Yi toqueꞌn xoꞌwseꞌn Nehemías
6
1 Bnixeꞌn tzun yi tapij. Quiꞌc muꞌẍ amaꞌl cyaj cyen yi quiꞌck tapij teꞌj. Ntin cuꞌn eꞌchk sawan ntaxk oc puertil.Itzun bantz yi quibital Sanbalat tu Tobías nin Gesem yi aj Arabia, scyuchꞌ yi eꞌ mas kacontr yi nsken wiꞌt bnix yi tapij, 2 nintzun ul mantartz cyaꞌn sweꞌj. I kloꞌ cyajbil yi choꞌnk woponeꞌn scyeꞌj tul jun aldey cwent yi tjocoꞌj yi na biꞌaj Ono. Poro nintzun el intxum te yi chitxumuꞌn yi iꞌtz tan insubleꞌn tuꞌ.
3 Beneꞌn tzun mantartz waꞌn tan talcheꞌn scyetz yi quiꞌc tamaꞌlil swetz, na na katzan tan banleꞌn jun balaj akꞌun. Nin yi kol chimben scyeꞌj stanek yi akꞌunaꞌtz. 4 Cyaj tir ul mantar sweꞌj. Nin iteꞌn nin xtxolbilaꞌtz na cyal. Nchaꞌtz in, iteꞌn nin xtxolbilaꞌtz na walnin scyetz.
5 Tuleꞌn tzun jun ẍchakum Sanbalat sweꞌj. Cyꞌaꞌn cart taꞌn yi jakij. Nin iteꞌn nin xtxolbilaꞌtz na tal tul. Yaꞌstzun oꞌiꞌn tir mantar cyaꞌn sweꞌj.
6 Ej, nin je na tal yi uꞌjeꞌj: “Nehemías, at yol na tzan ẍchixoꞌl wunak. Nin iteꞌn nin yol na tzan Gesem tan talcheꞌn. Nin yi yol iꞌtz: Yi aẍatz, scyuchꞌ yi eꞌ xonl Israel, na cxtzanwok tan xtxumleꞌn tan iteleꞌn tzaj jakꞌ caꞌwl yi rey. Nin yaꞌstzun xac yi na cxtzanwok tan banleꞌn yi tapij. Nchaꞌtz na aꞌlchij yi aẍaꞌtz, cẍocopon cyen tetz rey. 7 Nchaꞌtz ja kubit yi ja wiꞌt chibixeꞌ cobox elsanl stziꞌ Ryos awaꞌn tan tocseꞌn chicꞌuꞌl wunak. Nin scyaleꞌ scyetz cyakil wunak: ‘Ma jaluꞌ ja jal ketz kareyil yi oꞌ aj Judá,’ cheꞌch sbneꞌ. Tzꞌelpon akꞌej yi kol tzꞌopon yi xtxolbileꞌj twiꞌ Artajerjes yi rey. Chaꞌstzun te, mas balaj yil kajilon ketz tzawuchꞌ tan xtxꞌajleꞌn teꞌj, tan qui toponeꞌn twiꞌ rey,” chij Sanbalat tul yi uꞌj.
8 Beneꞌn tzun intzꞌibal yi xtxolbileꞌj tetz Sanbalat. “Yi xtxolbilaꞌtz yi na tzanuꞌ tan talcheꞌn, quiꞌc muꞌẍ xeꞌ, nin iluꞌ tuꞌ txumul tetz,” chinch ban nintz.
9 Ja lajluchax tzinwutz yi ja xcon yi jun xtxolbilaꞌtz cyakꞌun ntin tan kaxoꞌwseꞌn. Na i taneꞌn ẍchiwutz cyetz, yil kubit, kelepon xit, nin quiꞌt koꞌc il te yi akꞌun. Poro yi in wetz mas tcunin woqueꞌn il tan xtxumleꞌn yi akꞌun ẍeꞌnk tan bnixeꞌn chan.
10 Imbeneꞌn tzuntz tan xoꞌn te Semaías yi cyꞌajl Delaía, yi mamaj Mehetabel, yi junawes jopoꞌn tib iꞌ xe yi tetz caꞌl. Yi woponeꞌn nintzun tal iꞌ swetz:
—Baꞌn loꞌ chinch wetz yi nink kamol kib xe caꞌl Kataj nin kalameꞌl tzaj yi eꞌchk puert, na te yi akꞌbaleꞌj at cyulbil biyol ketz, stzun iꞌ bantz swetz.
11 —Yi eꞌ yaj chi wutaneꞌn wetz qui na chixob cyeraꞌtz, nin qui na cyew quib. Nin qui na chiben le caꞌl Kataj ntin tan ew ib. Chaꞌstzun te quil chimben wetz tan ew ib, chinch bantz tetz.
12 Nchaꞌtz el intxum tetz yi nkꞌeꞌtz Ryos na akꞌon tzaj yi yol iꞌ. Ma na tan paj yi chojijt iꞌ cyakꞌun Sanbalat tu Tobías tan inxoꞌwseꞌn. 13 Chojij iꞌ tan inxoꞌwseꞌn, bantz injuchul wil. Na yi nink mimban chi yi tal iꞌ, ja kloꞌ el intxꞌix, nin ja kloꞌ el inkꞌej.
14 “I bin jaluꞌ Taꞌ, iluꞌ inRyosil, quiꞌk tzꞌel teꞌj cꞌuꞌluꞌ yi xtxolbil yi na chitzan Sanbalat tu Tobías tan banleꞌn sweꞌj. Nchaꞌtz quiꞌk tzꞌel te cꞌuꞌluꞌ yi eꞌchk takleꞌn cachiꞌ yi na ban yi xnaꞌn Noadías, na na tocsaj tib tetz elsanl stziꞌuꞌ. Ej, nin quiꞌk tzꞌel te cꞌuꞌluꞌ yi mbi na chiban yi eꞌ mas yi na cyocsaj quib tetz elsanl stziꞌuꞌ, na nchaꞌtz eꞌ na chitzan tan joyleꞌn puntil tan inxoꞌwseꞌn” chinch bantz tetz Kataj.
15 Ja tzun bnix yi tapij le junak oꞌ tajlal xaw Elul.a Nicyꞌ cient tu cob kꞌej ben tcyꞌal tan banleꞌn yi tapijaꞌtz skeꞌj. 16 Yi quibital yi eꞌ kacontr yi nsken wiꞌt bnix yi kakꞌun, nintzun eꞌ xobtz sketz. Nchaꞌtz eꞌ ban yi mas nación yi ateꞌ skanakaꞌjil. Quiꞌt tzun cyocsaj quib nim, na nin el chitxum tetz yi ja bnix yi akꞌun kaꞌn tan tuꞌ yi xomij yi porer Ryos tan kuchꞌeyeꞌn.
17 Te yi cobox kꞌejaꞌtz wiꞌnin cart ben swutz Tobías cyakꞌun yi eꞌ katanum yi lmak wunak, yi xomij chiwiꞌ teꞌj iꞌ. Nchaꞌtz wiꞌnin tuleꞌn uꞌj tan Tobías ẍchiwutz yi eꞌaꞌtz. 18 Na wiꞌnin intanum sken chisuk chiyol tan xomeꞌn chiwiꞌ te Tobías tan paj yi iꞌ yi jiꞌ Secanías, yi cyꞌajl Ara. Nin nchaꞌtz xom chiwiꞌ teꞌj tan paj yi Johanán, yi cyꞌajl iꞌ, nsken chumeꞌ tu yi meꞌl Mesulam yi cyꞌajl Berequías. 19 Chaꞌstzun te tzinwutz cuꞌn na cyakꞌ kꞌej iꞌ. Nin cyakil yi na wal na opon cyaꞌn twiꞌ Tobías. Nintzun na ult uꞌj tan Tobías tan inxoꞌwseꞌn.