Yi chibansalt quib swutz Kataj Ryos
13
1 Itzun bantz te yi jun tiempaꞌtz nintzun oc siꞌleꞌn yi liwr tetz Moisés skawutz. Ej, nin te yi na tzan siꞌleꞌn skawutz, nintzun jal jun xtxolbil yi na tal yi quiꞌc rmeril tan cyoqueꞌn yi eꞌ aj Amón scyuchꞌ yi eꞌ xonl Moab tetz cyajlal yi eꞌ tanum Ryos. 2 Na yi eꞌaꞌtz, quinin eꞌ el tzaj tan takꞌleꞌn jujun chiwaꞌ nka muꞌẍ quicꞌaꞌ yi eꞌ kamam kateꞌ xonl Israel te yi na chixon tan cyuleꞌn tzoneꞌj. Ma na ja cyakꞌ pwok tetz Balaam tan toqueꞌn tan jakleꞌn chicaws. Poro nkꞌeꞌtz chicaws takꞌ Ryos ma na mas chibanl takꞌ iꞌ.3 Itzun yi quibital yi xtxolbilaꞌtz yi na tal yi ley, nintzun eꞌ octz tan chijatxleꞌn len yi eꞌ yi nsken cyokꞌbej quib scyuchꞌ awer nak.
4 Poro Eliasib yi paleꞌ, yi at tan qꞌuicyꞌleꞌn yi eꞌchk takleꞌn yi at xe caꞌl Kataj, cyajwutz quib tu Tobías. 5 Nsken tzun takꞌ iꞌ jun cuart yi at le templo, tetz Tobías tan najeweꞌn tul.
Choꞌn tkꞌol iꞌ yi jun cuartaꞌtz kale na chicolxeꞌt yi eꞌchk oy tu eꞌchk insens, tu eꞌchk maꞌcl yi na xcon xe caꞌl Kataj. Nin choꞌn na colxij yi eꞌchk diesum tu yi ixiꞌn triw yi na opon tetz Kataj. Nin choꞌn colij yi eꞌchk win tu aceit yi na xcon cyakꞌun yi eꞌ xonl Leví, scyuchꞌ yi aj bitz, scyuchꞌ yi eꞌ qꞌuicyꞌlom sawan, nin yi na akꞌlij scyetz yi eꞌ paleꞌ. Nin yaꞌstzun yi cuart yi xcon tan Tobías.
6 Yi bajeꞌn cyakil yi xtxolbilaꞌtz, quibin wetz atin tzoneꞌj Jerusalén. Na choꞌn atin pon Babilonia. Na te yi tiempaꞌtz, yaꞌstzun yi nsken el junak coblajix yob tan Artajerjes yi rey tan cawuꞌn tibaj yi amaꞌlaꞌtz. Poro yi teleꞌn cobox tiemp waꞌn, nintzun injakt impermis tan wuleꞌn junt tir tzoneꞌj Jerusalén.
7 Yi wuleꞌnt nintzun wil yi chin cachiꞌ nin yi ban Eliasib, na nin takꞌ iꞌ amaꞌl tetz Tobías tan najeweꞌn tul jun cuart le caꞌl Kataj, wech awer nak iꞌ.
8 Yi wital yi xtxolbilaꞌs nintzun chiꞌch incꞌuꞌltz te Eliasib. Imbeneꞌn tzun tan telseꞌn tzaj cyakil yi eꞌchk beꞌch tetz Tobías yi at le jun cuartaꞌtz.
9 Incawuneꞌn tzuntz tan cyoqueꞌn yi eꞌ paleꞌ tan xanseꞌn junt tir yi jun cuartaꞌtz. Kalenaꞌs tzun toqueꞌnt yi eꞌchk maꞌcl yi na xcon xe caꞌl Kataj tu yi eꞌchk insens, tu yi eꞌchk oy.
10 Ej, nin nchaꞌtz aꞌlchij swetz yi quiꞌt na akꞌlij yi chibambil yi eꞌ xonl Leví yi na chixcon le caꞌl Kataj. Nin tan yi qui na akꞌlij yi tajweꞌn scyetz, nsken cheꞌl ojk le caꞌl Kataj, nin nsken chopon tulak cyetz chiꞌamaꞌl.
11 Imbeneꞌn tzuntz tan chiyajleꞌn yi eꞌ ajcaw, na nxac ncyaj cyen quilol yi caꞌl Kataj. Chibajeꞌnt tzun inmolol yi eꞌ paleꞌ scyuchꞌ yi eꞌ xonl Leví. Nintzun eꞌ oc junt tir waꞌn te yi cyakꞌun yi bixbaꞌn cheꞌt sjuꞌ.
12 Ej itzun bantz, tircuꞌn tzun yi eꞌ aj Judá ul len chidiesum cyaꞌn tu ixiꞌn triw, tu win, tu aceit. Nin opontz cyaꞌn kale na molxeꞌt yi eꞌchk oy le caꞌl Kataj.
13 Chibixeweꞌn tzun cobox bajxom waꞌn tan tilweꞌn yi amaꞌl kale na molxeꞌt yi eꞌchk oyaꞌtz. Bixeꞌ Selemías yi paleꞌ, tu Sadoc yi ajtzꞌib, tu yi xonl Leví yi na biꞌaj Pedaías, scyuchꞌ cobox chꞌeyanl cyetz. Oc Hanán yi cyꞌajl Zacur, yi mamaj Matanías, na iꞌtz jun yaj yi baꞌn kꞌukeꞌ kacꞌuꞌl teꞌj. Eꞌ tzun eꞌ bixeꞌ-tz tan jatxleꞌn yi eꞌchk oyaꞌtz.
14 “Ma jaluꞌ iluꞌ Kataj Ryos yi atuꞌ tcyaꞌj, quiꞌk tzꞌel cyakil yi xtxolbilaꞌtz te cꞌuꞌluꞌ yi mimban te yi caꞌluꞌ, tu yi mimban tan chimolcheꞌn yi eꞌ intanum tan cyoqueꞌn junt tir tan cꞌuꞌlajeꞌnuꞌ. Quiꞌk tzꞌel te cꞌuꞌluꞌ Taꞌ,” chinch tzun bantz tetz Kataj Ryos.
15 Nchaꞌtz wil te cobox kꞌejaꞌtz, yi at eꞌ intanum aj Judá yi na chakꞌuj tan banleꞌn win tul eꞌchk kꞌej ujleꞌn. Nchaꞌtz at eꞌ yi na chitzan tan tekeꞌn triw, nin at eꞌ yi na chitzan tan tekeꞌn win, tu uva, tu wutz higo. Nin at eꞌ yi ja xcon buruꞌ cyaꞌn tan tekeꞌn eꞌchk takleꞌnaꞌtz. Nchaꞌtz ja wil yi at wiꞌnin eꞌ yi na chopon tan cꞌayiꞌn Jerusalén tul eꞌchk kꞌej ujleꞌnaꞌtz.
Woqueꞌn tzuntz tan chiyajleꞌn, tan paj yi na chicꞌayin lakak kꞌej ujleꞌn.
16 Nchaꞌtz at aj Tiro na chuꞌlak lak eꞌchk kꞌej ujleꞌn tan cꞌayiꞌn cay tu eꞌchk mas takleꞌn, scyetz yi eꞌ judiy yi najlcheꞌ Jerusalén. 17 Nintzun eꞌ inyaj yi eꞌ bajxom cwent Judá:
—¿Mbi na chibanuꞌ? ¿Nxac na chitzanuꞌ tan pajleꞌn yi jun kꞌej ujleꞌn? ¿Nxac na chitzanuꞌ tan juchleꞌn quiluꞌ swutz Ryos? 18 Yi xtxolbileꞌj yi na chitzanuꞌ tan banleꞌn, iteꞌn nin banakeꞌ yi eꞌ kamam kateꞌ yi chijuchul quil swutz Ryos. Chaꞌstzun te ja ul wiꞌnin kacaws, nin ja ul wiꞌnin sotzaj cꞌuꞌlal skawutz tuml yi tnum kale atoꞌt, na ja cuꞌ wocꞌ. ¿Na ptzun cyajtuꞌ yil kakꞌ chꞌon tetz Kataj, nin na ptzun cyajtuꞌ tzꞌul kacaws tan iꞌ? Nxac tzun qui na chitzanuꞌ tan banleꞌn taneꞌn yi jun kꞌej ujleꞌn, chinch bantz scyetz.
19 Iteꞌn nin rataꞌtz incawunin scyetz cyakil yi eꞌ wunak, yi tajweꞌn tan chibnol taneꞌn yi jun kꞌej ujleꞌnaꞌtz. Ej, ninin te yi cweꞌn kꞌejaꞌtz oꞌ xeꞌtij tan banleꞌn taneꞌn yi jun kꞌejaꞌtz. Ja chincawunin tan jopleꞌn eꞌchk sawan. Nin ja chiben inchakol cobox inchakum tan chibeneꞌn tan qꞌuicyꞌleꞌn yi eꞌchk sawanaꞌtz, bantz qui toqueꞌn tzaj jun eꞌchk takleꞌn, nka jun ektz te eꞌchk kꞌej ujleꞌn.
20 Wiꞌnin tzun aj yocol scyuchꞌ aj cꞌayinl yi eꞌ cyaj cyen alaꞌ tir solteꞌj Jerusalén. Quinin eꞌ oc tzaj, nin choꞌn eꞌ cyajeꞌn cyen tan watl solteꞌj yi tnum. 21 Imbeneꞌn tzuntz tan chiyajleꞌn, nin wal scyetz yi quiꞌc rmeril tan chiwiteꞌn cyen solteꞌj yi tapijil yi tnum.
Nchaꞌtz wal scyetz: “Yi kol chuꞌluꞌ junt tir lakak kꞌej ujleꞌn, chelpon injutiluꞌ swutz yi amaꞌleꞌj,” chinch. Nin jetzaꞌtz quiꞌt eꞌ ul lakak eꞌchk kꞌej ujleꞌn.
22 Nchaꞌtz incawunin scyetz yi eꞌ xonl Leví tan chixansal quib, nin tan chibeneꞌn tan qꞌuicyꞌleꞌn yi eꞌchk sawanil yi tnum. Na lastum yi ko na katzan tan telseꞌn kꞌej yi eꞌchk kꞌej ujleꞌn.
“Iluꞌ, iluꞌ Kataj Ryos, iluꞌ inRyosil, quiꞌk tzꞌel te cꞌuꞌluꞌ cyakil yi xtxolbilaꞌtz yi mimban. Elk kꞌajabuꞌ sweꞌj tan yi banl talmaꞌuꞌ.”
23 Nchaꞌtz te yi cobox kꞌejaꞌtz, wil yi at wiꞌnin judiy yi nsken chumeꞌ scyeꞌj awer nak, na at eꞌ nsken chumeꞌ scyeꞌj xnaꞌn aj Asdod, aj Amón nin aj Moab. 24 Nin yi chinitxaꞌ cob cuntuꞌ elnakeꞌ, na at eꞌ yi qui na aꞌw kayol cyakꞌun, ma na i chiyol yi eꞌ aj Asdod, nka junt jilwutz yol na aꞌw cyaꞌn.
25 Nintzun jeꞌ lajpuj inwiꞌ scyeꞌj. Nin wal scyetz yi ploj quitaneꞌn. At eꞌ, eꞌ loꞌon waꞌn, nin at eꞌ yi jeꞌ inxitxꞌul chin xiꞌil chiwiꞌ. Nintzun wal scyetz yi tajweꞌn tan chisukil chiyol swutz Kataj Ryos, tan quiꞌt cyumeweꞌn scyeꞌj yi eꞌ xnaꞌn awer nak. Ej, nin nchaꞌtz quiꞌc rmeril tan cyakꞌol amaꞌl scyetz yi chinitxaꞌ tan cyumeweꞌn scyeꞌj awer nakaꞌtz. 26 Nchaꞌtz wal scyetz: “¿Qui peꞌ nachij cyaꞌnuꞌ yi yaꞌstzun juchwit Salomón til? Wech na ocnak iꞌ tetz rey tibaj Israel. Quiꞌc junt rey tul junt nación yi yaꞌstzunk bantz chi banak iꞌ. Wech na wiꞌnin na pekꞌ Kataj Ryos teꞌj, na Ryos ocsan iꞌ tetz rey tibaj cyakil yi nación tetz Israel. Poro ja juch til tan paj yi ja tokꞌbej tib scyuchꞌ yi eꞌ xnaꞌn awer nak. 27 Chaꞌstzun te quil kakꞌ amaꞌl scyeruꞌ tan chibnoluꞌ yi cyeruꞌ cyajbiluꞌ scyuchꞌ yi eꞌ xnaꞌn yi eꞌ awer nak. Quiꞌk kajuch kil swutz kaRyosil tan paj yi jun xtxolbilaꞌtz.”
28 At tzun Joiada yi paleꞌ yi cyꞌajl Eliasib yi wiꞌtz paleꞌ. Nin oc jun scyeri yi eꞌ cyꞌajl te yi meꞌl Sanbalat yi aj Arón. Nin saj inwiꞌ te iꞌ, nin el inlajul skaxoꞌl.
29 ¡I bin jaluꞌ Taꞌ! Quiꞌk tzꞌel chipaj chitxꞌokꞌbeꞌn yi eꞌ paleꞌaꞌtz te cꞌuꞌluꞌ, na ja chipoꞌtzaj yi chimunl yi akꞌij taꞌnuꞌ scyetz. Na yi eꞌ kapaleꞌilaꞌtz, ja chipaj yi caꞌwl yi akꞌijt taꞌnuꞌ tan chixomeꞌn teꞌj. Nchaꞌtz yi eꞌ xonl Leví yi na chixcon le templo, ja chipaj yi caꞌwl yi akꞌijt tanuꞌ scyetz.
30 Nchaꞌtz eꞌ el injatxol yi eꞌ awer nak ẍchixoꞌl yi eꞌ xonl Israel. Nin eꞌ bixeꞌ junt tir yi eꞌ paleꞌ waꞌn te chimunl. Nchaꞌtz mimban scyeꞌj yi eꞌ xonl Leví.
31 Nchaꞌtz bixeꞌ waꞌn tan tulseꞌn junt tir yi siꞌ yi na xcon xe caꞌl Kataj. Ej, nin bixeꞌ cyen yi eꞌchk kꞌejlal waꞌn yi tonaꞌ tzꞌul yi siꞌaꞌtz tu yi eꞌchk bajx wutz ujul.
¡I bin jaluꞌ Taꞌ, iluꞌ inRyosil, ulk txꞌakx tcꞌuꞌluꞌ cyakil yi eꞌchk takleꞌnaꞌtz yi mimban, nin takꞌuꞌ banluꞌ swibaj!