25
Pọọlu îtumu ibe esa oyerebet kan̄ esi isi ogwu Sisa
1 Mgbọ Fesitọs obenebe ikwaan̄ kan̄ kubọk ogwu ibot mkpulu, usen ita iraraka, inanan̄a me Sisaria isi ikpọ ama Jeruselem. 2 Mgbọ Fesitọs orebe Jeruselem, ebi ibot ngwugwa, mè ebi ibot ebi Ju enenisa irek keya igwen ikọ kè Pọọlu isibi me isi kan̄. 3 Ema ebebeek ọmọ, kubọk ntap-ubọk, ibe inye lek iria Pọọlu inu me Jeruselem. Ema ebeek mbeek ya, mije, ema ekibem lek ilelet ebi ene me agba oniin̄ inyi ekpebe Pọọlu me oniin̄ ya ekpan̄. 4 Ire, Fesitọs ofọfọọk ema ibe, “In̄-in̄, ebi akọn̄ ekibebem Pọọlu me Sisaria. Emi me lek n̄a si, m̀bagwugwu ikom ifo Sisaria me nkafiatge mgbọ. 5 Ire Pọọlu irọ enyi ilọ, ìria usini ebi ibot kinyi inyi egọọk emi eje ukot ge esi egwen ikan îrọn̄be ekeme ọmọ me ere keya.”
6 Fesitọs îkup me Jeruselem iso usen jeeta, mè ire akọp usen, mè inigwu ikom ika inu Sisaria. Ofit iwele kan̄, igwegwen ebi uwu oyerebet, mè inyi ida ibe esa Pọọlu enu me isi kan̄. 7 Mgbọ esabe Pọọlu inu, ebi Ju cha ìgọgọọk inan̄a me Jeruselem inu ebebene ikigwen owuwa ataak ataak ulobo ikan ikeme ọmọ. Kpunu ikan cha geege eyi ema ekọtbe ijeen̄ ibe ke îre atikọ.
8 Pọọlu onenitumu ikọ ibot kan̄, mè ibe, “Emi ǹkafiat Ikan ebi Ju geege, ǹkachaka mbuban geege me Uwu Mbuban. Ǹkarọ si inu geege ìkeme ogwu Sisa.”
9 Fesitọs oneniweek irọrọ inyi ebi Ju ebele ejit me lek kan̄, mè inido Pọọlu ibe, “Ìre môneme owu isisi Jeruselem, mè ǹsi ǹsibi oyerebet kwun̄ me ere keya, mije otutuuk inu chi ekitumu ikeme owu?”
10 Pọọlu ofọfọọk ibe, “Isi ikasi oyerebet ogwu Sisa ire eyi nkekebe. Îre ere keyi gaalek si ogbe ere mêsibibe emi oyerebet me ibot. Ìkakaan̄ ijo inu geege nrọbe ebi Ju, kubọk owu me lek kwun̄ oriọọn̄be ijaan̄ lek. 11 Ubọk geelek, ire nrọn̄ ikan, mè irọ inu eyi ògbegbe ibe ekpan̄ emi, ǹkajit mkpa. Ire, ire kpunu atikọ geege me emen otutuuk ikọ ebi Ju chi etumube ikeme emi, kpunu ene geege òkakaan̄ unye ikakana emi itap ema me ubọk. Eya orọ, mgbọ keyi, emi ǹkibeek ibe ikọ n̄a ifo isi ogwu Sisa me lek kan̄.” 12 Fesitọs ogbagbaan̄ ibot ichọk melek ebi oru kan̄, mè initumu inyi Pọọlu ibe, “Owu òkiweek ibe ikọ kwun̄ ifo isi ogwu Sisa. Isi ogwu Sisa si ke owu obosi!”
Fesitọs îkpa ikọ kè Pọọlu inyi ogwu ubọọn̄ Agiripa
13 Sọnja mgbọ iraraka, ogwu ubọọn̄ Agiripa melek Benais ogwu ngwan̄ enenwaan̄, enenije inu Sisaria ibenitọp Fesitọs, aya ogwu ibot mkpulu amọn, mè ibọkọ ọmọ itap. 14 Mije ema ekupbe me Sisaria ya iwa usen, Fesitọs oneniben ikọ kè Pọọlu ikpa ijeen̄ ogwu ubọọn̄ Agiripa, ibe, “Ogwu enerieen̄ ge òwa me ere yi, ogwu Filikis otelebe me mkpọn, mè inan̄a. 15 Mgbọ nsibe Jeruselem, ebi ibot ngwugwa, mè ebi ugane ama ebi Ju mîgwen owuwa ikan ikeme ogwu enerieen̄ yi, mè ibeek ibe emi m̀fieek oyerebet mkpa ǹnyi.
16 “Nnenitumu inyi ema ibe ke ebi Rom kpekisa ene inyi ekpan̄ ikeya me ekanyige ene ya irek, mè idasi ikeke itumu ikọ ibot kan̄ me isi ebi ìgwegwen ikan ikeme ọmọ. 17 Mgbọ ebi Ju cha egọọkbe emi inu me ere keyi, ǹkafiat mgbọ geege. Ofit iwele kan̄, ngwegwen ebi oyerebet ititiin̄, mè inyi ida ibe esa ogwu enerieen̄ ya enu. Esasa inu. 18 Ire, mgbọ ebi ìtotoon̄ ọmọ ikọ cha enan̄abe ikeke ibetumu ikọ, kpegwen ikan geege mkpọbe chieen̄ ibe ke mêgwen ikeme ogwu enerieen̄ ya. 19 Kpan̄asi ikeya, ìyaka inire sọntiik gọlọgọlọ gaalek ke ema ekaan̄ melek ogwu enerieen̄ ya ofolek ubọk iriaak Awaji kiban̄, mè inu ofolek ene ge òkwukwu iraka ekigwen Jisọs, ogwu Pọọlu okitumu inye otu ibe ke ọmọ òwa me ugwem. 20 Ikọ ya okpọkpọ iniwuwọlọ emi. Ǹkayaka ìriọọn̄ ubọk mbasa iweek emen ojelek ikọ keyi, inyi ǹriọọn̄ atikọ. Mije keya, ndodo ogwu enerieen̄ ya ibe mè ìre môneme ogwugwu isisi Jeruselem inyi ǹsi ǹkup me ere keya ǹsibi oyerebet me lek otutuuk ikọ cha ekitumu ikeme ogwugwu. 21 Ire, ogwu enerieen̄ ya ìkachieek. Kpan̄asi ikeya, itutumu ibe esa oyerebet kan̄ esi isi ogwu Sisa. Eya orọ, nnyinyi unye ibe etet ọmọ ekaan̄ me mkpọn mege ire mgbọ mâkọtbe iria ọmọ ijet ogwu Sisa.”
22 Ogwu ubọọn̄ Agiripa onenitumu inyi Fesitọs ibe ke ọmọ me lek kan̄ môweek si inọnọ ikọ me otu ogwu enerieen̄ ya.
Fesitọs ofọfọọk ọmọ ibe, “Owu mônọ ikọ me otu kan̄ me iyakwut.”
Mîsa Pọọlu inu me isi kè Agiripa mè Benais
23 Me ofit iwele kan̄, ogwu ubọọn̄ Agiripa mè Benais ogwu ngwan̄ enenwaan̄ enenije ikeya òrirọ òrirọ, me umin kiban̄ inu, mè inin̄ uwu oyerebet ya, ema melek ebi ibot akọn̄, mè ebi ibot ama. Fesitọs onyinyi ida, esasa Pọọlu inu. 24 Fesitọs onenitumu ibe, “Ogwu ubọọn̄ Agiripa, mè otutuuk kinyi ebi melek kiji ekupbe me ere yi, enyi mîmun̄ ogwu enerieen̄ yi. Otutuuk ebi Ju mîge ikpa inyi emi ikeme ene yi me Jeruselem mè ere keyi si me Sisaria, mè ikitaan̄ ukpo ibe ke ogwu enerieen̄ yi ìkayaka ìgbe iluluk ugwem ofifi. 25 Ire, emi mweek imun̄ ibe ke kpunu ikan geege îrọn̄be, eyi ògbegbe ibe ekpan̄ ọmọ. Mgbọ keyi, ubọk ọmọ gaalek otumube ibe esa ikọ kan̄ ejet ogwu Sisa, emi si ntumu ifieek iraria ọmọ isi Rom. 26 Ire, kpunu ikan geege ogwu enerieen̄ yi orọn̄be, eyi emi mbakọt itet ubọk me lek isa ige ikpa ijet ogwu ibot mkpulu ido Rom. Eya orọ nsan̄abe ogwu enerieen̄ yi isibi inu me isi kinyi otutuuk ene, ògak ge, me isi kwun̄, owu ogwu ubọọn̄ Agiripa. Soso ìgọọk emi ìwọlọ emen ikọ yi, inyi ǹkọt ǹkaan̄ inu mâkọtbe ige itap me ikpa iria ijet ogwu Sisa. 27 Mije, ikpọkpọ imọnọ ogwu mkpọn iria ikeya ijet ogwu Sisa, me ikakaan̄ge ata ikan geege esabe ibọp ene ya ìre inu burubut.”