Yi toqueꞌn junt tir akꞌun te yi caꞌl Kataj
5
1 Itzun bantz nintzun cyal yi cob elsanl stziꞌ Ryos yi Hageoa tu Zacarías yi cyꞌajl Iddo, scyetz yi eꞌ judiy yi najlcheꞌ Judá, scyuchꞌ yi eꞌ yi ateꞌ Jerusalén yi eꞌchk xtxolbil yi tal Ryos scyetz. 2 Yi quibital Zorobabel yi cyꞌajl Salatiel, tu Josué yi cyꞌajl Josadac, yi eꞌchk xtxolbilaꞌtz yi tal Ryos tetz Hageo tu Zacarías, nintzun choꞌc junt tir tan akꞌun tan banleꞌn yi caꞌl Kataj Jerusalén. Nin xomcheꞌ yi eꞌ elsanl stziꞌ Ryosaꞌtz tan quichꞌeyeꞌn. 3-4 Poro yi quibital Tatnai, yi gobernador yi na cawun le eꞌchk amaꞌl swutz oꞌctzaj yi tzanlaꞌ Eufrates, tu Setar-boznai, nintzun eꞌ ul scyuchꞌ yi eꞌ yi xom chiwiꞌ scyeꞌj tan makleꞌn junt tir yi akꞌun. Itzun cyaltz: “¿Naꞌ mmakꞌon amaꞌl tzitetz tan itoqueꞌn tan banleꞌn junt tir yi akꞌuneꞌj, nin tan toqueꞌn eꞌchk tzeꞌ itaꞌn teꞌj? ¿Naꞌ scyetz eꞌ yi na chitzan tan akꞌun te yi jun akꞌuneꞌj?” cheꞌch bantz.5 Poro ntyoẍtuꞌ tetz Ryos yi ilenin xom iꞌ scyeꞌj yi eꞌ kabajxom yi oꞌ judiy, chaꞌstzun te quinin taneꞌ yi akꞌun. Poro yi eꞌ contraꞌtz ilenin ja chijoy puntil, na nin ben junt uꞌj cyaꞌn swutz Darío yi rey. 6 Yi eꞌ yi bensan yi uꞌjaꞌtz tetz yi rey iꞌtz Tatnai, yi gobernador yi na cawun tibaj eꞌchk amaꞌl swutz oꞌctzaj yi tzanlaꞌ Eufrates, nin Setar-boznai, scyuchꞌ yi eꞌ mas ajcaw yi na chicawun xlaj iꞌ.
7-8 Je na tal yi uꞌj yi ben cyaꞌn swutz Darío yi rey:
“Iluꞌ kareyil, jun yos tetz teruꞌ nin baꞌnk atituꞌ. Ntin na kaj kal teruꞌ yi ja xkaꞌk tan tiwleꞌn yi eꞌchk amaꞌl Judá, nin ja kil yi ilenin na tzan banleꞌn yi jun caꞌl Ryos tul yi tnumaꞌtz. Na chitzan tan banleꞌn tan eꞌchk lmak cꞌub yi seꞌij cuꞌn taneꞌn. Nin ja oc eꞌchk tzꞌlum cyaꞌn te yi tapij. Chin lajkeꞌl nin quitaneꞌn tan banleꞌn yi akꞌun. 9 Yi nkopon ẍchixoꞌl, nintzun nkajak scyetz yi chibajxom yi eꞌ judiyaꞌtz, yi naꞌ tzun mmakꞌon amaꞌl scyetz tan banleꞌn yi jun akꞌunaꞌtz. 10 Nchaꞌtz ja kajak scyetz yi mbi chibiꞌ yi eꞌ bajxom te yi jun akꞌunaꞌtz, na yi kajbil iꞌtz yi nin kloꞌ nkakꞌ chibiꞌ teruꞌ.
11 ”Itzun ncyaltz sketz: ‘Yi ketz, na kalokꞌ jun Ryos yi bnol tetz yi tcyaꞌj tu yi wuxtxꞌotxꞌ, nin na katzan tan banleꞌn baꞌn tetz yi caꞌl yi bnixnak tan jun kareyil yi oꞌ xonl Israel tenẍchan,’b cheꞌch.
12 ”Nchaꞌtz ja cyal: ‘Yi eꞌ kamam kateꞌ cyakꞌ chiꞌch cꞌuꞌlal tetz kaRyosil, chaꞌstzun te tkꞌol iꞌ amaꞌl tetz Nabucodonosor yi rey tetz Babilonia, yi caldeo, tan chibeneꞌn pres, nin tan xiteꞌn yi caꞌleꞌj.c 13 Poro yi teleꞌn tiemp yi toqueꞌn cyen Ciro tetz rey le amaꞌl Babilonia, nin yi teleꞌn jun yob tan iꞌ tan cawuꞌn, nintzun takꞌ iꞌ amaꞌl tan banleꞌn junt tir yi caꞌl Kataj,’d cheꞌch.
14 ”Nchaꞌtz ja cyal: ‘Yi tkꞌol Ciro yi rey amaꞌl tan banleꞌn yi caꞌl Kataj, nin ben iꞌ-tz tan ticyꞌleꞌn tzaj yi eꞌchk maꞌcl yi aj tcyꞌal Nabucodonosor le caꞌl Kataj tzoneꞌj, nin opontz taꞌn Babilonia. Choꞌn tkꞌol Ciro yi eꞌchk maꞌclaꞌtz tetz Sesbasar yi oc taꞌn tetz gobernador le tnumeꞌj Jerusalén. 15 Takꞌ Ciro amaꞌl tetz Sesbasar tan beneꞌn tcyꞌal eꞌchk maꞌclaꞌtz, nin takꞌ iꞌ amaꞌl tetz tan banleꞌn junt tir yi templo kale cuꞌnakit wocꞌ. 16 Chaꞌstzun te jetz yi tuleꞌn Sesbasar tzoneꞌj Jerusalén, ja cuꞌ xeꞌtzbil yi akꞌun taꞌn xe caꞌl Kataj, nin jetzaꞌtz xeꞌtleꞌnix yi akꞌun. Nin txeꞌn kaxcyeꞌ teꞌj,’ cheꞌch yi eꞌ xonl Israelaꞌtz bantz sketz.
17 ”Ma jaluꞌ iluꞌ kareyil, na kaj kajak pawor teruꞌ, yi nink tzꞌocuꞌ tan joyleꞌn, yi naꞌ colijeꞌt eꞌchk uꞌj yi ko bintzi takꞌ Ciro yi rey amaꞌl tan cyoqueꞌn yi eꞌ judiy tan banleꞌn yi jun templojaꞌtz. Nin ko bintzi yi xtxolbileꞌj na kaj kubit teruꞌ, nin na kaj kubit yi mbi xtxumuꞌnuꞌ te yi xtxolbilaꞌtz,” chij yi uꞌj yi opon swutz yi rey.