Yi bitzineꞌn Ana tan yi tzatzin yi at cuꞌnt
2
1 Ej itzun bantz, nintzun oc Ana tan nachleꞌn Kataj, itzun taltz:“Kataj Jehová, tetz cuꞌn walmaꞌ na chintzatzin swutzuꞌ, na na takꞌuꞌ inwalor.
Nin yi jaluꞌ, quiꞌt na chintxꞌixwij, na baꞌn chinjilon scyuchꞌ yi eꞌ incontr.
¡Wiꞌnin na chintzatzin swutzuꞌ Taꞌ, na ja ocuꞌ tan wuchꞌeyeꞌn!a
2 ¡Kataj Jehová, quiꞌc nin junt choꞌnk chi iluꞌ,
na yi iluꞌ teruꞌ quiꞌc muꞌẍ tal paltiluꞌ!
Cyaꞌl nin junt yi nink xcyeꞌ tan kaqꞌuicyꞌleꞌn, ma na ntin iluꞌ.
¡Quil jal junt kaꞌn choꞌnk chi iluꞌ!
3 Ma jaluꞌ, cyaꞌl bin jun ltocsaj tib nim tu jilon,
cyaꞌl ltocsaj tib tzꞌaknak, na yi Kataj Ryos iꞌ yi Mero Ryos.
Na na til tircuꞌn eꞌchk takleꞌn yi na kaban.
Na yi iꞌ tetz na maꞌlan kajtzaꞌkl, nin na til yi kapaltil.
4 Xcyek iꞌ tan xiteꞌn cuꞌn yi chimaꞌcl yi eꞌ yi chin cham nin eꞌ taneꞌn.
Nin na takꞌ iꞌ chiwalor yi eꞌ tal prow yi quiꞌc chichamil.
5 Yi eꞌ yi wiꞌnin na sowrin chiwaꞌ sajleꞌn,
yi jaluꞌ txꞌixij tlen tuꞌ na cyulej jun tal piẍ waj.
Ma yi eꞌ yi jalt nin tan chiquimeꞌn tan weꞌj sajleꞌn,
yi jaluꞌ, quiꞌt na chiquim tan weꞌj.
Ej nin yi xnaꞌn yi quiꞌc cuj tan talal jun tal sajleꞌn,
yi jaluꞌ, ja cheꞌ talaj juk tal.
Ma yi eꞌ yi wiꞌnin cyal sajleꞌn, quiꞌct cyetz cyalbilaꞌtz jaluꞌ.
6 Yi Kataj Ryos baꞌn lquim jun wunak taꞌn, nin baꞌn tzꞌitzꞌij taꞌn.
Baꞌn lkopon taꞌn ẍchixoꞌl almaꞌ, nin baꞌn lkajetzaj taꞌn ẍchixoꞌl.
7 Ko na taj Kataj Ryos baꞌn lkoꞌc taꞌn tetz ric,
nka baꞌn lkoꞌc taꞌn tetz meꞌbaꞌ.
Baꞌn lkacuꞌ trimp taꞌn, nin baꞌn lkoꞌ xicyeꞌn junt tir taꞌn.
8 Baꞌn tzꞌoc jun tal prow meꞌbaꞌ taꞌn tetz ric.
Nin baꞌn je tzaj jun aj rmosum taꞌn xoꞌl tzꞌis.
Nin baꞌn cꞌoleꞌ taꞌn ẍchixoꞌl yi eꞌ wiꞌtz ric.
Nin baꞌn ltakꞌ Kataj cawl tetz tan cawuneꞌn ẍchixoꞌl,
na yi Kataj Ryos iꞌ bnol tetz yi munt nin iꞌ yi taw tetz.
9 Na oc Kataj tan qꞌuicyꞌleꞌn chibeꞌ yi eꞌ yi choꞌn ajlij chicꞌuꞌl teꞌj.
Ma yi eꞌ yi junt len cyajtzaꞌkl, na chiquim cyeraꞌtz tul tzꞌoꞌtz wutzil,
na cyaꞌl jun na txꞌacon tan yi tetz ẍchamil cuntuꞌ.
10 Puchꞌij cunin ẍchibneꞌ yi eꞌ contr Kataj taꞌn.
Na tzꞌul eꞌchk kꞌancyok taꞌn tan chisotzajeꞌn cuꞌn.
Tzꞌocpon Kataj tan chicawseꞌn cyakil wunak yi ateꞌ beneꞌn tziꞌn wi munt.
Stkꞌeꞌ iꞌ ẍchamil yi wiꞌtz rey yi ja jeꞌ xtxaꞌol,
nin chin cham nin sbneꞌ iꞌ beneꞌn tziꞌn,” stzun Ana bantz.
11 Pakxeꞌn tzun Elcana tuml yi najal jalen Ramá kale atit chinajbil.
Ma yi tal tal Ana nintzun cyaj cyentz xe caꞌl Kataj te Elí yi wiꞌtz paleꞌ.
Yi chipaltil yi eꞌ cyꞌajl Elí
12 Te yi tiempaꞌtz, yi cob cyꞌajl Elí chin juntlen nin yi cyajtzaꞌkl. Qui na cyek muꞌẍ tal ẍchiꞌ Kataj. 13 Nin qui na chiban taneꞌn chimunl chi jun mero paleꞌ ẍchixoꞌl yi eꞌ wunak. Na ko na opon jun tan sukeꞌn jun toy tetz Kataj, bajx cunin na opon jun chichakum tan jeꞌseꞌn tzaj muꞌẍ chiꞌbaj te yi na pultij wi kꞌakꞌ. 14 Nin ja xcon jun chin tenedorb taꞌn tul ẍwokꞌ tan jeꞌseꞌn tzaj jun piẍ te yi chiꞌbajaꞌtz tan takꞌleꞌn scyetz yi eꞌ paleꞌaꞌtz. Nicyꞌ nin tunin na chibantz scyeꞌj cyakil yi eꞌ xonl Israel yi na chopontz tan oyiꞌn. 15 Poro nkꞌeꞌtz ntinaꞌtz, ma na nchaꞌtz te ntaxk oc pateꞌn yi ẍepuꞌil yi txꞌixwatz wi altar, bajx nin na opon yi chichakum yi eꞌ cyꞌajl Elí-aꞌtz te yi aj oyinl nin na tal tetz: “Akꞌtzaj muꞌẍ tetz paleꞌ te yi chiꞌbaj yi cyꞌaꞌn awaꞌn tan woqueꞌn tan boxleꞌn, na yi paleꞌ quil stzꞌam yi chiꞌbaj ko skꞌajsaꞌnt tzawakꞌ tetz, ma na chin tajweꞌn cunin yi txaꞌxeꞌt tzꞌopon swutz,”c stzun yi chakumaꞌtz na bantz. 16 Poro yi na cyal yi eꞌ aj oyinl yi bajx na patij yi ẍepuꞌ na yaꞌs tzun yi ley, kalenaꞌs tzun baꞌn tcyꞌajlen yi paleꞌ yi tetz piẍ yi bixbaꞌnt tan Ryos scyetz, ilenin na jeꞌ lajpuj wiꞌ yi chakum yi na tbit yi xtxolbil, nin tzun na taltz: “Quiꞌc rmeril, tajweꞌn tan awakꞌol jalcuꞌneꞌj yi ntaxk pat-xij, na ko quiꞌ, tzꞌelpon tzun inmajoltz tzatz,”d stzun na bantz.
17 Tan yi xtxolbilaꞌtz yi na chiban yi cob paleꞌaꞌtz, chin xoꞌwbil nin tzun yi quil jaltz swutz Kataj Ryos, na qui nin cyakꞌ kꞌej yi eꞌchk oy yi wiꞌnin xanil swutz Kataj Ryos, yi iꞌtz nin tetz.
18 Ej, ma yi Samuel ilenin na ban tetz munl le caꞌl Kataj, nin at cyen jun efode wutz cꞌuꞌl iꞌ yi lino cuꞌn yi na xcon cyakꞌun paleꞌ. 19 Nin cyakil nin yob na chopon yi xtxuꞌ Samuel tu chmil tan oyiꞌn le caꞌl Kataj. Ma tetz xtxuꞌ, ilenin ja opon jun tal neꞌẍ capa yi tal taꞌn yi iꞌ bnol tetz. 20 Nin tzun na takꞌ yi Elí chibanl Elcana tu Ana, nin je na tal Elí scyetz: “Takꞌ tzaj Kataj jun cꞌoloj initxajil tetz xel yi jun initxajil, yi ja wiꞌt itakꞌwok tan xconeꞌn tetz Kataj”, stzun Elí bantz scyetz.
Ej nin yi quibital yi jun yolaꞌtz nintzun eꞌ pakxij tan cyoponeꞌn le chinajbil. 21 Sajeꞌn tkꞌol Kataj yi banl tibaj Ana, na nin cyaj cyen junt tir chꞌon wiꞌ. Nin yi teleꞌn tiemp eꞌ jal oxt tal Ana yi xicy, nin cob xun. Ma tetz Samuel, wiꞌnin ẍchꞌuyeꞌn iꞌ swutz Kataj Ryos.
22 Ma Elí nsken tijin cꞌuꞌl, poro na tbit yi mbi cunin ajtzaꞌkl cachiꞌ na chiban yi cyꞌajl scyeꞌj yi eꞌ xonl Israel, nin na tbit yi na chiwitbej quib scyuchꞌ yi eꞌ xnaꞌn yi ateꞌ te chiturno tan akꞌun stziꞌ yi puertil yi mantial tetz Kataj. 23 Chaꞌstzun te tlol scyetz: “Cyakil cuꞌn yi eꞌ xonl Israel na cyal swetz yi chin juntlen nin itajtzaꞌkl. ¿Nxac yi yaꞌtz na ibanwok? 24 Chin junt lenin itajtzaꞌkl. Quiꞌc muꞌẍ banlil yi itajtzaꞌklaꞌtz yi na iban, na cyakil wunak na chitzan tan iyolcheꞌn. 25 Ej nin ko na jal paltil jun wunak teꞌj junt, baꞌn tzꞌoc Kataj tan chinucꞌleꞌn. ¿Poro naꞌ tzun jun tzꞌoc tan kanucꞌleꞌn ketz kol tzꞌel wex Kataj kaꞌn? Cyaꞌl jun.”
Poro qui nin ocpon yol Elí te chiwiꞌ yi eꞌ cyꞌajl. Nin tan paj yi stzeꞌtzsal cyalmaꞌ, bixeꞌ tan Kataj tan chisotzajeꞌn cuꞌn. 26 Ma yi Samuel, wiꞌnin ẍchꞌuyeꞌn iꞌ, nin chumbalaj nin iꞌ swutz Kataj. Nchaꞌtz yi eꞌ wunak wiꞌnin na chipekꞌ teꞌj, na chin jicyuch nin te tajtzaꞌkl.
27 Ej nin te yi tiempaꞌtz nin opon jun elsanl stziꞌ Ryos tan xajseꞌn Elí, i tzun taltz: “Je jun xtxolbileꞌj yi ja tal Kataj swetz tan walol teruꞌ: ‘Te yi ateꞌ tzaj yi eꞌ amam Egipto jakꞌ caꞌwl yi faraón, ja inchaj wib ẍchiwutz. 28 Nin ẍchixoꞌl cyakil yi eꞌ xonl Israel, ja jeꞌ intxaꞌol yi ara amam Aarón tu yi tetz xonl tan ixconeꞌn tetz paleꞌ tzinwutz. Nin ja ijeꞌ intxaꞌol axwok tan pateꞌn eꞌchk txꞌixwatz wi inaltar, nin tan itoqueꞌn tan pateꞌn insens tzinwutz, nin tan xconeꞌn yi efod itaꞌn.f Nchaꞌtz te cyakil oy yi na cyakꞌ yi eꞌ atanum swetz, ja wakꞌ irasión, quib yi bixeweꞌn waꞌn.g 29 Ma jaluꞌ ¿nxac na cẍtzan tan telseꞌn kꞌej cyakil yi eꞌchk txꞌixwatz tu oy yi ja wit chincawun teꞌj? ¿Mbi xac yi choꞌn na aj nin awiꞌ scyeꞌj yi eꞌ anitxaꞌ, nin quiꞌt na awek ẍchiꞌ in? Na ilenin ja awakꞌ amaꞌl scyetz tan sajeꞌn chicꞌatzaj tan yi eꞌchk cyoy yi eꞌ intanum,’ chij Kataj bantz swetz. 30 Chaꞌstzun te yi Kataj, yi kaRyosil yi oꞌ xonl Israel, yi talnak yi aẍatz tuml yi eꞌ anitxajil chixconk swetz, ja jeꞌ txꞌixpul iꞌ yi tajtzaꞌkl, nin jaluꞌ je na tal iꞌ: ‘Quiꞌt wakꞌ mas amaꞌl tzitetz te yi jun ajtzaꞌklaꞌtz, ma na ntin swakꞌeꞌ chikꞌej yi eꞌ yil cyakꞌ wetz inkꞌej tan chicꞌulutxumil. Na yi eꞌ yi quil cyakꞌ inkꞌej, tzꞌelpon chitxꞌixl waꞌn. Nin jun cuꞌn yaꞌstzun sbajok, na in Ryos nin na neꞌl cuꞌn te inyol. 31 Tzꞌul chan yi kꞌejlal yil noꞌc tan xiteꞌn cuꞌn akꞌej. Nchaꞌtz tzꞌelpon chikꞌej yi eꞌ amam waꞌn, nin yi eꞌ axonl yi xomt cheꞌ tzaj. Cyaꞌl jun nink biꞌẍin cuꞌn. 32 Tzawileꞌ cyakil yi eꞌchk takleꞌn balaj yi tzimbneꞌ ẍchixoꞌl yi eꞌ atanum. Poro yi aẍaꞌtz quiꞌc awetz tuchꞌ, nin cẍbisunk tan paj, nin cyaꞌl jun scyetz yi eꞌ axonl yi xomt tzaj stijink cuꞌn cꞌuꞌl na ẍchiquimok len. 33 Poro ilenin swakꞌeꞌ amaꞌl tan taꞌteꞌn jun scyeri axonlaꞌtz tan tilol nin yi inaltar joylaj, bantz jaleꞌn chꞌon tetz, nin bantz bisuneꞌn yil tzꞌel nin talmaꞌ te yi munl. Ma tircuꞌn yi eꞌ mas axonl chicopon biyij cyeraꞌtz. 34 Nin tan lajluchaxeꞌn tzawutz yi yaꞌstzun sbajok, ẍchiquimok yi cob acyꞌajl Ofni tu Finees, tcꞌuꞌl jun ntziꞌ kꞌej. 35 Ej tzꞌocpon cyen tzun jun chumbalaj paleꞌ-tz waꞌn, yi baꞌn lkꞌukeꞌ incꞌuꞌl teꞌj nin yi stzꞌelk cuꞌn te yi wetz wajbil, nin yi sbneꞌ taneꞌn eꞌchk incaꞌwl. Nin yi eꞌ tetz xonl quil chitzaj cyeraꞌtz, nin ilen nin stzꞌaꞌtok jakꞌ caꞌwl yi wiꞌtz rey yi jepon intxaꞌol. 36 Cyakil cunin tzun yi eꞌ axonl yi ẍchiclaxok cyen tkꞌab quimichil, chuꞌl len tzuntz swutz yi jun paleꞌaꞌtz, nin ẍchimejektz tan jakleꞌn jun tal piẍ sakal, nka jun tal piẍ pam tetz chiwaꞌ. Nin copon chiwutz tetz tan jakleꞌn alchok akꞌunil yi at ẍchixoꞌl yi eꞌ paleꞌ tan chitxꞌacol muꞌẍ chiwaꞌ,’ stzun Kataj Ryos,” chij yi elsanl tziꞌ bantz tetz Elí.