Yi beneꞌn Nehemías tan xtxicbajeꞌn junt tir yi tapij tetz Jerusalén
2
1 Itzun bantz, le xaw Nisána te yi nsken el junakix yob tan Artajerjes yi rey, tan cawuꞌn le amaꞌl Susa. Atin nintz le jun tnumaꞌtz tan akꞌun tuchꞌ yi rey, na in bnol tcꞌaꞌ. At tzun jun tir, yi woponeꞌn tan takꞌleꞌn tcꞌaꞌ, nintzun til iꞌ yi na chimbisun. 2 Nintzun saj jakol swetz:—Nehemías, ¿mbi na abislej? Quiꞌc ayab na wilnin. Poro ¿mbi na cẍicyꞌan? At loꞌ jun eꞌchk takleꞌn yi na abislej, stzun yi rey bantz swetz.
—Taꞌ, cuyuꞌ impaj. Lok ben ẍkon yi tiempuꞌ. Poro ẍeꞌn quil chimbisun, na yi intanum kale mukxnakeꞌt cyen yi eꞌ intaj intxuꞌ, quiꞌct xac, na cuꞌnak wocꞌ tircuꞌn. Nchaꞌtz yi eꞌchk sawanil yi tnumaꞌtz tircuꞌn ocnak kꞌaꞌkl. Chaꞌstzun te na chimbisun, chinch tzun bantz tetz.
4 —¿Ẍeꞌn tzimban tan awuchꞌeyeꞌn? stzun yi rey.
—Taꞌ, ko at imbalajil swutzuꞌ, nin ko baꞌn na nakꞌujeꞌt tuchꞌuꞌ, tkꞌeꞌuꞌ bin amaꞌl swetz tan imbeneꞌn le intanum Judá, kale mukxnakeꞌ cyent yi eꞌ intaj. Takꞌuꞌ amaꞌl swetz tan imbeneꞌn tan banleꞌn baꞌn tetz, chinch tetz yi rey.
6 Nintzun oc yi rey tan jakleꞌn swetz:
—Nehemías, ¿nicyꞌnaꞌ tiemp na taj tan awajeꞌn tan banleꞌn baꞌn tetz yi atanum? ¿Tonaꞌ cẍpakxij? stzun iꞌ swetz.
Te yi toqueꞌn yi rey tan jakleꞌn yi eꞌchk xtxolbilaꞌtz swetz, cꞌolchij yi reina xlaj iꞌ.
—Nink scꞌuluꞌ yil takꞌuꞌ jun wuꞌj tan inchajol scyetz yi eꞌ ajcaw yi ateꞌ jalaj cyꞌen yi tzanlaꞌ Eufrates, bantz cyakꞌol amaꞌl swetz tan woponeꞌn Judá. 8 Ej, nin nchaꞌtz na kloꞌ waj junt ort tan inchajol tetz Asaf yi qꞌuicyꞌlom tzeꞌ, tan tkꞌol iꞌ amaꞌl swetz tan telseꞌn tzaj yi tzeꞌ tan xconeꞌn tetz sawanil yi caꞌl yi na xcon cyakꞌun yi eꞌ sanlar yi eꞌ qꞌuicyꞌlom yi templo. Nin nchaꞌtz yi tzeꞌ yil xconk tan banleꞌn yi eꞌchk puertil yi tapij yi tzꞌocopon solteꞌj yi tnum, tu yi tzeꞌ yi xconk tan banleꞌn yi wetz incaꞌl, chinch tzun bantz tetz.
Nintzun takꞌ yi rey cyakil yi minjak tetz, na xomij Kataj sweꞌj tan wuchꞌeyeꞌn.
9 Itzun bantz yi woponeꞌn ẍchiwutz yi eꞌ ajcaw yi ateꞌ jalaj cyꞌen yi tzanlaꞌ Eufrates, nintzun wakꞌ eꞌchk uꞌj scyetz, yi takꞌ yi rey swetz. Nchaꞌtz xomcheꞌ jun cꞌoloj qꞌuicyꞌlom sweꞌj. Na nin eꞌ saj ẍchakol yi rey cobox sanlar yi ateꞌeꞌn wi chej, scyuchꞌ cobox cyajcawil tan kaqꞌuicyꞌleꞌn.
10 Poro yi tbital Sanbalat, yi aj Horón tuchꞌ Tobías, yi cyajcawil yi eꞌ amonita, yi at wopombil, nintzun jeꞌ-tz ẍchiwutz. Na yi cyajbil iꞌtz tan qui tponeꞌn jun tan quichꞌeyeꞌn yi eꞌ intanum yi eꞌ xonl Israel.
Yi tponeꞌn Nehemías Jerusalén
11-12 Kuleꞌn tzuntz Jerusalén. Ej, nin yi ticyꞌeꞌn ox kꞌej, nintzun imbeneꞌntz lakꞌbal scyuchꞌ coboxt yaj tan tilweꞌn yi ẍeꞌn cuꞌn taneꞌn yi tnum Jerusalén. Cyaꞌl nintzun walwit yi intxumuꞌn yi nsken oc lacꞌp te walmaꞌ tan Kataj Ryos, tan imbnol baꞌn te yi katnumil, Jerusalén.
Quiꞌc mas chej cyꞌaꞌn kaꞌn. Ntin cuꞌn yi jun wetz yi atineꞌn tibaj. 13 Choꞌn tzun keleꞌn tzajtz le sawan yi na biꞌaj sawan yi na xmayinin tjocoꞌj. Choꞌn kicyꞌeꞌntz swutz yi neꞌẍ aꞌ yi na biꞌaj Dragón.
Ej, nintzun ja kicyꞌaktz tzi yi sawan kale na eleꞌt tzꞌis. Nintzun baj inxmayil yi eꞌchk tapij yi at solteꞌj yi tnum te yi jalaj xlajaꞌtz. Tircuꞌn cuꞌnak woqꞌuiꞌn. Ma yi eꞌchk sawan tircuꞌn ocnak kꞌaꞌkl. 14 Kalenaꞌs tzun koponeꞌntz tzi yi junt sawan yi na biꞌaj yi sawan kale na itzꞌeꞌt tal neꞌẍ aꞌ. Nin oꞌ opontz tzi tanquil yi tcꞌaꞌ rey. Poro quinin tzun oꞌ icyꞌpon, na quiꞌc beꞌ tetz yi inchej.
15 Iteꞌn nin akꞌbalaꞌtz oꞌ jepontz tul yi tkambil aꞌ, nintzun baj wilol yi ẍeꞌn cuꞌn taneꞌn yi tapij yi at solteꞌj yi tnum. Yi wiꞌt wilol, nintzun oꞌ pakxijtz. Iteꞌn nin sawanaꞌtz oꞌ oqueꞌt kale oꞌ eltzit. 16 Qui tzꞌicyꞌ scyetz yi eꞌ ajcaw yi in xnaꞌkeꞌn. Nin qui tzꞌicyꞌ scyetz yi mbi mimban, na ntaxk wal scyetz. Nchaꞌtz quinin wal scyetz yi eꞌ intanum, yi eꞌ paleꞌ, scyuchꞌ yi eꞌ kawutzileꞌn, scyuchꞌ yi eꞌ wiꞌ banl wiꞌ, scyuchꞌ yi eꞌ mas intanum yi tajweꞌn tan cyakꞌujeꞌn te yi akꞌun.
Yi chimolxeꞌn cyakil yi cmon tan Nehemías
17 Itzun bantz, nintzun wal scyetz cyakil yi eꞌ cmon:
—Eꞌuꞌ kacmon, sak ẍchiwutzuꞌ yi chin bisbil nin kutaneꞌn. Nin sak ẍchiwutzuꞌ yi ẍeꞌn taneꞌn yi katnumil, tu yi eꞌchk sawanil yi tircuꞌn ocnak kꞌaꞌkl.
”Ma jaluꞌ eꞌuꞌ kacmon, kamoleꞌ bin kib nin kakꞌujk tan jeꞌseꞌn junt tir yi tapij, bantz quiꞌt chitzeꞌeneꞌn mas yi eꞌ kacontr skeꞌj, chinch bantz scyetz.
18 Nchaꞌtz intxolil scyetz yi banl talmaꞌ Kataj yi at swibaj tu yi mbi cuꞌn saj tlol yi rey swetz, nintzun cyaltz:
—Yi ko yaꞌtz, kamoleꞌeꞌn bin kib nin kakꞌujk, cheꞌch bantz.
Chaꞌstzun te tetz cuꞌn cyalmaꞌ jeꞌn chimolol quib tan akꞌun.
19 Poro itzun yi quibital Sanbalat, yi aj Horón, tu Tobías yi ajcaw tetz Amón, tu Gesem yi aj Arabia, yi mbi i ilaꞌtz yi katxumuꞌn, nintzun eꞌ oc tan xcyꞌakliꞌn skeꞌj. Itzun cyaltz:
—¿Mbi na iban wok? ¿Tzipajeꞌ peꞌ caꞌwl yi kareyil?
20 Poro nintzun wal scyetz:
—Yi Kataj Ryos yi at tcyaꞌj, iꞌ tzꞌocopon tan kuchꞌeyeꞌn. Chaꞌstzun te ja jeꞌ kamolol kib yi oꞌ ketz yi oꞌ xconsbeꞌtz iꞌ tan xtxicbajeꞌn junt tir yi tapij yi at solteꞌj yi katnumil. Ma itetz quiꞌc nin itocleꞌn teꞌj, na nkꞌeꞌtz itetz, chinch tzun bantz scyetz.