Yi quil yi eꞌ xonl Israel yi nchijuch swutz Ryos
9
1 Yi wiꞌt bajeꞌn yi xtxolbilaꞌtz, ja chuꞌl yi wiꞌtz ajcaw tan talcheꞌn yi xtxolbileꞌj swetz: “Cyakil yi eꞌ xonl Israel cyuml yi eꞌ paleꞌ, scyuchꞌ yi eꞌ xonl Leví, qui na chijatx eꞌltzaj quib scyeꞌj cyakil yi eꞌ aj Canaán, scyuchꞌ yi eꞌ hitita, tu eꞌ ferezeo, tu eꞌ jebuseo scyuchꞌ yi eꞌ amonita scyuchꞌ yi eꞌ moabita, scyuchꞌ yi eꞌ aj Egipto, nin yi eꞌ amorreo. Ma na xomcheꞌ te yi cyetz chicstumbr yi chin juntlen nin. 2 Na yi eꞌ katanum yi eꞌ xonl Israel scyuchꞌ yi eꞌ chinitxaꞌ, ja chumeꞌ scyuchꞌ chinitxajil yi eꞌ mal wunakaꞌtz. Nin tan yi xtxolbilaꞌtz, ja chisuk quib scyuchꞌ yi eꞌaꞌtz. Nin yi eꞌ yi bajxcheꞌ tan banleꞌn yi xtxolbilaꞌtz iꞌtz yi eꞌ kabajxom,” cheꞌch bantz.3 Yi wital yi xtxolbilaꞌtz, nintzun baj inkatzol yi beꞌch wetz, nin baj inxitxꞌul yi xiꞌil inwiꞌ tu inxmatziꞌ. Nin incꞌoleꞌ cuꞌntz tan bis tan paj yi xtxolbilaꞌtz. 4 Nchaꞌtz eꞌ ban yi eꞌ mas yi ja chibisun tan quil. Baj cunin kꞌej kaꞌn tan bis, jalen cuꞌn cweꞌn kꞌej yi toponeꞌn yi oril tan kapatil katxꞌixwatz. 5 Ma te yi oraꞌtz, nin el incyꞌal yi bis te walmaꞌ, nintzun incuꞌ mejloktz tan nachleꞌn Kataj. Poro atit nin yi beꞌch wetz sweꞌj yi nsken baj inkatzol.
6 Itzun waltz tul inoración: “Wajcaw yi iluꞌ inRyosil, nternin na chintxꞌixwij swutzuꞌ, nin qui na aꞌw yol waꞌn teruꞌ, na ja kajuch wiꞌnin kil swutzuꞌ. Ja icyꞌt cuꞌn yi kil swutz yi tcyaꞌj. 7 Na jetz tenẍchan, kaꞌwleꞌnix tan juchleꞌn kil swutzuꞌ. Nin tan paj yi kil yi nkajuch tu yi quil yi eꞌ kabajxom, scyuchꞌ yi kapaleꞌil, ja koꞌc jakꞌ chicaꞌwl yi eꞌ mas rey, yi eꞌ awer nak. Ja choꞌc yi eꞌ reyaꞌtz tan alakꞌ skeꞌj, nin ja el kakꞌej cyaꞌn. Quiꞌc muꞌẍ kaxac mban ẍchiwutz, nin yaꞌstzun kutaneꞌn jaluꞌ. 8 Poro ntyoẍ teruꞌ Taꞌ, tan yi banl talmaꞌuꞌ, ja takꞌuꞌ amaꞌl tetz cobox oꞌ tan keleꞌn liwr, nin tan kuleꞌn junt tir tan najeweꞌn tzoneꞌj le yi amaꞌleꞌj yi wiꞌnin xanil. Ja takꞌuꞌ junt tir tzatzin tetz ketz, quiꞌt na kabisun. 9 Mpe i nink yi atoꞌ nintz tetz esclaw, ilenin xomijuꞌ tan kaqꞌuicyꞌleꞌn, na ja ẍchajuꞌ yi banl talmaꞌuꞌ sketz, na ja jal kabalajil ẍchiwutz yi eꞌ rey tetz Persia. Nchaꞌtz ja takꞌuꞌ amaꞌl sketz tan koqueꞌn tan banleꞌn yi caꞌluꞌeꞌj yi cuꞌnak wocꞌ. Ntyoẍ teruꞌ yi xomijuꞌ tan kaqꞌuicyꞌleꞌn tzoneꞌj le tnum Jerusalén, cwent Judá.
10 ”Poro Wajcaw, mbil kal teruꞌ jaluꞌ tan paj cyakil yi eꞌchk takleꞌn cachiꞌ yi ja wiꞌt bnix kaꞌn. Na qui na katzan tan banleꞌn taneꞌn yi teruꞌ caꞌwluꞌ, 11 yi cyalnak yi eꞌ ẍchakumuꞌ sketz, yi eꞌ elsanl stziꞌuꞌ tentz. Na talnakuꞌ scyetz: ‘Yi amaꞌl kalel cxaꞌt cuꞌnt, eꞌ cuꞌn mal nak ateꞌ tul. Chin cachiꞌ nin eꞌ, ntin na chitzan tan banleꞌn yi eꞌchk chicstumbr yi chin cachiꞌ nin’. 12 Nchaꞌtz taluꞌ yi quiꞌc rmeril tan cyumeweꞌn yi eꞌ ketz kanitxaꞌ scyuchꞌ yi cyetz chinitxaꞌ.a Nin quiꞌc rmeril yi nink lkucyꞌaj kib scyuchꞌ, nin quil nucꞌx jun baꞌn kaꞌn scyuchꞌ. Nin kol kaxcyeꞌ tan banleꞌn taneꞌn yi xtxolbilaꞌtz, skatzatzink tzuntz swutz yi amaꞌl yi ja wiꞌt takꞌuꞌ sketz. Ej, nin nkꞌeꞌtz ntin oꞌ skatzatzink, ma na nchaꞌtz yi eꞌ kanitxaꞌ sbneꞌ opon tunintz. 13 Poro tan cyakil yi kil yi kajuchnak swutzuꞌ, ja ul wiꞌnin eꞌchk sotzaj cꞌuꞌlal skawutz. Poro quinin ntakꞌuꞌ kacaws, chi yi tajweꞌn kloꞌ tan tkꞌoluꞌ. Ma na ja takꞌuꞌ amaꞌl sketz tan keleꞌn liwr ẍchikꞌab kacontr.
14 ”Ma jaluꞌ Taꞌ, quiꞌt kloꞌ nkapakxij junt tir tan juchleꞌn iteꞌn nin kilaꞌtz swutzuꞌ tan kokꞌbel kib scyuchꞌ yi eꞌ mal nakaꞌtz. Na elnakt katxum tetz yi tzꞌul colp wiꞌuꞌ skeꞌj, nin kelepon cuꞌn taꞌnuꞌ swutz. Cyaꞌl jun sketz yi nink lclax cyen. 15 Kataj, iluꞌ kaRyosil yi oꞌ xonl Israel. Chin jicyuch nin tajtzaꞌkluꞌ tan pujleꞌn xtisyaꞌ. Poro quinin ocuꞌ tan kasotzleꞌn cuꞌn kacyakil. Ma jaluꞌ, na katxꞌixwij swutzuꞌ tan yi kil. Chaꞌstzun te quiꞌct kloꞌ cuj tan koponeꞌn swutzuꞌ Taꞌ.”