9
Sọọlu îgwu ikom
1 Otutuuk mgbọ ya, Sọọlu okpọkpọ itet lek inye ikitap ukpook, mè mkpa me lek ebi udun̄ Okaan̄-ene. Mije keya, inanan̄a ije isi lek ogwu òban Awaji, 2 mè isi ibeek ibe inyi ọmọ ikpa unye, inyi ọmọ isa isi ije ikana otutuuk uwu ntitiin̄ ebi Ju òkup me Damasikọs isi iweek ebi ìchechieek me lek Oniin̄ yi, mè ìre ebirieen̄ mè ìre ebibaan̄, mè itet ema isa initap me mkpọn me Jeruselem. 3 Ibọbọkọ ikpa ya, mè inan̄a ije. Mgbọ îjebe igbet Damasikọs, me ekakpọge chieen̄, utoon̄ onanan̄a me isinyọn̄ ikebe ikana ọmọ mèrèrèp. 4 Ọmọ onanan̄a irọn̄ me ijọn̄, mè inọ ida ge okitumu inyi ọmọ ibe, “Sọọlu, Sọọlu, ìre keke orọ owu okisisaak emi?”
5 Sọọlu ododo ibe, “Owu ìre ekene, Okaan̄-ene?” Ida ya ofọfọọk ibe, “Emi ìre Jisọs, ogwu owu okisisaak. 6 Nan̄a keke mgbọ keyi, mè je nin̄ emen ama Damasikọs. Me emen ama ya, mêteme owu inu owu oborọ.” 7 Ebi melek kan̄ cha ekpọkpọ ikeke me ere ya, kpekọt isan̄a amọn. Ema mînọ ida ya, ire, kpemun̄ ene geege. 8 Sọọlu onanan̄a ikeke, mè ichili chieen̄. Ire, ìkayaka ìkọt ìmọọn̄ inu. Ebi melek kan̄ cha enenitet ọmọ me ubọk isa ije inin̄ emen ama Damasikọs. 9 Sọọlu okukup ikeya egwe ita, ìkamọọn̄ inu, ìkarie inorie, ìkanwọ inu geege.
10 Me Damasikọs ya, îkaan̄ ogwu enerieen̄ ge ekigwen Ananayas, ogwu òchechieek me lek kè Jisọs Karais. Me ilaak ọkpọchieen̄, Okaan̄-ene ogwegwen ogwu enerieen̄ ya, “Ananayas!”
Ichechieek ibe, “Iin̄, Okaan̄-ene.”
11 Okaan̄-ene otutumu inyi ibe, “Je si uwu ogwu enerieen̄ ge ekigwen Judas, me oniin̄ ekigwen Oniin̄ Òtatat. Osire uwu ya, do ibe ejeen̄ owu ogwu enerieen̄ ge ekigwen Sọọlu ogwu Tasọs. Sọọlu ya ọmọ òwa me uwu ya mgbọ keyi okiriaak uriaak.” 12 Me ilaak ọkpọchieen̄ si, Sọọlu omumun̄ ubọk ogwu enerieen̄ ge ekigwen Ananayas onube initoon̄ ọmọ ubọk me lek, mè irọ inyi ọmọ ibene ikimọọn̄ inu.
13 Ananayas onenifọọk ibe, “Okaan̄-ene, nnọ owuwa ukpatu ofolek ene yi, mè otutuuk inu ikpak îrọbe me lek bọn kwun̄ me Jeruselem. 14 Mgbọ keyi înube me Damasikọs, îbọkọ ikpa unye me ubọk ogwu òban Awaji, inyi ọmọ ikọt itet otutuuk ebi ìkigwen erieen̄ kwun̄ isi itap me mkpọn.”
15 Ire, Okaan̄-ene otutumu inyi Ananayas ibe, “Je si, mije, nra igobo ogwu enerieen̄ ya ibe inikana nroon̄ ikwaan̄ inyi emi, mè isi itumu erieen̄ n̄a isibi inyi ebi ekarege ebi Ju, mè ebi ubọọn̄, mè ebi Ijeren. 16 Emi mâjeen̄ ọmọ otutuuk ufialek ìbobọkọ mije n̄a.”
17 Ananayas onanan̄a ije isi uwu ya, mè iraka inin̄, mè itoon̄ ubọk iba kan̄ me lek kè Sọọlu, mè itumu ibe, “Sọọlu, gwun̄ Nte n̄a, Okaan̄-ene Jisọs ogwu òchichichini owu me oniin̄ mgbọ okinu ama keyi, oria emi inu me lek kwun̄, inyi owu òbene òkomọọn̄ inu, mè Ekwukwu Mbuban inin̄ ijot me emen kwun̄.” 18 Mgbọ yaage, inu òkup kubọk ikpọk irin̄ owawaan̄ inan̄a Sọọlu me chieen̄ igwook me ijọn̄. Sọọlu obebene ikimọọn̄ inu, mè inan̄a ikeke. Egwogwook ọmọ mun̄. 19 Ibọbọkọ inorie irie. Mgbọ îriebe inorie isan̄a, unye obebene inin̄ ọmọ emen.
Sọọlu îtumu ikọ Awaji me Damasikọs
Sọọlu îgọọk ebi ìchechieek me lek kè Jisọs Karais ikup owuwa usen me Damasikọs. 20 Me ikafiatge mgbọ, ibebene ikitumu ikọ Awaji me uwu ntitiin̄ ebi Ju cha òkup me ama ya ibe ke Jisọs ore Gwun̄ Awaji. 21 Ikọ Awaji Sọọlu okitumu ya okeke otutuuk ebi ìnọnọ chieen̄ enenen. Ema ekekido ibe, “Ìre ìkare ene yi okirọ inu ikpak me lek otutuuk ebi ìchechieek me lek erieen̄ keyi me Jeruselem? Eyi înube ama keyi, ìre ìkare ìnu ibonitet ebi ìchechieek me lek erieen̄ yi si isa ijet ebi ibot ngwugwa etap me mkpọn?” 22 Ire, Sọọlu okpọkpọ itet lek inye ikitumu ikọ Awaji me unye me unye. Oniin̄ îsabe ikijeen̄ ebi ene ibe ke Jisọs ore ogwu Awaji otọkọbe aran̄ me ibot ya îkwu lek ebi Ju ìkup me Damasikọs enenen. Kpunu ene geege me etete kiban̄ òkọkọt ikeke ifọọk ọmọ otu.
23 Mgbọ owuwa usen orakabe, ebi Ju enenitọt ikpakpan̄ Sọọlu. 24 Ire, Sọọlu onọnọ otitọt kiban̄. Ebi Ju ekekikeke me otunchit ama ya eririeen̄ mè ikarek ikibem mgbọ Sọọlu oboniraka, inyi ema etet ekpan̄. 25 Ire, me eririeen̄ usen ge, ebi ìchechieek me lek ikọ Awaji Sọọlu okitumu, ebeben Sọọlu me emen okwun ge etobobe olik me lek itap itibi otu nruruk ge me lek mgban enamabe ikana ama ya, mè igele ọmọ me emen okwun ya isiki iyik me ijọn̄ me agan̄ oyet.
Sọọlu îfo Jeruselem
26 Sọọlu onanan̄a me ere ya ije ifo Jeruselem, mè iweek itetet lek iriaak me lek ebi ìchechieek me lek kè Jisọs Karais me Jeruselem. Ire, mije ukpook, ife cha kpenyi ọmọ irek, mije, ema kpechieek ibe ke Sọọlu îkana ogwu udun̄ kè Jisọs Karais me atikọ. 27 Ire, Banabas onenitet Sọọlu igba lek, mè isa ọmọ inu me isi ebi otuchieen̄ kè Jisọs, mè inikpa inyi ema ubọk Sọọlu omun̄be Okaan̄-ene me oniin̄ mgbọ ìbosi Damasikọs, mè ubọk Okaan̄-ene otumube ikọ inyi Sọọlu. Îkpa si inyi ema ubọk Sọọlu osabe ilook si ata etip me erieen̄ kè Jisọs ikana Damasikọs, ukpook ìkatet. 28 Sa me ikeya, Sọọlu onenigọọk ebi otuchieen̄ cha ikup, mè ikilook ata etip me erieen̄ Okaan̄-ene ikana ere geelek me Jeruselem, ukpook ìkatet. 29 Îtumu si ikọ Awaji inyi ebi Ju ebi ìkitumu usem Giris, mè iwut ifan̄a ikọ Awaji melek kiban̄ enenen. Mije keya, ema ebebene ikiweek ikpakpan̄ ọmọ. 30 Mgbọ ebi ìchechieek me lek kè Jisọs enọbe otitọt yi, ema esasa Sọọlu ije iban me Sisaria, mè iria ọmọ ifo Tasọs ama kiban̄.
31 Bene me mgbọ ya, otutuuk ntitiin̄ Awaji òkup me otutuuk agan̄ Judia, mè Galili, mè Sameria onenikaan̄ utelelek, mè ikeke inye, mè ikimumana inan̄a me unye eyi Ekwukwu Mbuban ogwu òtatap ema efuuk me emen. Ebi ntitiin̄ Awaji ekekiluk ugwem me ukpook Okaan̄-ene.
Pita îgwa Enias ogwu
32 Mgbọ Pita okijijen̄e ikana owuwa ama òkup me agan̄ ya, îje si isi ikpọ bọn Awaji ìkup me ama ekigwen Lida. 33 Me ama ya, inenimun̄ ogwu ngọm ge ekigwen Enias. Ogwu enerieen̄ ya îkup me ijọn̄ orukan̄ ya acha jeeta. 34 Mgbọ Pita omun̄be ogwu enerieen̄ ya, itutumu inyi ibe, “Enias, Jisọs Karais îgwa owu! Nan̄a keke, mè kat mkpilaak kwun̄!” Enias onanan̄a ikeke mgbọ yaage jîp. 35 Mgbọ otutuuk ebi Lida mè Sarọn emun̄be inu ya òrọrọ, ema egwugwu ikom igọọk Okaan̄-ene.
Pita îjomo Tabita me
36 Me ama Jọpa, îkaan̄ enenwaan̄ ge òchechieek me lek kè Jisọs, ekigwen Tabita, mè ègwen si Dọkas me usem Giris. (Erieen̄ iba cha ìsibi “uman anam.”) Ogwu enenwaan̄ ya ìre ogwu òkirọ ata inu, mè ikitap ubọk inyi ebi ugbọọn̄ mgbọ geelek. 37 Me emen mgbọ Pita okupbe me Lida, ogwu enenwaan̄ ya onenifiak orukan̄, mè ikwu. Eneniken nkwukwu kan̄ mun̄ isan̄a, mè iben imaan̄ me agwut ge òkup me agan̄ inyọn̄ me lek uwu ya. 38 Lida îgbet ere me Jọpa. Eya orọ, mgbọ ebi ìchechieek me lek kè Jisọs me Jọpa enọbe ibe ke Pita òwa me Lida, ema eraria ebirieen̄ iba ibe esi egwen Pita ibe, soso, mè ogwugwu inu mgbọ keyi mgbọ keyi.
39 Mgbọ yaage Pita obọkọbe etip ya, igọgọọk ebirieen̄ iba cha ije inu Jọpa. Mgbọ îrebe uwu ya, esasa ọmọ ije inene uwu inyọn̄ ya isi me agwut ere emaan̄be nkwukwu ogwu enenwaan̄ ya. Mgbọ Pita onin̄be agwut ya, ebi nwakpa ìkup me agwut ya ikito ito ekakana ichit Pita, mè ikijeen̄ ọmọ ofọnti, mè ekwut echi Dọkas ochimbe inyi ema mgbọ îkupbe me ugwem.
40 Ire, Pita osasan̄a ema otutuuk ene isibi me emen agwut ya, mè itọbọ ekpe me ijọn̄, mè iriaak uriaak. Mgbọ îriaakbe uriaak isan̄a, ikakana isi ikpọ nkwukwu ene ya, mè itumu ibe, “Tabita, nan̄a keke!” Ogwu enenwaan̄ ya òkwukwu obobolo chieen̄. Mgbọ îmun̄be Pita, ibebene lek isiki ikweek irek. 41 Pita onenitet ọmọ me ubọk, mè itap ubọk inyi ọmọ inan̄a ikeke. Ikekeke. Pita onenigwen ebi ìchechieek me lek kè Jisọs mè ebi nwakpa cha ibe enu, mè inikana ogwu enenwaan̄ ya me ògat ugwem itap ema me ubọk. 42 Etip inu ya otataan̄ ikana otutuuk Jọpa. Mije keya, owuwa ebi ene egwugwu ikom inichieek me lek Okaan̄-ene. 43 Pita oluluk me Jọpa ifiin̄ mgbọ sọnja me uwu ogwu enerieen̄ ge ekigwen Saimọn, ogwu ikwaan̄ ikpa anam.