21
Pọọlu îbene ije isi Jeruselem
1 Mgbọ eji etelebe ebi ugane ntitiin̄ Efesọs cha, eji esasan̄a uji me ijọn̄, mè ikọp isi achọ Kọs. Me ofit iwele kan̄, eji ekọkọp isi itoon̄ me achọ Rodis, mè inan̄a me ere ya isi ama Patara. 2 Me Patara ke eji enitut uji ile òbosaba isi ido Fonisia, mè igọọk inin̄, mè ikọp isaba okwaan̄ ya. 3 Mgbọ eji ebenebe chieen̄ imọọn̄ achọ Saipọrọs, eji ekọkọp iraka me agan̄ osiki, mè itet uji itat ikọp ifo ido Siria, mè isi itoon̄ me ijọn̄ me ama Taya. Me ere ya ke ebesan̄a otutuuk akpan inu òkup me uji ya igwook. 4 Eji enenimun̄ usini ebi udun̄ kè Jisọs me ama ya, mè igọọk ema ikup egwe jaaba. Ema eneniben nriran sa me unye Ekwukwu Mbuban, mè iriaak Pọọlu ibe ikasi Jeruselem. 5 Ire, mgbọ usen eji ebenan̄a me ama ya orebe, otutuuk bọn Nte cha mè ebi nwa, mè ebi bọn, esasa eji ije iban mege isibi me ama ya. Eji irere atasuk, eji etọtọbọ ekpe me ijọn̄ me agba okpoon̄, mè iriaak Awaji. 6 Mgbọ eji eriaakbe uriaak ya isan̄a, eji melek kiban̄ etọtọp lek kiji amọn mgburudun̄. Eji esasaba inin̄ uji, ema egwugwu ikom ifo.
7 Eji eneninan̄a me Taya ikọp isi ire Tolemayas. Mgbọ eji etapbe uji me ama ya, eji enenisi itọp bọn Nte ìkup me ama ya amọn, mè igọọk ikup egwe ge. 8 Me ofit iwele kan̄, eji esasan̄a uji me Tolemayas, mè ikọp isi ama Sisaria. Mgbọ eji erebe Sisaria, eji egọgọọk Filip ogwu òkilook ata etip ikup me uwu kan̄. Filip yi ìre ene ge me lek ebirieen̄ jaaba ebi ebi otuchieen̄ egobobe me Jeruselem ibe ekegọọk ema ekpọ chieen̄ me lek ikwaan̄. 9 Filip yi îkaan̄ nsabọn ibaan̄ ini ebi ìkiben nriran, ema kpekaan̄ olom.
10 Mgbọ eji elukbe me ere ya iwa usen, ogwu nriran ge ekigwen Agabọs onanan̄a me agan̄ Judia inu me ama ya, 11 mè ije inu me ere eji ekupbe, mè imọnọ fanti kè Pọọlu isa ibọp ubọk iba kan̄, mè ukot iba kan̄, mè itumu ibe, “Ekwukwu Mbuban ìtumu ibe, ‘Ikeyi ke ebi Ju ìkup me Jeruselem ebebọp ogwukaan̄ fanti yi, mè ikana ọmọ itap me ubọk ebi ekarege ebi Ju.’ ”
12 Mgbọ eji enọbe ikọ yi, eji melek otutuuk bọn Nte ìkup me ere ya erariaak Pọọlu ibe ikasi Jeruselem. 13 Pọọlu obebe eji, “Ìre keke orọ enyi ekito ito ifiat emi ejit ikeyi? Emi mbem lek inyi inu geelek, ìkare ibọbọp emi ubọk mè ukot gaalek. Mbem lek si ikwukwu me Jeruselem, mije erieen̄ Okaan̄-ene Jisọs.” 14 Ubọk Pọọlu ikachieekge inwenwene ejit, eji esasan̄a lek me lek, mè ibe, “Nkeek Okaan̄-ene irọ!”
Pọọlu îre Jeruselem
15 Mgbọ eya orakabe, eji enenibem lek, mè inan̄a ije isi Jeruselem. 16 Usini bọn Nte esasa eji iban inan̄a me Sisaria inire uwu kè Minesin, ogwu Saipọrọs ge òluk me Jeruselem. Minesin yi ìre ene ge me lek ebi ìdadasi ichieek me lek kè Jisọs. Uwu kan̄ ke eji egọọk ikup me Jeruselem. 17 Mgbọ eji erebe Jeruselem, bọn Nte ìkup me ama ya ebọbọkọ eji itap me unwọọn̄. 18 Me ofit iwele kan̄, Pọọlu melek kiji enenije isi imun̄ Jemis. Mgbọ eji erebe, eji mîmun̄ otutuuk ebi ugane ntitiin̄ Awaji melek kan̄. 19 Pọọlu otọtọp ema amọn, mè iniben otutuuk ikwaan̄ Awaji osabe ọmọ isi me irek me irek me etete ebi ekarege ebi Ju ikpa inyi ema.
20 Mgbọ ema egban̄be ukpatu ya isan̄a, ema etọtọn̄ Awaji, mè initumu inyi Pọọlu ibe, “Kpọ, gwun̄ Nte Pọọlu, me mgbọ keyi, ogbogbo ebi Ju, me obop obop, mîchieek me lek kè Jisọs. Ire, ife chi si ekpọkpọ itet Ikan kè Mosis ikaan̄ inye. 21 Ema ekinọ ibe ke owu òkijeen̄ otutuuk ebi Ju ebi ìluk me etete ebi ekarege ebi Ju ibe mè etele Ikan kè Mosis, mè ekayaka ìfieek bọn kiban̄ afi, mè etele si otutuuk orọmijọn̄ ebi Ju. 22 Mgbọ keyi, eji kpeyaka iriọọn̄ inu eji eberọ, mije, ife cha kpelọlọ inọnọ ibe ke owu onu! 23 Eya orọ, ire ikaan̄ inu geelek eji etumube inyi owu, rọ ikeya. Îkaan̄ ebirieen̄ ini me etete kiji ebi ìnyanyan̄a ibot isa ichieek Awaji use, mè isun̄ lek kiban̄ me mbuban mgbọ keyi, inyi ema etana me isi Awaji. 24 Si kpulu ife chi tap me lek kwun̄, mè gọọk ema faka mfaka igwọk-lek ya. Kpe ikpoko mfaka ya nyi ema, inyi ema ekọt ekwọkọ ijeek me ibot, mè egwa ngwugwa ekisa ichit mfaka ya. Osigọọk irọ orọmijọn̄ ebi Ju yi, otutuuk ebi Ju mêmun̄ ibe ke owu me lek kwun̄ òkiluk ugwem igọọk me lek Ikan kè Mosis, mè isa me ikeya iriọọn̄ ibe ke otutuuk ukpatu cha ema enọbe òfo me lek kwun̄ ìre ataak. 25 Ire inu ofolek ebi ekarege ebi Ju ebi ìchechieek me lek kè Jisọs, eji mîra iwuuk lek ige ikpa itumu nkeek kiji inyi ema ibe ema etele inorie geelek esabe igwa ngwugwa inyi mkpọmfaka, mè ekalaka eje, mè ekataka anam geelek kpegwugwu isibi eje, mè etele ugwem barabat.”
26 Ofit iwele kan̄, Pọọlu okpukpulu ife cha itap me lek kan̄, mè igọọk ema igwọk lek, ubọk orọmijọn̄ okupbe, mè inije isi Uwu Mbuban isi ilook usen igwọk-lek kiban̄ obota, òrere usen ebegwa ngwugwa ekisa ichit igwọk-lek, me ibot kan̄, mè ibot ebi ene ini melek kan̄ cha.
Mîtet Pọọlu me uwu Awaji
27 Sabum usen jaaba eyi igwọk-lek kiban̄ cha onita, ebi Ju ìnanan̄a me agan̄ Esia inu me Jeruselem emumun̄ Pọọlu me Uwu Mbuban, mè itap wọlọwọlọ me etete otutuuk ebi ìkup me ere ya, mè itet Pọọlu, 28 mè ikitaan̄ ukpo ibe, “Ebi Ijeren, ìna ìnitap ubọk inyi eji! Kpọ ogwu enerieen̄ ya ire ogwu, ogwu òkijeen̄ otutuuk ene me ere geelek inu ikeme ebi kiji, mè Ikan kiji, me Uwu Mbuban yi. Ògak ge, ìkpọ, ke îsa ebi Giris initap me emen Uwu Mbuban, mè isa me ikeya ichaka mbuban me lek ere yi òkup me mbuban, inyi ikayaka ìtana.” 29 (Ubọk ema ewuukbe lek imun̄ Pọọlu melek Tọrọfimọs ogwu Efesọs me ama ya sọntiik mgbọ òraraka, ema ekikeek ibe ke Pọọlu îsa ene ya initap me Uwu Mbuban.)
30 Ama ofafan̄a kep, ebi ene egbugbuku inan̄a me agan̄ geelek inu, mè initet Pọọlu, mè itaba isibi me Uwu Mbuban ya. Mgbọ yaage, echichit otutuuk otunchit Uwu Mbuban. 31 Mgbọ ema ekiweek ikpakpan̄ Pọọlu, etip orere lek ogwu ibot akọn̄ ebi Rom òkup me Jeruselem ibe ke ufialek înin̄ me otutuuk emen ama. 32 Me ekafiatge mgbọ geege, ogwu ibot akọn̄ ya oteteen̄ ebi ibot akọn̄ inen mè inen, mè ikpulu si urum ebi akọn̄ inen mè inen igbaalek isa ilibi ekot ekot isibi igọọk ebi ife cha. Mgbọ yaage ebi ìkitap ufialek cha emun̄be ogwu ibot akọn̄ mè otutuuk ebi akọn̄ cha, ema etetele isusulu Pọọlu.
33 Ogwu ibot akọn̄ ya olilibi inin̄ etete kiban̄, mè itet Pọọlu, mè inyi ida ibe esa mkpọn iba ebọp ọmọ, mè inikido ogwu Pọọlu orebe, mè inu îrọbe. 34 Mgbọ usini ene me ere ya ekitaan̄ ukpo itumu ikọ ge, ebi ofifi ife ekekitaan̄ ukpo itumu ofifi ikọ. Ubọk okput ya onyebe enenen, ogwu ibot akọn̄ ya ìkakọt ìriọọn̄ inu òrere ibot ikọ. Mije keya, inyinyi ida ibe esa Pọọlu efo oyet egep ebi akọn̄. 35 Mgbọ Pọọlu ogọọkbe ebi akọn̄ cha ije inire lek otitop òkup me otunchit oyet egep ebi akọn̄ ya, ebi afa cha ebebene ikirọ inu iraak iraak me lek kan̄. Mije keya, ebi akọn̄ cha ebeben ọmọ ikaan̄ me ubọk kiban̄ isa ije inin̄ emen oyet egep ya. 36 Ebi urum ene ìkigọọk ema me udun̄ ekekitaan̄ ukpo ibe, “Ìkpan̄ ọmọ! Ìkpan̄ ọmọ!”
Pọọlu îtumu ikọ ibot kan̄
37 Mgbọ ebi akọn̄ cha ebesa Pọọlu iraka inin̄ emen oyet egep kiban̄, Pọọlu otutumu inyi ogwu ibot akọn̄ ya ibe, “Soso tele mè ǹtumu ikọ ge ǹnyi owu.”
Ogwu ibot akọn̄ ya ododo Pọọlu ibe, “Ìre okitumu usem ebi Giris? 38 Ìre ìkare owu ore ogwu Ijipiti ya òsasa obop ebi ijo ibot ini cha inin̄ emen èwê, me ujọn̄ọ mgbọ òraraka, isi ikup ikitim akọn̄ iweek ifefele ama?”
39 Pọọlu ofọfọọk ọmọ ibe, “Emi ìre ogwu Ju, ǹnan̄a me ama Tasọs me agan̄ Silisia. Emi ìre gwun̄ owot ama eriọọn̄be erieen̄. Ǹkasibi me fọkọfọkọ ama. Soso tele mè ǹtumu ikọ ǹnyi ife chi.”
40 Ogwu ibot akọn̄ ya onyinyi Pọọlu unye ibe itumu ikọ. Pọọlu okekeke me inyọn̄ otitop cha, mè iwuwum ubọk inyi ebi ife cha ibe egban̄ utọn̄. Otutuuk kiban̄ erariaan̄ otu. Pọọlu obebene ikitumu ikọ inyi ema me usem Iburu.