Yi jaleꞌn wakꞌ ib ẍchixoꞌl teꞌn yi eꞌ xonl Israel
5
1 Itzun bantz nintzun eꞌ mol quib cyakil yi eꞌ xonl Israel scyuchꞌ quixkel tan jun txumuꞌn scyeꞌj coboxt katanum yi at chimeꞌbiꞌl. 2 Nin at eꞌ cyaltz: “Yi oꞌ ketz wiꞌnin kanitxaꞌ, nin quiꞌc kawaꞌ. Chaꞌstzun te ja katxꞌix wiꞌnin ixiꞌn triw scyetz tan qui kaquimeꞌn tan weꞌj.” 3 Nin nchaꞌtz at eꞌ cyaltz: “Tan paj yi quiꞌc kawaꞌ ja kakꞌ yi katxꞌotxꞌ scyetz eꞌ ricaꞌtz tetz prentil kawaꞌ, nin ja kakꞌ scyetz eꞌchk kaꞌamaꞌl kale awijeꞌt loꞌbaj uva kaꞌn. Nchaꞌtz ja kakꞌ yi kacaꞌl scyetz tetz prentil kacꞌmoꞌn.” 4 Nchaꞌtz at eꞌ cyaltz: “Ja el tzaj kacꞌmoꞌn tan ẍchojleꞌn yi alcawal yi na cꞌuch yi rey. Nin ja kakꞌ yi katxꞌotxꞌ tu yi kujul scyetz tetz prentil yi kacꞌmoꞌnaꞌtz.”5 Ej, nin cyaltz: “Mbi tzuntz yi buchij choꞌ cyakꞌun yi eꞌ mas katanum yi at chimeꞌbiꞌl, na katanum kib. Ej nin quiꞌc jatxbil chixoꞌl yi eꞌ kanitxaꞌ tu yi cyetz. Poro yi eꞌ ketz kanitxaꞌ ja wiꞌt cheꞌ kacꞌay tan cyoqueꞌn tetz chiꞌesclaw. Nin quiꞌt na jal kawalor tan chicolpeneꞌl tzaj, na quiꞌct katxꞌotxꞌ nin quiꞌct kujul, na benak tetz prentil yi katxꞌokꞌbeꞌn,” cheꞌch tzun bantz.
6 Yi wital yi eꞌchk xtxolbilaꞌtz, nintzun nnoꞌctz tan xtxumleꞌn, nin saj jun chin chiꞌch cꞌuꞌlal swetz tan paj. 7 Yi wiꞌt intxumul yi chin ploj nin yi jun ajtzaꞌklaꞌtz, nintzun saj colp inwiꞌ scyeꞌj yi eꞌ ajcaw scyuchꞌ yi eꞌ gobernador. Na mbi xac na chitzan tan jakleꞌn taꞌal chipuꞌk scyetz katanum. Cheꞌ inmolol tzun cyakil yi eꞌ xonl Israel tan xtxumleꞌn yi ẍeꞌn sban yi jun xtxolbilaꞌtz.
8 Yi chimolol quib chicyakil, nintzun waltz scyetz: “Yi oꞌ ketz ja kajoy puntil tan chicolpeꞌn yi eꞌ katanum yi benakeꞌ cꞌaꞌy jakꞌ chicaꞌwl yi eꞌ mas tnum yi qui na cyek ẍchiꞌ Ryos. Ma yi eꞌ cyeruꞌ na chitzanuꞌ tan chicꞌayeꞌn nin junt tir. ¿I peꞌ cyajbiluꞌ tan koqueꞌn tan chicolpeꞌn junt tir?” chinch tzun bantz scyetz. Quiꞌct nin tzun jun yol cyaltz na quiꞌt jal chiwalor tan yol.
9 Nchaꞌtz wal scyetz: “Qui na yub yi xtxolbil yi na chitzanuꞌ tan banleꞌn. Tajweꞌn cyekuꞌ ẍchiꞌ Kataj Ryos, tan qui cyoqueꞌn yi eꞌ yi quiꞌc na cyocsaj, tan kayolcheꞌn. 10 Chaꞌstzun te yi oꞌ ketz scyuchꞌ yi eꞌ inxonl, scyuchꞌ yi eꞌ yi na chakꞌuj swuchꞌ, ja kakꞌ chicꞌmoꞌn, tu ixiꞌn triw tetz chiwaꞌ yi eꞌ katanum. Poro ja wiꞌt katxum yi skacuyeꞌ chipaj te yi chitxꞌokꞌbeꞌnaꞌtz yi at sketz. 11 Ma jaluꞌ, copon inwutz scyeruꞌ tan chicuyuluꞌ chipaj yi eꞌ katanum yi at chitxꞌokꞌbeꞌn scyeruꞌ. Cyakꞌeꞌuꞌ junt tir yi chitxꞌotxꞌ tu yi cyujul, tu chicaꞌl yi at cyen tetz prentil chitxꞌokꞌbeꞌn,” chinch bantz scyetz. 12 “Baꞌn atit, skabneꞌ chi yi ntaluꞌ sketz. Quiꞌt kacꞌuch yi chitxꞌokꞌbeꞌn,” cheꞌch tzun bantz.
Cheꞌ inchakol tzun yi eꞌ paleꞌ. Nin waltz scyetz yi eꞌ akꞌol cꞌmoꞌn yi ateꞌ-tz yi tajweꞌn tan chisukil chiyol ẍchiwutz cuꞌn yi eꞌ paleꞌaꞌtz.
13 Nchaꞌtz je injaꞌbul yi beꞌch wetz ẍchiwutz tircuꞌn. Nin waltz scyetz: “Choꞌn cuꞌn sbneꞌ Ryos tan chilajeꞌn lenuꞌ xeꞌak chicaꞌluꞌ tuml cyakil yi at scyuchꞌuꞌ ko quil cheꞌl cuꞌnuꞌ te chiyoluꞌ yi ja chisukuꞌ tetz,” chinch tzun bantz scyetz. “Amén, yaꞌstzunk sbneꞌ,” cheꞌch.
Tircuꞌn tzun eꞌ cyakꞌ kꞌej Kataj. Nin eꞌ el cuꞌn teꞌj quib yi chiyol yi eꞌ suk.
14 Ej, itzun bantz te yi coblaj yobaꞌtz yi nchinxcon wetz tetz gobernador cwent Judá, quinin minxconsaj yi eꞌchk takleꞌn yi at derech jun gobernador teꞌj. Na ja chimbixeꞌ tan Artajerjes yi rey, te yi at tzaj iꞌ tul junakiꞌn yob tan cawuꞌn. Nin ja cyaj cyen wilol yi akꞌun te yi na xon tzaj iꞌ tul junak coblajix yob tan cawuꞌn. 15 Ma yi eꞌ mas gobernador yi icyꞌnakeꞌ cyen, nkꞌeraꞌtz nchiban cyetz, na ja choꞌc tan chixileꞌn yi eꞌ kawunakil. Na ntin tan jaleꞌn chiwaꞌ tu chiwin, ja chijak caꞌwunak piẍ sakal tul jujun kꞌej. Nchaꞌtz yi eꞌ mas yi ja chakꞌuj jakꞌ chiwiꞌ, ja baj chibuchul yi eꞌ wunak. Ma yi in wetz, nkꞌeraꞌtz mban intxumuꞌn, na na wek ẍchiꞌ Ryos. 16 Ej nin nchaꞌtz ja bnix jun piẍ wetz waꞌn te yi tapij. Nin ja nakꞌuj scyuchꞌ cyakil yi eꞌ inmos yi na chakꞌuj swuchꞌ.
Ej, nin nchaꞌtz quinin nnoꞌc tan joyleꞌn puntil tan incambal muꞌẍ intxꞌotxꞌ. 17 Ma na, ja cheꞌ incꞌaꞌchaj mas xkancaꞌp cient wunak cyakil kꞌej. Ẍchixoꞌl yi eꞌ wunakaꞌtz, at cobox bajxom. Apart yi eꞌ yi nchisaj tul junt nación tan kaxajseꞌn. 18 Nin in txiclchin swutz yi gast. Na jun kꞌej nintuꞌ, ja quim jun mam woys waꞌn, tu kak balaj cneꞌr, tu eꞌchk balaj qꞌuitx. Nin yi na jepon lajuj kꞌej, ja wakꞌ wiꞌnin win scyetz. Quinin minxconsaj yi chipuꞌk katanum tan ẍchojleꞌn cyakil yi eꞌchk gastaꞌtz, na ja wil yi quiꞌc ateꞌ cuꞌnt.
19 “Ma jaluꞌ bin Taꞌ, yi iluꞌ inRyosil, nink nuꞌl txꞌakx tcꞌuꞌluꞌ. Nink nuꞌl txꞌakx tcꞌuꞌluꞌ tan yi baꞌn yi mimban scyeꞌj intanum,” chinch tetz Kataj.