PROVERBIOS
Txꞌolbil Xoꞌl Yi Liwreꞌj
Jun proverbio, iꞌtz cobox yol yi cyꞌaꞌn wiꞌnin ajtzaꞌkl taꞌn, yi chin tzꞌaknak cunin, nin yi na ẍchaj sketz yi ẍeꞌn kaban tan koqueꞌn tetz cꞌulutxum jak caꞌwl Ryos, tan qui kaxubseꞌn.
Ma jaluꞌ, yi mero xtxolbil yi na ẍchaj yi liwreꞌj sketz iꞌtz: Yi wiꞌnin xanil Ryos, nin kol kaban taneꞌn yi tetz caꞌwl, slajluchax yi na kek ẍchiꞌ iꞌ bintzi cunin. Ej nin kol kaban taneꞌn yi eꞌchk caꞌwlaꞌtz, sjalok kaẍcꞌatnakil tan banleꞌn yi tajbil Ryos.
At wiꞌnin jilwutz ajtzaꞌkl tul yi liwreꞌj. At ajtzaꞌkl te yi ẍeꞌnl kaban te yi ankꞌiꞌn yi akꞌij sketz.
Nchaꞌtz na jilon te yi mbiꞌtz tajweꞌn tan chibnol taneꞌn jun najal tan jaleꞌn yi tzatzin paz le chinajbil. Nin na jilon te yi ẍeꞌn kaban tu kameꞌbiꞌl.
Nchaꞌtz na ẍchaj sketz yi tajweꞌn tan kocsal kib juy. Nin yi ẍeꞌn jal kapasens te cyakil yi na ul skawutz.
Nchaꞌtz na ẍchaj sketz yi tajweꞌn tan teleꞌn kakꞌajab scyeꞌj yi eꞌ tal prow meꞌbaꞌ. Ej nin na ẍchaj sketz yi tajweꞌn tan keleꞌn cuꞌn te jun kayol yi na kasuk.
Na aꞌlchij “Proverbios de Salomón” tetz tircuꞌn yi liwr. Poro yi mero xtxolbil yi cyajnak cyen stzꞌibal Salomón, choꞌn na jal kaꞌn tul capítulo 10 jalen capítulo 29. Tul yi capítulo 30 na jilon jun yaj yi na biꞌaj Agur, nin tul yi capítulo 31:1-9 na jilon yi xtxuꞌ Lemuel.
Yi bajx 9 capítulo na tzan tan takꞌleꞌn kꞌej yi balaj ajtzaꞌkl. Ma tul yi capítulo 31:10-31, na ẍchaj sketz yi balajil yi cyajtzaꞌkl yi eꞌ xnaꞌn yi chin tzꞌaknak cunin, nin yi chin cꞌascꞌuj nin eꞌ.
Yi Weklil Yi Liwreꞌj
Yi bajx wekl (Cap. 1–9) na jilon te yi mbi ekaꞌn tan yi balaj ajtzaꞌkl.
Yi caꞌp wekl (Cap. 10–29) na xtxol yi eꞌchk tajtzaꞌkl Salomón.
Yi toxeꞌn wekl (Cap. 30) na jilon te yi tajtzaꞌkl Agur.
Yi cyajeꞌn wekl (Cap. 31) na xtxol coboxt ajtzaꞌkl scyetz eꞌ xnaꞌn.