BAJX SAMUEL
Yi tkꞌol Kataj Ryos jun tal Ana
1
1 I tzun bantz tenẍchan le jun amaꞌl wiꞌwtz cwent Efraín yi na biꞌaj Ramá, at tzun jun yaj yi xonl kꞌajtzun Zuf najlijtz, yi na biꞌaj Elcana. Yi Elcanajaꞌtz iꞌ jun cyꞌajl Jeroham, nin yi Jeroham, Eliú biꞌ yi taj. Nin yi Eliújaꞌtz, Tohu tzun biꞌ yi tetz taj banak cyentz. Tircuꞌn yi eꞌaꞌtz eꞌ len cuꞌn xonl kꞌajtzun Efraín. 2 Yi Elcana cob txkel banak, Ana biꞌ jun, ma yi junt Penina biꞌ, nin yi Penina wiꞌnin tetz tal eꞌ jal, ma yi Ana quinin talaj jun tal. 3 Yi Elcana, cyakil nin yob na xaꞌktz tan cꞌuꞌlajeꞌn Kataj Jehová, yi cyaꞌl na xcyeꞌ quen teꞌj, nin tan pateꞌn xtxꞌixwatz swutz iꞌ jalen le tnum Silóa kale atit yi caꞌl Kataj. Nin choꞌn najlij Elí yi wiꞌtz paleꞌ tan banleꞌn yi munl xe caꞌl Kataj, tu cob cyꞌajl yi na chibiꞌaj Ofni tu Finees, na nchaꞌtz eꞌ, eꞌ len cuꞌn paleꞌ. 4 I tzun yi na opon tiempil tan tkꞌol Elcana yi xtxꞌixwatz tetz Kataj Ryos, nin tzun na takꞌ iꞌ muꞌẍ cyetz Penina te yi chiꞌbajaꞌtz tuml tircuꞌn yi eꞌ tal, 5 ma tetz junt txkel, yi Ana, na tzun takꞌ jun chumbalaj piẍ te yi oyaꞌtz tetz, na wiꞌnin na pekꞌ iꞌ teꞌj, wech na quiꞌc talbil iꞌ tan Kataj Ryos. 6 Nin tan yi xtxolbilaꞌtz nin tzun na oc Penina tan xuxeꞌn Ana nin tan xcyꞌaklil teꞌj, nin wiꞌnin na octz tan telseꞌn xtxꞌix na qui nin takꞌ Kataj Ryos amaꞌl tetz Ana tan jaleꞌn jun tal.
7 I tzun yi na jepon yi jujun yob, yi na ben Ana le caꞌl Kataj Ryos, ilen nin tzun na oc Penina tan xuxeꞌn iꞌ, nin tan xcyꞌaklil teꞌj, nin tan yi xtxolbilaꞌtz wiꞌnin tzun na okꞌtz tan yi bis yi at cuꞌnt, nin quiꞌt tzun na wantz tan paj. 8 Jakol tzun Elcana tetz Ana: “Ana ¿mbi na awokꞌlej? ¿Mbi tzuntz quiꞌt nin na cẍwan tan paj bis? ¿Nkꞌeꞌtz peꞌ baꞌnt cuꞌn in wetz swutz yi ateꞌk lajuj awal?” stzun Elcana bantz tetz Ana.
9 Ej i tzun ban jun tirtz, le tnum Siló, yi wiꞌt waneꞌn Ana nin tzun el tzajtz, nin bentz le caꞌl Kataj. Yi toponeꞌn Ana choꞌn tzun cꞌolchij Elí, yi wiꞌtz paleꞌ nakaꞌjeꞌl tzaj yi puert yi na kocpon cunin le caꞌl Kataj Ryos. 10 Wiꞌnin tzun tokꞌeꞌn Ana yi tocomponeꞌn, nin tan paj yi wiꞌnin sotz cꞌuꞌlal at cuꞌnt, nin tzun oc iꞌ-tz tan nachleꞌn Kataj. 11 I tzun taltz: “Kataj Ryos, iluꞌ yi Ryos yi cyaꞌl na xcyeꞌ quen teꞌj, nink nuꞌl txꞌakxuj tcꞌuꞌluꞌ, nink tzꞌel kꞌajabuꞌ sweꞌj, tkꞌab yi sotz cꞌuꞌlal yi atin cuꞌnt. Yi wajbil taꞌ, iꞌtz yi nink takꞌuꞌ jun tal wal, nin yil takꞌuꞌ yi jun tal walaꞌtz, jun cuꞌn yol swakꞌeꞌ teruꞌ tan xconeꞌn xe caꞌluꞌ tetz cyakil tiemp, nin quil tzꞌel cꞌapluꞌn yi xiꞌil wiꞌb bantz tuleꞌn txꞌakx tkacꞌuꞌl yi iꞌtz jun ẍchakumuꞌ,” stzun Ana bantz tul yi oración. 12 Ej nin tan paj yi nim nin jun chin tkuj ban Ana tan nachleꞌn Kataj, nintzun oc cwent Elí te yi stziꞌ Ana te yi na tzan tan nachleꞌn Kataj. 13 Poro yi Ana tcꞌuꞌl cuntuꞌ na tzan tan nachleꞌn Kataj. Nkꞌeꞌtz chin wiꞌ nin iꞌ ban. Nin tan paj yi numun cuntuꞌ nachol Ana Kataj, nintzun xtxum Elí yi kbarel loꞌ iꞌ. 14 Beneꞌn nintzun tlol Elí tetz:
—¿Ana, tonaꞌ nin lcyaj cyen yi xcꞌalaꞌiꞌn awaꞌn? ¡Cyajk cyen awaꞌn jalcuꞌneꞌj! stzun Elí bantz tetz.
15 —Taꞌ, chij Ana, nkꞌeꞌtz aꞌ at tinwiꞌ. Nkꞌeꞌtz ik jajk oc aꞌ tinwiꞌ, ma na at jun chin bis tetz walmaꞌ, chaꞌstzun te na chintzan tan xtxoleꞌn nin tetz Kataj. 16 Quil xtxumuꞌ yi ink jun yab xnaꞌn. Quiꞌ, yi in wetz nachleꞌn Kataj mimban na wiꞌnin na sotz incꞌuꞌl, nin wiꞌnin bis at swetz, stzun Ana bantz tetz Elí yi wiꞌtz paleꞌ.
17 Yi tbital Elí yi xtxolbilaꞌtz nintzun taltz:
—Tzatzin cuꞌn cẍben. Nink takꞌ Kataj tzatz tircuꞌn yi mmajak tetz, stzun Elí bantz tetz Ana.
18 —Tyoẍtuꞌ teruꞌ taꞌ, stzun Ana bantz.
Ej nintzun pakxij junt tir Ana le chiposar, nin octz tan waꞌaꞌn. Nin jetzaꞌtz quiꞌt bisun iꞌ junt tir.
19 Ej i tzun le junt eklok, chicꞌaseꞌntz chin bixeꞌ skil, ej, nin te yi nsken wiꞌt bnix yi chimunl swutz Kataj Ryos, nintzun eꞌ pakxijtz xe chicaꞌl le tnum Ramá. Nintzun eꞌ witbej quib Ana tu Elcana yi chmil. Nintzun ban Kataj taneꞌn yi xtxolbil yi el stziꞌ Ana tan jakleꞌn tetz, tan tkꞌol amaꞌl tan jaleꞌn jun tal iꞌ. 20 Ej chaꞌstzun te toqueꞌn cyen Ana tetz chꞌon wiꞌ, nin yi jeꞌn poneꞌn yi tiempil iꞌ, nin tzun ul yos tuchꞌ, nin oc tkꞌol biꞌ yi tal niꞌaꞌtz tetz Samuel,c na nin el stziꞌ tan jakleꞌn tetz Kataj Ryos.
21 Ej oponeꞌn nintzun ban tiemp tan beneꞌn Elcana tuml tircuꞌn yi eꞌ najal tu yi junt txkel le tnum Siló, tan teleꞌn cuꞌn iꞌ te yi yol yi sukiꞌnt taꞌn tetz Kataj Ryos, nin tan toyeꞌn yi xtxꞌixwatz yi na pat-xij cyakil yob. 22 Ma tetz Ana qui nin tzun ben xomoktz scyeꞌj, na nin tal iꞌ:
—Qui nin lchimben, ma na jalen yil tzꞌel tal wal te xtxuꞌtx. Ej kalenaꞌs tzun lbentz waꞌn tan tabnajeꞌn tkꞌab Kataj, nin taꞌsteꞌn nin lcyajeꞌt-tz waꞌn tan xconeꞌn xe caꞌl Kataj tetz cyakil tiemp, chij Ana tetz Elcana.
23 —Baꞌn tzaban yi xtxolbil yi mas na cẍpekꞌ teꞌj. Baꞌn ẍcyaj cyen jalen yil tzꞌel yi niꞌ te xtxuꞌtx. Baꞌn tzun cxeꞌl cuꞌn te yi xtxolbil yi masuk, stzun Elcana bantz tetz Ana.
Ej chaꞌstzun te cyajeꞌn cyen Ana, nin octz tan ẍchꞌuyseꞌn yi tal niꞌ jalen yi quiwixeꞌn nin yi teleꞌn te xtxuꞌtx. 24 Yi teleꞌn te xtxuꞌtx, tal juyeꞌt nintzun iꞌ yi beneꞌn ticyꞌleꞌn le caꞌl Kataj jalen le tnum Siló. Nintzun ben tcyꞌal Ana jun tor yi sken tzꞌak ox yob taꞌn. Nchaꞌtz ben tcyꞌal junak cob liwr triw, tu jun tzꞌuꞌm win tan toyeꞌn tetz Kataj. 25 Yi wiꞌt cyoyil yi tor tetz jun chitxꞌixwatz swutz Ryos cyaꞌn nintzun cyabnaj yi tal niꞌ Samuel tetz Elí. 26 I tzun tal Ana tetz Elí:
—Max cꞌuꞌluꞌ taꞌ, poro yi yol yi swaleꞌ teruꞌ, iꞌtz yi mero bintzij. Yi in wetz in yi jun xnaꞌn yi ulak oxix yob tan nachleꞌn Kataj Ryos tzoneꞌj, nin at ninuꞌ-tz nakaꞌj banak. 27 Yaꞌstzun injakol tetz Kataj tan tkꞌol jun tal waleꞌj swetz, nin jun cuꞌn ja takꞌ iꞌ swetz. 28 Nin ja insuk tetz Kataj yi tzinjatxeꞌ yi wal tkꞌab iꞌ tan xconeꞌn tetz iꞌ tzoneꞌj le caꞌl Kataj jalen yil quim, stzun Ana bantz tetz Elí.
Yi tbital Elí yi xtxolbilaꞌtz, nintzun cuꞌ mejloktz, jalen yi cweꞌn poneꞌn yi plaj wuxtxꞌotxꞌ tan takꞌleꞌn kꞌej Kataj Ryos.