 Mije egwijo ya owutbe unye unye ikeya owuwa usen, eji kpemun̄ ura me ikarek, kpemun̄ ntoronyan̄ me eririeen̄, eji otutuuk ene ekpọkpọ iyaka imọnọ me ejit kiji ibe ke kpunu ubọk ebesa ikọt inyan̄a eji isibi.
21 Eji otutuuk ene mîkup ikeya owuwa usen, kperie inorie geege. Usen ge, Pọọlu onanan̄a ikeke me isi ebikaan̄ uji ya, mè itumu inyi ema ibe, “Ebi une n̄a, mebe enyi mîgban̄ utọn̄ me lek ikọ n̄a ya, mè itele isasan̄a uji me agba achọ Keret, enyi kpemekaan̄ ojelek ichep kechi, kpunu si inu geege eyi mofiat. 22 Ire, me mgbọ keyi, ǹkiriaak enyi ibe, soso, ìkat ejit! Mije, kpunu ene geege me lek kinyi òbokwukwu. Uji gaalek obofiat. 23 Me eririeen̄ òraraka, ogwu osat Awaji Ogwukaan̄ n̄a, ogwu nkisi ikwaan̄ inyi, înu inikeke me agba lek n̄a, 24 mè itumu inyi emi ibe, ‘Pọọlu katet ukpook! Owu òkpolọlọ ikekeke me isi ogwu Sisa, inyi isibi oyerebet me ibot kwun̄. Mije kwun̄, Awaji îsa me atata nnwọn kan̄ inyan̄a ebek ugwem otutuuk ebi melek kwun̄ ekupbe me emen uji yi.’ 25 Eya orọ, ebi une n̄a, ìtet lek ìnye. Mije, emi nkaan̄ ichechieek me lek Awaji, mè itoon̄ ejit ibe ke ìkpolọlọ irọrọ ike îtumube inyi emi. 26 Ire, ubọk geelek, efet yi môben eji itọbọ irak me ijọn̄ me agba lek achọ ge.”
Uji îrek me agba lek Mọlita
27 Eji mîkup me inyọn̄ isi mun̄ me okwaan̄ ya, ekigwen okwaan̄ Adiria, iso akọp mè eririeen̄ ini. Me ejit eririeen̄, me òso akọp mè eririeen̄ ini ya, ebi ìkikọp uji ya eweweek iriọọn̄ ibe ke eji mêkigbet ijọn̄. 28 Ema enenitọ ijọn̄, mè imun̄ ibe ke îdọk iso akọp ejit iba. Sọnja mgbọ iraraka, ema ekpọkpọk itọ, mè imun̄ ibe ke oke ere keya îdọk iso akọp mè ejit go. 29 Ubọk efet egwijo ya okpọkpọ ikiwut ibieen̄ uji kiji itap me ijọn̄, ema efefieek owot ibe ke uji ya mônisi itọbọ me lek ewuuk, mè inito iloma ini me agan̄ edim uji isa itet uji ikaan̄, mè ikup ikiriaak Awaji ibe egwe iwele. 30 Ebi ìkikọp uji ya etọtọt inwenween̄ lek inan̄a isibi itele uji ya, mè inisan̄a gwun̄ uji ya ito me mun̄, mè ifiaan̄ ikirọ kubọk ema ebesi itọn̄ọ iloma òkup me otu uji ito me mun̄. 31 Mgbọ Pọọlu omun̄be inu ya, itutumu inyi ogwu ibot akọn̄ ya mè ebi akọn̄ melek kiban̄ ibe, “Ire ebi ife chi inan̄a me uji yi isibi, kpunu ene geege me etete kinyi òbonwọnọ mkpa.” 32 Mgbọ yaage, ebi akọn̄ cha esọsọp olik esabe itobo gwun̄ uji ya, gwun̄ uji ya onanan̄a irọn̄ me okwaan̄, mè ichep.
33 Me agan̄ egwe, mgbọ egwe okitoon̄ inu, Pọọlu orariaak otutuuk ebi uji ya ibe erie inorie, mè itumu inyi ema ibe, “Chereyi mè ọmọ oso akọp mè usen ini, enyi ekpọkpọ ikup me ufieejit mgbọ geelek, kperie inorie geege. 34 Mgbọ yi, soso, ìnye lek ìrie inorie, inyi enyi ekaan̄ efuuk me owot. Me atikọ, kpunu ukut ijeek geege òbonan̄a me ibot ene geege me etete kinyi ichep.” 35 Mgbọ Pọọlu otumube ikọ ya inyi ema isan̄a, ibọbọkọ fituru, mè inyi Awaji itọn̄ me isi otutuuk kiban̄, mè ikpọkọ me lek ikitaka. 36 Inu ya Pọọlu orọbe onenitap ema efuuk me emen. Ema ererie si inorie. 37 Otutuuk otu ifuk kiji ebi ìkup me emen uji ya ìre efit ene iba, mè akọp jaaba, mè gweregwen. 38 Mgbọ ema eriebe inorie ijot, ema etọtọọn̄ otutuuk inorie òsisik me uji ya ifiin̄ me okwaan̄, inyi uji ya ifet.
39 Mgbọ egwe owelebe ita, ebi ìkikọp uji ya ebebene chieen̄ imun̄ emen ọfọ ge, mè imun̄ si inyọn̄ okpoon̄, mè itumu ifieek ibe ke ema mêkọp uji ya itoon̄ me ere ya. Ire, ema kpekọt iriọọn̄ ere ijọn̄ ya orebe. 40 Ema enenisọp otutuuk olik iloma cha, mè itele iloma cha me okwaan̄, mè itọn̄ọ si olik esabe itobo uran̄ edim uji ikaan̄, mè itaba awala eyi isi iwele inyi efet, mè iyaka otu uji ikpọ ijọn̄. 41 Ire, uji ya olilibi itoon̄ me inyọn̄ okpurukpu ge òkup igbet ijọn̄ ya, mè isa otu ichim inwaan̄ me emen okpoon̄ ya. Kpeyaka ikọt ibieen̄ isan̄a. Ikpele ekoon̄ cha onenitọọn̄ agan̄ edim uji ya ibak isan̄a.
42 Ebi akọn̄ cha enenitọt ibe ke ema mêkpan̄ otutuuk ebi mkpọn ìkup me uji ya, inyi ene geege me lek kiban̄ ikakọt ìgwọk ìsi ìre ijọn̄, mè ìlibi ìfo ìtoon̄ ema me ibot. 43 Ire, ogwu ibot ebi akọn̄ ya ogbagban ema, mije, ìkaweek ibe ekpan̄ Pọọlu. Kpan̄asi ikeya, inyinyi ida ibe ebi geelek ìbekọt igwọk ugwọk edasi ewulu erọn̄ me okwaan̄, mè egwọk efo ijọn̄, 44 mè ebi ekariọọn̄ge ugwọk etet uwot mè okpọkọ uji òkup me isi mun̄ esa ete esi ere ijọn̄. Sa me ikeya, ema otutuuk ene esisi ire ijọn̄ me esuuk.