Yi cyoqueꞌn yi eꞌ contr tan makleꞌn kloꞌ wutz yi akꞌun
4
1 Itzun bantz yi tbital Sanbalat yi na katzan tan banleꞌn yi tapij solteꞌj yi tnum, nintzun saj colpuj wiꞌ-tz, nin chiꞌch cꞌuꞌl iꞌ skeꞌj, nin nchaꞌtz oc iꞌ tan xcyꞌakliꞌn skeꞌj yi oꞌ judiy. 2 Beneꞌn tzun tlol iꞌ scyetz yi eꞌ mas tanum scyuchꞌ yi eꞌ sanlar cwent Samaria. Itzun taltz: “¿Mbi na chiban yi eꞌ tal yab judiy tzoneꞌj yi jaltnin tan chiquimeꞌn tan weꞌj? ¿Cheꞌch ptzun cyetz ko stzꞌakꞌlok junt tir amaꞌl scyetz tan pateꞌn chitxꞌixwatz swutz chiRyosil? ¿Cheꞌch ptzun cyetz ko jun ntziꞌ kꞌej chixcyeweꞌt tan banleꞌn yi tapijeꞌj? ¿Cheꞌch ptzun cyetz yi ko sjalok balajil yi nicyꞌ cꞌubeꞌj yi tzꞌeꞌnakt xoꞌl tzaꞌj?” stzun iꞌ bantz.3 Nchaꞌtz at Tobías yi aj Amón xlaj Sanbalat, itzun taltz tan ẍchiꞌchbeꞌn cꞌuꞌl: “Chixmayninuꞌ yi tal cyakꞌun yi na chitzan tan banleꞌn. Copon wocꞌ yi nink xon jun yac tibaj,” stzun iꞌ bantz.
Yi toqueꞌn Nehemías tan nachleꞌn Kataj tan jakleꞌn ẍchꞌeybil cyetz
4 Yi wital yi xtxolbilaꞌtz, woqueꞌn tzuntz tan nachleꞌn Kataj. Itzun waltz: “Taꞌ, yi iluꞌ kaRyosil, tbiteꞌuꞌ cyakil yi xcyꞌakliꞌn yi na chiban yi eꞌ wunakeꞌj skeꞌj. Cyakil yi eꞌchk takleꞌn yi na cyal sketz, choꞌnk bajij scyeꞌj. Nink chiloꞌon cyetz cyakꞌun chicontr. Nink chiben pres jakꞌ caꞌwl junt nación. 5 Quiꞌk scuyuꞌ chipaj. Quiꞌk tzꞌel kꞌajabuꞌ scyeꞌj. Na na chitzan tan xcyꞌakliꞌn skeꞌj yi na katzan tan banleꞌn yi tapij solteꞌj yi tnum,” chinch tzun bantz yi woqueꞌn tan nachleꞌn Kataj.
6 Ma yi oꞌ ketz, quinin oꞌ taneꞌ tan banleꞌn yi tapij, na nsken wiꞌt nicyꞌan kaꞌn. Nin cyakil yi eꞌ yi na chakꞌuj, tetz cuꞌn cyalmaꞌ na chitzan tan akꞌun.
7 Ma yi quibital Sanbalat tu Tobías, scyuchꞌ yi eꞌ aj Arabia, scyuchꞌ yi aj Amón, nin scyuchꞌ yi eꞌ aj Asdod yi tzan bnixeꞌn yi tapij solteꞌj yi tnum Jerusalén, nintzun chiꞌch chicꞌuꞌltz skeꞌj, na sken wiꞌt kaxcyeꞌ tan jeꞌseꞌn junt tir yi eꞌchk piẍaꞌl yi cuꞌnak wocꞌ. 8 Nin jeꞌ chimolol quibtz tan xtxumleꞌn yi ẍeꞌn chiban tan xiteꞌn yi akꞌun yi nsken wit bnix kaꞌn.
9 Nintzun oꞌ oc ketz tan jakleꞌn ẍchꞌeybil ketz tetz Kataj Ryos, nin skꞌejl tu lakꞌbal eꞌ cuꞌ qꞌuicyꞌlom kaꞌn tan kacolol kib ẍchikꞌab.
10 Ma yi eꞌ xonl Judá, nin chicabej chicꞌuꞌl te yi akꞌun, na at eꞌ yi cyal: “¿Ẍeꞌn kaban? na yi eꞌ akꞌunwil ja chikꞌeꞌxij tan telseꞌn yi eꞌchk cꞌub yi tzꞌeꞌnak. Nin at tzajnin tan chixcyeweꞌn teꞌj. Nchaꞌtz oꞌ ketz quil kaxcyeꞌ tan banleꞌn yi tapij,” cheꞌch bantz.
11 Ma yi eꞌ kacontr nin cyal: “Kocopon ẍchixoꞌl yi eꞌ xonl Israel, nin qui tzꞌicyꞌ scyetz yil kocopon. Na kocopon ẍchixoꞌl tan chibiyleꞌn cuꞌn, nin tan xiteꞌn yi cyakꞌun yi na chitzan tan banleꞌn,” cheꞌch.
12 Poro yi eꞌ katanum yi najlcheꞌ nakaꞌjil yi eꞌ kacontraꞌtz, yi quibital nintzun eꞌ ul tan talcheꞌn sketz. Alaꞌ tir eꞌ ulak tan talcheꞌn yi at cyulbil yi eꞌ kacontraꞌtz tan kabiyleꞌn. Yil chuꞌl tan chibiyleꞌnuꞌ, sbajk chisutal yi tnum, cheꞌch bantz sketz.
13 Walol tzuntz scyetz cyakil yi eꞌ intanum tan chibnol list quib tan oyintziꞌ. Chimolol tzun quibtz tuml chinajal. Nintzun incawunin tan chibeneꞌn cobox tcꞌuꞌloꞌc tzaj yi tapij. Nin coboxt kale cuꞌnakit woꞌc. Nin coboxt kale atit eꞌchk jocoꞌjil yi tapij. Cyꞌaꞌn len yi eꞌchk maꞌcl tetz oyintziꞌ cyaꞌn, chi taneꞌn spar, tu lans, tu cꞌoxbil flech. 14 Yi wilol yi tircuꞌn na chixob len yi eꞌ ajcaw, scyuchꞌ yi eꞌ gobernador, scyuchꞌ cyakil yi eꞌ mas intanum, nintzun ben walol scyetz: “Quil chixobuꞌ scyetz yi eꞌ kacontr. Ulk txꞌakx ẍchicꞌuꞌluꞌ, yi ketz Kataj chin cham nin iꞌ, nin chin xoꞌwbil nin iꞌ. Quiwit bin tan oyintziꞌ tan chicolcheꞌn yi eꞌ mas katanum, scyuchꞌ yi eꞌ kanitxaꞌ, scyuchꞌ yi eꞌ kanajal nin tan colcheꞌn cyakil yi kameꞌbiꞌl,” chinch ban nintz scyetz.
15 Ma yi quibital yi eꞌ kacontr yi list atoꞌt ketz tan oyintziꞌ, nin yi teleꞌn chitxum tetz yi nsken xcyeꞌ Ryos tan xiteꞌn yi chitxumuꞌn, quiꞌt tzun eꞌ sajtz tan oyintziꞌ. Ma oꞌ ketz, oꞌ xeꞌtij junt tir tan akꞌun te yi tapij.
16 Ej, nin iteꞌn nin te kꞌejaꞌtz, cweꞌn kajatxol kib tan akꞌun. Cob oꞌ eltz. At eꞌ, eꞌ oc tan akꞌun, nin at eꞌ, eꞌ oc tan kaqꞌuicyꞌleꞌn tan paj yi eꞌ kacontr. Yi eꞌ, yi eꞌ oc tan kaqꞌuicyꞌleꞌn cyꞌaꞌn eꞌchk lans cyaꞌn, tu eꞌchk makbil flech. Nchaꞌtz cyꞌaꞌn cꞌoxbil flech cyaꞌn tu colol wutz chicꞌuꞌl yi chꞌichꞌ cuꞌn. Ej, nin cyakil yi cyajcawil yi eꞌ aj Judá, ateꞌ-tz wutz chicoc tan chiquiwseꞌn. 17 Nchaꞌtz cyakil yi eꞌ yi na chakꞌuj te yi tapij, chi quitaneꞌn yi eꞌ yi na chitzan tan tekeꞌn yi eꞌchk cꞌub, jalaj chikꞌab tan ticyꞌleꞌn nin yi chimaꞌcl tetz oyintziꞌ, nin jalajt tan akꞌun. 18 Nchaꞌtz quitaneꞌn yi eꞌ yi na chitzan tan banleꞌn yi tapij, at len chispar xeꞌak chicꞌuꞌl yi na chakꞌuj. Nchaꞌtz choꞌn at yi yaj yi na ocsan yi chun tzinxlaj. 19 Na nsken wal yi xtxolbileꞌj scyetz yi eꞌ ajcaw, scyuchꞌ yi eꞌ gobernador, nin scyetz cyakil yi eꞌ mas katanum. “Tircuꞌn oꞌ joylaj len skaxoꞌl te yi na katzan tan akꞌun, na nim tkan yi tapij yi na katzan tan banleꞌn. 20 Chaꞌstzun te, yil quibituꞌ yil ẍchꞌin yi chun, quiꞌc na ban alchok ateꞌtuꞌ, lajkeꞌl chuꞌluꞌ tan kuchꞌeyeꞌn tan oyintziꞌ. Nin Kataj Ryos tzꞌocopon tan kuchꞌeyeꞌn,” chinch bantz scyetz.
21 Yaꞌstzun kulejtz tan banleꞌn yi tapij. Ja koꞌc tan akꞌun jetz yi na jeꞌul yi kꞌej, jalen yi na cuꞌ kꞌej. Nchaꞌtz nchiban yi eꞌ yi na chitzan tan kaqꞌuicyꞌleꞌn, cyꞌaꞌn cyen tuꞌ chimaꞌcl tetz oyintziꞌ cyaꞌn cyakil kꞌej.
22 Nchaꞌtz wal scyetz cyakil yi eꞌ intanum, scyuchꞌ yi eꞌ yi na chitzan tan kuchꞌeyeꞌn te yi akꞌun, yi tajweꞌn tan kacyajeꞌn cyen le tnum Jerusalén cyakil lakꞌbal. Nin bixeꞌ yi jun puntilaꞌtz waꞌn tan chixconeꞌn tetz qꞌuicyꞌlom lakꞌbal. Ma chajkꞌej, ja chakꞌuj te yi tapij.
23 Nchaꞌtz te yi cobox kꞌejaꞌtz, quinin el beꞌch ketz kaꞌn. Mpe ink, nka jun inxonl, mpe junk kamos nka jun yi na tzan tan kaqꞌuicyꞌleꞌn. Cyaꞌl nin jun yi nink el beꞌch tetz tan watl. Ej, nin yi nkaben tan ticyꞌleꞌn kucꞌaꞌ, cyꞌaꞌn len kamaꞌcl kaꞌn tetz oyintziꞌ.