Yi cyeleꞌn lajuꞌn yi eꞌ xnaꞌn awer nak
10
1 Te yi na tzan Esdras tan nachleꞌn Kataj swutz yi templo, wiꞌnin tokꞌeꞌn tan jakleꞌn cuybil chipaj. Choꞌn tzun at iꞌ-tz yi cyoponeꞌn nil jun cꞌoloj wunak teꞌj. At yaj, at xnaꞌn, nin ateꞌ nitxaꞌ eꞌ opon nil teꞌj. Cyakil eꞌ na chokꞌ len, tan paj yi ja chinachon te quil. 2 Nintzun jilon jun scyeri jun cꞌoloj wunakaꞌtz, yi iꞌtz Secanías, yi cyꞌajl Jehiel yi xonl Elam. Itzun taltz tetz Esdras: “Yi oꞌ ketz ja kapaj yi caꞌwl Ryos, na ja kumeꞌ scyeꞌj eꞌ xnaꞌn yi apart cyetz chiryosil na cyocsaj. Poro koꞌch ketz yi at kachꞌiw yi scuyeꞌ Ryos kapaj yi oꞌ xonl Israel.3 ”Ma jaluꞌ, skasukeꞌ kayol tetz Kataj tan chicyajeꞌn cyen kapaxil yi eꞌ xnaꞌnaꞌtz tuml yi cyal, na na kaj kaxom te yi caꞌwl Kataj, chi yi na xom teruꞌ teꞌj scyuchꞌ yi eꞌ mas wunak yi na cyakꞌ ẍchiꞌ Ryos.
4 ”Ma jaluꞌ taꞌ Esdras, bneꞌuꞌ pawor, xcyekeꞌnuꞌ, nin bneꞌuꞌ yi munluꞌ, na yi oꞌ ketz skabneꞌ yi mbil taluꞌ sketz. Quiwit bin, nin quin skawutz,” cheꞌch bantz.
5 Jeꞌn tzun txiclok Esdras, nintzun jak iꞌ scyetz yi eꞌ paleꞌ, scyuchꞌ yi eꞌ xonl Leví, scyuchꞌ cyakil yi xonl Israel, yi ko bintzinin yi ẍchibneꞌ taneꞌn yi caꞌwl Ryos. Nin swutz cuꞌn Ryos yi ja chisuk chiyol yi ẍchibneꞌ taneꞌn. 6 Yi wiꞌt bajeꞌn yi xtxolbilaꞌtz, nin aj tetz Esdras xe caꞌl Johanán, yi cyꞌajl Eliasib. Choꞌn cyajeꞌn cyen iꞌ-tz te jun akꞌbalaꞌtz, nin quinin wan, nin nchaꞌtz quinin ucꞌaꞌ tan paj bis yi at cuꞌnt, na yi eꞌ xonl Israel yi eꞌ ult junt tir Jerusalén, qui nin eꞌ xom te yi caꞌwl Kataj. 7 Ej, nin el jun ort tan Esdras tan chichakleꞌn cyakil yi eꞌ xonl Israel yi eꞌ ul junt tir, nin scyetz yi eꞌ yi ateꞌ le eꞌchk amaꞌl cwent Judá tu Jerusalén tan chimolol quib Jerusalén. 8 Na nsken bixeꞌ cyakꞌun yi eꞌ wiꞌtz ajcaw scyuchꞌ yi eꞌ mas akꞌol cyajtzaꞌkl, yi ko at jun yi quil tzꞌopon tul ox kꞌej te yi jun txumuꞌnaꞌtz, tzꞌelepon majij cyakil yi meꞌbiꞌl nin tzꞌelepon lajuꞌn ẍchixoꞌl yi eꞌ tanum. 9 Chimolol tzun quib cyakil yi eꞌ aj Judá scyuchꞌ yi eꞌ xonl Benjamín le junak tajlal yi belujiꞌn xaw tetz yi yob. Tul yi ox kꞌejaꞌtz, choꞌn chimolol quib swutz yi jun chin wutzileꞌn amaꞌl yi at swutz yi caꞌl Ryos. Wiꞌnin chilucneweꞌn tan xoꞌw, nin tan paj yi nsken chacꞌ tan yi aꞌbal yi na tzan scyeꞌj.
10 Jeꞌn tzun txiclok Esdras yi paleꞌ, nintzun taltz scyetz:
—Eꞌuꞌ katanum, yi eꞌ cyeruꞌ ja chijuchuꞌ quiluꞌ, na ja cyokꞌbej quibuꞌ scyuchꞌ yi eꞌ xnaꞌn yi nkꞌeꞌtz eꞌ ketz katanum. Chaꞌstzun te ja jal wiꞌnin kil swutz Ryos. 11 Ma jaluꞌ, swutz cuꞌn Kataj Ryos yi nchaꞌtz iꞌ chiRyosil yi eꞌ kamam kateꞌ, cyakꞌ cyenuꞌ scyeꞌjuꞌ yi eꞌuꞌ ajpaj. Nin chisukeꞌuꞌ chiyoluꞌ yi ẍchibneꞌuꞌ taneꞌn yi caꞌwl kaRyosil. Chijatxeꞌl tzaj quibuꞌ ẍchixoꞌl yi eꞌ awer nak, nin chipax cyenuꞌ yi eꞌ xnaꞌn yi nkꞌeꞌtz eꞌ katanum, chij Esdras ban.
12 —Kabneꞌ cyakil yi mbi na tal tzajuꞌ, cheꞌch tzun cyakil wunak ban tzajtz.
13 Nchaꞌtz cyaltz:
—Yi xtxolbileꞌj nim tkanil, nin na tzan aꞌbal skibaj, nin quiꞌc amaꞌl tan kacyajeꞌn cyen tzoneꞌj, na yi jun xtxolbileꞌj nkꞌeꞌtz jun ntziꞌ kꞌej na taj, ma na na taj cobox kꞌej tan xtxumleꞌn, na kacyakil cuꞌn ja kajuch kil. 14 Ma jaluꞌ, ¿quiꞌc peꞌ rmeril yi nink chicyaj cyen ntin yi eꞌ kabajxom tan xtxumleꞌn yi ẍeꞌn sban? Ma yi eꞌ katanum yi ja cyokꞌbej quib scyuchꞌ yi eꞌ xnaꞌn yi awer nak, baꞌn chuꞌl le junt kꞌej, nin baꞌn chixom tzaj yi cyetz cyajcaw scyeꞌj, scyuchꞌ yi eꞌ pujul xtisyaꞌ tetz chiꞌamaꞌl tan banleꞌn taneꞌn. Xitok tzun yi ẍchiꞌchbeꞌn cꞌuꞌl Ryos skeꞌj, cheꞌch bantz.
15-16 Baꞌn tzun ban yi xtxolbilaꞌtz ẍchiwutz cyakil cmon xonl Israel. Ma tetz Jonatán, yi cyꞌajl Asael tu Jahazías yi cyꞌajl Ticva, qui eꞌ pekꞌ te jun txumuꞌnaꞌtz. Nchaꞌtz Mesulam tu Sabetai yi xonl Leví, choꞌn xomeꞌn cyetz chiwiꞌ scyeꞌj.
Ma tetz Esdras yi paleꞌ, nin jeꞌ xtxaꞌol cobox yaj yi eꞌ ajcaw te jujun kꞌuꞌj oꞌ tan banleꞌn taneꞌn yi xtxolbilaꞌtz. Nintzun eꞌ mol quibtz le bajx tajlal yi lajujiꞌn xaw tetz yi yob.
17 Chixcyeweꞌn tzun yi eꞌ ajcawaꞌtz tan chibanleꞌn taneꞌn cyakil yi eꞌ yi cyokꞌbej quib scyuchꞌ yi eꞌ xnaꞌn yi awer nak. Le bajx tajlal yi bajx xaw tetz yi junt yob, yaꞌstzun eꞌ xcyeweꞌn teꞌj.
18 Ej, nin je chibiꞌ yi eꞌ paleꞌ yi cyokꞌbej quib scyuchꞌ yi eꞌ xnaꞌnaꞌtz yi eꞌ awer nak. Te yi eꞌ xonl Josué yi cyꞌajl Josadac, scyuchꞌ yi eꞌ titzꞌun, ateꞌ Maasías, Eliezer, Jarib tu Gedalías. 19 Yi eꞌaꞌtz, eꞌ suk tetz Ryos yi ẍchipaxeꞌ cyen yi eꞌ xnaꞌn yi eꞌ oc tetz quixkel. Nchaꞌtz cyoy jun mam cneꞌr tetz Ryos tetz chitxꞌixwatz, tan jaleꞌn cuybil chipaj.
20 Ej, nchaꞌtz te yi eꞌ xonl Imer, yi cyokꞌbej quib scyuchꞌ yi eꞌ xnaꞌn awer nak, iꞌtz: Hanani tu Zebadías.
21 Ma ẍchixoꞌl yi eꞌ xonl Harim iꞌtz: Maasías, Elías, Semaías, Jehiel tu Uzías. 22 Nchaꞌtz Elioenai, Maasías, Ismael, Natanael, Jozabad tu Elasa yi eꞌ cuꞌn xonl Pasur.
23 Ma ẍchixoꞌl yi eꞌ xonl Leví iꞌtz: Jozabad, Simei, Kelaía (nka Kelita), Petaías, Judá tu Eliezer.
24 Ma ẍchixoꞌl yi eꞌ aj bitz ntin cuꞌn Eliasib.
Ma ẍchixoꞌl yi eꞌ qꞌuicyꞌlom puert iꞌtz: Salum, Telem tu Uri.
25 Ma ẍchixoꞌl yi eꞌ mas xonl Israel yi cyokꞌbej quib scyuchꞌ xnaꞌn yi eꞌ awer nak iꞌtz:
Ẍchixoꞌl yi eꞌ xonl Paros: Ramía, Jezías, Malquías, Mijamín, Eleazar, Malquías tu Benaía.
26 Nchaꞌtz ẍchixoꞌl yi eꞌ xonl Elam iꞌtz: Matanías, Zacarías, Jehiel, Abdi, Jeremot tu Elías.
27 Ma ẍchixoꞌl yi eꞌ xonl Zatu iꞌtz: Elioenai, Eliasib, Matanías, Jeremot, Zabad tu Aziza.
28 Ma ẍchixoꞌl yi eꞌ xonl Bebai, iꞌtz: Johanán, Hananías, Zabai tu Atlai.
29 Ma ẍchixoꞌl yi eꞌ xonl Bani, iꞌtz: Mesulam, Maluc, Adaía, Jasub, Seal tu Ramot.
30 Ma ẍchixoꞌl yi eꞌ xonl Pahat-moab, iꞌtz: Adna, Quelal, Benaía, Maasías, Matanías, Bezaleel, Binuy tu Manasés.
31-32 Ma ẍchixoꞌl yi eꞌ xonl Harim, iꞌtz: Eliezer, Isías, Malquías, Semaías, Simeón, Benjamín, Maluc, tu Semarías.
33 Ma ẍchixoꞌl yi eꞌ xonl Hasum, iꞌtz: Matenai, Matata, Zabad, Elifelet, Jeremai, Manasés tu Simei.
34-37 Ma ẍchixoꞌl yi eꞌ xonl Bani iꞌtz: Madai, Amram, Uel, Benaía, Bedías, Queluhi, Vanías, Meremot, Eliasib, Matanías, Matenai tu Jaasai.
38-42 Ma ẍchixoꞌl yi eꞌ xonl Binuy iꞌtz: Simei, Selemías, Natán, Adaía, Macnadebai, Sasai, Sarai, Azareel, Selemías, Semarías, Salum, Amarías tu Ẍep.
43 Ma ẍchixoꞌl yi eꞌ xonl Nebo iꞌtz: Jeiel, Matatías, Zabad, Zebina, Jadau, Joel tu Benaía.
44 Cyakil yi jun cꞌoloj yajaꞌtz, yaꞌstzun eꞌ yi cyaj cyen chipaxil yi quixkel tan paj yi eꞌ awer nak yi eꞌ xnaꞌnaꞌtz. Tircuꞌn chicyajeꞌn cyen paxiꞌn tuml yi cyal yi nsken jal.