20
Pọọlu îsi Mesidonia mè Giris
1 Mgbọ ufialek ya owọbe me ama ya, Pọọlu ogwegwen ebi ìchechieek me lek kè Jisọs ititiin̄, mè itumu ikọ ikat ema ejit, mè ibe ema eriọọn̄ ubọk eluk, mè inan̄a isi agan̄ Mesidonia. 2 Îjijen̄e ikana me agan̄ ya, mè ikitumu owuwa ikọ ukarajit inyi ebi ene mege, mè inire ido Giris, 3 mè ikup me Giris onyan̄ ita. Mgbọ ìbonan̄a me Giris ikọp isi Siria, inọnọ ibe ke ebi Ju mîtọt isasan̄a ugwem kan̄. Mije keya, inwenwene ejit, mè itọt ijeje inyọn̄ inyọn̄ itibi Mesidonia. 4 Ebi ìgọgọọk ọmọ ije ìre Sopata gwun̄ kè Pirọs ogwu ama Beria, mè Arisitakọs mè Sekọndọs, ebi ama Teselonaika, mè Gayọs ogwu ama Dabi, mè Timọti mè Taikikọs mè Tọrọfimọs, ebi ìnan̄a me agan̄ Esia. 5 Ife chi edasi ije isi ikup me Torowas iban eji. 6 Mgbọ ijọk Fituru Kpunu Olat orakabe, eji enenikọp inan̄a me Filipai, mè ikup me okwaan̄ egwe go sabum eji enichichini ema me Torowas, mè ikup me ama ya usen jaaba.
Yutikọs îjomo me mkpa
7 Me usen ògọọk Usen Mbuban, eji enenititiin̄ iberie inorie mbuban. Pọọlu otutumu ikọ Awaji inyi ebi ìchechieek me lek kè Jisọs me Torowas. Mije îweekbe itetele ama ya me ofit iwele kan̄, ikukup me lek ikọ ya irọn̄ ejit eririeen̄. 8 Mîmin owuwa mkpukan̄ me emen agwut uwu inyọn̄ ita ya ere eji etitiin̄be. 9 Îkaan̄ ogwu nsabọn irieen̄ ge ekigwen Yutikọs òsisiki ikweek me otu nruruk ge me agwut ya ikigọọk igban̄ ikọ ya. Mgbọ îkigban̄ ikọ ya, uga ilaak obeben ọmọ, inanan̄a me uwu òso inyọn̄ ita ya irọn̄ me ijọn̄. Mgbọ esibe isi ibene ọmọ, îkwu inye. 10 Pọọlu me lek kan̄ onanan̄a isibi ijọn̄, mè inilaak inyana me inyọn̄ ogwu enerieen̄ ya, mè ikat ọmọ ikaan̄, mè itumu inyi ebi melek kan̄ ibe, “Ikasisaak ejit kinyi! Ìkakwu! Ọmọ me ugwem!” 11 Pọọlu onenigwu ikom inene ifo uwu inyọn̄ ya, mè ikpọkọ fituru ya, eji ererie inorie mbuban me ere ya. Pọọlu otutumu ikọ Awaji inyi ema mege ibum ura, mè inan̄a itele ema. 12 Bọn Nte cha enenisa gwun̄ enerieen̄ ya me ògat ugwem iban me uwu kan̄, mè ikaan̄ ukarajit enenen.
Pọọlu înan̄a me Torowas isi Militọs
13 Eji edadasi ikọp okwaan̄ okwaan̄ isi Asọs, mè isi itap Pọọlu me ama ya. Pọọlu otọt ikeya inyi eji, mije îweekbe ijeje ukot ukot isi Asọs. 14 Pọọlu onenichichini eji me Asọs, eji etatap ọmọ me uji, mè ikọp isi ama Mitilin. 15 Me ofit iwele kan̄, eji esasan̄a uji, mè ikọp isi agba lek achọ Kiyọs. Me ofit iwele ofifi usen, eji esasaba itoon̄ me achọ Samos. Me ofit iwele ògọgọọk, eji enenire ama Militọs. 16 Pọọlu otutumu ifieek me ejit kan̄ ibe ke ọmọ môkọp iraka Efesọs, inyi ọmọ ikafiat mgbọ me agan̄ Esia, mije, ìkup ọmọ ugwat ugwat, inyi ọmọ isi ire Jeruselem me usen Pentikọs, ire ọmọ ikọt.
Pọọlu îtumu mgburudun̄ ikọ inyi ebi ugane ntitiin̄ Awaji me Efesọs
17 Eya orọ, mgbọ ema etoon̄be me ijọn̄ me Militọs, Pọọlu oraria ikwaan̄ igwen ebi ugane ntitiin̄ Awaji òkup me Efesọs ibe enemun̄ ọmọ me Militọs. 18 Mgbọ ife cha enube, Pọọlu otutumu inyi ema ibe, “Enyi mîriọọn̄ ubọk nlukbe melek kinyi otutuuk mgbọ ngọọkbe enyi iluk, bene me adasi usen njakbe ukot me ijọn̄ Esia. 19 Enyi mîmun̄ ibe ke ǹsa ejit òsisiki mè isa si mun̄ ito me chieen̄ isi ikwaan̄ inyi Okaan̄-ene me emen otutuuk ikpele ntọ-mkpọ ònunu inyi emi inan̄a me lek ijo otitọt ebi Ju etọtbe isasan̄a ugwem n̄a. 20 Enyi mîriọọn̄ ibe ke ǹkatele ilolook enyi etip geelek eyi môtapbe ubọk inyi enyi. Ire, ǹkijeen̄ enyi ikọ Awaji me eden̄ ama, mè ikijeen̄ si ikana me uwu me uwu. 21 Ntaba ebi Ju mè ebi Giris ubọk me utọn̄ ibe ke îkup me uyọt ibe ema egwu ekom etele ijo inu kiban̄, mè ekana egọọk Awaji, mè ekaan̄ ichechieek me lek Okaan̄ kiji, Jisọs.
22 “Mgbọ keyi, me emen isiki ibot eyi nsikibe inyi Ekwukwu Mbuban, Jeruselem ke mbasi, ubọk geelek nkariọọn̄ge inu òbosibi inyi emi me ere ya. 23 Inu nriọọn̄be ìre gaalek ke me ama geelek nrebe, Ekwukwu Mbuban ìkitaba emi ubọk me utọn̄ ibe ke ùrioon̄ mè mkpọn okup iban emi. 24 Ire, emi ǹkasa ugwem n̄a ìgwen inu geege. Otutuuk inu mweekbe ìre ikọkọt irọ ikwaan̄ Okaan̄-ene Jisọs onyibe emi isan̄a, eyi òrere ikwaan̄ ilolook ebi ene ata etip ofolek atata nnwọn eyi Awaji.
25 “Mgbọ keyi, emi nriọọn̄ ibe, me etete kinyi otutuuk ebi njijen̄ebe ikana ikilook ata etip eyi mkpulu eyi Awaji, ke kpunu ene geege òboyaka ikpọk imun̄ emi isi mè isi ofifi. 26 Eya orọ, me chereyi, ǹkitumu inyi enyi ibe, ire ikaan̄ ogwu melek kinyi òjeje ichep, eje kan̄ ìkakup emi me ubọk. 27 Mije, ǹkatele irọrọ inyi enyi eriọọn̄ otutuuk nkeek Awaji. 28 Eya orọ, ìkpọ chieen̄ me lek kinyi, mè ìgbala si chieen̄ ìkpọ otutuuk ebi Ekwukwu Mbuban osabe itap enyi me ubọk ibe enyi ekpọ chieen̄ me lek. Soso, ìkpukpo ebi ntitiin̄ Okaan̄-ene chi ebi Okaan̄-ene osabe eje kan̄ ilep, kubọk ogwu òkpukpo arọọn̄ okikpukpo arọọn̄ kan̄.
29 “Nriọọn̄ ibe, nsinan̄a itele enyi, ke ijo ebi nlilọ ijejeen̄ mênu iniyiyala enyi, kubọk ibo oron okiwulu inin̄ me etete arọọn̄, mè ikpan̄ ema otutuuk isan̄a, ìkatele geege. 30 Ìrere me etete kinyi, usini ene mênan̄a isibi, mè ininwene atikọ eyi Awaji, inyi ema esa me ikeya ekaan̄ ebi ìbekigọọk ema me udun̄. 31 Eya orọ, ìgwọk chieen̄, mè ìkibem! Ikawuuk ibe, me otutuuk acha ita ngọọkbe enyi iluk, ke ǹkatele itataba enyi ubọk me utọn̄, me ge me ge, eririeen̄ mè ikarek, melek mun̄ ito me chieen̄ n̄a.
32 “Mgbọ keyi, ǹkibene enyi itap me ubọk Awaji, mè ubọk ikọ eyi atata nnwọn kan̄, eyi òbokọt inama enyi ibene, mè irọ inyi enyi ekaan̄ uche me lek ugbana eyi òkup inyi otutuuk ebi Awaji osun̄be esese inyi lek kan̄. 33 Ǹkakaan̄ chieen̄ ile me lek ikpoko alata okuket, mè alata araran̄, mè ìyaka ire ofọnti ene geege okaan̄be. 34 Enyi me lek kinyi mîriọọn̄ ibe ke ǹsasa ubọk n̄a chi ibọm mbọm eyi nsabe irọ inu geelek òkup emi mè ebi melek n̄a me uyọt. 35 Me inu geelek nrọbe, njeen̄ enyi ibe, sa me ojelek unye ikwaan̄ òkup ikeyi, ke eji mêkọt itap ubọk inyi ebi una, kubọk Okaan̄-ene Jisọs Karais me lek kan̄ otumube ibe, ‘Inyinyi îkaan̄ ugbana me lek igak ibọbọkọ.’ ”
36 Mgbọ Pọọlu otumube ikọ chi isan̄a, itọtọbọ ekpe me ijọn̄, ọmọ melek kiban̄ otutuuk ene, mè iriaak uriaak. 37 Otutuuk kiban̄ ebebene ikito ito, mè ikikana Pọọlu ikat, mè ibe ọmọ iriọọn̄ ubọk ije. 38 Inu òfefieek ema ejit ichit ìre ikọ ya Pọọlu otumube ibe ke ema kpebeyaka imun̄ ọmọ ofifi. Ema esasa ọmọ isi itap me uji.