Yi jeꞌn xtxaꞌol Kataj Ryos Samuel
3
1 I tzun ban te yi jun tiempaꞌtz, chin juyeꞌt nin Samuel, nin wiꞌnin na oc il iꞌ tan banleꞌn taneꞌn eꞌchk munl swutz Kataj. Poro choꞌn at jakꞌ caꞌwl Elí yi wiꞌtz paleꞌ. Nin te yi tiempaꞌtz quiꞌc mas na jilon Kataj tetz jun elsanl stziꞌ iꞌ, nin quiꞌc mas eꞌchk wutzicyꞌ taneꞌn nẍchaj Ryos scyetz. 2 Poro at tzun jun tir bantz, te yi nsken wiꞌt biꞌẍin Elí, nin te yi nsken wiꞌt oc cyen tetz moyiꞌẍ, nin te yi na wit-tz le tetz witbil, yi jiloneꞌn tzaj Ryos tetz Samuel. 3 Choꞌn tzun na wit quen Samuel le mantial Kataj, kale atit yi caẍaꞌ kale at cuꞌn eꞌchk caꞌwl Kataj, nin te yi na tzaneꞌt kꞌaꞌkl yi cantil, nintzun jilon tzaj Kataj tetz:4 —Samuel.
—¡Choꞌn atin tzoneꞌj taꞌ! stzaꞌwel Samuel tetz.
5 Lajkeꞌl nin tzun beneꞌntz kale na witeꞌt Elí, i tzun taltz:
—Je ineꞌj taꞌ, ¿mbi na tajuꞌ swetz?
—Nkꞌeꞌtz in ncẍchakon, stzun Elí. —Quiloꞌk tan watl.
Nintzun pakxij Samuel tan watl.
6 Poro nintzun jilon tzaj junt tir Kataj tetz Samuel:
—¡Samuel!
Lajkeꞌl nin tzun beneꞌn junt tir Samuel kale na witeꞌt Elí, i tzun taltz:
—Je ineꞌj taꞌ ¿mbi na tajuꞌ swetz?
—Aẍ jun cꞌoloj Samuel cun witen, na qui na chintzan tan achakleꞌn, stzun Elí bantz tetz Samuel.
7 Na te yi jun tiempaꞌtz, ntaxk el xtxum iꞌ tetz Kataj Jehová, na yaꞌtz bajx tir yi tbit iꞌ yi jiloneꞌn tzaj Kataj tetz. 8 Jiloneꞌn tzaj tzun Kataj tetz Samuel le toxiꞌn tir. Cyenin tzun toponeꞌn iꞌ junt tir te Elí:
—Je ineꞌj taꞌ, ¿mbi na tajuꞌ swetz? chij iꞌ.
—Quiloꞌk tan watl, nin kol tzabit nin junt tir yi na chakon tzaj Kataj tzatz, baꞌn tzawalnin tetz: “Jilonk tzajuꞌ Taꞌ, na in ẍchakumuꞌ nin list wutaneꞌn tan tbiteꞌn yi yoluꞌ.”
Ej, nin tzun aj junt tir Samueltz tan watl. 10 Oponeꞌn nin tzun ban junt tir Kataj nakaꞌjil Samuel, nin tzun chakonin junt tir tetz:
—¡Samuel! ¡Samuel!
—Jilonk tzajuꞌ Taꞌ, na in ẍchakumuꞌ nin list wutaneꞌn tan tbiteꞌn yi yoluꞌ, stzun Samuel tetz Kataj.
11 —Ja bixeꞌ jun xtxolbil waꞌn yi sbajok Israel, nin alchok scyetz yil tbit yi mbi tzimbneꞌ stzꞌichꞌcaxk taꞌn, chij Kataj. 12 Na tul yi jun kꞌejlalaꞌtz, tzꞌelpon inkꞌab te cyakil yi ja wal tetz Elí, te yi mbi cuꞌn sbajok scyeꞌj yi eꞌ cyꞌajl. 13 Na walnak tetz yi ẍcheꞌ incawseꞌ, nin chelpon cuꞌn waꞌn swutz, tan yi quil yi na nin tbit iꞌ. Na ja el inkꞌej cyakꞌun yi eꞌ cyꞌajl, nin qui nin mmoꞌc Elí tan makleꞌn chiwutz. 14 Nin jun cuꞌn yol walnak yi quiꞌc cuj tan stzajeꞌn yi quilaꞌtz, mpe nink choyin, nka pe nink chipat chitxꞌixwatz tzinwutz. Quiꞌc cuj nink tzaj yi quilaꞌtz, stzun Kataj bantz tetz Samuel.
15 Yi tbital Samuel tircuꞌn yi xtxolbilaꞌtz, nintzun wit-tz, ma yi tuleꞌn skil, nin bentz tan jakleꞌn yi puertil yi caꞌl Kataj. Poro nin xob tan talcheꞌn tetz Elí yi mbi cuꞌn tal Kataj tetz chi tul wutzicyꞌ taneꞌn. 16 Poro nintzun ẍchak Elí, nintzun taltz:
—¡Aẍ jun cꞌoloj witzꞌun!
—¿Mbi na tajuꞌ taꞌ? stzun iꞌ.
17 —¿Mbiꞌtz tal Kataj tzatz maꞌs lakꞌbal? Qui kloꞌ na waj yil tzawew cuꞌn jun takleꞌn tzinwutz. ¡Ej nin ko quil tzatxol swetz yi mbi cuꞌn tal Kataj tzatz, nink tzꞌoc iꞌ tan acawseꞌn!
18 Nin tzun oc Samuel tan xtxoleꞌn tircuꞌn tetz Elí, ej nin quiꞌc nin jun yol cuꞌ tewal swutz iꞌ. Yi tbital Elí nintzun tal:
—¡Yi Kataj Ryos iꞌ yi wiꞌtz ajcaw! ¡Nin baꞌn lban iꞌ yi tetz tajbil, na iꞌ Ryos! stzun Elí bantz.
19 Chꞌuyeꞌn nin tzun ban Samueltz, nin xomij Kataj tan ẍchꞌeyeꞌn. Nchaꞌtz el cuꞌn kꞌab Kataj te tircuꞌn yi sukiꞌnt taꞌn. 20 Ej nin cyakil yi eꞌ xonl Israel yi najlcheꞌ cwent yi amaꞌl Dan jalen te yi tnum Beerseba yi at cweꞌn tziꞌn,a ja lajluchax len ẍchiwutz yi jun cuꞌn yi Samuel iꞌ jun mero elsanl stziꞌ Ryos. 21 Wiꞌnin tzun tir ẍchaj tib Kataj Ryos swutz Samuel le amaꞌl Siló. Na ntinaꞌtz yi jun amaꞌlaꞌtz kale na talwit iꞌ yi tetz tajbil tetz Samuel.