NEHEMÍAS
Txꞌolbil Xoꞌl Yi Liwreꞌj
Ja bnix yi liwr Nehemías eꞌchk cyaj cient tu caꞌwunak oꞌ yob loꞌ, te yi ntaxk itzꞌij Kajcaw Jesucristo.
Yi xtxolbil yi at tul yi liwr iꞌtz: Yi ẍeꞌn cunin ban yi jeꞌmponeꞌn junt tir yi tapij solteꞌj yi tnum Jerusalén, nin yi ẍeꞌn cunin ban yi chibansal quib yi eꞌ aj Israel junt tir swutz Kataj Ryos.
Yi tzꞌibanl tetz yi liwr iꞌtz yi yaj yi na biꞌaj Nehemías. Yi jun yajaꞌtz, iꞌ jun scyeri eꞌ xonl Israel yi aꞌtij pres jalen Babilonia.
Te yi at tzaj Nehemías Babilonia, ja jal balajil iꞌ swutz yi rey Artajerjes, na ocnak iꞌ tetz pilul tcꞌaꞌ yi reyaꞌtz. Choꞌn tzun at iꞌ-tz yi tponeꞌn stziblal cyakꞌun yi eꞌ titzꞌun yi ẍeꞌn cuꞌn taneꞌn yi tnum Jerusalén. Yi tbital iꞌ, nintzun octz tan jakleꞌn cuybil chipaj yi eꞌ tetz tanum tetz Ryos. Tkꞌol tzun Kataj Ryos yi banl tibaj, na nin takꞌ yi rey amaꞌl tetz tan beneꞌn tan jeꞌseꞌn junt tir yi tapij yi cuꞌnak wocꞌ solteꞌj yi tnum Jerusalén.
Yi chusuꞌn yi na kil tul yi liwr iꞌtz: Yi wiꞌnin na tek Nehemías ẍchiꞌ Ryos, nin jun cuꞌn kꞌuklij cꞌuꞌl teꞌj. Ej, nin nchaꞌtz na kil yi quinin cyaj cyen tilol iꞌ yi jun akꞌunaꞌtz yi cyoqueꞌn yi eꞌ contr tan xcyꞌaklil teꞌj.
Nchaꞌtz na kil yi ẍeꞌn cunin ban Nehemías tan chijutzꞌeꞌn cyakil yi eꞌ cmon tan banleꞌn yi akꞌun, nin yi ẍeꞌn cunin ban iꞌ tan jachleꞌn cuꞌn yi akꞌun ẍchiwutz jujun kꞌuꞌj najal.
Yi Weklil Yi Liwreꞌj
Yi bajx wekl (Cap. 1–2) na jilon te yi beneꞌn chakij Nehemías jalen Jerusalén tan yi rey Artajerjes.
Yi caꞌp wekl (Cap. 3–7) na jilon te yi toqueꞌn kbal yi akꞌun tan jeꞌseꞌn pon yi tapij.
Yi toxeꞌn wekl (Cap. 8–10) na jilon te yi toqueꞌn siꞌleꞌn yi caꞌwl Kataj ẍchiwutz eꞌ nim juy.
Yi cyajeꞌn wekl (Cap. 11–13) na jilon te yi chibansalt quib swutz Kataj Ryos.