NEHEMÍAS
Yi jakol Nehemías ẍchꞌeybil cyetz yi eꞌ tanum
1
1 Je yi xtxolbileꞌj yi cyajnak cyen stzꞌibal Nehemías, yi cyꞌajl Hacalías:Itzun bantz le xaw Quisleu,a te yi nsken el junakix yob tan Artajerjes yi rey, tan cawuꞌn le tnum Susa. Choꞌn tzun atin wetz yi in Nehemías le jun tnumaꞌtz. 2 Choꞌn atintz le jun tnumaꞌtz yi cyuleꞌn yi eꞌ witzꞌun Hanani scyuchꞌ coboxt kaxonl, yi choꞌn chisajeꞌn le amaꞌl cwent Judá. Nintzun injak scyetz yi ẍeꞌn taneꞌn yi katnumil Jerusalén, scyuchꞌ yi eꞌ katanum yi nsken chopon junt tir tan najeweꞌn tul.
3 Itzun cyaltz: “Chin bisbil nin ateꞌ cuꞌnt yi eꞌ katanum. Nin yi tnum, tircuꞌn elnak cuꞌn swutz. Na yi tapij yi at solteꞌj, cuꞌnak woqꞌuiꞌn. Nin cyakil yi eꞌchk sawanil ocnak kꞌaꞌkl,” cheꞌch tzun bantz swetz.
4 Yi wital yi xtxolbilaꞌtz, nintzun incꞌoleꞌ cuꞌntz tan oꞌkl. Junawes toqueꞌn cyen bis swetz tetz cobox kꞌej. Quinin nchinwan te cobox kꞌejaꞌtz. Nin ja noꞌctz tan jakleꞌn ẍchꞌeybil ketz, tetz Kataj yi at tcyaꞌj.
5 Itzun waltz tetz: “Iluꞌ Kataj Ryos, iluꞌ taw yi tcyaꞌj. Iluꞌ yi Ryos yi wiꞌnin kꞌejuꞌ, nin wiꞌnin ẍchamiluꞌ. Iluꞌ yi Ryos yi na el cuꞌnuꞌ te yoluꞌ, nin ilenin xomijuꞌ skeꞌj cyakil yi oꞌ yi choꞌn kꞌuklij kacꞌuꞌl teꞌjuꞌ, nin scyeꞌj yi eꞌ yi cyetz cuꞌn cyalmaꞌ na chitzan tan banleꞌn taneꞌn yi caꞌwluꞌ.
6 ”Ma jaluꞌ Taꞌ, max cꞌuꞌluꞌ skibaj, tbiteꞌuꞌ yi intziꞌ, inkul. Ajk cuntzaj wutzuꞌ tan inxmayeꞌn. Na skꞌejl tu lakꞌbal na cuꞌ inwutz teruꞌ Taꞌ. Na cuꞌ inwutz teruꞌ tan jakleꞌn cuybil kapaj yi oꞌ xonl Israel. Na na el intxum tetz, yi ja kajuch kil swutzuꞌ. Nkꞌeꞌtz ntin yi eꞌ mas xonl Israel, ma na nchaꞌtz in, scyuchꞌ innajal, nin scyuchꞌ yi eꞌ inxonl. Ja kajuch len kil swutzuꞌ. 7 Ja kaxom te yi ketz kajbil yi quiꞌc muꞌẍ xac, na quinin nkaxom te yi teruꞌ tajbiluꞌ. Quinin nkaban taneꞌn yi caꞌwluꞌ, na qui nkaxom te yi teruꞌ yoluꞌ yi talnakuꞌ tetz yi ẍchakumuꞌ Moisés.
8 ”Ma jaluꞌ Taꞌ, elk kꞌajabuꞌ skeꞌj chi alijt cyen tanuꞌ tetz Moisés. Na je yoluꞌeꞌj: ‘Kol tzijuch itil, cxelpon inxitul ẍchixoꞌl yi eꞌ awer nak.’b
9 ”Poro nchaꞌtz taluꞌ: ‘Kol tzimejbajt itib tzinwutz nin kol cxomwok te yi wajbil, tzincuyeꞌ ipaj.’ Nchaꞌtz taluꞌ: ‘Kol tziban taneꞌn yi incaꞌwl, cxuꞌlt waꞌn le yi amaꞌl yi txaꞌijt waꞌn tetz wetz innajbil. Mpe nskenk cxeꞌlwok xit beneꞌn tziꞌn wi munt, cxuꞌlt junt tir waꞌn,’ chijuꞌ ban Taꞌ.
10 ”Oꞌ bin ẍchakumuꞌ Taꞌ, nin oꞌ tanumuꞌ yi txaꞌij choꞌt taꞌnuꞌ. Ja kacolpij tanuꞌ tan yi poreruꞌ tu ẍchamiluꞌ, 11 na iluꞌ kaRyosil, iluꞌ Cawl ketz. Chaꞌstzun te, na cuꞌ inwutz teruꞌ tan tbitaluꞌ intziꞌ inkul, na in xconsbeꞌtzuꞌ. Nchaꞌtz tbiteꞌuꞌ chitziꞌ chikul yi eꞌ mas xconsbeꞌtzuꞌ. Na yi kajbil iꞌtz, tan takꞌleꞌn kꞌejuꞌ. Takꞌtzajuꞌ banluꞌ swibaj tan jaleꞌn imbalajil swutz yi rey,” chinch tzun bantz tetz Kataj yi woqueꞌn tan jakleꞌn ẍchꞌeybil wetz tetz iꞌ.
Yaꞌstzun waltz, na te yi tiempaꞌtz in akꞌol tcꞌaꞌ Artajerjes yi rey.