Yi bajeꞌn jatxol Nehemías yi eꞌchk akꞌun
3
1 Itzun chitarey yi eꞌ paleꞌ Eliasib scyuchꞌ yi eꞌ tuchꞌ, iꞌtz tan banleꞌn yi sawan yi na biꞌaj Cyetz Cneruꞌ. Oc marquil yi sawanaꞌtz cyaꞌn. Nin nchaꞌtz oc yi puertil cyaꞌn. Ej, nin eꞌ nchibnon yi tapij yi na xeꞌt tzaj kale atit yi Torre de Los Cien, jalen kale atit yi torre Hananeel.2 Ma yi junt piẍ tapij yi xom tzaj, eꞌ aj Jericó bnon tetz.
Ma yi junt piẍ yi xom tzaj, Zacur yi cyꞌajl Imri bnon tetz.
3 Ma yi sawan yi na biꞌaj tetz cay, eꞌ xonl Senaa bnol tetz. Eꞌ ocsan yi eꞌchk marquil yi sawan tu yi eꞌchk quiwel wutz coc tan qui jakxeꞌn.
4 Ma yi junt piẍ tapij yi xom tzaj, eꞌ tu Meremot bnol tetz. Yi Meremotaꞌtz iꞌ cyꞌajl Urías, nin iꞌ mamaj taꞌ Cos.
Ma yi junt piẍ yi xom tzaj, eꞌ xonl Mesulam yi cyꞌajl Berequías, yi mamaj Mesezabeel bnol tetz.
Ma yi junt piẍ yi xom tzaj, eꞌ xonl Sadoc yi cyꞌajl Baana bnol tetz.
5 Ma yi junt piẍ yi xom tzaj eꞌ xonl Tecoa bnon tetz. Quinin eꞌ cꞌul yi eꞌ chibajxom nka yi eꞌ yi at chikꞌej tan quichꞌeyeꞌn tan banleꞌn yi akꞌun, poro ilenin ja bnix cyaꞌn.
6 Ma yi sawan yi na biꞌaj Jesana eꞌ tu Joiada scyuchꞌ yi eꞌ xonl Mesulam bnon tetz. Yi Joiadajaꞌtz iꞌ cyꞌajl Paseah. Ma Mesulam iꞌ cyꞌajl Besodías. Eꞌ bnol tetz yi sawanaꞌtz tuml yi eꞌchk marquil, tu eꞌchk quiwel wutz coc tan qui toqueꞌn jakx.
7 Ma yi junt piẍ tapij yi xom tzaj, eꞌ xonl Melatías bnon tetz, scyuchꞌ yi eꞌ xonl Jadón. Yi eꞌ xonl Malatías eꞌ aj Gabaón. Ma yi eꞌ xonl Jadón eꞌ aj Meronot. Yi eꞌ wunak yi najlcheꞌ Gabaón tu Mizpa choꞌn ateꞌ jakꞌ cawl yi gobernador tetz yi amaꞌl yi at jalaj cyꞌen tzanlaꞌ Eufrates. 8 Ma yi junt piẍ tapij yi xom tzaj, eꞌ xonl Uziel bnon tetz. Yi Uzielaꞌtz iꞌ cyꞌajl Harhaía, yi txakꞌol sakal.
Ma yi junt piẍ yi xom tzaj Hananías bnol tetz. Yi Hananíasaꞌtz iꞌ bnol perfum. Yi cob yajaꞌtz eꞌ bnon yi tapij jalen te yi tapij yi na biꞌaj Nim Wutz. 9 Yi junt piẍ yi xomtzaj, bnix tan Refaías yi cyꞌajl Hur. Yi Refaías iꞌ yi ajcaw te yi jalaj tnum Jerusalén.
10 Ma yi junt piẍ yi xom tzaj Jedaías yi cyꞌajl Harumaf bnon tetz, na yi jun piẍaꞌtz yi bnix taꞌn, choꞌn cuꞌn at swutz yi caꞌl iꞌ.
Ma yi junt piẍ yi xom tzaj, Hatús yi cyꞌajl Hasabnías bnon tetz.
11 Ma yi junt piẍ tapij tuml yi torre yi at tibaj yi na biꞌaj torre tetz eꞌchk chuj, eꞌ Malquías yi cyꞌajl Harim bnon tetz tu Hasub yi cyꞌajl Pahat-moab.
12 Ma yi junt piẍ yi xom tzaj, Salum bnon tetz scyuchꞌ yi eꞌ meꞌl. Yi Salumaꞌtz iꞌ cyꞌajl Halohes, nin iꞌ ajcaw te jalajt yi tnum Jerusalén.
13 Ma yi sawan yi na xmayinin tjocoꞌj yi na biꞌaj Hinom, eꞌ Hanún scyuchꞌ yi eꞌ wunak yi najlcheꞌ Zanoa bnon tetz. Oc yi puert cyaꞌn tu yi eꞌchk quiwel wutz coc tan qui jakxeꞌn. Nchaꞌtz bnix cyaj cient tu niꞌcy metr tapij cyaꞌn. Choꞌn eꞌ xeꞌteꞌnin te yi sawan yi na xmayinin tjocoꞌj, jalen te yi junt sawan kale na eleꞌt tzꞌis.
14 Yi sawanaꞌtz kale na eleꞌt tzꞌis Malquías bnon tetz. Yi Malquías iꞌ cyꞌajl Recab. Nchaꞌtz iꞌ yi ajcaw tibaj Bet-haquerem. Iꞌ ocsan yi puert tu yi eꞌchk quiwel wutz coc tan qui toqueꞌn jakx.
15 Ma yi sawan kale na itzꞌeꞌt tal neꞌẍ aꞌ, Salum bnon tetz. Yi Salumaꞌtz iꞌ cyꞌajl Colhoze, nin iꞌ ajcaw tibaj yi tnum Mizpa. Iꞌ ocsan yi puert, nin iꞌ jeꞌsan yi mujil tu eꞌchk quiwel yi na oc wutz coc tan qui toqueꞌn jakx. Nchaꞌtz oc iꞌ tan banleꞌn yi tapijil yi pilaꞌ yi na biꞌaj Siloé, yi at xlaj yi cojbil yi at swutz yi caꞌl yi rey, jalen kale atit yi yotx yi at tan kacweꞌn poneꞌn le tnumbeꞌn kꞌajtzun Luwiy.
16 Ma yi junt piẍ yi xom tzaj Nehemías, yi cyꞌajl Azbuc bnon tetz. Choꞌn xeꞌteꞌnin swutz yi chinich kꞌajtzun Luwiy, jalen kale atit yi pilaꞌ nin jalen kale atit chicaꞌl yi eꞌ sanlar. Yi Nehemías iꞌ ajcaw tibaj jalaj yi tnum Bet-sur.
17 Ma yi junt piẍ yi xom tzaj, eꞌ xonl Leví bnon tetz. Bajx xeꞌteꞌn Rehum, yi cyꞌajl Bani tan banleꞌn jun piẍ. Kalenaꞌtz xeꞌteꞌn Hasabías, yi ajcaw tibaj yi jalaj amaꞌl yi na biꞌaj Keila tan banleꞌn junt piẍ. Nin ja bnix tan iꞌ tan chibiꞌ cyakil wunak yi ateꞌ jakꞌ caꞌwl.
18 Ej, nin kalenaꞌtz cyoqueꞌnt yi eꞌ mas xonl Hasabías tan banleꞌn jujunt piẍ cyetz. Oc Bavai yi cyꞌajl Henadad tan banleꞌn jun piẍ. Yi Bavai, iꞌ ajcaw te yi jalajt amaꞌl Keila.
19 Kalenaꞌs tzun toqueꞌn cyen Ezer yi cyꞌajl Josué te junt piẍ tetz. Choꞌn xeꞌteꞌnin iꞌ swutz yi jeꞌnak kale colijcheꞌt cyakil yi maꞌcl tetz oyintziꞌ. Nchaꞌtz iꞌ yi ajcaw cwent Mizpa.
20 Kalenaꞌs tzun toqueꞌn cyen Baruc, yi cyꞌajl Zabai tan banleꞌn jun piẍ tetz. Choꞌn xeꞌteꞌnin iꞌ le xtxꞌuꞌc yi tapij, jalen stziꞌ yi puert kale atit yi caꞌl Eliasib yi wiꞌtz paleꞌ.
21 Ej, nin xom cyen Meremot tan banleꞌn junt piẍ. Yi Meremotaꞌtz iꞌ cyꞌajl Urías, nin iꞌ mamaj taꞌ Cos. Choꞌn xeꞌteꞌnin iꞌ tan akꞌun swutz yi caꞌl Eliasib jalen kale na tzajpont yi mojom iꞌ.
22 Ma yi junt piẍ yi xom tzaj, eꞌ cuꞌn yi eꞌ paleꞌ yi najlcheꞌ ẍkꞌajlaj Jordán, bnon tetz.
23 Kalenaꞌs tzun cyoqueꞌn cyen Benjamín tu Hasub tan banleꞌn junt piẍ yi at swutz chicaꞌl. Nchaꞌtz Azarías, yi cyꞌajl Maasías yi mamaj Ananías, oc iꞌ tan banleꞌn yi junt piẍ yi at swutz tetz caꞌl.
24 Kalenaꞌs tzun oc Binuy yi cyꞌajl Henadad tan banleꞌn jun piẍ tetz. Choꞌn xeꞌteꞌnin iꞌ te caꞌl Azarías, jalen kale atit yi xtxꞌuꞌc yi tapij.
25 Te yi xtxꞌuꞌcaꞌtz choꞌn xeꞌteꞌnin Palal yi cyꞌajl Uzai tan banleꞌn junt piẍ. Nchaꞌtz bnix yi torre taꞌn yi at tibaj caꞌl rey, yi choꞌn at wutzkꞌanil kale atit yi caꞌl yi eꞌ sanlar yi eꞌ qꞌuicyꞌlom tetz rey.
Kalenaꞌtz toqueꞌn cyen Pedaías, yi cyꞌajl Faros tan banleꞌn junt piẍ, 26 scyuchꞌ yi eꞌ akꞌunwil yi na chakꞌuj le templo yi najlcheꞌ le amaꞌl Ofel. Choꞌn eꞌ xeꞌteꞌnin tan jeꞌseꞌn tapij te yi sawan tetz Aꞌ. Nintzun eꞌ ajt leꞌlnak. Nchaꞌtz bnix yi torre cyaꞌn yi elnak tzaj muꞌẍ tib tapij.
27 Kalenaꞌs tzun cyoqueꞌn yi eꞌ paleꞌ yi najlcheꞌ Tecoa tan banleꞌn junt piẍ. Choꞌn eꞌ xeꞌteꞌnin te yi jun torre yi mas nim wutz tkan, jalen te yi junt torre yi na biꞌaj Ofel. 28 Chijunaleꞌn yi eꞌ paleꞌ, eꞌ oc tan nucꞌleꞌn yi tapij swutzak chicaꞌl. Choꞌn tzun xeꞌteꞌnin yi cyetz tzi yi sawan kale na cheꞌleꞌt yi chej.
29 Kalenaꞌs tzun toqueꞌn Sadoc, yi cyꞌajl Imer tan banleꞌn junt piẍ tapij yi at swutz yi tetz caꞌl. Nchaꞌtz ban Semaías yi cyꞌajl Secanías. Yi Secaníasaꞌtz iꞌ qꞌuicyꞌlom tetz yi sawan yi na xmayinin teleꞌn tziꞌn.
30 Ma yi junt piẍ, eꞌ Ananías, yi cyꞌajl Selemías tu Hanún yi wukakiꞌn cyꞌajl Salaf, bnon tetz.
Ma yi junt piẍ yi xom tzaj, Mesulam yi cyꞌajl Berequías bnol tetz. Yi jun piẍaꞌtz yi bnix tan iꞌ iꞌtz yi at swutz yi caꞌl.
31 Ma yi junt piẍ yi xom tzaj, Malquías yi txakꞌol sakal bnon tetz, jalen kale atit chicaꞌl yi eꞌ yi na chakꞌuj le templo, nin kale atit chicaꞌl yi eꞌ aj negos swutz yi puert tetz pujbil xtisyaꞌ, nin jalen le xtxꞌuꞌc kale atit yi garit.
32 Ej, nin kale atit yi jun garitaꞌtz, jalen kale atit yi sawan cyetz cneruꞌ, eꞌ txakꞌol sakal scyuchꞌ eꞌ aj negos bnol tetz.