TOꞌIꞌN WEKL TE EꞌCHK SALMO
107:1—150:6
Wiꞌnin banl talmaꞌ Kajcaw
107
1 Katyoẍink tetz Kajcaw, na chumbalaj nin iꞌ.Nin quinin bajsbeꞌn tetz yi banl talmaꞌ iꞌ.
2 Baꞌn kakꞌ kakꞌajsbil tetz cyakil oꞌ yi ja kaclax taꞌn, yi oꞌ yi ja kaclax ẍchikꞌab yi eꞌ kacontr.
3 Na ja koꞌ cuꞌ jutzꞌil. Ja keꞌl tzaj tcyꞌal tulak eꞌchk nación yi ateꞌ jeꞌn tziꞌn tu cweꞌn tziꞌn nin yi ateꞌ teleꞌn tziꞌn tu toqueꞌn tziꞌn.
4 Txꞌakxnakoꞌ tulak eꞌchk amaꞌl tzꞌinunin tuꞌ, quiꞌt njal tkanil kabeꞌ kaꞌn tan koponeꞌn tnum.
5 Ja katij weꞌj tu saktziꞌ. Txant nin qui nkaquim.
6 Poro te yi atoꞌ tul sotzaj cꞌuꞌlalaꞌtz nintzun cuꞌ kawutz tetz Kajcaw, nin ja keꞌl liwr taꞌn tkꞌab yi jun qꞌuixcꞌujaꞌtz.
7 Nin ja ẍchaj iꞌ jun balaj beꞌ sketz tan koponeꞌn le amaꞌl kalel kaꞌteꞌt.
8 Kakꞌeꞌ kakꞌajsbil tetz Kajcaw, na wiꞌnin banl talmaꞌ iꞌ. Na na el kꞌajab iꞌ skeꞌj.
9 Na ja takꞌ iꞌ kucꞌaꞌ yi nkaquim tan saktziꞌ. Nin ja takꞌ iꞌ kawaꞌ yi nkaquim tan weꞌj.
10 Ja kaxom nim tiemp tul tzꞌoꞌtz wutzil. Ja kabisun na cꞌalijchoꞌ tul caren taneꞌn.
11 Yaꞌstzun nkaban tan paj yi nkapaj yi caꞌwl yi wiꞌtz Ajcaw. Quinin nkaxom te yi tetz tajbil.
12 Ja takꞌ iꞌ amaꞌl tan katijol wiꞌnin qꞌuixcꞌuj. Ja katij qꞌuixbel eꞌchk akꞌun. Ja kacuꞌ, nin cyaꞌl mmoꞌc il tan kuchꞌeyeꞌn.
13 Poro te yi atoꞌ tcꞌuꞌl eꞌchk sotzaj cꞌuꞌlalaꞌtz nintzun cuꞌ kawutz tetz Kajcaw. Nin ja keꞌl liwr taꞌn tkꞌab yi jun qꞌuixcꞌujaꞌtz.
14 Ja keꞌl tzaj taꞌn tul yi jun tzꞌoꞌtz wutzilaꞌtz. Nin ja keꞌl liwr taꞌn tkꞌab eꞌchk carenaꞌtz.
15 Kakꞌeꞌ kakꞌajsbil tetz Kajcaw, na wiꞌnin banl talmaꞌ iꞌ nin na el kꞌajab iꞌ skeꞌj.
16 Jeꞌ jakul iꞌ yi eꞌchk puert yi brons cuꞌn. Puchꞌij cunin sajeꞌn eꞌchk puertaꞌtz yi chꞌichꞌ cuꞌn.
17 At eꞌ yi ja chitij wiꞌnin qꞌuixcꞌuj, nin eꞌ len cuꞌn yabiꞌẍ tan paj yi quil yi nchijuch, na qui nin pujx cyaꞌn yi mbi nchiban.
18 Quiꞌt na takꞌ nin tib chiwaꞌ tan paj muꞌẍt nin qui nchiquim.
19 Poro te yi ateꞌ tul eꞌchk sotzaj cꞌuꞌlalaꞌtz, nintzun cuꞌ chiwutz tetz Kajcaw. Nin ja cheꞌl liwr taꞌn, tkꞌab yi jun qꞌuixcꞌujaꞌtz.
20 Nin yi cawuneꞌn iꞌ, ja ul yos scyuchꞌ. Quiꞌt tzun nchiquimtz.
21 Kakꞌeꞌ kakꞌajsbil tetz Kajcaw. Na wiꞌnin banl talmaꞌ iꞌ, na na el kꞌajab iꞌ skeꞌj.
22 Koyeꞌ bin katxꞌixwatz tetz iꞌ tan katyoẍil yi banl talmaꞌ, nin baꞌn katxol yi eꞌchk takleꞌn balaj yi na ban iꞌ.
23 Nchaꞌtz eꞌ ban yi eꞌ aj cꞌayinl scyuchꞌ yi eꞌ yocol yi ilenin na chixon wi mar tu cyetz chibarc.
24 Te yi na chixon wi mar, na quil yi eꞌchk takleꞌn balaj yi bnixnak tan Kajcaw.
25 Poro yi cawuneꞌn Kajcaw nin saj jun chin wutzileꞌn cyekꞌekꞌ tan ẍchekꞌeꞌn yi mar.
26 Nin yi pakꞌbil yi maraꞌtz oponeꞌn cuꞌn jalen xe cyaꞌj, nin oponeꞌn cuꞌn jalen xe mar. Ma yi eꞌ aj pyajaꞌtz wiꞌnin tzun chixobeꞌntz tan paj.
27 Wiꞌnin chilucneweꞌn tan xoꞌw. I cuꞌn cyuchꞌ kbarel taneꞌn. Quiꞌc chixac tu yi cyetz cyajtzaꞌkl yi na aꞌw cyaꞌn.
28 Poro te yi ateꞌ tul eꞌchk sotzaj cꞌuꞌlalaꞌtz nintzun cuꞌ chiwutz tetz Kajcaw. Nin ja cheꞌl liwr tkꞌab yi jun sotzaj cꞌuꞌlalaꞌtz.
29 Nintzun taneꞌ yi cyekꞌekꞌaꞌtz taꞌn. Nchaꞌtz ban yi pakꞌbil mar, numeweꞌn nin ban cyakil.
30 Yi quilol yi aj pyajaꞌtz yi numeweꞌn tircuꞌn, kalenaꞌs tzun chitzatzineꞌn, nin eꞌ opontz tan Ryos le amaꞌl kale atit cyopombil.
31 Kakꞌeꞌ kakꞌajsbil tetz Kajcaw, na wiꞌnin banl talmaꞌ iꞌ, nin na el kꞌajab iꞌ skeꞌj.
32 Tajweꞌn kakꞌ kꞌej iꞌ yi na kamol cuꞌn kib kacyakil cuꞌn. Nchaꞌtz eꞌuꞌ wiꞌ banl wiꞌ tetz tnum, cyakꞌeꞌuꞌ chikꞌajsbiluꞌ tetz.
33 Yi Kajcaw baꞌn na jal tzanlaꞌ taꞌn tu eꞌchk cwaꞌ le eꞌchk amaꞌl tzꞌinunin tuꞌ nin le eꞌchk amaꞌl yi skajwutz.
34 Ma yi eꞌchk cojbil yi na takꞌ ujul quiꞌt na takꞌ balaj cosech tan paj yi quil yi eꞌ wunak yi najlcheꞌ swutz.
35 Ma yi eꞌchk amaꞌl tzꞌinunin tuꞌ, na oc taꞌn tetz lawun. Nin yi skajwutz na oc taꞌn tetz sijaꞌbil.
36 Choꞌn tzun na chinajan yi eꞌ yi at tajweꞌn scyetz. Choꞌn tzun na bnix chitnumil tul eꞌchk amaꞌlaꞌtz.
37 Na cyawaj ujul swutz eꞌchk amaꞌlaꞌtz. Na cyawaj eꞌchk uva, nin na jeꞌ balaj cosech cyaꞌn swutz.
38 Ryos na akꞌon banl tibaj. Iꞌ na pucꞌsan wutz yi cyawun yi awnaꞌn cheꞌ cyaꞌn.
39 Ma yi ko na chiquim jujun cyakꞌun yi eꞌ yi na chitzan tan chibuchleꞌn, nin ko na cutzaj tajlal chixoneꞌn tan paj yi eꞌ yi na chitzan tan takꞌleꞌn bis oꞌkl scyetz,
40 na oc Ryos tan chicawseꞌn yi eꞌ buchul cyetz. Ẍchitxꞌakxok cyeraꞌtz tu chibeꞌ. Tu chipaꞌcaꞌp tlentuꞌ tbeꞌ.
41 Na oc Kajcaw tan quichꞌeyeꞌn, nin tan chimayseꞌn yi eꞌ yi na chibisun. Na chꞌuy tajlal xoneꞌn yi chinajal chi na ban jun kꞌuꞌj cneruꞌ yi na pucꞌun chiwutz.
42 Yi na quil yi eꞌ balaj wunak yi xtxolbileꞌj na chitzatzin teꞌj. Ma yi eꞌ mal nak quiꞌc jun yol na cyal cyeraꞌtz.
43 Yi eꞌ yi at cyajtzaꞌkl, tajweꞌn choꞌc tan xtxumleꞌn yi eꞌchk xtxolbilaꞌtz. Nin tajweꞌn tan teleꞌn chitxum tetz yi banl talmaꞌ Kajcaw.