6
1 Nintzun ben mantar yi rey Darío tan joyleꞌn eꞌchk uꞌjaꞌtz tul eꞌchk cuꞌlbil uꞌj yi at Babilonia. 2 Choꞌn tzun jaleꞌn jun liwr xe chicaꞌl yi eꞌ ajcaw tetz yi tnum Ecbatana yi at le amaꞌl Media. Nin je na tal yi jun uꞌjaꞌtz:3 “Itzun bantz tul yi bajx yob tan Ciro yi rey tan cawuꞌn le amaꞌl Persia, nintzun el yi jun caꞌwleꞌj taꞌn, nin yi xtxolbil, iꞌtz te yi ẍeꞌn sbneꞌ yi templo, yi caꞌl Ryos Jerusalén. Oken kbal banleꞌn, nin xeꞌtok cuꞌseꞌn yi xeꞌ, bantz bnixeꞌn jun balaj caꞌl, bantz cyoponeꞌn yi eꞌ wunak tan cyoyil chitxꞌixwatz le yi jun amaꞌlaꞌtz. Nin tajweꞌn yi junak juk metr tzꞌan yi wutz tkan yi jun caꞌlaꞌtz, nin junak juk metr tzꞌan yi wutz. 4 Baꞌn xcon ox txol lmak cꞌub cuꞌn. Kalenaꞌs tzun lben balaj tzeꞌ tibaj. Ma yi pwok yil sotz teꞌj, tajweꞌn tan ẍchojol yi rey.
5 ”Ma yi eꞌchk maꞌcl yi xconk le caꞌlaꞌtz, baꞌn chaꞌj junt tir yi maꞌcl yi sajnak tcyꞌal Nabucodonosor, yi oro cuꞌn tu sakal. Baꞌn chaꞌjt, na choꞌn sajeꞌn le templo yi xitnak Jerusalén. Nin tajweꞌn tan tajeꞌn junt tir cyakil yi eꞌchk maꞌclaꞌtz, na yaꞌstzun xac tan xconeꞌn.”
6 Yi tbital Darío yi rey yi xtxolbilaꞌtz nintzun ben jun uꞌj taꞌn tetz Tatnai tu Setar-boznai, scyuchꞌ yi eꞌ mas ajcaw yi na chicawun le eꞌchk amaꞌl swutz oꞌctzaj yi tzanlaꞌ Eufrates, tan talcheꞌn scyetz yi xtxolbileꞌj:
7 “Axwok Tatnai scyuchꞌ yi eꞌ mas ajcaw, na waj lwal tzitetz. Quil cheꞌ ixuxwok yi eꞌ judiy. Akꞌwok amaꞌl scyetz yi chibajxom tan cyoqueꞌn tan banleꞌn yi jun templojaꞌtz.a 8 Nin je jun caꞌwleꞌj tan koqueꞌn tan quichꞌeyeꞌn tan banleꞌn yi jun akꞌunaꞌtz. Cyakil yi pwok yi na saj le eꞌchk amaꞌl yi at swutz cyꞌen yi tzanlaꞌ Eufrates, tajweꞌn tan takꞌleꞌn scyetz yi eꞌ aj Judá tan quichꞌeyeꞌn, bantz bnixeꞌn chan yi akꞌun. 9 Nin tajweꞌn tzꞌakꞌlij cyakil yi tajweꞌn scyetz yi eꞌ paleꞌ yi ateꞌ le amaꞌlaꞌtz. Tajweꞌn yil tzꞌakꞌlij eꞌchk neꞌẍ wacẍ, lmak cneꞌr nka eꞌchk neꞌẍ cneruꞌ scyetz, na yaꞌstzun yi na xcon cyaꞌn tetz chitxꞌixwatz. Nchaꞌtz tajweꞌn tzꞌakꞌlij eꞌchk takleꞌn chi taneꞌn ixiꞌn triw tu atzꞌum, 10 tu taꞌal uva, tu aceit. Tajweꞌn tzꞌakꞌlij scyetz, na yaꞌstzun na oylij tetz Ryos yi at tziꞌn tcyaꞌj tan stzatzineꞌn iꞌ scyeꞌj. Nchaꞌtz na waj yil chijak yi banl talmaꞌ Ryos swibaj yi in wetz ireyil, scyuchꞌ yi eꞌ innitxaꞌ. 11 Nchaꞌtz na waj wal: Yi ko at jun yi quil sban taneꞌn yi jun caꞌwleꞌj, tajweꞌn tan teleꞌn tzaj jun ptzoꞌm te yi caꞌl, nin jek cꞌalij iꞌ teꞌj. Ma yi caꞌl iꞌ, cuk woqꞌuiꞌn, junawes nin woqꞌueꞌk cyen tuꞌtz. 12 Nin yi Ryos yi txaꞌoneꞌn yi tnum Jerusalén scyetz yi tetz tanum, tzꞌocopon iꞌ tan xiteꞌn alchok rey nka nación yil tzꞌoc tan joyleꞌn puntil tan xiteꞌn yi tetz caꞌl yi at Jerusalén. Yaꞌstzun yi caꞌwl yi na chintzan tan talcheꞌn nin tzitetz. Nin tajweꞌn tzibanwok taneꞌn tircuꞌn yi wetz incaꞌwlaꞌtz,” stzun Darío yi rey ban nintz tul uꞌj.
Yi cyoqueꞌn yi eꞌ xonl Israel tan wiꞌtzeꞌn yi caꞌl Kataj, nin tan ticyꞌseꞌn wutz kꞌej
13 Yi tponeꞌn yi uꞌj ẍchiwutz Tatnai yi gobernador, tu Setar-boznai, scyuchꞌ yi eꞌ mas ajcaw yi ateꞌ le amaꞌlaꞌtz, swutz oꞌctzaj yi tzanlaꞌ Eufrates, nintzun eꞌ ban taneꞌntz, quib yi tal Darío yi rey scyetz. 14 Chaꞌstzun te ja jal puntil tan cyoqueꞌn cyakil yi cyajcawil yi eꞌ judiy tan bnixeꞌn chan yi jun akꞌunaꞌtz. Ej, nin yaꞌtznin cyajbil yi cob elsanl stziꞌ Ryos, yi Hageo, tu Zacarías yi cyꞌajl Iddo.b Nin ja bnix yi templo chi yi cyajnakeꞌ cyen cawuꞌn teꞌj tan Kataj Ryos, nchaꞌtz chi yi caꞌwl yi cyakꞌnak Ciro tu Darío, tu Artajerjes, yi eꞌ rey banakeꞌ cyen le amaꞌl Persia. 15 Ja bnix yi akꞌun cyaꞌnc le ox tajlal yi xaw Adar, tul yi kakiꞌn yob tan yi rey Darío tan cawuꞌn le amaꞌl Persia.
16 Ticyꞌeꞌn tzun wutz kꞌej yi caꞌl Kataj cyakꞌun cyakil yi eꞌ xonl Israel yi ẍchaꞌknakeꞌ pres, scyuchꞌ yi eꞌ paleꞌ, nin yi eꞌ levita. 17 Wiꞌnin chitzatzineꞌn yi ticyꞌeꞌn wutz kꞌej yi caꞌlaꞌtz, nin baj cyoyil yi chitxꞌixwatz. Eꞌ oc tan pateꞌn jun cient neꞌẍ wacẍ tu cob cient cneꞌr, tu cyaj cient neꞌẍ cneruꞌ. Nchaꞌtz cyoy coblaj chiw, jujun te yi jujun kꞌuꞌj eꞌ. Yaꞌstzun yi cyoy yi cyakꞌ len tan stzajseꞌn yi quil.
18 Cyoqueꞌn tzun yi eꞌ xonl Israel tan banleꞌn chimunl swutz Kataj Ryos. Nchaꞌtz yi eꞌ paleꞌ, eꞌ oc tan banleꞌn yi cyetz chimunl. Ej, nin nchaꞌtz eꞌ ban yi eꞌ xonl Leví. Bnix eꞌchk xtxolbilaꞌtz cyaꞌn chi tzꞌibaꞌnt cyen tan Moisés.
Yi ticyꞌeꞌn yi Pasc cyaꞌn
19 Ma le cyajlaj tajlal yi bajx xaw tetz yi yob,d cyakil yi eꞌ, yi eꞌ opon junt tir Jerusalén eꞌ ban taneꞌn yi Pasc. 20 Te yi cyoqueꞌn tan banleꞌn taneꞌn, nin chixansaj quib yi eꞌ paleꞌ scyuchꞌ yi eꞌ xonl Leví. Kalenaꞌs tzun cyoqueꞌn yi eꞌ xonl Leví tan biyleꞌn chitxꞌixwatz tetz Pasc. Cyoy yi cyetz chitxꞌixwatz, nin chitxꞌixwatz yi eꞌ yi eꞌ ult. 21 Cyakil yi eꞌ xonl Israel yi eꞌ ult junt tir Jerusalén, eꞌ ban taneꞌn yi Pasc. Nchaꞌtz eꞌ ban yi eꞌ awer nak yi nsken cyaj cyen quilol yi eꞌchk yab ajtzaꞌkl yi xomcheꞌ teꞌj sajleꞌn.e Eꞌ ban taneꞌn yi Pasc scyuchꞌ yi eꞌ xonl Israel, na nin cyek ẍchiꞌ yi kaRyosil yi oꞌ xonl Israel. 22 Juk tzun kꞌej eꞌ ban tan banleꞌn taneꞌn yi jun kꞌejaꞌtz. Baj pam cyaꞌn yi quiꞌc xtxꞌamil. Nin wiꞌnin chitzatzineꞌn chicyakil cuꞌn, na ja quil yi banl talmaꞌ Ryos. Na nin oc tkꞌol Ryos le xtxumuꞌn yi rey tan tkꞌol amaꞌl, nin tan quichꞌeyaneꞌn tan banleꞌn yi caꞌl Kataj yi kaRyosil.