Yi toqueꞌn banleꞌn yi patbil chitxꞌixwatz
3
1 Itzun bantz yi tucumuleꞌn yi jukiꞌn xaw tetz yi yob, nin te yi nsken chibaj najeꞌ yi eꞌ xonl Israel swutzak yi chiꞌamaꞌl, nintzun eꞌ mol quibtz chicyakil cuꞌn le tnum Jerusalén.a 2 Ma cyetz Josué, yi cyꞌajl Josadac scyuchꞌ yi eꞌ mas paleꞌ, tu Zorobabel yi cyꞌajl Salatiel, tuml cyakil yi eꞌ chixonl, nin eꞌ oc tan banleꞌn jun patbil chitxꞌixwatzb tan pateꞌn cyoy tetz Ryos chi na tal yi ley Moisés, yi ẍchakum Ryos. 3 Ej, nin choꞌn jeꞌn chibnol junt tir tibaj yi xeꞌ yi antiw yi xitnak. Ja chixob scyetz yi eꞌ chicontr yi najlcheꞌ chinakaꞌjil, poro quinin nchitaneꞌ tan banleꞌn yi jun patbil chitxꞌixwatzaꞌtz. Ma yi bnixeꞌn, cyakil jalchan nin cyakil cweꞌn kꞌej,c eꞌ oc tan pateꞌn chitxꞌixwatz tibaj tan takꞌleꞌn kꞌej Kataj. 4 Nchaꞌtz eꞌ oc tan banleꞌn taneꞌn yi jun wutzileꞌn nim kꞌej yi na biꞌaj Tetz Scabteꞌ,d chi yi ley yi tzꞌibaꞌnt cyen. Nin cyakil kꞌej eꞌ oc tan pateꞌn chitxꞌixwatz chi taneꞌn chicstumbr, nin cyakꞌ cyakil yi cyoy yi tajweꞌn tan cyoyil. 5 Eꞌ pat yi chitxꞌixwatz yi tajweꞌn tan chipatil cyakil kꞌej, nin eꞌ ban taneꞌn yi kꞌej tetz yi neꞌẍ xaw, na yaꞌstzun yi eꞌchk kꞌej yi bixbaꞌnt cyen tan takꞌleꞌn kꞌej Kataj.e Nin at wiꞌnin eꞌ yi tetz cuꞌn cyalmaꞌ ja chopon tan toyeꞌn yi chitxꞌixwatz yi chigan tuꞌ. 6 Eꞌ xeꞌtij tan pateꞌn cyoy tetz Kataj le bajx kꞌej tetz yi jukiꞌn xaw te yi yob. Nin te yi tiempaꞌtz yaꞌstzun taxk xeꞌtij banleꞌn yi caꞌl Kataj Jerusalén. 7 Poro nintzun eꞌ txumtz tan banleꞌn yi caꞌl Kataj, cyakꞌ pwok scyetz yi eꞌ bnol caꞌl tan banleꞌn yi akꞌun. Nchaꞌtz eꞌ ban scyeꞌj yi eꞌ seꞌol tzeꞌ. Nin nchaꞌtz cyakꞌ ixiꞌn triw, tu aceit scyetz yi aj Tiro tu Sidón, tan chibeneꞌn tan ticyꞌleꞌn eꞌchk tzeꞌ yi cedro jalen wiꞌwtz Líbano, nin tan sajeꞌn cyaꞌn wi mar, tan tuleꞌn Jope yi at tzi mar. Yaꞌstzun cyulejtz, chi yi permis yi takꞌ yi rey Ciro cwent Persia scyetz.Yi cyoqueꞌn tan banleꞌn yi caꞌl Kataj Jerusalén
8 Tircuꞌn tzun cyoqueꞌntz tan akꞌun tan banleꞌn yi caꞌl Kataj. Oc Zorobabel yi cyꞌajl Salatiel, tu Josué yi cyꞌajl Josadac. Nchaꞌtz eꞌ ban yi eꞌ paleꞌ scyuchꞌ yi eꞌ xonl Leví, scyuchꞌ cyakil yi eꞌ yi eꞌ ul junt tir Jerusalén. Eꞌ xeꞌtij te yi akꞌun tul yi caꞌp xaw tetz yi caꞌp yob yi cyunleꞌnix. Nin yi eꞌ yi eꞌ oc sjuꞌ yi akꞌun iꞌtz yi eꞌ xonl Leví yi nsken tzꞌak junak yob cyakꞌun. 9 Ma tetz Josué scyuchꞌ yi eꞌ cyꞌajl, scyuchꞌ yi eꞌ mas xonl, junit eꞌ ban cyetz tan akꞌun scyuchꞌ yi eꞌ xonl Cadmiel, scyuchꞌ yi eꞌ tetz cyꞌajl, na eꞌ cuꞌn xonl Judá. Nchaꞌtz junit eꞌ ban scyuchꞌ yi eꞌ xonl Henadad, yi eꞌ xonl Leví. Eꞌ tzun eꞌ bajx cuꞌn tan tiwleꞌn yi akꞌun te caꞌl Kataj.
10 Yi xeꞌteꞌn cuꞌseꞌn xeꞌ yi caꞌl Kataj, nintzun eꞌ opon cyakil yi eꞌ paleꞌ. Tircuꞌn chiwekoꞌn quib tu yi beꞌch cyetz tetz paleꞌ, nin cyꞌaꞌn len jujun chun cyaꞌn. Nchaꞌtz eꞌ ban yi eꞌ xonl Leví, yi eꞌ tu Asaf, cyꞌaꞌn eꞌchk maꞌcl cyaꞌn tan takꞌleꞌn chikꞌajsbil tetz Kataj, chi yi talnak Luwiy yi toqueꞌn tetz chireyil yi eꞌ xonl Israel.f 11 At jun kꞌuꞌj na chitzan tan bitz, nin at junt kꞌuꞌj na tzaꞌwen tzaj yi bitz, nin je na cyaleꞌj: “Katyoẍink tetz Kataj, na chumbalaj nin yi banl talmaꞌ iꞌ,g nin quinin bajsbeꞌn tetz yi banl talmaꞌ skibaj yi oꞌ xonl Israel,” cheꞌch.
Wiꞌnin chiẍchꞌineꞌn tan biꞌl tzatzin ateꞌ cuꞌnt tan takꞌleꞌn chikꞌajsbil tetz Kataj, na yaꞌstzun cweꞌn xeꞌ yi caꞌl Kataj.
12 Ma yi eꞌ paleꞌ, scyuchꞌ yi eꞌ mas xonl Leví, scyuchꞌ yi eꞌ wiꞌ banl chiwiꞌ yi jujun kꞌuꞌj xonl Israel yi sken tijin chicꞌuꞌl, nin yi quilnak yi bajx caꞌl Kataj, wiꞌnin cyokꞌeꞌn yi cweꞌn xeꞌ yi acꞌaj caꞌl. Nin wiꞌnin eꞌ yi wiꞌnin cyokꞌeꞌn tan biꞌl tzatzin yi ateꞌ cuꞌnt. 13 Wiꞌnin oꞌkl ateꞌ cuꞌnt tircuꞌn, na wiꞌnin eꞌ yi na chiẍchꞌin tan yi tzatzin yi ateꞌ cuꞌnt. Nin at eꞌ na chokꞌ tan bis, chin chiwiꞌ nin tan oꞌkl, nin tan sichꞌ, nin kajpeꞌn nin na icyꞌeꞌt chiwiꞌ.