BAJX SAMUEL
Txꞌolbil Xoꞌl Yi Liwreꞌj
Tul yi liwr tetz Bajx Samuel na ẍchaj yi ẍeꞌn cuꞌn ban yi stzajeꞌn wiꞌ yi eꞌchk tiempaꞌtz yi nchicawun tzaj yi eꞌ pujul xtisyaꞌ cwent Israel. Nin na ẍchaj yi ẍeꞌn cuꞌn toqueꞌn yi bajx chireyil yi eꞌ aj Israel tan chicawuꞌn.
Ej nin tul yi liwreꞌj, skileꞌ yi mbi cuꞌn bajij scyeꞌj ox yaj yi na chibiꞌaj: Samuel, Saúl tu Luwiy.
Yi xeꞌ cyakil yi chusuꞌn yi na jal kaꞌn tul cyakil yi liwreꞌj iꞌtz: Yi ko at cꞌulutxumil jun tan banleꞌn taneꞌn yi caꞌwl Ryos sjalok yi banl Kataj tibaj. Ma na ko at jun yi na tzan tan pajleꞌn caꞌwl Ryos ilenin na ben tul il. Clar cunin na lajluchax tul cap. 2:30 kale jiloneꞌt Kataj Ryos tetz yi wiꞌtz paleꞌ Elí: “...ntin swakꞌeꞌ chikꞌej yi eꞌ yil cyakꞌ wetz inkꞌej tan chicꞌulutxumil. Ma yi eꞌ yi quil cyakꞌ inkꞌej, tzꞌelpon chitxꞌixl waꞌn”.
Ja bixeꞌ chireyil yi eꞌ aj Israel tan Ryos poro tan tuꞌ yi chꞌinchꞌuj nin eꞌ ban tan jakleꞌn tetz. Ja takꞌ Ryos chireyil poro nkꞌeꞌtz tajbil iꞌ. Na ntin iꞌ yi mero ajcaw squibaj, nin iꞌ yi mero ajcaw squibaj cyakil wunak yi ateꞌ wi munt (2:7-10).
Yi Weklil Yi Liwreꞌj
Yi bajx wekl (Cap. 1–7) na jilon te yi toqueꞌn cyen Samuel tetz pujul xtisyaꞌ.
Yi caꞌp wekl (Cap. 8–10) na jilon te yi toqueꞌn cyen Saúl tetz rey.
Yi toxeꞌn wekl (Cap. 11–15) na jilon te yi tiemp yi ncawun tzaj Saúl.
Yi cyajeꞌn wekl (Cap. 16–30) na jilon te yi toqueꞌn Saúl tan quimseꞌn kloꞌ David.
Yi toꞌeꞌn wekl (Cap. 31) na jilon te yi chiquimeꞌn Saúl tu yi eꞌ tetz cyꞌajl.