Esdras 7

Yi cyoponeꞌn Esdras scyuchꞌ yi eꞌ mas tanum le tnum Jerusalén

1 Itzun bantz yi teleꞌn tiemp, nin yi toqueꞌn cyen Artajerjes tetz ajcaw le amaꞌl Persia. At tzun jun paleꞌ yi at Babilonia yi na biꞌaj Esdras, yi ul tzoneꞌj Jerusalén. Yi jun yajaꞌtz iꞌ mero xonl Aarón, yi bajx paleꞌ, na iꞌ xonl Seraías, tu Azarías, nin Hilcías, yi eꞌ cuꞌn xonl Salum. 2 Yi Salumaꞌtz, yaꞌstzun cyꞌajl Sadoc, ma yi Sadoc iꞌ cyꞌajl Ahitob, 3 ma yi Ahitob iꞌ cyꞌajl Amarías, ma yi Amarías iꞌ cyꞌajl Azarías, ma yi Azarías iꞌ cyꞌajl Meraiot, 4 ma Meraiot iꞌ cyꞌajl Zeraías, ma Zeraías iꞌ cyꞌajl Uzi, ma Uzi iꞌ cyꞌajl Buqui, 5 ma Buqui iꞌ cyꞌajl Abisúa, ma Abisúa iꞌ cyꞌajl Finees, ma Finees iꞌ cyꞌajl Eleazar, ma Eleazar iꞌ cyꞌajl Aarón yi bajx paleꞌ.

6 Yi Esdrasaꞌtz, iꞌ jun balaj ajchusunl scyeꞌj wunak te yi ley Ryos yi akꞌlij tetz Moisés. Nin xomij yi banl talmaꞌ Kataj teꞌj. Chaꞌstzun te tkꞌol Artajerjes yi rey cyakil yi mbi cuꞌn jak iꞌ tetz. Nin chaꞌstzun te pakxeꞌn junt tir le tnum Jerusalén. 7 Yi pakxeꞌn Jerusalén, xomcheꞌ coboxt xonl Israel te iꞌ. Xomcheꞌ cobox paleꞌ teꞌj, scyuchꞌ cobox xonl Leví, nin cobox ajbitz, scyuchꞌ cobox qꞌuicyꞌlom puert, tu yi eꞌ akꞌunsom xe caꞌl Kataj. Nin te yi tiempaꞌtz yi tunleꞌnix, yaꞌstzun yi sken el jukix yob tan Artajerjes tan cawuꞌn le amaꞌl Persia.

8-9 Itzun bantz, tan yi banl talmaꞌ Ryos, nintzun xtxum Esdras tan tuleꞌn Jerusalén. Eꞌ el tzaj Babilonia le bajx tajlal yi bajx xaw tetz yi jukiꞌn yob tan Artajerjes tan cawuꞌn, nin eꞌ ul tzoneꞌj Jerusalén le bajx kꞌej tetz yi oꞌiꞌn xaw tetz yi iteꞌn nin yobaꞌtz. 10 Yi mero tajbil Esdras iꞌtz tan teleꞌn xtxum mas te yi caꞌwl Kataj, nin tan banleꞌn taneꞌn, nin tan chichusleꞌn yi eꞌ mas xonl Israel te yi eꞌchk caꞌwlaꞌtz.

Yi permis yi takꞌ Artajerjes yi rey tetz Esdras

11 Je na tal yi uꞌj yi takꞌ Artajerjes yi rey tetz Esdras, yi paleꞌ yi chusijt te yi eꞌchk caꞌwl Ryos yi akꞌijt scyetz yi eꞌ xonl Israel. Je yi xtxolbileꞌj:

12 “Yi in wetz in Artajerjes, in yi rey, nin na chintzan tan talcheꞌn jun yos tetz teruꞌ iluꞌ Esdras. Iluꞌ jun paleꞌ, nin chusijuꞌ te yi caꞌwl yi Ryos yi choꞌn at tcyaꞌj. 13 Ja el jun caꞌwl waꞌn tan talcheꞌn yi ko at jun xonl Israel yi at beneꞌn tziꞌn yi na taj tzꞌaj junt tir Jerusalén teꞌjuꞌ, baꞌn tzꞌajt. Quiꞌc na ban ko eꞌ paleꞌ nka eꞌ xonl Leví, alchok scyetz baꞌn tzꞌajt. 14 Na ja bixeꞌ waꞌn, scyuchꞌ yi juk yaj yi ateꞌ tan wuchꞌeyeꞌn tzoneꞌj, tan beneꞌnuꞌ tan xajseꞌn yi tnum Jerusalén cwent Judá, chi yi caꞌwl yi takꞌnak Ryos teruꞌ. 15 Baꞌn tcyꞌaj ninuꞌ eꞌchk oro tu sakal yi na katzan tan takꞌleꞌn nin tetz yi chiRyosiluꞌ yi at Jerusalén. 16 Nin nchaꞌtz, baꞌn tcyꞌaj ninuꞌ yi eꞌchk oro tu sakal yi scyakꞌeꞌ cyakil wunak yi najlcheꞌ beneꞌn tziꞌn Babilonia, tu yi eꞌchk mas ichꞌeyaꞌn yi scyakꞌeꞌ yi eꞌ wunak, scyuchꞌ yi eꞌ paleꞌ tan banleꞌn yi caꞌl yi chiRyosiluꞌ Jerusalén. 17 Nin tan yi eꞌchk ichꞌeyaꞌnaꞌtz, baꞌn slokꞌuꞌ eꞌchk neꞌẍ wacẍ, tu eꞌchk lmak cneꞌr, nin eꞌchk neꞌẍ cneruꞌ, tu eꞌchk oy, chi taneꞌn ixiꞌn triw tu taꞌal uva, tan toyiluꞌ wi yi patbil txꞌixwatz yi at le caꞌl yi chiRyosiluꞌ le tnum Jerusalén.

18 ”Ma yi sowril yi oro tu yi sakal, baꞌn xcon taꞌnuꞌ scyuchꞌ yi eꞌ mas tuchꞌuꞌ kale atit yi tajweꞌn te yi akꞌun, nin chi yi tajbil yi chiRyosiluꞌ.

19 ”Ma yi eꞌchk maꞌcl yi ja wakꞌ teruꞌ tan xconeꞌn xe caꞌl chiRyosiluꞌ, baꞌn tabnajuꞌ tkꞌab yi Ryos tetz Jerusalén. 20 Ej, nin alchok scyetz mas eꞌchk takleꞌn yi tajweꞌn teruꞌ tan banleꞌn yi caꞌl Ryos, baꞌn tcyꞌajeꞌl tzajuꞌ tulak eꞌchk cuꞌlbil kale colijeꞌt yi eꞌchk inmeꞌbiꞌl waꞌn. 21 Nchaꞌtz na chintzan tan talcheꞌn scyetz cyakil yi eꞌ colol pwok, yi ateꞌ jakꞌ chicaꞌwl yi eꞌ ajcaw yi najlcheꞌ jalaj cyꞌen yi tzanlaꞌ Eufrates, yi tajweꞌn tan cyakꞌol yi mbil sjak Esdras scyetz. Na iꞌ jun paleꞌ yi chusijt te yi ẍchusuꞌn Ryos yi at tziꞌn tcyaꞌj. 22 Baꞌn cyakꞌ kak mil tu kak cient liwr sakal, nin baꞌn cyakꞌ junak cob mil litr triw, tu cob mil tu cob cient litr win, tu cob mil tu cob cient litr aceit, tu cyakil yi atzꞌum yil sjak iꞌ.

23 ”Nchaꞌtz baꞌn cyakꞌ cyakil yi mbi tajweꞌn tan xconeꞌn tetz yi caꞌl Ryos le tnum Jerusalén, nin quil chijiẍ quib tan takꞌleꞌn. Na qui na waj yi nink cawsaj Ryos yi ketz kaꞌamaꞌl scyuchꞌ yi eꞌ innitxaꞌ. 24 Ej, nin nchaꞌtz quiꞌc cuj yi nink jaklij eꞌchk cutxuj scyetz yi eꞌ yi na chixcon xe caꞌl Ryos chi quitaneꞌn yi eꞌ paleꞌ, nka yi eꞌ xonl Leví, nka yi eꞌ ajbitz, nka yi eꞌ qꞌuicyꞌlom puert, scyuchꞌ yi eꞌ mas yi na chixcon xe caꞌl Ryos, chinch ban nin scyetz.

25 ”Ma teruꞌ taꞌ Esdras, chi yi balaj ajtzaꞌkl yi takꞌnak yi Ryosiluꞌ teruꞌ, tajweꞌn cheꞌ bixbajuꞌ cobox ajcaw, tu cobox gobernador tan chicawuneꞌn squibaj yi eꞌ tanumuꞌ yi ateꞌ jalaj cyꞌen yi tzanlaꞌ Eufrates. Baꞌn chibixeꞌ yi eꞌ yi na el chitxum te caꞌwl chiRyosiluꞌ, nin ko qui na el chitxum tetz, baꞌn cheꞌ ẍchusuꞌ. 26 Nin alchok scyetz yi quil sban taneꞌn yi caꞌwl Ryos tu yi caꞌwl yi ja wiꞌt wal teruꞌ yi in rey, tajweꞌn tan quimeꞌn jalcuꞌn, nka tajweꞌn tan teleꞌn lajuꞌn, nka tajweꞌn yil ẍchoj yi mult, nka baꞌn tzꞌoc iꞌ xetzeꞌ,” stzun yi rey bantz tul yi uꞌj yi bnix taꞌn.

Yi toqueꞌn Esdras tan nachleꞌn Kataj

27 Toqueꞌn tzun Esdras tan nachleꞌn Kataj, itzun taltz tul yi oración: “Ntyoẍ teruꞌ Taꞌ, yi iluꞌ kaRyosil, nin iluꞌ chiRyosil yi eꞌ kamam kateꞌ. Ntyoẍ teruꞌ yi ja oc tkꞌoluꞌ xtxumuꞌn yi rey tan tkꞌol iꞌ kꞌej yi caꞌluꞌ yi at le tnum Jerusalén. 28 Nin ntyoẍ teruꞌ, na ja ẍchajuꞌ yi banl talmaꞌuꞌ swibaj, na ja jal imbalajil swutz yi rey, scyuchꞌ yi eꞌ mas ajcaw yi na chicawun xlaj iꞌ. Nin tan yi xtxolbilaꞌtz, ja jal inwalor tan chijutzꞌeꞌn cobox kabajxom yi oꞌ xonl Israel tan kapakxeꞌn Jerusalén,” stzun Esdras ban tul yi oración.