ESTER
Txꞌolbil Xoꞌl Yi Liwreꞌj
Yi xtxolbil yi tzꞌibaꞌnt cyen tul yi liwreꞌj choꞌn mbajij le amaꞌl Persa, yi jaluꞌ na biꞌaj Irán tu Irak. Ja bnix loꞌ 539—331 yob te yi ntaxk itzꞌij Kajcaw Jesucristo. Ej nin yi liwreꞌj ja bnix te yi na cawun tzaj yi rey Asuero tentz. Jaluꞌ iꞌtz mas cob mil oꞌ cientiẍ yob jetz yi cweꞌn tzꞌibaꞌn. Ej nin na jilon scyeꞌj yi eꞌ xonl Israel yi qui nin eꞌ pakxij le cyetz chitanum.
Tul yi liwreꞌj na kil yi at wiꞌnin aj Persa yi ja chiꞌch chicꞌuꞌl scyeꞌj yi eꞌ judiyaꞌtz. Poro at jun judiy yi na biꞌaj Mardoqueo yi ja nachon te yi problemaꞌtz. Chaꞌstzun te ja cawun iꞌ tetz yi reina Ester tan qui talol tetz jun yi iꞌ tetz iꞌ jun judiy (2:10).
Nchaꞌtz at cob ẍchakum yi rey (3:3-4) yi eꞌ oc tan xochleꞌn Mardoqueo, na nsken el chitxum tetz yi iꞌ judiy. Nchaꞌtz na lajluchax yi chiꞌch cꞌuꞌlal yi cyꞌaꞌn tan Amán yi beneꞌn tan chixochleꞌn cyakil yi eꞌ judiy swutz yi rey Asuero.
Ej nin tul yi jun liwreꞌj na kil yi ja nimsaj cꞌuꞌl yi reina Ester tan joyleꞌn puntil tan chiclaxeꞌn yi eꞌ tetz tanum, ptzunk jak quim tan paj.
Yi Weklil Yi Liwreꞌj
Yi bajx wekl (Cap. 1–2) na jilon te yi toqueꞌn cyen Ester tetz reina.
Yi caꞌp wekl (Cap. 3) na jilon te yi bixeweꞌn tan Amán tan chisotzajeꞌn kloꞌ yi eꞌ judiy.
Yi toxeꞌn wekl (Cap. 4) na jilon te yi moxeꞌn Ester tan Mardoqueo tan chiclaxeꞌn tkꞌab quimichil.
Yi cyajeꞌn wekl (Cap. 5–6) na jilon te yi tkꞌol yi rey kꞌej Mardoqueo.
Yi toꞌeꞌn wekl (Cap. 7) na jilon te yi jeꞌn chꞌimbeꞌn Amán jakꞌ tzeꞌ.
Yi kakeꞌn wekl (Cap. 8:1–9:19) na jilon te yi chicolol quib yi eꞌ judiy chikꞌab chicontr.
Yi jukeꞌn wekl (Cap. 9:20–10:3) na jilon te yi wutz kꞌej yi na biꞌaj “Purim”.