Je chibiꞌ yi eꞌ yi eꞌ ult Jerusalén
8
1 Je chibiꞌ yi eꞌ chibajxom yi jujun kꞌuꞌj xonl Israel yi eꞌ pakxijt tzoneꞌj Jerusalén. Choꞌn xomcheꞌ te Esdras yi cyuleꞌn, yi tkꞌol Artajerjes amaꞌl scyetz tan chipakxeꞌn. 2-3 Ul Gersón yi xonl Finees. Nchaꞌtz Daniel, yi xonl Itamar, tu Hatús yi cyꞌajl Secanías, yi xonl Luwiy. Nchaꞌtz ul Zacarías yi xonl Paros, nin xomcheꞌ jun cient tu niꞌcy yaj te iꞌ yi chixonl quib tuchꞌ. 4 Ej, nin nchaꞌtz Elioenai yi cyꞌajl Zeraías yi xonl Pahat-moab, nin xomcheꞌ cob cient yaj teꞌj yi eꞌ nin xonl iꞌ. 5 Ul Secanías yi cyꞌajl Jahaziel, yi xonl Zatu, nin xomcheꞌ ox cient yaj te iꞌ. 6 Ma tetz Ebed yi cyꞌajl Jonatán yi xonl Adín, xomcheꞌ nicyꞌ cient yaj te iꞌ yi tuleꞌn. 7 Nchaꞌtz ul Jesaías yi cyꞌajl Atalías yi xonl Elam, nin xomcheꞌ oxcꞌal tu lajuj yaj te iꞌ. 8 Ma tetz Zabadías yi cyꞌajl Micael yi xonl Sefatías, xomcheꞌ jun mutxꞌ tu wajxaklaj yaj te iꞌ yi tuleꞌnt. 9 Ul Obadías yi cyꞌajl Jehiel yi xonl Joab, nin xomcheꞌ cob cient tu wajxaklaj yaj te iꞌ. 10 Nchaꞌtz Selomit yi cyꞌajl Josifías yi xonl Bani, xomcheꞌ jun cient tu oxcꞌal yaj teꞌ iꞌ. 11 Ma tetz Zacarías yi cyꞌajl Bebai jun scyeri chixonl yi eꞌ tu Bebai, xomcheꞌ junak wajxak yaj teꞌj yi tuleꞌn. 12 Ma tetz Johanán yi cyꞌajl Hacatán yi xonl Azgad, xomcheꞌ jun cient tu lajuj yaj te iꞌ. 13 Nchaꞌtz cyetz Elifelet tu Jeiel, nin Semaías, yaꞌstzun wiꞌtzbil xonl Adonicam. Nin xomcheꞌ oxcꞌal yaj scyeꞌj yi buch tlen cyuleꞌn. 14 Ma cyetz Utai tu Zabud yi eꞌ xonl Bigvai, yi cyuleꞌn cyetz xomcheꞌ oxcꞌal tu lajuj yaj scyeꞌj.Yi eꞌ yi nchixcon xe caꞌl Kataj
15 Itzun imban wetz yi in Esdras, cheꞌ cweꞌn tzun inmolol cyakil yi eꞌ wunakaꞌtz stziꞌ yi canal yi na oponsan yi aꞌ le tnum Ahava. Choꞌn tzun oꞌ cyajeꞌn cyentz tetz ox kꞌej. Ma yi woqueꞌn tan jeꞌseꞌn list, cyaꞌl njaleꞌt jun xonl Leví waꞌn skaxoꞌl, ntin ateꞌ nin cobox paleꞌ. 16 Chaꞌstzun te cheꞌ beneꞌn inchakol cobox yi at chikꞌej tan yol tetz Iddo. Je chibiꞌ yi eꞌ yi eꞌ ben inchakoleꞌj: Eliezer, Ariel, Semaías, Elnatán, Jarib, Elnatán, Natán, Zacarías nin Mesulam. Nchaꞌtz eꞌ ben xomok yi cob chusul cyetz wunak yi na chibiꞌaj Joiarib tu Elnatán tan yol tetz Iddo. 17 Yi Iddojaꞌtz, iꞌ yi ajcaw le yi amaꞌl Casifía, nin yi chimantar yi eꞌaꞌtz, iꞌtz tan talcheꞌn tetz Iddo scyuchꞌ yi eꞌ mas tuchꞌ yi eꞌ akꞌunsom le caꞌl Kataj, tan chichakleꞌn coboxt tan kuchꞌeyeꞌn tan banleꞌn yi caꞌl Kataj Ryos le tnum Jerusalén. 18 Nin tyoẍtuꞌ tetz Kataj Ryos, na nin saj chichakol Serebías, iꞌtz jun yaj yi tzꞌaknak cuꞌn tan akꞌun. Iꞌ jun scyeri eꞌ xonl Leví yi na chibiꞌaj, tu Mahli. Xomcheꞌ wajxaklaj xoneꞌn teꞌj, eꞌ cyꞌajl tu eꞌ titzꞌun. 19 Nchaꞌtz eꞌ ul Hasabías tu Jesaías yi eꞌ xonl Merari. Eꞌ ul tuml junak chixonl.
20 Nchaꞌtz eꞌ ul cob cient tu junak chixoneꞌn akꞌunwil yi eꞌ bixeꞌ tan Luwiy yi rey tiemp tzaj. Xomcheꞌ nin chibajxom scyeꞌj. At jun list jeꞌnak tetz chibiꞌ. Yi cyetz chitarey iꞌtz tan quichꞌeyeꞌn yi eꞌ mas xonl Leví tan akꞌun te caꞌl Kataj.
21 Yi wiꞌt bajeꞌn yi xtxolbilaꞌtz nintzun wal scyetz: Tajweꞌn tan kamucꞌul weꞌj te yi atoꞌ nakaꞌjil yi beꞌ aꞌ yi na icyꞌ le tnum Ahava, bantz kajakol cuybil kapaj tetz Kataj Ryos, nin tan jakleꞌn yi banl talmaꞌ iꞌ skibaj scyuchꞌ yi eꞌ kanajal tu yi eꞌchk kameꞌbiꞌl. 22 Na at kloꞌ rmeril tan kajakol cobox sanlar tu cobox aj chejinl tan chixomeꞌn tan kaqꞌuicyꞌleꞌn, poro nin oꞌ txꞌixwij tan jakleꞌn, na sken kal tetz yi rey: “Yi Kataj Ryos xomij iꞌ scyeꞌj yi eꞌ yi na chixom te yi tetz tajbil. Poro na takꞌ iꞌ chicaws yi eꞌ yi qui na chixom te yi tetz tajbil,” koꞌch bantz.
Yi eꞌchk balaj oy yi cyꞌaꞌn kaꞌn
23 Koqueꞌn tzuntz tan nachleꞌn Kataj, nin tan mucꞌleꞌn weꞌj. Oꞌ oc tan cuꞌswutzil tetz Kataj tan toqueꞌn iꞌ tan kaqꞌuicyꞌleꞌn, nin yaꞌtz nin bantz. 24 Nchaꞌtz nin eꞌ jeꞌ intxaꞌol coblaj chibajxom yi eꞌ paleꞌ. Eꞌ jeꞌ intxaꞌol Serebías tu Hasabías nin lajujt chixonl.
25 Cweꞌn tzun injatxol yi sakal tu yi oro, tu cyakil yi eꞌchk maꞌcl yi takꞌ yi rey, tu cyakil yi eꞌchk cutxuj yi cyakꞌ yi eꞌ xonl Israel tetz yi caꞌl Kataj. Ja inmaꞌlaj, nin ja cuꞌ injatxol ẍchiwutz tan sajeꞌn chicyꞌal. 26 Yi bajeꞌn kamaꞌlal, iꞌtz caꞌwunak ox mil liwr sakal tu jun cient lak yi sakal cuꞌn, tu kak mil tu kak cient liwr oro. 27 Nin junak tkan lmak lak yi oro cuꞌn, yi waklaj liwr talal, tu cob maꞌcl yi brons cuꞌn, yi chin yubeꞌn nin yi icuꞌn oro taneꞌn.
28 Nchaꞌtz wal scyetz intanum yi xonl Israel: “Yi eꞌuꞌ cyeruꞌ xansaꞌncheꞌtuꞌ chi taneꞌn yi eꞌchk maꞌcleꞌj yi sakal tu yi oro. 29 Chibneꞌuꞌ bin pawor tan qꞌuicyꞌleꞌn, jalen yil kamaꞌlaj junt tir ẍchiwutz cuꞌn yi chibajxom yi eꞌ paleꞌ, scyuchꞌ yi chibajxom yi eꞌ xonl Leví, scyuchꞌ chibajxom yi jujun xonl Israel, yil kopon le caꞌl Kataj yi at Jerusalén.” 30 Beneꞌn tzun chicyꞌal yi eꞌ paleꞌ scyuchꞌ yi eꞌ xonl Leví cyakil yi eꞌchk oro tu sakalaꞌtz, nin cyakil yi maꞌcl yi akꞌlij scyetz.
31 Kajeꞌn tzaj tzuntz tzi yi beꞌ aꞌ yi na icyꞌ Ahava, le coblaj tajlal yi bajx xaw tetz yi yob tan kuleꞌn Jerusalén. Ntyoẍ tetz Kataj Ryos yi xomij skeꞌj tan kaqꞌuicyꞌleꞌn ẍchikꞌab yi eꞌ mal nak yi ateꞌ tbeꞌ. 32 Yi kuleꞌn Jerusalén, nin oꞌ ujeꞌ ox kꞌejtz. 33 Ma le cyajiꞌn kꞌej, kalenaꞌs tzun toqueꞌn maꞌleꞌn yi sakal tu yi oro, tu cyakil yi eꞌchk lak yi saj quicyꞌal yi eꞌ paleꞌ. Choꞌn toqueꞌn cyen ẍchikꞌab Meremot yi paleꞌ yi cyꞌajl Urías, nin Eleazar yi cyꞌajl Finees. Nchaꞌtz ateꞌ yi eꞌ xonl Leví yi Jozabad yi cyꞌajl Josué, tu Noadías yi cyꞌajl Binuy. 34 Oc maꞌleꞌn tircuꞌn, nin cuꞌ swutz jun uꞌj cyakil yi tajlal yi eꞌchk maꞌclaꞌtz. 35 Ej, nin cyakil yi eꞌ yi eꞌ ult tzoneꞌj cyakꞌ yi cyetz cyoy. Iꞌtz coblaj neꞌẍ wacẍ, jun mutxꞌ tu waklaj cneꞌr, nin oxcꞌal tu juklaj neꞌẍ cneruꞌ, tu coblaj chiw tan ẍchojleꞌn quil swutz Ryos. Chijunaleꞌn cuꞌn cyoyil chitxꞌixwatz, nin cyakil yi eꞌchk txꞌixwatzaꞌtz patuꞌn cuꞌn uꞌlij swutz Ryos. 36 Ej, nin nchaꞌtz yi eꞌ kajcawil, cyakꞌ yi ort yi saj tkꞌol yi rey swetz, scyetz yi eꞌ ajcaw yi ateꞌ-tz le eꞌchk amaꞌl jalajicyꞌ tzaj yi tzanlaꞌ Eufrates. Nin yi quilol yi jun uꞌjaꞌtz yi opon tan yi rey, nin xom chiwiꞌ skeꞌj yi oꞌ xonl Israel tan banleꞌn yi caꞌl Kataj.