Chin pajol caꞌwl nin yi eꞌ xonl Israel
106
1 Kakꞌeꞌ kakꞌajsbil tetz Kajcaw.Katyoẍink tetz Kajcaw, na chumbalaj nin iꞌ.
Quinin bajsbeꞌn tetz yi banl talmaꞌ iꞌ.
2 Cyaꞌl jun yi nink xcyeꞌ tan talcheꞌn cyakil yi eꞌchk takleꞌn balaj yi bnixnak taꞌn.
Cyaꞌl jun yi nink xcyeꞌ tan tyoẍiꞌn tetz te cyakil yi banak iꞌ.
3 Baꞌn cyeri eꞌ yi na chiban taneꞌn yi balaj, nin yi na chiban yi eꞌchk takleꞌn yi jicyuch teꞌj.
4 Nink nuꞌl txꞌakx tcꞌuꞌluꞌ yil tzꞌocuꞌ tan banleꞌn baꞌn te yi tanumuꞌ.
Lok nuꞌl txꞌakx tcꞌuꞌluꞌ yil tzꞌul tzajuꞌ tan chicolpeꞌn.
5 Ink jun te yi banluꞌ yi stakꞌeꞌuꞌ scyetz yi eꞌ txaꞌij cheꞌt tanuꞌ.
Lok chintzatzin ẍchixoꞌl.
Lok jal inkꞌej ẍchixoꞌl.
6 Oꞌ len juchul il swutzuꞌ chi banakeꞌ yi eꞌ kamam kateꞌ. Quiꞌc muꞌẍ tal kaxac.
Quiꞌc jun eꞌchk takleꞌn balaj yi ja bnix kaꞌn.
7 Nchaꞌtz banakeꞌ eꞌ kamam kateꞌ le amaꞌl Egipto.
Quinin cyek ẍchiꞌ yi eꞌchk milawr yi bnix tanuꞌ.
Ja el te chicꞌuꞌl yi banluꞌ yi nẍchajuꞌ scyetz.
Nin yi cyoponeꞌn tzi Cyak Mar ja choꞌc tan contriꞌn te eꞌchk caꞌwluꞌ.
8 Ma yi iluꞌ teruꞌ Taꞌ, ilenin ja chiclax tanuꞌ.
Ja ẍchajuꞌ yi poreruꞌ scyetz bantz jaleꞌn kꞌejuꞌ.
9 Na ja cuꞌ cabsaluꞌ yi Cyak Mar.
Nin yi skejeꞌn, ja chicyꞌ tzaj yi eꞌ teruꞌ tanumuꞌ tcꞌuꞌl. Chin skej nin ban yi jun beꞌaꞌtz tanuꞌ.
10 Yaꞌstzun ntulejuꞌ tan chicolcheꞌn ẍchikꞌab yi eꞌ chicontr yi wiꞌnin ẍchiꞌcheꞌn chicꞌuꞌl scyeꞌj.
11 Nin yi chicontraꞌtz tircuꞌn chiquimeꞌn xe aꞌ.
Quiꞌc nin jun nclax cyen.
12 Yi quilol yi xtxolbileꞌj ja cyocsaj yi yoluꞌ yi sukiꞌnt tanuꞌ.
Nin eꞌ octz tan takꞌleꞌn chikꞌajsbil teruꞌ.
13 Poro yi teleꞌn coboxt kꞌej, ja el cyakil yi eꞌchk xtxolbilaꞌtz te chicꞌuꞌl, nin quinin jal chipasens tan ẍchꞌiweꞌn yi txumijt cyen tanuꞌ scyeꞌj.
14 Ma na te yi ateꞌ le amaꞌl tzꞌinunin tuꞌ, ja choꞌc tan pileꞌnuꞌ, nin tan caweꞌnuꞌ, tan bnoluꞌ yi cyetz cyajbil.
15 Ilenin ja takꞌuꞌ yi cyetz cyajbil poro xomij chicaws teꞌj.
Na ja ul jun chin yaꞌbil ẍchiwutz yi nim eꞌ nchiquim taꞌn.
16 Nchaꞌtz yi chinajeweꞌn cobox kꞌej le jun amaꞌl, ja chiꞌch chicꞌuꞌl te Moisés tu Aarón, yi eꞌ ẍchakumuꞌ, yi xansaꞌn cheꞌt tanuꞌ.
17 Nin tan paj yi quilaꞌtz ja chiquim, na ja cuꞌ cꞌabx yi wuxtxꞌotxꞌ nin ja chiben tcꞌuꞌl.
Itzꞌenleꞌn nchiben tcꞌuꞌl. Ja chiquim cyakil yi eꞌ tu Datán, scyuchꞌ yi jun txob tu Abiram.
18 Na ja oc chikꞌaꞌkl chicyakil cuꞌn.
Tircuꞌn yi eꞌ juchul ilaꞌtz chiquimeꞌn.
19 Nchaꞌtz yi cyoponeꞌn swutz yi wiꞌwtz Horeb, eꞌ octz tan banleꞌn jun teblal jun neꞌẍ wacẍ, yi oro cuꞌn. Nin eꞌ octz tan cꞌuꞌlajeꞌn.
20 Ja jeꞌ chitxꞌexul yi chiRyosil yi wiꞌnin kꞌej, nin eꞌ oc tan cꞌuꞌlajeꞌn teblal jun neꞌẍ wacẍ, jun tuꞌ txuc yi na baj chꞌim taꞌn.
21 El te chicꞌuꞌl yi chiRyosil yi colpinl cyetz.
Wech na bnixnak wiꞌnin eꞌchk milawr taꞌn le amaꞌl cwent Egipto,
22 le amaꞌl Cam, nin stziꞌ yi Cyak Mar kale mbnixeꞌt wiꞌnin eꞌchk takleꞌn yi chin xoꞌwbil nin.
23 Yi bnixeꞌn eꞌchk takleꞌnaꞌtz, ja kloꞌ oc Ryos tan chisotzajeꞌn chicyakil cuꞌn, ma na nin oc Moisés ẍchixoꞌl tu Ryos tan qui chiquimeꞌn. Yi jun Moisésaꞌtz txaꞌijt iꞌ tan Ryos.
Nin ja xcyeꞌ iꞌ tan mayseꞌn cꞌuꞌl Ryos, bantz qui toqueꞌn tan chixiteꞌn cuꞌn.
24 Nchaꞌtz yi ticyꞌeꞌn cobox kꞌej eꞌ opontz tzi mojom yi balaj amaꞌl yi sukiꞌnt tan Ryos scyetz.
Poro niꞌcuꞌn yi quiꞌc xac le chiwutz cyetz na quinin kꞌuklij chicꞌuꞌl yi at Ryos tan quichꞌeyeꞌn.
25 Na eꞌ oc tan yolcheꞌn Kataj Ryos xeꞌak chinajbil, nin quinin eꞌ oc cꞌulutxum jakꞌ caꞌwl iꞌ.
26 Chaꞌstzun te jeꞌn tkꞌol iꞌ yi kꞌab nin tal:
“Jun cuꞌn ẍchiquimok yi eꞌaꞌtz waꞌn le amaꞌl tzꞌinunin tuꞌ.
27 Nchaꞌtz ẍchibneꞌ yi eꞌ chinitxajil, nin at eꞌ yi chelepon inxitul ẍchixoꞌl yi eꞌ mas nación yi quiꞌc cyetz chiryosil.”
28 Nchaꞌtz cyakꞌ quib tkꞌab chiryosil wunak yi na biꞌaj Baal-peor. Nin baj ẍchiꞌbel yi chitxꞌixwatz yi eꞌ mas wunak yi na cyoy scyetz chiryosil yi banij cuntuꞌ taneꞌn.
29 Tan yi cyajtzaꞌkl eꞌ oc tan takꞌleꞌn chiꞌch cꞌuꞌlal tetz Ryos. Chaꞌstzun te beneꞌn loꞌon jun chin yaꞌbil ẍchixoꞌl.
30 Poro yi yaj yi na biꞌaj Finees nin bentz tan biyleꞌn jun scyeri eꞌ juchul ilaꞌtz.
Chaꞌstzun te taneweꞌn te yi jun yaꞌbilaꞌtz yi nsken ben loꞌon ẍchixoꞌl.
31 Quiꞌc tzun til Finees ban swutz Ryos tan yi xtxolbil yi ban iꞌ. Chaꞌstzun te tkꞌol Ryos yi banl tibaj scyuchꞌ yi eꞌ tetz xonl tetz ben kꞌej ben sak.a
32 Nchaꞌtz eꞌ octz tan xuxeꞌn Ryos tan sajeꞌn colpuj wiꞌ scyeꞌj le amaꞌl Meriba kale eltzit aꞌ wutz cꞌub tan Ryos. Nin tan chipaj, juchul Moisés til.
33 Na ja saj jun chiꞌch cꞌuꞌlal teꞌj nin quinin tzꞌicyꞌ tetz yi el tzaj cobox yol yi quinin tzatzin Ryos teꞌj.
34 Nchaꞌtz quinin eꞌ octz tan chisotzajeꞌn yi eꞌ wunak yi talnak Ryos yi tajweꞌn tan chisotzajeꞌn.
35 Ma na nin cyokꞌbej quib scyuchꞌ yi eꞌ yi apart chiryosil nin ja chixom te cyetz chicstumbr.
36 Na ja choꞌc tan cꞌuꞌlajeꞌn chiryosil yi eꞌ mal nakaꞌtz. Chaꞌstzun te eꞌ cuꞌ xitul Ryos.
37 Na nin eꞌ baj oc tan toyeꞌn chinitxajil tetz chitxꞌixwatz ẍchiwutz yi eꞌ demonio yi eꞌ ẍchakum Baybaꞌn.
38 El chiẍchꞌel yi eꞌ yi quiꞌc quil. Na, el chiẍchꞌel yi chinitxajil, nin eꞌ octz tan toyeꞌn scyetz chiryosil yi eꞌ aj Canaán. Nin tan yi chichꞌ yi el kojxuj ja jal til yi wuxtxꞌotxꞌ.
39 Nin tan cyakil eꞌchk takleꞌn cachiꞌ yi nchiban, ja chijuch quil. Na ja choꞌc tan jopleꞌn wutz Kataj Ryos, na ja cyokꞌbej quib tu junt chiryosil apart.
40 Sajeꞌn tzun colp wiꞌ Ryos scyeꞌj nin tal iꞌ:
“Quiꞌc wocleꞌn scyeꞌj yi eꞌ wunakaꞌtzeꞌj.”
41-42 Ja tzun takꞌ iꞌ amaꞌl scyetz tan chibeneꞌn pres ẍchikꞌab yi eꞌ awer nak.
Ja choꞌc jakꞌ chicaꞌwl yi eꞌ chicontr nin ja chibuchlij cyaꞌn. Junawes meꞌl chitxꞌix.
43 Wiꞌnin tir oc Ryos tan chicolcheꞌn.
Ma yi eꞌ cyetz quinin chixom te tajbil iꞌ.
Ma na mast cunin nchiban yi cyetz cyajbil.
44 Poro ilenin el kꞌajab Ryos scyeꞌj, na nin til iꞌ yi chin qꞌuixcꞌuj nin ateꞌ cuꞌnt. Nin ja tbit iꞌ yi chitziꞌ chikul yi na chokꞌ swutz iꞌ.
45 Na nin ul txꞌakx yi yol iꞌ yi suknak scyetz.
Chaꞌstzun te jeꞌn xtxꞌixpul iꞌ yi tajtzaꞌkl, na wiꞌnin banl talmaꞌ iꞌ.
46 Na nicyꞌ nin yi chicontr yi eꞌ xonl Israelaꞌtz el chikꞌajab scyeꞌj.
47 Kajcaw, iluꞌ kaRyosil koꞌ coleꞌuꞌ.
Koꞌ jutzꞌeꞌuꞌ ẍchixoꞌl yi eꞌ mas nación, bantz kakꞌol kakꞌajsbil teruꞌ, na chin xan nin yi biꞌuꞌ.
Koꞌ jutzꞌeꞌuꞌ ẍchixoꞌl yi eꞌ mas nación, bantz tetz cuꞌn kalmaꞌ yil kakꞌ kakꞌajsbil teruꞌ.
48 Kakꞌeꞌ bin kakꞌajsbil tetz Kajcaw yi kaRyosil yi oꞌ xonl Israel.
Kakꞌeꞌ kakꞌajsbil tetz iꞌ sbneꞌ opon tunintz.
Lok kal len cyakil oꞌ: “Yaꞌtzk sbantz.”
Kakꞌeꞌ kakꞌajsbil tetz Kajcaw. ¡Aleluya!