22
1 Pọọlu otutumu inyi ema ibe, “Ebi ngwan̄ n̄a mè ebi nte n̄a, ìgban̄ utọn̄, mè ǹtumu ikọ ibot n̄a.” 2 Mgbọ ema enọbe ibe ke Pọọlu ìkitumu ikọ ya inyi ema me usem Iburu, ere okukup yiràk. Otutuuk ene erariaan̄ ere ikigban̄.
Pọọlu obebene ikitumu inyi ema ibe, 3 “Emi ìre ogwu Ju, emanbe me Tasọs òkup me agan̄ Silisia. Ire, ekpukpo emi isibi me Jeruselem yi. Nkween̄ ikpa ijaan̄ lek enenen me irak kè Gamalien, ogwu òkijeen̄ Ikan ebi nte nte kiji, mè ichieek mkpa mè ugwem me lek inu eyi Awaji, kubọk enyi otutuuk ekupbe cherekeyi. 4 Mije keya, emi me lek n̄a nsisaak ebi geelek ìchechieek me lek Oniin̄ Awaji keyi, mè ikpan̄ owuwa me lek kiban̄. Nsa me Ikan itet ebirieen̄ kiban̄ mè ebibaan̄ kiban̄ itọọn̄ itap me mkpọn. 5 Ogwu òban Awaji, mè otutuuk ebi Oru ebi Ju mêkọt itumu si ibe ke ikọ nkitumu ìre atikọ. Emi mbọkọ ikpa unye me ubọk kiban̄ ibasa ijet ebi ibot ebi Ju ìkup me Damasikọs, mè enyi emi irek mè ǹtet otutuuk ife cha kubọk ebi mkpọn, mè ǹtaba ema ǹsa ǹnu Jeruselem inyi enebọkọ osusut.
6 “Me ejit ikarek, mgbọ nkije igbet Damasikọs, me ekakpọge chieen̄, ikpele utoon̄ ge onanan̄a me isinyọn̄ itoon̄ mèrèrèp ikana emi me ijọn̄ mgbọ yaage. 7 Nnanan̄a irọn̄ me ijọn̄, mè inọ ida ge okibe emi, ‘Sọọlu, Sọọlu! Ìre keke orọ okisisaak emi ikeyi?’
8 “Ndodo ibe, ‘Okaan̄-ene owu ìre ekene?’
“Ida ya ofọfọọk ibe, ‘Emi ìre Jisọs ogwu Najeret ogwu owu okisisaak.’ 9 Ebi melek n̄a ekije ije ya mîmun̄ utoon̄ ya, ire, kpekọt itet ibot me lek ida ya òkitumu ikọ melek n̄a.
10 “Nnenido ibe, ‘Okaan̄-ene, ìre keke ke mbarọ?’ Okaan̄-ene ofọfọọk emi ibe, ‘Nan̄a keke, mè je nin̄ emen ama Damasikọs. Osire emen ama ya, mêtumu otutuuk ikwaan̄ ngobobe isibi ibe owu ònorọ inyi owu.’ 11 Ebi melek n̄a etetet emi me ubọk isa ije inin̄ emen ama Damasikọs, mije, unye utoon̄ ya îrọ inyi chieen̄ n̄a ikayaka ìmọọn̄ inu.
12 “Ogwu enerieen̄ ge ekigwen Ananayas onunu inikpọ emi. Enerieen̄ ya ìre atalek ogwu òkisun̄ Ikan kè Mosis, ogwu otutuuk ebi Ju ìluk me Damasikọs ekinyi umin. 13 Ananayas ojeje inikeke me agba lek n̄a, mè ibe emi, ‘Gwun̄ Nte n̄a Sọọlu, mọọn̄ inu!’ Mgbọ yaage, mbebene ikimọọn̄ inu, mè imọọn̄ ogwu enerieen̄ ya.
14 “Inenitumu inyi emi ibe, ‘Awaji ebi nte nte kiji îgobo owu ibe owu ònoriọọn̄ nkeek kan̄, mè ònomun̄ si Ogwu Ata Irọrọ ya, mè ònọ si ikọ ònan̄a me otu kan̄. 15 Me lek otutuuk inu geelek owu osabe chieen̄ imun̄ mè isa utọn̄ inọ, owu môre ogwu ata-ikọ inyi ọmọ me isi otutuuk ebilene. 16 Mgbọ keyi, kayaka ìkup ìfiat mgbọ. Nan̄a keke, mè egwook owu mun̄, mè kigwen erieen̄ Okaan̄-ene, inyi egwọk otutuuk ijo kwun̄ esan̄a.’
17 “Mgbọ ngwube ikom ika inu Jeruselem, nneninin̄ Uwu Mbuban usen ge isi iriaak uriaak. Mgbọ nkiriaak uriaak ya, nnenimun̄ ilaak ọkpọchieen̄. 18 Me emen ilaak ọkpọchieen̄ ya, mmumun̄ ubọk Okaan̄-ene okitumu ikọ inyi emi ibe, ‘Gwat lek nan̄a sibi me Jeruselem, mije, ebi Jeruselem kpebechieek inu geelek obotumu ibak emi.’
19 “Ntutumu inyi ọmọ ibe, ‘Okaan̄-ene kpọ, ife chi mîriọọn̄ ibe ke emi ǹkekijijen̄e ikana me uwu ntitiin̄ me uwu ntitiin̄ isi ikikpulu ebi geelek ìchechieek me lek kwun̄ itap me mkpọn, mè isut usini kiban̄. 20 Mgbọ ekpan̄be Sitibin ogwu ata-ikọ kwun̄, emi òwa me ere ya nkekebe ikigọọk irọ inye ibe ekpan̄. Emi me lek n̄a si ntet otutuuk ofọnti ebi ìkpakpan̄ Sitibin cha ikaan̄ mgbọ ekitọbọ ọmọ ikpan̄.’
21 “Okaan̄-ene otutumu inyi emi ibe, ‘Je! Mâria owu isi ujọn̄ọ ere, me etete ebi ekarege ebi Ju.’ ”
22 Ogbogbo ebi ene cha mîkat ejit ime efuuk ikigban̄ ikọ kè Pọọlu mege inire mgbọ îtumube ikọ keyi. Ema inọnọ ikọ yi, otutuuk kiban̄ etataan̄ ukpo, ibe, “Ìcho ene yi ìfiin̄ ìsan̄a me linyọn̄! Ene yi ìkagbe ogwu òboluk ugwem!”
23 Ema ekekibọn̄ ukpo, mè ikiwọọk ofọnti kiban̄ itọp igwook, mè ikigwọ achiaan̄ ifiaak ifo inyọn̄. 24 Mije keya, ogwu ibot akọn̄ ya onyinyi ida ibe esa Pọọlu esi etap me oyet egep ebi akọn̄. Ineninyi ida ibe esulu Pọọlu, mè edo ọmọ ikọ, inyi eriọọn̄ inu òrọrọ ebi ene ekitaan̄ ukpo me ibot kan̄ ikeya. 25 Mgbọ ebi akọn̄ cha ebọpbe Pọọlu isan̄a, mè iben imaan̄ me ijọn̄ ibesulu, Pọọlu ododo ogwu ibot akọn̄ ge òkeke me ere ya ibe, “Ìre îtat me ikan ibe enyi esulu gwun̄ owot Rom me mgbọ kpunube oyerebet geege otitip ene ya?”
26 Mgbọ ogwu ibot akọn̄ ya onọbe ikọ ya, ijeje isi lek ogwu ibot otutuuk ebi akọn̄, mè ido ibe, “Ìre keke ke owu oborọ ikeyi? Kpọ, ogwu enerieen̄ yi ìre gwun̄ owot Rom.” 27 Ogwu ibot otutuuk ebi akọn̄ ya ojeje isi lek kè Pọọlu, mè ido ibe, “Tumu-nu atikọ nyi emi, ìre owu ìre gwun̄ owot Rom?”
Pọọlu ofọfọọk ọmọ ibe, “Iin̄, emi ìre gwun̄ owot Rom.”
28 Ogwu ibot akọn̄ ya otutumu inyi Pọọlu ibe, “Kpọ, emi me lek n̄a m̀kpekpe ogbogbo ikpoko sabum nnikọt ikana ire gwun̄ owot Rom.”
Pọọlu ofọfọọk ọmọ ibe, “Eyi n̄a, emi ìre gwun̄ owot Rom nan̄a me iman n̄a.”
29 Mgbọ yaage, ebi akọn̄ cha, ebi ìbenisulu ọmọ mè ido ọmọ ikọ, eyayat itele ọmọ. Ogwu ibot otutuuk ebi akọn̄ ya si me lek kan̄, ukpook îtet enenen mgbọ îriọọn̄be ibe ke ọmọ îtap mkpọn me ubọk mè ukot kè Pọọlu gwun̄ owot Rom.
Mîsa Pọọlu isi isi Oru ebi Ju
30 Ogwu ibot otutuuk ebi akọn̄ ya îweek irọriọọn̄ ibot inu òrọrọ ebi Ju ekiweek ikpakpan̄ Pọọlu me atikọ. Eya orọ, me ofit iwele kan̄, isasan̄a Pọọlu isibi, mè inyi ida ibe ebi ibot ngwugwa mè otutuuk Oru ebi Ju etitiin̄, mè inisa Pọọlu isi ntitiin̄ ebi Oru ya, mè isan̄a ọmọ ito me isi ebi Oru ya ibe itumu ikọ ibot kan̄.