ESDRAS
Yi caꞌwl yi el tan Ciro, yi rey
(2Cr 36:22-23)
1
1 Itzun bantz te yi bajx yob yi na cawun Ciro yi rey tul yi amaꞌl Persia, nintzun oc tkꞌol Kataj Ryos le xtxumuꞌn Ciro tan teleꞌn jun caꞌwl scyetz cyakil wunak. Beneꞌn nin tzun eꞌ ban yi eꞌ ẍchakum tan talcheꞌn yi jun stziblalaꞌtz tulak eꞌchk tnum. Nchaꞌtz ben stzꞌibal eꞌchk cart tan tponeꞌn beneꞌn tziꞌn. Oc tkꞌol Kataj Ryos yi jun ajtzaꞌklaꞌtz le wiꞌ Ciro tan teleꞌn cuꞌn te yi yol iꞌ yi talnak tetz Jeremías, jun scyeri eꞌ ẍchakum iꞌ.a 2 “Je yol Ciro yi kareyil yi na cawun le kaꞌamaꞌl Persia: Yi Jehová, yi chiRyosiluꞌ, yi taw yi tcyaꞌj, ja takꞌ iꞌ amaꞌl swetz tan incawuneꞌn squibaj yi eꞌchk mas tnum beneꞌn tziꞌn. Ej, nin ja chimbixeꞌ tan iꞌ tan imbnol jun tetz caꞌl le tnum Jerusalénb cwent Judá. 3 Chaꞌstzun te, alchok scyetz scyeruꞌ yi eꞌuꞌ tanum Ryos, at amaꞌl tetz cyeruꞌ tan chibeneꞌnuꞌ Jerusalén cwent Judá tan banleꞌn yi caꞌl tetz Jehová chiRyosiluꞌ, yi choꞌn najlij le amaꞌlaꞌtz. 4 Nin cyakil yi eꞌ yil chiben, quiꞌc na ban mbi amaꞌlil lchisiteꞌt. Tajweꞌn chichꞌeyxij cyakꞌun yi eꞌ chiwisin tan sakal, oro tu eꞌchk meꞌbiꞌl, nin eꞌchk awun, chi taneꞌn wacẍ. Yaꞌstzun tajweꞌn tan cyakꞌol. Apart yi pwok yi baꞌn cyakꞌ tan jeꞌseꞌn yi templo.”
Yi chipakxeꞌn yi xonl Israel Jerusalén
5 Yi quibital yi cyajcawil yi jujun kꞌuꞌj xonl Judá tu yi cyajcawil yi eꞌ xonl Benjamín, scyuchꞌ yi eꞌ paleꞌ, nin yi eꞌ mas xonl Leví, nintzun eꞌ txumtz tan chibeneꞌn Jerusalén tan jeꞌseꞌn yi caꞌl Kataj, na iꞌ makꞌon cyen yi jun txumuꞌnaꞌtz le chiwiꞌ.
6 Ma yi chiwisin, yi eꞌ teꞌn judiy, nintzun eꞌ chꞌeyan scyeꞌj, na nin cyakꞌ sakal, oro, tu eꞌchk mas meꞌbiꞌl, tu eꞌ wacẍ, nin eꞌchk takleꞌn yi wiꞌnin jamel. Ej, nin nchaꞌtz cyakꞌ eꞌchk mas oy. Nin tetz cuꞌn cyalmaꞌ cyakꞌol. 7 Ma tetz rey, nin takꞌ iꞌ yi eꞌchk maꞌcl yi colij xe yi caꞌlil yi tetz ryosil. Na yi eꞌchk maꞌclaꞌtz Nabucodonosor ulsan, na choꞌn sajeꞌn tcyꞌal iꞌ xe caꞌl Ryos yi at Jerusalén.c 8 Cawuneꞌnin tzun yi rey tetz Mitrídates yi colol pwok, tan tkꞌol iꞌ yi eꞌchk maꞌclaꞌtz tetz Sesbasar, yi gobernador cwent Judá. 9 Je yi cyajlal yi eꞌchk maꞌclaꞌtz: junaklaj lmak lak yi oro cuꞌn, jun mil lmak lak yi sakal cuꞌn, junak beluj cchiluꞌ, 10 junaklaj lak yi oro cuꞌn, cyaj cient tu lajuj lak yi sakal yi ajnak tzaj muꞌẍ tal yi clasil, nin jun mil eꞌchk mas maꞌcl. 11 Tircuꞌn yi eꞌchk maꞌclaꞌtz yi akꞌlij, iꞌtz oꞌ mil tu cyaj cient. At maꞌcl yi oro cuꞌn, nin at yi sakal cuꞌn. Cyakil yi eꞌchk maꞌclaꞌtz, aj tcyꞌal Sesbasar yi chipakxeꞌn junt tir Jerusalén scyuchꞌ yi eꞌ mas aj Judá, yi elnakeꞌ xit beneꞌn tziꞌn.