Yi chixcyeweꞌn yi eꞌ contr tan makleꞌn yi akꞌun
4
1 Itzun bantz, yi quibital yi eꞌ kacontr yi oꞌ aj Israel, yi oꞌ xonl Judá tu Benjamín, yi na katzan ketz tan banleꞌn yi caꞌl Kataj, wech na inak kuleꞌn junt tir le kaꞌamaꞌl, 2 nintzun eꞌ ultz tan yol scyetz Zorobabel tu Josué, nin scyetz yi eꞌ kawiꞌ banl wiꞌ, itzun cyaltz:—Eꞌuꞌ xonl Israel, ¿cuj peꞌ cyaꞌnuꞌ yil koꞌc ketz tan quichꞌeyeꞌnuꞌ tan banleꞌn yi caꞌl Kataj? Na nchaꞌtz oꞌ, niꞌcuꞌn oꞌ scyuchꞌuꞌ, na junit Ryos na kacꞌuꞌlaj scyuchꞌuꞌ, nin na kapat ketz katxꞌixwatz swutz iꞌ jetz te yi tiemp tetz Esar-hadón yi rey tetz Asiria yi oꞌ ulsan tzoneꞌj.a
3 Poro nin cyal Zorobabel tu Josué scyuchꞌ yi eꞌ mas bajxom yi quiꞌc rmeril, nin je cyal scyetzeꞌj:
—Quiꞌc rmeril tan cyoqueꞌnuꞌ tan banleꞌn yi caꞌl Kataj, yi ketz kaRyosil yi oꞌ xonl Israel, na tajweꞌn tan bnixeꞌn kaꞌn ketz kachuc, chi yi caꞌwl yi takꞌ kawutzileꞌn Ciro yi rey cwent Persia.
4 Yi quibital yi eꞌ kacontr yi xtxolbilaꞌtz, nintzun chiꞌch chicꞌuꞌl skeꞌj, nin eꞌ oc tan tocseꞌn chicꞌuꞌl yi eꞌ mas aj Judá tan qui cyoqueꞌn il tan akꞌun. 5 Nchaꞌtz cyakꞌ pwok scyetz cobox bajxom yi na chicawun jakꞌ caꞌwl yi rey, tan qui cyakꞌol amaꞌl tan banleꞌn yi caꞌl Kataj Ryos. Yaꞌstzun eꞌ ban te yi tiemp yi ncawun Ciro yi rey, jalen te yi tiemp yi ncawun Darío yi rey.
6 Ma te yi tiemp yi toqueꞌn cyen Asuerob tetz rey, nintzun ben uꞌj cyaꞌn tan kaxochleꞌn yi oꞌ aj Judá yi atoꞌ Jerusalén. 7 Nchaꞌtz eꞌ ban yi toqueꞌn cyen Artajerjesc tetz rey cwent Persia. Yi Bislam, Mitrídates, Tabeel scyuchꞌ yi eꞌ mas cyuchꞌ, nin ben chitzꞌibal jun uꞌj swutz Artajerjes yi rey tan kaxochleꞌn yi oꞌ aj Judá. Nin yi uꞌj yi bnix cyaꞌn, bnix cyaꞌn le chiyol, nin tan yi eꞌchk letra yi na xcon cyakꞌun yi eꞌ arameo. 8 Nchaꞌtz ban yi wiꞌtz bajxom yi na biꞌaj Rehum tu yi tetz tajtzꞌib yi na biꞌaj Simsai, nin ben chitzꞌibal jun uꞌj tetz Artajerjes yi rey tan takꞌleꞌn kil yi oꞌ aj Jerusalén. 9-11 Yi tzꞌibanl tetz yi uꞌjaꞌtz iꞌtz Rehum tu yi tajtzꞌib Simsai, scyuchꞌ yi eꞌ mas ajcaw, scyuchꞌ chibajxom yi eꞌ sanlar, nin yi eꞌ mas ajcaw cwent Persia, Erec, Babilonia tu Susa, yi na aꞌlchij Elam tetz. Tircuꞌn junit eꞌ ban scyuchꞌ yi eꞌ mas ajcaw yi ateꞌ lakak eꞌchk mas tnum, yi at jakꞌ caꞌwl yi wiꞌtz ajcaw Asnapar, nin choꞌn cyuleꞌn tan najeweꞌn le eꞌchk amaꞌl cwent Samaria tu eꞌchk amaꞌl swutz oꞌctzaj yi tzanlaꞌ Eufrates. Je na tal yi carteꞌj yi opon swutz Artajerjes yi rey:
“Yi uꞌjeꞌj, iꞌtz tetz teruꞌ yi wiꞌtz kareyil Artajerjes, nin ja bnix kaꞌn yi oꞌ yi oꞌ ẍchakumuꞌ, yi atoꞌ le eꞌchk amaꞌl swutz oꞌctzaj yi tzanlaꞌ Eufrates.
12 ”Iluꞌ kareyil, na kaj kal teruꞌ: Yi eꞌ judiy, yi takꞌ kareyil amaꞌl scyetz tan cyuleꞌn junt tir le chiꞌamaꞌl Jerusalén, na chitzan tan banleꞌn baꞌn tetz yi chitnumil, na na chitzan tan banleꞌn yi tapij solteꞌj yi tnum. Ej, nin chocopon tan contriꞌn skeꞌj, na eꞌ pajol caꞌwluꞌ. 13 Chaꞌstzun te na katzan tan talcheꞌn teruꞌ, na yi kol chixcyeꞌ tan banleꞌn yi chitnumil, nin tan jeꞌseꞌn junt tir yi tapij, quiꞌt chichoj yi alcawal tu eꞌchk cutxuj, tu eꞌchk mas pwok yi na saj ẍchixoꞌl. Ej, nin tan paj yi quil cyakꞌ, quil jal mas bambiluꞌ. 14 Iluꞌ kareyil yi oꞌ ketz yi atoꞌ jakꞌ caꞌwluꞌ qui na kaj yil bajij yi jun xtxolbilaꞌtz teꞌjuꞌ, chaꞌstzun te ja katxum tan beneꞌn katzꞌibal yi jun uꞌjeꞌj tan talcheꞌn teruꞌ. 15 Iluꞌ teruꞌ kareyil, baꞌn tcuꞌn yi nink tzꞌocuꞌ tan joyleꞌn yi eꞌchk uꞌj yi colij cyakꞌun yi eꞌ ajcaw sajleꞌn, nin stileꞌuꞌ kale na talwit yi eꞌ yi ateꞌ le yi jun tnumaꞌtz, eꞌ len cuꞌn pajol caꞌwl, nin chin xoꞌwbil nin eꞌ yil choꞌc tetz kacontr. Nkꞌeꞌtz ntin tetz ketz, ma na tetz cyakil nación beneꞌn tziꞌn, na yaꞌstzun eꞌ banak sajleꞌn. Nin yaꞌstzun quil yi cweꞌn woqꞌuiꞌn yi chitnumil. 16 Ma jaluꞌ, iluꞌ kajcaw, na katzan tan talcheꞌn yi xtxolbileꞌj teruꞌ na yi kol chixcyeꞌ tan banleꞌn junt tir yi tnum tu yi tapij solteꞌj, tzꞌelepon kꞌejuꞌ nin quiꞌt xcyeꞌuꞌ tan chicaweꞌn. Nin tan yi xtxolbilaꞌtz, nchaꞌtz ẍchibneꞌ cyakil yi eꞌ mas nación yi ateꞌ swutz oꞌctzaj yi tzanlaꞌ Eufrates,” cheꞌch yi eꞌ bajxomaꞌtz ban nintz tul yi uꞌj yi opon swutz yi rey.
17 Yi tponeꞌn yi uꞌj swutz yi rey, nintzun saj bnol junt uꞌj tan talcheꞌn scyetz yi eꞌ ajcawaꞌtz, nin je na taleꞌj:
18 “Na waj yil wal muꞌẍ tal tzitetz te yi jun uꞌj yi ulnak itaꞌn tzinwutz, yi jeꞌnakt itxꞌixpulwok le ketz kayol. Ja jeꞌ siꞌleꞌn tzinwutz. 19 Nchaꞌtz ja noꞌc tan joyleꞌn tkanil yi ẍeꞌn taneꞌn yi jun tnumaꞌtz, nin bintzinin, yi jun tnumaꞌtz chin cachiꞌ nin, na eꞌ cuꞌn pajol caꞌwl yi eꞌ wunak yi ateꞌ tcꞌuꞌl, nin alaꞌ tir eꞌ oc tan contriꞌn scyeꞌj mas tnum. 20 Nin le yi jun tnumaꞌtz, eꞌ jal balaj rey yi eꞌ cawun tibaj cyakil eꞌchk amaꞌl toqueꞌn tziꞌn, kale atiteꞌt yi tzanlaꞌ Eufrates. Nin ja choꞌc cyakil wunak jakꞌ chicaꞌwl, na ja chichoj eꞌchk alcawal tu eꞌchk cutxuj scyetz. 21 Chaꞌstzun te na waj yil ben mantar itaꞌnwok tan chimakleꞌn te yi akꞌun. Quiꞌt tzꞌoc kbal yi akꞌun, jalen cuꞌn chincawun junt tir yi kol bnix nka quiꞌ. 22 Eliꞌch yi caꞌwleꞌj te icꞌuꞌl, na ko tzun chixcyeꞌ tan kaxiteꞌn tircuꞌn,” chij yi rey ban nintz.
23 Yi toponeꞌn yi uꞌjeꞌj tkꞌab Rehum, nin yi jeꞌn siꞌleꞌn swutz iꞌ tan Simsai yi tajtzꞌib, nin yi quibital chicyakil cuꞌn scyuchꞌ yi eꞌ mas ajcaw, lajkeꞌl nin tzun eꞌ beneꞌntz Jerusalén tan chimakleꞌn yi eꞌ judiy yi na chakꞌuj. 24 Chaꞌstzun te quiꞌt oc akꞌun te yi caꞌl Kataj yi at Jerusalén, jalen te yi teleꞌn caꞌp yob tan Darío yi rey tan cawuꞌn tibaj yi amaꞌl Persia.