ESDRAS
Txꞌolbil Xoꞌl Yi Liwreꞌj
Yi liwr Esdras tu yi liwr Nehemías, junit taneꞌn tul chibiblia yi eꞌ judiy, na na jilon yi cob liwraꞌtz te iteꞌnin xtxolbil te yi mbi banakeꞌ yi eꞌ judiy yi eꞌ pakxeꞌn tzaj Jerusalén. Nchaꞌtz at wiꞌnin xtxolbil yi at le liwr Esdras yi quiꞌc at le yi liwr Nehemías. Poro nchaꞌtz yi liwr Nehemías at wiꞌnin xtxolbil yi quiꞌc at tul yi liwr Esdras.
Ma jaluꞌ, at jun jatxbil xoꞌl yi na kil tul yi cob liwraꞌtz iꞌtz: Yi Esdras iꞌ jun paleꞌ, nin mas na tzan iꞌ tan xtxumleꞌn yi ẍeꞌn sban tan chixomeꞌn yi eꞌ xonl Israel te yi tajbil Kataj Ryos.
Ma tetz Nehemías iꞌ jun gobernador, nin mas na tzan iꞌ tan xtxumleꞌn yi ẍeꞌn sban tan jeꞌseꞌn pon junt tir yi tapij yi at solteꞌj tnum Jerusalén. Nin yi tetz takꞌun, iꞌtz tan chiqꞌuicyꞌleꞌn yi eꞌ wunak, nin tan cawuꞌn squibaj yi eꞌ sanlar. Poro nchaꞌtz oc iꞌ tan joyleꞌn puntil tan chichusleꞌn yi eꞌ wunak tan kꞌukeweꞌn chicꞌuꞌl te Ryos, na iꞌ jun yaj yi wiꞌnin ja tek ẍchiꞌ Ryos.
Ma tetz Esdras iꞌ tzꞌiban cyen yi ẍeꞌn cuꞌn ban yi cyeleꞌn tzaj Zorobabel scyuchꞌ jun cꞌoloj judiy yi ateꞌ tzaj pres jakꞌ caꞌwl yi rey cwent Babilonia.
Yi Weklil Yi Liwreꞌj
Yi bajx wekl (Cap. 1–2) na tal yi nicyꞌnaꞌ chixoneꞌn yi cyeleꞌn tzaj Babilonia te yi bajx tir.
Yi caꞌp wekl (Cap. 3–6) na tal yi ẍeꞌn cuꞌn eꞌ ban tan jeꞌseꞌn junt tir yi templo; nin yi ẍeꞌn cuꞌn eꞌ ban tan tyoẍiꞌn tetz Kataj Ryos.
Yi toxeꞌn wekl (Cap. 7–10) na tal yi ẍeꞌn cuꞌn ban yi pakxeꞌnt Esdras Jerusalén, scyuchꞌ junt cꞌolojt xonl Israel yi ateꞌ tzaj pres jakꞌ caꞌwl yi rey cwent Babilonia. Nchaꞌtz oc il iꞌ tan xtxumleꞌn yi ẍeꞌn sban tan chixomeꞌn yi eꞌ tetz tanum te tajbil Ryos.