Yi toqueꞌn Luwiy tan cyajleꞌn yi eꞌ tetz tanum
(1Cr 21:1-27)
24
1 At tzun jun tir yi ja chiꞌch cꞌuꞌl Ryos scyetz yi eꞌ xonl Israel. Ej nin xcon Luwiy taꞌn tan takꞌleꞌn chicaws. Talol tzun Ryos tetz Luwiy: “Baꞌn cẍoꞌc tan cyajleꞌn yi jatnaꞌ chixoneꞌn yi eꞌ aj Israel, scyuchꞌ yi eꞌ aj Judá, yi atanum,” stzun Ryos tetz. 2 Cawuneꞌn tzun Luwiy tetz Joab yi wiꞌtz ajcaw scyeꞌj yi eꞌ tetz sanlar:—Baꞌn cẍben tulak yi jujun kꞌuꞌj katanum yi ateꞌ jeꞌn tziꞌn le tnum Dan jalen cweꞌn tziꞌn le tnum Beerseba tan jeꞌseꞌn jun list yi jatnaꞌ chixoneꞌn yi eꞌ katanum.
3 Poro itzun taltz Joab tetz:
—Lok tzꞌoc Kataj Ryos tan pucꞌseꞌn tajlal yi eꞌ katanum. Lok jal cien tir mas chixoneꞌn swutz yi eꞌ yi ateꞌ jaluꞌ. Ej nin lok tiluꞌ yil chijepon te yi jun tajlalaꞌtz. Poro max cꞌuꞌluꞌ, iluꞌ in reyil, ¿mbi xac teruꞌ yi tzꞌel xtxumuꞌ tetz yi jatnaꞌ cyajlal yi katanum?
4 Por mbnix yi caꞌwl yi rey, nin qui nin xom wiꞌ iꞌ te yi cyajtzaꞌkl Joab scyuchꞌ yi eꞌ mas bajxom scyeꞌj eꞌ sanlar. Cyeleꞌn tzaj tzun Joab scyuchꞌ yi eꞌ mas bajxomaꞌtz swutz yi rey, nin eꞌ bentz tan jeꞌseꞌn jun tajlal xoneꞌn. 5 Quicyꞌeꞌn tzun yi aꞌ Jordán. Choꞌn tzun bnixeꞌn chicampament cyaꞌn nakajil yi tnum Roar, nin eꞌ xeꞌtij tan banleꞌn yi akꞌun tul yi tnum yi at nicyꞌal yi jocoꞌj yi choꞌn na opon kale atit eꞌchk tnum tetz Gad tu Jazer. 6 Nin eꞌ icyꞌtz jalen le tnum tetz Galaad tu Cades, cobox tnum cwent Israel yi choꞌn ateꞌ le chiꞌamaꞌl yi eꞌ hitita. Choꞌn tzun cyoponeꞌtz Dan, nin yi cyeleꞌntzaj Dan choꞌn tzun cyoponeꞌtz nakajil Sidón. 7 Ej, nin yi cyeleꞌntz, choꞌn tzun cyoponeꞌtz le tnum tetz Tiro. Ej nin mbnix yi sens cyaꞌn tulak eꞌchk tnum cwent eꞌ heveo tu yi eꞌ cananeo jalen yi cyoponeꞌn Beerseba, yi choꞌn at cweꞌn tziꞌn. Bnixeꞌn yi tajlal cyakꞌun te cyakil yi eꞌchk tnum cwent Israel. 8 Beluj xaw tu junak kꞌej eꞌ ban tan banleꞌn yi jun tajlal xoneꞌnaꞌtz. Kalenaꞌtz tzun eꞌ pakxeꞌntz jalen Jerusalén. 9 Tkꞌol tzun Joab yi tajlal tetz cyakil eꞌ wunak yi ateꞌ cwent Israel tetz Luwiy. Yi cyajlal eꞌ yaj yi list eꞌ tan oyintziꞌ iꞌtz waxak cient mil yi eꞌ aj Israel, nin oꞌ cient mil yi eꞌ aj Judá.
10 Poro tan yi xtxolbilaꞌtz, nin nachon Luwiy teꞌj yi oc iꞌ tan juchleꞌn til swutz Ryos, nintzun jakol iꞌ cuybil paj tetz. Itzun taltz:
—Max cꞌuꞌluꞌ taꞌ, na na chinachon teꞌj yi ja cuꞌ in nucꞌul jun chumam il swutzuꞌ, tan tuꞌ yi chꞌinchꞌuj mimban tan jeꞌseꞌn yi tajlalaꞌtz. I bin jaluꞌ Taꞌ, max cꞌuꞌluꞌ swiꞌbaj yi in wetz, yi in ẍchakumuꞌ. Nink cuyuꞌ impaj tan yi wajtzaꞌkl yi quiꞌc nin muꞌẍ xac mimban swutzuꞌ, chij Luwiy bantz.
11 Itzun le junt eklok, yi nsken cꞌas Luwiy, toqueꞌn tzun Ryos tan yol tu yi elsanl stziꞌ Ryos yi na biꞌaj Gad, itzun taltz tetz: 12 “Cun al tetz Luwiy yi na chintzan tan takꞌleꞌn amaꞌl tetz tan jeꞌn xtxaꞌol jun scyeri ox xtxolbil. Nin list wutaneꞌn tan banleꞌn taneꞌn yi jun yil jepon xtxaꞌol iꞌ.” 13 Beneꞌn tzun Gad tan yol tetz Luwiy, nin txol iꞌ yi mbi cuꞌn tal Ryos tetz, nin tzun jak iꞌ tetz Luwiy:
—Ibin, jaluꞌ Taꞌ Luwiy, jeꞌ yol Ryoseꞌj: ¿Mbi iꞌ ilaꞌtz yi awajbil, i peꞌ juk yob weꞌj yi cupon squibaj cyakil yi eꞌ atanum, nka ox xaw yil cxelepon ojk ẍchiwutz yi eꞌ icontr, nka ox kꞌej icaws tan jun jilwutz yaꞌbil yi chin xoꞌwbil nin?
14 —I bin jaluꞌ ja noꞌc wutz peꞌm tan Kataj Ryos. Poro le wutz wetz wajtzaꞌkl, mas balaj yi nink katij ox kꞌej kacawsaꞌtz tkꞌab iꞌ, na chumam nin yi banl talmaꞌ iꞌ skeꞌj, swutz yi choꞌnk kacuꞌ chikꞌab yi eꞌ wunak.
15 Sajeꞌn tzun ẍchakol Ryos jun chin yaꞌbil squibaj cyakil yi eꞌ xonl Israel. Xeꞌteꞌn nin ban te jun jalchanaꞌs jalen yi jeꞌn poneꞌn te ox kꞌej, yi bixbaꞌnt. Cyakil tzun yi eꞌ xonl Israel eꞌ loꞌontz, yi eꞌ yi najlcheꞌ Dan, jalen te yi tnum Beerseba. Yi tajlal yi eꞌ yi eꞌ quim tan jun chin yaꞌbilaꞌtz, iꞌtz oxcꞌal tu lajuj mil wunak. 16 Ej list taneꞌn yi ángel cwent Kataj tan chicawseꞌn yi eꞌ aj Jerusalén, yi sajeꞌn jun chin bis te talmaꞌ Kataj yi beneꞌn tilol yi caws yi na tzan yi ángel tan banleꞌn beneꞌn tziꞌn cwent Israel, nintzun cawuntz tetz: “Ja binaꞌs. Makaj awib te yi na cẍtzan tan banleꞌn.”
Choꞌn tzun at yi ángel nakajil yi er tetz yi yaj Arauna, yi jebuseo, yi na tzan yakꞌpeꞌn triw tan yi tetz wacẍ. 17 Itzun yi beneꞌn tilol Luwiy yi ángelaꞌtz, yi na tzan tan takꞌleꞌn chicaws wunak, nintzun taltz tetz Kataj:
—¡Max cꞌuꞌluꞌ Taꞌ, in yi aj paj! ¡In yi juchul il! Quiꞌc muꞌẍ tal quil yi eꞌ tal prow wunak, yi ja chisotz. Ink kloꞌ yi jun yi tajweꞌn tan cawseꞌn, scyuchꞌ yi eꞌ innajal.
18 Ej itzun te iteꞌn nin kꞌejaꞌs nintzun opon Gad tan yol tetz Luwiy itzun taltz tetz: “Tajweꞌn tan abeneꞌn kale atit yi er tetz Arauna, nin tajweꞌn tan jeꞌn abnol jun patbil txꞌixwatz swutz Kataj Ryos.” 19 Nintzun ban Luwiy quib yi ntal Gad tetz, chi cawunin Kataj Ryos tetz Gad. 20 Ma yi beneꞌn tilol Arauna, yi tzan chijeꞌn poneꞌn yi rey scyuchꞌ yi eꞌ ẍchakum teꞌj iꞌ, ja ben tan chicꞌulcheꞌn. Nin cuꞌ mejlok swutz yi rey. 21 Itzun taltz:
—Max cꞌuꞌluꞌ Taꞌ, in tuꞌ ẍchakumuꞌ ¿mbitzun mmuꞌluꞌ tan inxajseꞌn?
—Na kloꞌ waj tzinlokꞌ yi amaꞌl yi na xcon awaꞌn tan yakꞌpeꞌn triw, na na waj bnix jun patbil tan pateꞌn jun intxꞌixwatz swutz inRyosil tan cuꞌswutzil swutz iꞌ ko ptzunl taneꞌ yi yaꞌbil yi chin xoꞌwbil nin, yi na tzan tan kacawseꞌn.
22 —Cu bin, taꞌ. Baꞌn tetzajuꞌ yi amaꞌl yi na tajuꞌ tan patuluꞌ yi eꞌchk xtxꞌixwatzuꞌ. Ej nin nchaꞌtz baꞌn xcon yi cobox inwacẍeꞌj tetz xtxꞌixwatzuꞌ. Ej nin at eꞌchk yucuꞌ tu eꞌchk maꞌcl yi baꞌn xcon tanuꞌ tetz siꞌ. Baꞌn xcon cyakil tanuꞌ. 23 Na swoyeꞌ cyakil yi eꞌchk takleꞌneꞌj teruꞌ. Ej nin lok xcyeꞌuꞌ tan mayseꞌn cꞌuꞌl yi Ryosiluꞌ, stzun Arauna bantz.
24 —Ntyoẍ tzatz yaj, poro tajweꞌn cuꞌn tzinchojeꞌ jamel cyakil, na quil wakꞌ jun intxꞌixwatz tetz inRyosil yi oy tuꞌ, ma na tajweꞌn tzinchojeꞌ jatnaꞌ jamel, stzun Luwiy bantz.
Lokꞌol tzun Luwiy yi amaꞌl, tu eꞌchk mam tor tan nicyꞌ cient piẍ sakal. 25 Jeꞌn tzun bnol Luwiy jun patbil chitxꞌixwatz, nin octz tan pateꞌn cobox xtxꞌixwatz tibaj. Nchaꞌtz toy eꞌchk oy yi na ẍchaj yi ja wiꞌt jal yi tzatzin paz ẍchixoꞌl tu Kataj junt tir. Tbital tzun Kataj Ryos yi cuꞌswutzil nin octz tan makleꞌn chicaws wunak. Taneweꞌn tzun ban yi jun chin wutzileꞌn yablilaꞌtz, tul cyakil yi amaꞌl cwent Israel.